2012年2月29日星期三

超超超超軟液種麵包

woo~ 又跟住食譜書試整新麵包,
之前整包用過湯種, 麵包會較鬆軟,
今次睇書學了整「冷藏液種」, 是大概 1:1 的麵粉同水混合, 加入少少酵母,
室溫發一小時後, 放入雪櫃再發 16 小時,
計比例, 佢的水成分比湯種多, 又方便, 唔洗開火煮~ 食譜仲講到麵包會超鬆軟, 一定要試試啦~

早一晚發了液種, 今日把所有材料放到 Delonghi 攪攪攪~
之後人手再處理, 用吐司模整了芝士吐司, 見佢發得非常之好, 就知應該好掂!
試味, 嘩~~ 不得了, 真係超超超鬆軟, 冇呃你! 好好好味呀!!!
真係好難想像, 冇落過化學膨脹劑的麵包, 我的懶人方法, 也可以做到這麼好的效果, 這個液種真係好勁呀!!!

022902

還有分小份整了六個包仔, 用了榛子朱古力醬, 做茶點啱啱好~ yummy~

022901

2012年2月28日星期二

皮蛋尖椒滑豆腐

今日係搬 office 後, 第一日可以準時走,
似乎每個月, 都要到了月尾先會可以有好日子過~

上次在譚仔食過好美味的皮蛋尖椒豆腐後, 念念不忘,
今日有點時間, 可以試吓自己整!

找了台灣的食譜, 屋企那支從台灣買回來的油膏大派用場了!
用上了辣醬、蒜蓉、蔥粒、尖椒粒、麻油、少許糖、油膏, 混合即成~
嘩, 真係好惹味好正呀! 大家都不妨試吓! 個汁就咁食都一流呀~

022801

還有葡國雞, 而家煮餸唔再係用李錦記的溝好的醬料, 是自己煮的汁, 味道真係好D o架!

022802

2012年2月27日星期一

南翔饅頭店

前日先食完上海菜, 今晚又食喇!

2007 年去上海, 吃過二樓的南翔饅頭店, 那巨大的小籠包, 用飲管吸湯汁的, 令人難忘~
香港也開了南翔饅頭店, 好想試試~

之前團購了一個二人餐, 足足五個多月, 呢幾日見就到期先的起心肝打去訂位~
估唔到團購的質素都算唔錯, 全是正常的份量,
雞絲粉皮、上海粗炒、小籠包都唔錯, 不過前日豫園的小籠包實在太太太正了!
相比起來, 這裡太普通了~
最要大讚的是高力豆沙, 蛋香、多豆沙、新鮮即炸, 是上佳的水準呀!

022701

2012年2月26日星期日

懶人做出好麵包

自從上星期部焗爐開幕了, 這星期不斷的測試點樣先整到理想的麵包

比起上一部焗爐, 我覺得呢一部 EOB2017 熱得冇咁快, 但因為有對流風, 所以熱力是均勻的
貴嘢果然係唔同D, 前兩日整香蕉包, D 香蕉溶了流咗落個焗爐底, 諗住好難清潔啦,
點知竟然清水一抹就甩, 貴價貨的防黏實在做得好!

用過部機的全自動 mode (即係掉晒D 料落去, 會自動攪、發、焗) 及半自動mode (自動攪、發, 我可以後加一點材料如香蕉合桃),
發覺如果係一大舊咁焗, 好多時中間都焗唔熟, 麵包亦發得唔夠鬆軟

在深圳買了的 "經典麵包製作大全", 是一本超詳細的教學書, (我還有同系列的另外兩本, 都是超好看!)
是一個日本廚師寫的, 不過譯了做簡體中文, 反而我喺香港未見過,
入面很詳細的講解做麵包的每一個步驟, 及其原因, 亦有好多竅門, 教你點整先會成功好吃!

今日跟了入面的牛油卷食譜, 用了焗爐的"搓粉" mode, (我最想都係唔洗自己搓到手都跛o者),
之後好似以前全人手整咁發酵, 分割, 滾圓, 鬆弛, 包餡, 再發酵, 先去焗,
工夫是多了很多, 不過我覺得, 分返開一個個麵包咁整, 每一個麵包有多D 位去膨脹, 應該會鬆軟D

果然, 每一個都脹得好好呀!
這裡有榛子包、芝士粟米包

022601

還有合桃包、玉桂提子包、蕃薯包
這個食譜很不錯, 麵包十分鬆軟又香牛油味, 是很好的早餐啊~
最緊要係, 成功研究到用機搓都可以做到好麵包, 是懶人的目標, 嘻嘻~

022602

2012年2月25日星期六

深圳買書 - 超讚豫園上海菜

由上年十二月, 我已經話想搵次返深圳書城買書, 一路的 weekend 都唔知忙乜未有時間去,
今日終於可以去喇, 好嘢~

唔該晒老公, 幫我捧了這幾本咁重的書返香港, 大陸買只係香港一半嘅價錢, 平到笑!

022501

還記得一年前也到過深圳買書, 那次吃不到豫園,
今日兩點鐘去到,  心想碰碰運氣啦, 都唔知佢有冇落場時間,
去到冇休息, 太好了!
很舒適的環境呀~

022504

這裡主打上海菜, 我們都讚不絕口! 因為煮法都好正宗!
先來了燻蛋, 那特別的煙燻茶葉味道, 加上流心蛋黃, 真係極品!

022505

超超超推之上海醉蝦, 是生蝦來的, 用酒同話梅浸佢一段時間,
係生嘅, 未必人人敢食! 我也只會去到呢D 高級有信譽的食肆先夠膽食呀~
味道真係一流, 冇得彈! 害我念念不忘五年的上海鷺鷺酒家的美味, 原來就在此一再嚐到!
酒同話梅的味充分滲了入蝦肉, 蝦肉是很 Q 的, 哈哈, 有趣!

022506

看那晶瑩剔透, 一再回味!

022507

上海菜, 點少得小籠包!

022508

這裡造得很出色, 皮薄, 餡料的肥瘦適中, 仲有好多湯汁呀!! 好吃死人了!!!

022509

最後的是河蝦炒鱔拉麵, 這種上海的河蝦, 很清而爽口, 香港太難吃到~
炒鱔有點炸燶咗, 否則呢餐真係冇得彈!!
整體實在十分滿意, 在香港除非到某幾間每位幾百蚊的食肆, 否則很難食到咁嘅質素!

022510

行埋吉之島, 買了點食物就歸家了~
我的烹飪書角落, 很精彩呀!

022503

晚餐沒有吃太多, 這個溏心蕃薯拼蜜糖丹麥吐司叫人很滿足~
哈, 前兩日喺街市, 誤打誤撞買到兩個溏心到不停漏糖水的蕃薯, 很幸運~

022502

2012年2月24日星期五

一星期又過

星期五的獎勵, 是 Burger King 的 QQ 漢堡, 是兩個像餐包大的軟麵包, 夾著芝士漢堡洋蔥圈,
份量啱啱好女仔食, 味道 ok 啦~

022401

持續的忙碌, 人很累, 週一至週五都沒太多心情時間去寫 blog

倒數仲有一個月就去旅行, 很希望快D 叉叉電!

2012年2月21日星期二

泰豐婁

前兩日同朋友去慶祝生日, 在尖沙咀試了泰豐婁,
很古色古香的酒家, 待應都似係做了幾十年的~

021905

食物味道唔錯呀, 很是傳統的中菜口味, 又唔算好油, 上菜又快, 抵讚~
飯後還有高力豆沙, 太開心~

021901


2012年2月18日星期六

跑數

忙忙碌碌的一星期過去, 這星期愛追看 On Call 36小時, 入面 D 嘢 so true!
醫院就是一個資源短缺, 很階級, 很多政治的地方,
其實我 Department 除了某人, 個個都好勤力, 老細好多時都做到八九點先走,
我哋唔會好似有D Department D 人咁, 得閒到坐喺度睇雜誌囉,
有時一晝約滿了門症的, 但知道好多病房症要睇的話, 如果遇上有一個門症病人唔嚟,
等完佢 15 分鐘之後, 我們都會用剩餘的15分鐘衝上病房睇個症, 又再撲返落嚟睇下一個,
成個 Department 都係盡責的同事, 有幾多高層知道同欣賞??
大家根本都盡了力去睇啦, 仲話我哋唔夠數, 睇得唔夠多 case,
第一, 係有人成日攞 sick leave, 一年 sick leave 了兩三個月, 數當然唔夠,
第二, 高層年尾埋數, 真係只會睇個數, 唔會理你個 quality,
我一日可以睇 30 個症嘅, 不過冇 quality o者, 如果嗰個係高層個阿媽, 想唔想我做完 assessment 咩 management 都冇就走? 去到求其望望佢就話自己睇咗個 case?
哈, 有D 醫院真係咁做o架, 不過我哋冇一個人過到自己囉~

很悲哀, 老細雖然一向好堅持 quality, 但佢都承受不了高層的壓力, 落 order 叫我哋真係要跑數..... by whatever means..........
咁我 D BB 仔case 係咪唔好睇咁多呢? 睇一個 BB 的時間, 可以用來睇 3-4 個大人了,
睇完症, 唔好詳細解釋俾病人聽囉, 仲有開多D 有數但冇質素的 group 囉, 就係咁........
公立醫院, 就係咁......
所以劇中范智岳話出來做 private 係為了多D 時間做好D 嘅醫療, 醫院太多限制, 是完全身同感受的~


今日的起了心肝, 自己要持續進修吓,
把讀 Master 的所有 handout 執了一次同分類, 有D 得閒都要睇返溫吓,
另外開始睇多D 專科的書, 有D case 唔常見, 但都要識多D 先會做得好D~

整咗檸檬慕士做甜品, 好好味好 creamy 呀, 都唔難整,
30ml 奶加熱加入一隻蛋同埋 10g 糖打勻, 用小火煮到杰身,
1tsp 魚膠粉用少少熱水溶化, 加入奶糊
80g whipping cream + 10g 煉奶打到企身, 逐少拌入奶糊中, 加入適量之檸檬香油,
分落杯, 放入雪櫃雪兩個鐘即成~

021803

Delonghi 再整麵包

尋晚再用新焗爐整麵包, 今次唔用說明書的 recipe 了, 用返 Carol 的食譜感覺上穩陣好多~
教咗 timer, set 好今朝七點先焗完,
清晨時份, 聞到麵包香, 香醒了!! 那感覺實在是太美好~

我用了法包的食譜, 因波比愛西方麵包 (我反而愛港式軟軟的麵包)
點知焗完, 竟然又唔似法包咁硬喎!

021801

今次做到外脆內軟, 有筋性, 不再是上次那鬆散的質地, 滿意很多!!
原來只要用好的食譜, 這麵包焗爐也可以做到滿意的麵包, 太安慰了!
我以後真係唔洗再幫襯嘉頓麵包啦~

021802

2012年2月16日星期四

僭建是太太主意

睇到呢個標題, 真係覺得好心 up.......
如果唔係唐唐有「感情缺失」, 太太又洗唔洗挖地窖嚟「建造一個安樂窩」呢?

講到尾, 唐唐真係賤到冇人有,
明知故犯, 有事仲推個老婆出嚟,
如果真係愛呢個老婆, 邊有可能咁做?
如果真係愛呢個老婆, 就會保護佢自己食攬晒上身啦, 點會推個老婆出嚟做罪人?
嫁著個咁嘅人, 應該係人生最錯的事.............

D 問題答咗等如冇答, 擘到對眼咁大嚟講大話, 香港在佢手上的話, 一定冇好日子過...........

2012年2月15日星期三

Delonghi EOB2017 整麵包

尋晚部焗爐好忙呀, 除了焗雞同埋燉蛋, 還第一次用來整麵包!
就係我之前所講, 掉晒D 材料落去, 等兩個鐘就有得食嘅麵包~

跟機的 Manual 附有麵包 recipe, 用了佢嘅朱古力包 recipe 試試

放入爐, set 了全自動焗麵包 programme, 佢會自動攪攪攪

021501

攪攪吓, 就會變成一團, 然後就會發酵個幾鐘
不過其實我見佢嗰種攪法, 都估到麵包應該唔係自己搓咁好食了,
佢停止的一刻, 個麵糰似乎都未起筋

021502

到了今朝起身睇吓, 嘩, 焗好了!!! 發成了勁大個麵包~ 夠我食三日囉!
味道嘛 , 老實講, 麻麻地啦, 冇筋性, 變咗好似我成日整的免搓包的質感, 很鬆散,
不過唔洗郁, 唔洗洗好多廚具, 咁方便就有麵包食, 算啦, 食麵包都係為了充饑嘅o者, 我又冇乜所謂~

下次可以用佢的 semi-auto mode, 佢負責搓同發酵, 然後我自己再分割同包入餡料, 整菠蘿包都好方便了!

021503

2012年2月14日星期二

10 個年頭情人節

今日其實放假, 但返了醫院執嘢, 本來諗住執半日好走啦, 點知攪攪吓, 5pm 先走!
證明我間房表面上整齊, 但一翻開D 櫃桶同 file, 真係亂到冇朋友..........
這一日也花得值得, 所有嘢都執好了, 好開心呀~ 返工做嘢都醒神D!

踏入同波比先生相識 10 個年頭, 又是情人節, 煮大餐~

急急離開去買餸, 買了隻雞, 新焗爐開幕了!!

021401

最後幾分鐘冇睇火, 點知就係咁....... 燶咗少少........
俾大家睇吓最靚的美腿啦, D 皮又薄又脆, 好正呀~

021404

點少得心形漢堡扒!

021403

波比話要食蒸扇貝, 無啦啦有個中菜~

021402

仲有甜品呀, 係焗焦糖布丁

021405

不過D 焦糖唔係好深色, 而且覺得太肥了, 都係唔好落咁多~
好滑呀, 波比讚好 yummy~
願大家日日都係情人節, 同另一半開開心心~

021406

2012年2月13日星期一

情人蛋糕

明天是情人節, 老公買了這兩件可愛的花花蛋糕回家, 氹老婆開心,
朱古力味好夠濃, 讚讚讚!

021301

明天放假, 等我煮返餐大餐俾老公食啦!

2012年2月12日星期日

焗爐到

今日波比先生就開心啦, 公司有 Function, 約咗陳豪, 有咖啡飲又有好嘢食~

之後我們 join 埋, 去 TST 食 Paisano's Pizza, 好大件呀, 睇住師傅轉轉轉新鮮造, 特別好食!

021201

唔該晒波比, 幫我搬咗新焗爐返屋企了, 超超超開心啊!!!
好多掣, 好 pro 呀!!! 有燈有對流風, 太好了~

021202

呢個就係用來整麵包的兜, 早一晚放晒D 材料入去, 教埋 timer , 就可以每朝有新鮮麵包食了!
不過屋企仲有幾片方包, 所以今日未有得整住

021203

去了聯邦食晚飯, $78 的片皮鴨真係抵到爛, 不過就好肥好多油囉~

021204

2012年2月11日星期六

過冬雀仔

今日跑咗去南生圍, 10km
見到好多好多來過冬的雀仔, 幾百隻都有! 最攪笑係第一次唔係喺動物園見到鴛鴦

021101

去了 Chow Chow Cafe 吃個悠閒午餐, 返屋企瞓食瞓
因為尋晚好夜先瞓呀, 下星期開始帶實習學生, 自己都要做一點準備呢~

021102

2012年2月10日星期五

入伙了!

忙了足足一星期,  clinic 大部分嘢已經執好了,
我間房都執好了, 嘩, 真係從未如此整齊過囉~ 往後的好多好多年, 就會喺呢度渡過了~

Panorama 1


2012年2月8日星期三

很勞氣

話過這 blog 盡量唔寫勞氣事, 唔帶工作入嚟,
不過今日實在很勞氣, 成個儲物室內基本上得我一個人做嘢,
抹塵, unpack, 爬高踎低把一件又一件的大大小小儀器工具玩具上架,
一個人清了十幾箱加十多袋物件,
與我同 grade 的同事人人都應該幫手,
但同事就在偷懶, 叫佢做嘢就唔知蛇咗去邊, 出現就施施然地執咗少少就收工,
再叫佢做老細吩咐的工作, 佢又藉詞唔做!
但然後在老細面前又扮到好似做咗好多嘢咁~
真係大開眼界!!!

仲有個文員又係激到我嘔血!!!
已嚟咗兩個月, 仲日日做錯嘢!

同老公傾咗成晚, 點解會有D 咁嘅人, 老公還是叫我睇開D~
但我真係頂唔順點解D 人咁懶, 或者係我太心急, 真係睇唔過眼D 人做得咁慢咁冇效率, 於是乜都係自己做
最後, 所有在儲物室的堆積箱和袋, 都俾我清走晒了, 我負責的地方, 地下已有返一條路行,
見到咁都開心D~
向好嗰方面睇, 差唔多九成的櫃都係我執嘅時候, 我就最清楚所有嘢放喺邊喇!

2012年2月7日星期二

搬喇!

嘩, 今日搬 office , 攰得想死, 返 8:30am , 即刻開始指揮呀、搬呀、抹櫃呀、unpacking 呀......
一路到 6:30pm, 全日只係飲咗 1.5杯水......
老公問點解我要做埋呢D 咁嘅嘢? 冇辦法, 我們係細戶就係乜都要自己做, 老細今日都同我一齊做清潔抹塵擔擔抬抬

仲要好嘔血, 俾兩個好食懶飛的阿姐激死, 攪到今日連環鬧人, 火滾!

新的房間, 雖然再沒有窗戶, 但很大很光猛, 多謝老細的安排~

超辛苦的一日, 去了食意粉屋獎勵自己, 食物很好, 充滿力量, 聽日再努力呀!

IMG_2044

2012年2月6日星期一

蘿蔔炆牛肋骨

今日好攪笑, 我又參加畢業禮, 有得早放, 好!

今個星期正式搬 office, 都唔洗旨意有得準時放工, 於是今日去掃定幾日的食材先~

今晚煮了炆牛肋骨, 不過時間關係, 炆得未夠火喉, 唔知過一晚會唔會好食D呢?

020601

我又懶咗一星期冇跑步了, 今日為了有 quota 食湯圓, 去跑了 7km,
元宵佳節快樂~

020602

2012年2月5日星期日

渣打馬拉松相片 - 加加油及慶功

今日老公跑渣打半馬拉松一組, 8:45am 起跑, 一程西鐵就到起跑點, 實在好方便~

我搵咗個有利位置影相, 開跑, 衝呀~~~~~~~~~
好唔容易先見到波比, 不過用了長鏡, 佢太近我反而 focus 唔到

P1090158

Star war, haha!

P1090346

當D 人走晒, 我就搭地鐵去灣仔馬師道天橋轉入駱克道的位置影相,
企足個幾鐘, 影咗成 800 張相呀!!

P1090883

著住鯊魚衫跑全馬, 實在毅力可嘉!

P1100180

見到好大年紀的伯伯都跑全馬, 超勁呀!!!!

P1100209

P1100214

波比 10:30am 就到, 但我都見唔到佢, 係忽然佢在鏡頭中閃出, 真係啞咗..... 又係朦查查........
我追去 CWB 搵佢, 都好唔錯呀, 1hr47min 完成了半馬,
有人仲話自己只係 hea 跑, 冇發過力, 怕第一次跑半馬會抽筋唔敢盡力喎~

如果係 9:20-10:30am 落橋的朋友, 快D 去我 album 睇吓有冇自己嘅相啦~
http://www.flickr.com/photos/12728356@N05/

咁辛苦, 梗係要食返餐好的!
想食豚王/魂拉麵, 點知兩間星期日都唔開,
最後去了一風堂,  CWB 店果然唔洗等位, 太感動!!!

020501

之後去了中環的 Le Creuset, 用 Promotional price 買了一 set 心型碗仔, 超開心!

然後去 City Super 買食材, 今晚食大餐慰勞吓跑畢半馬的老公
海鮮火雞火腿 Pizza, 新鮮多料超美味!

020502

020503

肥美三文魚腩, 超正! 仲有燒雞半隻, 大滿足~

020504

看來, 我應該要勤力返D 練習, 希望今年年尾, 有能力陪老公跑到半馬!