10km 之行

仲有兩個星期, 波比先生就要跑那個十公里的比賽了, 要加緊練習喇!

今日, 我就揸住新單車, 陪佢跑了 10km!
由屋企出發了!



新單車非常的性能好, 踩上來一點都唔吃力,
好舒服地可以踩到 12km/hr,
我都唔敢去得太快, 太耐冇踩咁長途, 今日有幾次都有D 危險情況!

我的任務就是幫波比先生計計佢的速度, 原來佢跑起嚟都有 13km/hr,
如果 keep 到, 都真係有望 45min 跑完 10km 喎~



踩到好熱呀~~
仲有 pat pat 好痛囉.....
因為有好多路都好唔平, 仲要過好多次馬路/ 輕鐵路軌, dan 到個 pat pat 好痛.....
上網睇返, 原來D 專業的單車褲係會有厚厚的 Pad 在 pat pat 位o架, 睇嚟我都要買返條.....



我哋去到鍾屋村就折返, 即是 8 個輕鐵站的路程! 來回就 16 個站了, 勁呀!
10 km, 計埋等過馬路, 用了 51 分鐘的時間, 算是唔錯啊!



下次我話不如去到藍地, 然後去季季紅飲茶, 都唔錯喎, 嘻嘻!

新寵 - DAHON DOVE

特登買了對跑步鞋, 暫時都只係跑過一次, 係喇, 我會跑多D~

不過星期六日, 波比先生會由元朗跑到天水圍/洪水橋/兆康 (!?!), 我點跟到?

上年九月我咪買咗部單車, 仲喺樓下租咗個單車位, 點知唔租好過租,
架單車擺咗落去之後, 又封塵又生锈!!! 仲又漏氣又甩埋粒輪胎的螺絲....... 真係好無奈......
所以而家想踩都踩唔到喇.....

的起心肝, 上網睇睇諗住買o架貴D 襟D 嘅, 睇中了 DAHON 的兩款,
一架一千, 一架差唔多二千,
問問有咩分別, 店員話平那架會生锈, 貴嗰架就唔會, 因為係鋁合金車架,
一聽到「生锈」兩個字, 即刻驚咗...... 所以都係買了貴呢架
其實白色係好好好靚的, 但我又好驚污糟, 所以都係買咗黑色喇~





第一次擁有可轉波的單車, 踩返屋企的一段車, 試了唔同的「波」, 感覺很有趣,
4 波算是好啱我用, 踩得好快好爽, 同我樓下生咗锈嗰部, 絕對是兩回事!
好希望快D 同波比先生去走返轉, 等佢追我唔到, 呵呵呵!!! XD





還買了兩樣配件, 這個是 DAHON 的單車籃子, 好靚又好大容量~
店員仲示範:「o拿, 妳去買餸可以一抽咁成個拎走, 幾方便!」
「嘩, 又真係好方便喎」, 咁就買咗



咁啱尋晚 search 資料時, 見到原來單車都有咪錶的, 好勁啊!
頭先踩返嚟, 可以計到 Maximum speed (左上), 共用時間 (右上),
距離 (左下), 同埋消耗卡路里 (右下),
主要的功用, 係同波比先生去得遠時, 可以計吓 speed/ distance/ calories 等自己有D 滿足感, 哈哈!


快快到聽日, 我們要去次遠的!

人生下一步

其實, 我很滿足現在的生活狀況~
有一份穩定的工作, 錢一定不是太多 (相比起如果我跳返入 NGO/EDB 行列),
對這個年資來講可能還算少 (以前還有點耿耿於懷),
不過錢係搵唔晒的, 要 120分辛苦去賺 $100的話, 我還是想用 100 分辛苦去賺 $70,
少了的錢, 就當是抵消攪呢攪路講 talk 開 workshop 做大 project 的壓力, 只要做好我的 clinical work 就可以了~
留多點時間來享受生活, 準時的放工買餸煮飯, 從不需要帶工作返屋企,
五天工作, 25日大假, 話飛就飛~

有朋友很認真地邀請我去私人執業, 其實我都好鍾意朋友的診所,
但是長遠的穩定性還是令我不太敢去博,
雖然我們這個行頭, 由我畢業的年代已經成日話開始飽和,
但年年的畢業生都係唔憂做, 有工冇人做, 人人都投入私營市場,
明明是 NGO 都請唔到人, 要問返 Private clinic 買 service, 真有點諷刺~~
政府的服務, 一排就要一至三年多, 私營市場真係仍有大大的發展空間

考慮私人執業大概有三個問題: 錢是多了, 但始終唔可以確保逐年有遞增,
同埋手停口停, 放病假/ 去旅行/ 紅日都係沒收入的~
成日要擔心住收入的穩定性, 長遠驚自己好大壓力~

時間是 flexible 了, 朋友就用這個 point 引我, 話我可以生仔又唔洗請菲傭, 係咪好一舉兩得呢? (奸!)
哈, 講到尾睇吓我會唔會有一刻真係好想好想有個小朋友啦, 不過想都唔係話生就生到囉!
早兩日見咗個得一歲有兩隻牙仔的 BB, 真係好鬼得意~~
又見咗個 90 歲的阿伯, 仔仔女女都錫到佢燶, 做一家大公司 CEO 的大仔都請假嚟陪佢見我,
CEO 又氹又錫去叫阿伯合作 D 做治療, 雖然阿伯呢一刻已經 Demented 到不知世事,
但仔女的孝心真的令我感動, 所以有時諗如果到我 80歲又 Demented 到咁, 無兒無女真係唔知點算....

現時的工作, 加上讀書的東西學以致用, 其實十分有滿足感,
如果去私人執業, 這幾年醫院生涯的東西就會白白浪費了~ 覺得很可惜~

所以, 暫時我都只可答覆朋友:「考慮一下」
人生的下一步, 常常有很多未知之數,
是為了一個小 baby 去改變我下半生的路, 還是繼續在醫院拼博, 看看一年半載後心境又有沒有改變~

歎爆新梳化

早幾星期訂的梳化今晚送貨了!!
同波比的大學同學講開, 原來佢哋的新居都買了同款的梳化啊, 大家都覺得係正嘢!
左邊的座位可以電動降低靠背同升起腳踏, 攤喺度真係好舒服好爽呀~~~~
坐坐吓, 真係舒服到會瞓著的, hehe~



為了等送貨, 沒太多時間煮飯, 去對面買了日本食物,
嘩, 不過點解今次板海膽少咗咁多o既...... 好唔開心囉~~

自家製 - 脆皮咸豬手

好開心啊, 尋日在凍肉店見到有豬手賣, 就買咗今日整,
焗了半個鐘, 諗住 ok 啦, 點知D 皮食落一D 都未脆嘅.....



於是拎去煎一煎, 嘩, D 脆皮豬手效果即刻出晒嚟,
係喇, 就係要呢種質地呢種味道喇, 估唔到屋企都整到, 又唔貴, 真係好開心啊~~~
雖然明知又肥又咸, 但都唔理喇, D 皮唔食到聽日就唔好食o架喇~~

你最鍾意玩咩?

有一個可愛的四歲妹妹, 我問佢:「妳最鍾意玩咩呀?」
「我最鍾意玩 facebook」
O 咗咀..... 「吓, face~~~ book~~~?! 妳識玩o架?!」
「識o架, 有得種花同養動物o架」(Pet society 乎?)

haha, 我之前都聽過朋友話佢個 facebook 係主要用嚟俾阿仔玩 Happy Farm,
但我真係冇諗到四歲的小朋友都識玩囉~

聽到有個三歲幾的小朋友在 Waiting area 笑到咔咔聲,
我離遠嗌佢, 問佢玩咩咁開心,
佢答我:「玩 iPad」, 真係啞晒.............

呢排真係忙到嘔...... 一轉凍又可能好多老人家入院,
寫排板愈寫愈快, 愈寫愈撩......

在醫院工作的人都好有災難性思維,
流鼻血會好驚自己鼻咽癌, 頭痛就驚腦癌,
今日我條脷忽然間好痛, 第一樣諗到的就係舌頭癌..... (尋日先睇完個切咗成條脷的舌頭癌病人...)
睇清楚無啦啦損了! 快快搵D 藥嚟食先得!

今晚煮了黑椒牛肉炒蜜糖豆



仲有呢個好好味的茄子, 超易整, 只係蒸熟了茄子,
面頭淋個有: 日本麻醬 + 花生醬 + 麻油 + 蒜蓉 的醬汁, 非常之甘香o架~

尋回兒時味道

我喜歡吃家常便飯, 多於珍饈百味,

今日去完第二間醫院開會, 比平時早放, 可以有時間整D 複雜的菜色!
特地去買了一個刨, 用來刨薯絲, 刨都手都攰....
又撈又煎, 製成了呢個煙肉煎薯餅,
真係好好好開心, 雖然唔係咩特別名貴的菜色, 但呢度菜細細個已經好鍾意食, 又好多年冇食過!
而家大個女, 自己第一次整, 太愛那味道了~
我會選它造我「本年度最成功的菜色」啊!



另一好味推介係豬軟骨, 哈哈, 不過唔係我煮o架, 要炆好耐太麻煩了,
我係喺屋企對面的日本食品店買的, 再自己加 D 金菇去索吓汁撈吓飯,
超愛豬軟骨的我會俾 80 分佢!
要數 100分的, 我會揀旺角那間香港仔魚蛋粉的, 真係炆到勁林又勁入味o架~~



天氣轉涼喇~~~ 諗緊幾時打邊爐同埋爐端燒, he he he~ :P

結唔結?

朋友很煩惱, 已經乜都 book 好晒之下, 究竟應唔應該結婚?
那個未來老公我實在太有保留......
大男人之餘又小女人脾氣, 凡事斤斤計較, 做事唔諗人感受, 再難聽的說話都可以對未來太太講得出
嫁給這樣的一個男人, 朋友有幸福嗎?
物質上的幸福一定有, 但心靈上的幸福實在遙不可及

那個男的竟然因為自己又發老皮, 竟然鬧到婚都想唔結住,
現在就因為乜都已經 book 晒, 人都已經通知得七七八八, 可以剎掣唔結嗎?
唔結的話, 佢又想點呢?!
咁委屈佢的結了婚, 我朋友有好日子過嗎?
唉....................................................................................

「寧教人打仔, 莫教人分妻」, 還是「趁早斬欖」好呢?

*******************************************************************

吃完一頓漫長的晚飯, 不忘去萬家燒餅王, 買了個胡椒餅俾波比先生踢完波食,
一咬開, 超多餡呀!! 不過就完全唔係預期中的台式質感囉, 但都好好味~

增加 Quota

波比先生參加了一個下個月舉行的跑步比賽, 而家要好努力練習,
我的腳傷都算好返了, 今日就著住新跑鞋, 陪佢跑去元朗大球場,
又曬又熱, 波比先生再叫我日頭去跑的話, 一定要佢贊助我買防曬囉!
睇吓D 相, 波比先生對腳就嚟幼過我對腳喇, 幾恐怖!
仲有睇吓佢著咗 training 緊身衫的相, 條腰真係lup 入去的, 過份!!!



咁神心做運動, 都係因為近來真係肥了, 好慘.....
每朝 7am 食包, 但返到醫院又肚餓, 9am 又要食多個包仔,
1pm lunch 食足一盒飯, 8pm dinner 晚晚都好好餸,
最衰係而家晚晚都又食生果又食甜品........ 長期都有D 零食/ 自製甜品喺屋企, 忍唔住口....
叫我食少D 又唔得, 所以唯有做運動去增加 quota 啦~

今日整了朱古力咖啡蛋糕呀!! 因為今日又沖咗杯咖啡王飲,
諗到不如唔好嘥, 用D 沖完的咖啡豆粒去整蛋糕, 其實係得o架 (因為唔知喺邊食過有原粒咖啡豆在內的咖啡蛋糕)
焗到半熟, 入面有流心效果, 正呀!
有埋咖啡香味, 真係唔錯~~



不過尋日都有失敗之作, 上次整桂花拉糕衰咗, 今次又試吓整桂花椰汁糕,
點知都係衰咗, d 粉的份量可能唔啱, 攪到都成唔到型.....
又可能落得太多桂花, 攪到質地有變, 唉.....
真係唔敢再整呢d 中式糕! 出去買舊食冇咁嬲~

另一燒 QUOTA 之作, 鹽酥雞腿肉燥炒麵, 好正呀~~~



晚上的一餐去了囍慶, 好唔掂, 只有最後的蕃薯糖水令我覺得我有食過嘢囉!
有時出街食到咁嬲, 真係愈來愈唔鍾意出街食~

難得一聚之 1023 婚宴

打唔成風, 今日仲好鬼好天, 鄧今日要結婚的朋友好高興!!
今日是好日, 好多人結婚, 好多人都要去飲~

很感恩, 很順利地由上 Master 的地方去到遠遠的飲宴地方,
見返一班紅十字會的老友記, 好掛住你哋啊~~
呢班大忙人小朋友 (他們大部分都比我年青, 在眼中永遠也覺得他們是小朋友), 永遠很難約得齊人,
如果唔係其中一個結婚, 我諗我哋好難約到咁齊人 gathering~
大家, 也沒有怎樣變啊~ :P

新郎哥還是很 Baby Face, 他的樣貌同中一時代完全一樣, 大家也很想知道他的不老之迷!
看著一個還似中學生的小朋友穿上結婚的禮服, 太有趣, 總覺得「佢咁細個就結婚喇?!」
但其實我當年比佢仲細個就結婚, 哈哈, 太難想像返自己當時的模樣~

好鄧新郎哥開心, 因為他實在很住家男人好老公 feel~
祝佢哋幸福甜蜜, 一生一世~



今次的婚宴很環保, 沒有魚翅, 改了燕窩, 仲好啦!
我都叫波比先生唔好特登去食鯊魚啦



還有鮑魚, yummy!!

話了不再見

見返一個舊病人, discharge 佢時已經同佢講:「我哋唔好再見喇」, 點知又再見, 不是好事.......
以為這家人有個美滿的結局, 結果還是逃不過殘酷的命運.........
這些故事雖然都常常見, 但遇上是一個相處了很久的病人, 感覺仍很震撼很難過
或者再遇多 D, 先可以慢慢釋懷....

******************************************************

竟然打唔成風, 真係有點 O 咀, 之前仲講到鬼死咁嚴重咁....
不過都好, 我聽晚仲要去飲呢, 都希望朋友結婚開開心心, 順順利利

夜晚出了旺角, 去明苑食煲仔飯,
雖然未到冬天, 但有點秋涼之下, 熱騰騰的煲仔飯真係令人好開心~

惠州西湖

食咗三餐粥, 今晚終於都好返D 喇~

*******************************************************************

最後一篇遊記, 最後一個景點是惠州西湖,
去之前波比先生都講定呢度只係一個乜都冇的湖, 唔好有咩 expectation,
去到行一圈, 都算 ok 啦~



喜洋洋棉花糖呀!

















食咗唔好食的雪糕, 買咗好食的手信, 之後返歸了~

此行十分開心, 除咗大學時代同同學仔去過台灣之外, 都未試過一班熟的朋友一齊外遊,
太多爆笑位, 太多好玩的遊戲~
期待下年春天, 我哋再一齊大伙兒為食到廣州/澳門~

棕櫚島之三: 惠州農家菜

由司機引路, 帶了我們去吃一間農家菜,
很簡陋的地方, 但食物很不錯

農家菜大概是指新鮮的自己種自己養, 即摘即煮,
見到呢條鴨咀魚, 好可愛,
店員問我哋點唔點鴨咀魚同騾仔的菜式, 我們都覺得太殘忍了........當然冇點~



豆苗也很自家種, 新鮮!



湯是放在這個大窰中煮的, 很地道啊!!



菜來了! 這裡的扣肉很特別, 每一舊都有條水草扎住,
不過點解要扎住? 都唔係好知.....



五所謂雞有雞味, 豆腐有好香豆味,
呢D 看似應份, 但香港太多垃圾食肆用D 唔新鮮的、雪都未溶晒的食物煮俾你食,
簡單而新鮮的食材, 其實也是難得!

冇病人餐的醫院....

本來諗住已經好返 D, 點知因為冇帶飯而要喺 canteen 食飯,
Canteen 乜差都賣晒, 唔想食D 好油嘅餸, 就唯有叫咗個河粉,
點知...... 食完就肚痛, 仲痛過尋日......
下午仲要係上病房睇 in-patient, 仲要走勻三個 block, 真係想史 *0*

為咗聽日唔洗再食 canteen, 肚痛住、拖住史史吓的腳步都要去買餸煲粥,
回家都係得返半條人命.......

恐怕呢個風都打得成, 去超級市場入定貨, 屋企的食糧應該食三四日都得!

實習課

見我唔寫 blog, 最大機會 (1) 我去咗旅行上唔到網 (2) 我病到史史吓上唔到網......
尋晚我就係 (2)

去旅行前已有小病, 星期五晚更一度離奇地差D 失聲,
回港後都冇咩, 星期一一起身就肚痛肚痾, 仲有全日都好想嘔 #0#
好辛苦先捱咗一日的工作, 夜晚返到屋企, 發燒........................

到咗今日都仲燒, 返去睇咗 9am 個症就 sick leave, 醫院的 staff clinic 又 full booking,
我就出去睇咗個好貴的兒科聖手醫生,
咁佢都貴得有道理的, 因為佢開的都係靚藥,
如果我睇 staff clinic, 次次都係開同一種勁 hea 的藥囉.......
最攪笑係醫生仲開咗隻 yeast 俾我食, 呢隻 yeast 大有來頭啊, 佢唔係藥, 但又可以醫病的~



食完藥, 好返好多了!

下午要上 Master Course 的實習課, 今堂係去用超聲波照腦血管,
嘩, 做咩我有條血管的 blood flow velocity 咁強勁嘅..... (通常係血管收窄就中風的人就會偏高!)
好好玩, 好有得著的一課~

棕櫚島之繼續食繼續 hea

上回講到食完海鮮, 跟住的下午, 就係齋 hea - 又去按摩,
我同波比先生都係按按頭頸肩腳, 好舒服, 舒服到瞓著了 zzzzzzzzzzzzzzz (尋晚打牌太夜瞓喇)
朋友們就去埋推油, 但不適合超級怕唧的波比太太啦~~
還有朋友採耳, 據聞阿姐好似做手術咁好認真地採呀採......... 最後採了好多礦物出來, 還要 show 俾朋友睇 (爆笑)

食完就按, 按完又食!!!
轉個彎就係一間司機推介的湘菜館, 古色古香的裝修, 好有趣!!



朋友們都要啤一啤



哈哈, 每一碟遠睇都好似差唔多, 其實有雞、豬大腸、牛肉、排骨,
唔算太辣, 但好惹味!



重點推介- 水煮魚, 喺香港食唔到咁好味!



拔絲香蕉, 超超超水準, 食到唔停得口,
熱辣辣又軟綿綿的香蕉餡, 太回味!



炸饅頭, 又係超正!!



食完返到棕櫚島, 已經差唔多九點了,
男子組去了打桌球, 女子組去了打兵兵波, 玩到人哋收工先走~
返到 apartment , 又來打牌, 打到 3:30am.......

3 x 2 + 1 @ 棕櫚島之旅

好開心好開心, 玩完三日兩夜返來喇!!!

3 對 couple + 肥仔一同去了棕櫚島渡過了一個超 hea 超豪食的週末,
好多謝肥仔做攪手安排好行程同七人車, (好難得去旅行我又唔洗諗嘢擔心嘢)
又好多謝五位朋友要入紙抽這間 apartment, 終於幸運地抽到了 $800 就可以住棕櫚島三日兩夜, 好抵呀!
仲有多謝朋友們遷就我今個星期去, 因為得今個星期我先唔洗返學咋~

星期五返咗半日工, 下午就出發去上水會合朋友

我們過了關到皇岡, 先去咗按摩, 一按就差不多兩小時,
之前試過兩次在深圳按摩, 感覺都是麻麻, 因為按完攪到我周身都痛, 仲要痛幾日.....
今次的按摩雖然是臨時加插求其試一間, 估唔到又幾 ok 喎,
按摩完係鬆了, 又唔痛, 好舒服啊!

等齊朋友, 我哋 6pm 上了包車, 因為塞車塞咗一段時間, 我們約 8pm 先去到惠陽,
去了一家酒家食晚飯, RMB200 叫了好多個餸,
唔係常常食到的黃金蝦, 片皮鴨, 炸鮮奶都有, 味道都算唔錯呀!
不過大陸煮嘢就好油囉, 同埋D 食具真係幾污糟吓, 要自己洗乾淨先得!



去到棕櫚島 check-in 埋, 都差不多 10pm 了,
我哋就用 iPhone 同 iPad 一齊玩 pictionary , 超好玩, 超爆笑!
之後就係不可或缺的打牌環節, 朋友們激到自己喺香港抬咗副越南麻雀上去.....
打到成 2pm 先瞓................

第二朝, 人人都仲瞓緊, 我又慣常地未到 7am 就醒咗.....
真係好痛苦, 明明好眼瞓又瞓唔到......
起身自己影吓相

呢兩隻麥兜 7 月先返我哋返屋企, 但已經跟我哋去過了布吉、上海、九州, 而家仲有棕櫚島添!



講吓棕櫚島: 我哋住的 Apartment 好大, 呢度係廳, 仲有兩客房一套房, 又有廚房可自己煮食~
尋晚大戰完的戰地實況



今晚到達時黑媽媽都睇唔到呢度環境, 日頭終於見到個 view,
嘩, 好渡假 feel



我們的房就望住 golf 場, 晨咁早八點幾已經有人打緊 golf



肥仔都起身了, 我們趁另一 couple未起身就先周圍影吓相消磨時間





這邊的會所很泰國 feel 呀~~







荷花池剛好有開得燦爛的荷花, 此行帶了 DSLR, 影荷花又夠陽光, 照片好滿意!






中午又有七人車來接我哋, 目的地係去大亞灣食海鮮,
如果唔係肥仔帶路, 我諗我哋都冇機會會自己咁樣嚟食嘢, 因為根本冇旅遊書介紹惠州這個地方.....

好似去西貢咁, 可以自己去海鮮檔買食材, 再拎去酒家加工~



全部海鮮都係香港三分一的價錢, 仲要好新鮮, 樣樣都超好食, 香港真係食唔到呀!!!
個蟶子滑到好似豆腐咁, 好味到畢生難忘
咁大兜八爪魚, 只係 RMB29 囉!!!



海蝦只是白灼, 更食到佢的鮮甜味!



完全冇諗過此行竟然食到大閘蟹, 大概 RMB7 一隻, 平到笑
質素好 OK! D 膏好食過我喺香港買過 $100/3隻的囉~



惠州地區很出名梅菜, 這個梅菜扣肉都很讚!



仲有蒜蓉蒸帶子, 不過蒸得老咗少少



每人兩隻鮑魚, 鮮味彈牙!!