台灣遊記 2011 之台北篇

我們回來了!!! 這是一個十分難忘的旅程!

雖說這次台灣之旅是用來取締北海道花田之旅, 但花蓮宜蘭的美景, 絕對無令我們失望,
反之「如果冇去就一定终生後悔」就真!

所有的行程同景點都超滿意, 很開心用我很爛的普通話同所有酒店民宿導遊都溝通到, (證明原來也不算太爛)
去過咁多次旅行, 雖然次次都有點唔捨得, 但從未試過難捨難離的感覺那麼強烈!
好, 趁我還有記憶的時候, 快快寫了!
寫得詳細一點, 如果看完有心動的朋友, 大可以跟我的行程同小貼士去玩啊!

出發了!

今次搭港龍 KA486 8:15am 的航班去台北, 本來預定了 5:45am 出發搭機場巴士,
點知落雨, 我講過如果落雨就搭的士, 波比先生即刻趁機要搭的士, 好吧~

Call 的士後等待中, 再看看證件, 才忽然間發現尋晚懶安全把波比的 passport and ID card 都影印,
點知印完唔記得拎返出嚟!!!!!!!!!!!!!!!!!!!!
好彩落雨, 好彩要搭的士, 如果唔係, 真係唔會忽然間再睇睇 (因為已覺得明明執好晒了!),
去到機場先發現的造, 波比應該要留在香港了 (哈! 我會忍住淚說一聲 Goodbye 囉!)

新買的行李喼, 好易認~



10am  到台北, 可能我們班機太早了, 哈, 成個海關都冇人, 直出!
入境後先去唱錢, 做咗資料搜集, 知道而家人人都係去到先用 ATM 提款, 匯率會好過銀行唱,
要用一張有 "Plus" 或者 "銀聯" 的卡, 再搵返有 "Plus" 或者 "銀聯"的提款機就可以提款,
每次提款要收 NT200 的手續費, 所以提多D 會抵D,
每次最多提 NT20000, 返來 check 返, 我當日的 rate 也有 3.63, 算是不錯了!

之後係去"台灣大哥大" 的櫃台出電話卡, 如果 11am 前, 入境大堂(地下)的櫃台未開,
要走上一兩層到出境大堂的櫃台, 過程中要睇你的 passport, (台灣人出電話卡好嚴謹. 因為驚用張卡去犯罪)
我買了 NT345 的預付卡, 優惠期間送多 NT60, 即張卡有 NT405,
用了呢 NT405 內的 NT350 開通了五日無限上網計劃, 還有NT55 可用來打電話!
用 iPhone 4 的朋友, 記住要自己帶支針去開 sim card 位啊, 服務員唔會幫你開的~

之後是去買國光客運的來回機場 <--> 台北車站的車票, 記住買來回票啊, 抵D!

一小時多已經到了台北車站, 陽光普照! 拉著行李箱, 走到新驛旅店前站店,
對這間旅店很滿意, 服務員親切有禮, 房間乾淨企理, 基本的設備都十分齊全, 只是留意房間沒有雪櫃~
最重要是地點太方便, 搭捷運/火車/機場巴士都行少少路就到, 適合我們會到其他地區的旅客呀!
佢哋好鬼認真, 出發前一天竟然打長途電話同我 confirm 係咪會入住,
不過很 strict 的未到 3pm 係唔可以 early check-in, 我們放低行李, 先出去走走~

之前有一篇都講過秒殺台鐵車票, 網路訂位之後, 最遲可以喺開車前 30分鐘去取票,
不過我們搭 7:20am 的車, 還是早一天取票較安全~
取票的地方, 原來就係我哋落機場巴士的地方, 早知唔洗兜來兜去啦............

取票後, 我哋行咗台北車站上的微風廣場, 和兩年前差不多, 不過想買日式果子的「口福堂」竟然執咗.....
之後去行台北車站後後的 Q Square, 係一個好新好靚的商場, 走型格路線賣潮流產品,
地庫的甜點部簡直令人大開眼界, 好多好精緻的蛋糕朱古力都賣得不貴,
不過來台灣我們覺得肚子是要留給地道食物的, 所以先忍口沒有買~

最後, 買了一杯什菜汁, 很真材實料好好喝!



行到差不多一點, 肚子終於餓了, 開始發揮我們的食力!
以下暴食相片可能會引起閣下不安, 敬請留意!

第一站, 是良品牛肉麵, 牛肉麵湯真的很很很讚!
還有那餃子, 是香港難吃到的鮮味~ (以五星為滿分的話, 這裡的評: ****)



行到街口, 就是世祖胡椒餅, 好大個....... 食完牛肉麵的我們, 太飽之下, 都夾硬要食晒,
因為皮好香脆, 又來充滿肉汁的, 還會爆汁!! 很不錯! 波比的手被胡椒餅的肉汁盪了一把!
(評: ****)



去到西門町, 忽然間落起雷雨, 係行十步都足以半身濕透的大雨.....
於是躲於屈人寺避雨, 又買了好清甜的蜂蜜苦瓜汁飲~ (評: *****)



行了萬年商場同誠品書店, 買咗烘焙書同素材書籍, 超開心呀!
之後, 想搵個地方坐低抖抖, 就被蜂大咖啡的香氣吸咗入去~



令人精神抖擻的咖啡~ (評: ****)



再直行, 走到百貨公司, 為的是去惠康買些地道食品飲料 (當地的惠康叫「頂好」)



還有在藥妝店的收穫, 同埋去咗一間叫「世運」的麵包店, 那裡的芝士蛋糕超好食, 是日式製法的又鬆又濃芝士味, 最後一日去買咗兩件返香港啊!



抖咗一陣, 又出發去士林夜市, 嚟過無數次, 不多介紹的阿宗, 不過味道點解好似淡咗D? ((評: ***)



第一次食的烤蔥肉捲, 那醬汁太惹味 (評: ****)



少不得的豪大大雞排同埋大腸包小腸啊,
大腸包小腸今次要了沒有花生, 反而是麻辣口味, 又另一種全新的感覺, 停唔到口! (評: *****)



第一天是不停的吃, 好好睡一覺, 明天去花蓮了!