2011年5月31日星期二

每日一 B

尋日同今日都去了睇 B, 兩個都係女, 兩個都超可愛~
可憐都是有些先天性的疾病, 有一個是由好轉差那種, 實在令人心酸~
把 BB 抱在懷中餵奶的一刻, BB 望著我依依呀呀的一刻, 實在會有令人想當母親的衝動 (當然那只是霋時的感動)

在 Jusco 買了支日本 Tomato Puree, 用來煮闊條麵唔錯呀~

02

2011年5月30日星期一

正燒肉@和幸吧

出糧日, 啱啱加人工, 於是就請老公食飯,
本來想去牛陣, 但最後還是去了和幸吧,
同樣是牛肉的話, 我始終覺得燒的會原汁原味, 打邊爐的話大部分牛油同牛味都落了在湯底中喇~

叫了個拼盤, 乜都有D, 一次過滿足多個願望實在好!


01

這牛肉十分嫩滑, 油脂溶化後十分香,
右邊的厚切牛舌爽中帶嫩, 整體牛肉質素我覺得比盛八好!
還有燒飯糰, 燒到脆脆的像飯焦, 很香口!

02

呢個鵝肝石頭飯絕對推介, 鵝肝仲係醃過味的, 油香混在飯中, 太美味!

03

不過咁大間舖頭, 水都唔供應一杯, 一係迫你買廿蚊罐可樂, 一係 $28/支礦泉水囉,
最後迫住要叫飲品, 巨峰乳酸其實都開胃好飲, 不過係覺得被迫叫而唔抵o者~

04

前菜仲有加一, 五百幾, 咁啱 HA 員工有 88 折, 都差不多五百落樓,
味道十分滿意的, 不過咁嘅價錢, 下次都係等到冬天自己喺屋企燒可以買到好多食物,
出街食呢D 燒肉, 真係食好多錢都唔覺飽的, 最後波比請返我食榴槤甜品啊~

大阪馬拉松訓練日誌 (3): 食完咁多嘢, 要做吓運動喇!
尋日免費 download 咗 Nike+ 個 App, 好好用呀!!!
首先佢用好少 data, 啱晒我呢D 唔係用無限 data plan 的人,
佢好在可以即刻睇到自己的速度, 今日可以好好 KEEP 住步速, 好成功地唔會跑得太快而喘晒氣,
好順利地跑咗 5KM 都唔係好辛苦咋!
仲有佢會定時用語音話你聽你跑咗幾遠, 好有激勵性! 繼續努力!
5km

2011年5月29日星期日

元朗青年節長跑賽

相隔幾個月, 又有跑步比賽喇, 今次又係喺天水圍濕地公園起跑, 8km,
我冇參加呀, 係幫波比影相o者, 點知..........
執好晒相機同鏡頭放喺枱面, 出咗門口先發現........ 冇帶.........

等起跑之際, 即刻上 App Store d/l 咗個可以連環快拍的 App 啦,
點知............ 影開跑時原來按唔到個 "Start" 掣, 影唔到..........

02

到返終點, make sure 一定影到, 點知.......... 有個工作人員阿哥企正喺我前面,
我影到邊佢行到邊, 完住 block 晒我個鏡頭, 勁無奈.......... !#*$&(&%(
好黑仔!!!!

講返比賽, 波比先生話 20 min 跑完 5 km 後, 忽然間橫隔膜位痛, 攪到跑唔到.......
攪到好遲先返到嚟, 唔緊要啦, 下次再努力過~

2011年5月28日星期六

完美句號

今日上了最後一堂的 Master Class, 估唔到, 兩年轉眼就過~
如果冇讀過書, 呢兩年就係 hea 過, 讀書學到很多東西, 終生受用

上學前, 心血來潮,
用了 40 分鐘極速整好咗呢個特濃 Valrhona 朱古力合桃蛋糕俾同學仔食,
為兩年的一同上學的生涯作一個完美的句號。
我落咗超多合桃, 少糖; 朋友食到啖啖都有合桃, 話非常之滿足~
這就是自家煮的好處, 愛吃的食材可以狂落, 哈!

但願我們的考試同 thesis 都可順利過渡, 出埋成績要去大肆慶祝!

04

講吓大阪之旅, 機票都未買, 但係 book o左酒店! 哈!
因為驚到時酒店會好full (有成三萬幾人跑, 唔知有幾多外地人), 所以 confirm 報名後就開始留意吓有邊間酒店好,
今次想住梅田, 因為去京都同和歌山搭 JR 都方便, 亦較近馬拉松的終點,
睇中了 Hearton Hotel, 發現 Hotel Club 有限時特價, 就 book 咗三晚都係 $1900, 好抵!

仲有睇緊白濱溫泉酒店 , 不過勁貴~

台灣之旅仲有四星期咋, 行程晨早已 plan 好, 今日買埋保險,
東亞(藍十字)買好抵啊, 有 65 折, 去旅行的朋友可考慮吓!
http://www.hkbea.com/insurance/index_tc.htm?page=btp&pcode=edm01

流心溫泉蛋多士

唔知曾經喺邊度睇過有人咁整多士, 今早就試試整俾波比先生食,
先將一塊麵包切邊, 將麵包邊圍住放在另一麵包上, 打一隻雞蛋在中間,
起了邊的小麵包可放上一塊芝士,
一同入焗爐, 焗約五分鐘, 完成!

溫泉蛋多士

味道嘛, 真係好好好正, 蛋是半生熟, 滑得有點流動性,
沒有調味, 完全食到蛋香味, 很像溫泉蛋的感覺, 加上脆多士~ 正正正!

大阪馬拉松訓練日誌 (2): 嘩, 成個星期晚晚都懶/去街, 今日先第二日為比賽練吓,
跑跑吓腹部有點痛所以要慢行......
要努力D 練習喇, 唔係會失禮晒香港人.....

2011年5月27日星期五

山頭火 x Holly Brown

今日真係忙到癲咗, 7 點先放工,
波比因為公司活動都遲走, 就相約在尖咀等,
去 iSquare 搵食, 還是第一次走上 6 樓及7 樓, 原來有好多食店,
最後選了吃山頭火, 發現呢間分店的食物同沙田分店的有點不同, 味道這一間佔上風,
因為湯底沒有沙田店那麼咸, 可飲得出湯底本身的美味, 麵條煮得軟硬適中,
叉燒又唔會太肥, 肉質算是嫩滑, 整體感覺很好!

08

我沒有點拉麵的餐, 因為要留肚子去 Holly Brown 歎咖啡,
因為見到飲食 Blogger 大讚, 吸引到我來試試, 原來波比話佢之前已經想帶我嚟喎~
在 K11 兜了半個圈才找到這家店子, 裝修光猛舒服,
波比點了 Cappuccino, 濃厚的奶泡同拉花, 水準十足! 沒有落糖但一點也不苦澀, 嚐真咖啡味道
後面是我的薄荷 Gelato, 加入了 Chocolate Brownie 同朱古力脆, 非常之好味及滿足~
這個星期五晚餐實在令人十分滿意!

09

一邊喝咖啡, 一邊用 K11 的免費 Wifi 上網睇旅行資料,
仲有電視播著出神入化的拉花手藝, 很悠閒, 很值得再來的小店!

2011年5月26日星期四

一田迫爆購物日

今日, 是我最後一次 in-charge 那個 X-ray exam , 然後把這個重大任務交了給新同事了!
雖然來了這醫院只是短短三年, 但有機會 in-charge 過兩個不過的 exam, 學到和看到的很多,
終於都不用過令人發瘋的星期四, 星期四亦再沒有不做飯的藉口

哈哈, 讓我最後一次行駛這個藉口, 今晚去了菓一道食飯,
好耐冇嚟了, 由讀緊 U 食到做咗咁多年嘢, 呢度的質素實在很有保障!
駝鳥肉炒意粉, 味道很好, 不過是駝鳥肉有點太細粒; 波比的墨魚汁意粉也很讚!

06

飯後, 我們第一次去體驗一田購物日這盛事!
常常在電視見到點點點迫, 今次體會到真的人貼人的超級迫!!!
不過D 嘢真係幾平, 見到運動衫褲好想買, 但今個月去 Nike 有特價已經掃咗好多貨了, 唔敢再買...
最後買了 $150 兩個枕頭, $69 日本雨傘,
仲有最開心係 $568 買咗兩個旅行喼呀! 超抵!!! 因為我們用開的兩個喼去完曼谷都爛了 (真係唔知國泰點掟D 行李, 可以掟到爆轆.....)
其實仲有好多嘢可以買, 但真係太迫人, 要迫入去揀, 迫去排隊都真係要好好耐性, 所以都冇再買了~

07

回家時仲買咗 Italian Tomato 蛋糕, 歎~~

2011年5月25日星期三

小明上廣州

下星期五六日, 小明上廣州!
誰是小明? 嘻, 那是我多年前的網名, 小明和波比, 是梁望鋒旅遊書的角色,
波比先生的名字, 從這而來~

上一次去廣州已經係 6 年前了, 睇返嗰D 相,
肥騰騰的波比先生和十分青春的小明小姐, 是一對常吵咀的小情侶,
再訪的時候, 已經是一對老夫老妻了~

幸運地朋友抽到了公司的祈福新邨渡假屋, 又可以大伙兒上廣州又玩又食! (是上次棕櫚島的好好玩班子!)
一天遊長隆睇馬戲, 另一天就廣州闖盪,
上網 search 資料, 睇返 J2 的 <<廣州闖盪>>, 再請教完旅遊家朋友後,
想去嶺南印象園拍拍照, 同埋去一德路買玩具家品, 仲有可考慮上電視塔睇風景!
考慮好冇留多一日添~

最愛的事情, 就係 plan 行程, 睇我幾勤力!

gz

2011年5月24日星期二

西班牙蛋餅

今日睇咗一個兩個月大的早產 BB,
算成功地餵咗一餐奶同埋掃風, 好開心~
個 B 女好可愛, 眼碌碌, 不過好曳豬囉,
餵佢食奶就瞓覺唔肯食, 仲出拳撐嚟撐去, 一放返佢落箱仔入面就眼碌碌望住我, 似在奸笑, 哈~

這個西班牙薯仔蛋餅係睇生果日報教整的,
簡單又美味, 我太愛薯仔這些澱粉質東東了~

蛋餅1

2011年5月23日星期一

滑滑肉餅

今朝第一個 case 係個廿幾歲的智障年青人, 佢咳住咁入我房, 入到嚟想除口罩
我:「你病喎, 唔好除口罩喇」
佢阿媽: 「佢冇病呀」
我:「佢咳喎」
媽:「佢係咳o者」
我心想: 咳都唔係病? 咁係咩呀? 即使好多人好多藉口話係咩氣管敏感咳兩聲,
但知唔知咳一吓有幾多你睇唔到的飛沫會噴出嚟, 噴到周圍都係
我:「咳都要戴口罩o架喎, 醫院規矩一定要」
個阿媽先冇聲出

過咗一陣, 見個 case 滿頭大汗
我:「嘩, 你出晒汗喎, 好熱呀?頭先好趕嚟呀? 俾張紙巾你抹汗啦」
Case: 「唔係, 我一路都出汗, 不過頭先食咗藥好D 喇」
吓?! 食藥?! 藥都食埋都唔係病呀?! 個阿媽都黐線o架!
明知自己個仔病仲帶佢嚟, 分分鐘仲發緊燒, 仲叫佢唔洗戴口罩嚟對住我講嘢,
我呢份工真係搵命博囉!

個 case 是一個很乖巧的男孩, 有個咁嘅阿媽, 真係............
有趣的, 這個 case 是我出來工作的第一個地方的一個學生,
輾轉多年後, 又在醫院見返佢, 世界真細小

我今日都要睇醫生, 有隻眼無啦啦發炎, 都係手多摔眼之過..... 以後要乖D~

今晚可以準時放工煮飯, 冇落大雨, 感恩~
唔知大家有冇睇過阿蘇教蒸肉餅?
http://www.towngasavenue.com/magazine/article.aspx?art_id=236

雖然好多人一味彈阿蘇的介紹唔掂又話佢唔識煮嘢食,
不過應該自己試吓佢D 方法 work 唔 work, 不要人云亦云~

這兩星期用了佢的方法去蒸肉餅, 蒸肉餅呢家嘢我已經識咗十幾年, 但從來冇諗過點樣令佢好食D~
試過因為健康我有時只買瘦肉, 試過整到好硬連自己都覺得有點難哽......
阿蘇的方法, 我可以話俾大家聽真係幾 work! 上次用半肥瘦, 今次用全瘦肉, 都造到滑滑的口感!
健康, 都可以好味道的!

肉餅

之前咁多年都要波比先生食過 n 次硬硬蒸肉餅, 真係有點慚愧,
好彩你老婆有自我增值, 你以後都有滑滑肉餅食喇!

2011年5月22日星期日

味吉拉麵館

去旺角拎淘寶那一晚, 要找個地方快快吃過晚飯快快回家,
咁啱一落樓就係家樂坊, 那裡地庫開了很多食肆, 還未有機會幫襯過
由於只要揀有位同快, 就選了味吉拉麵館

這拉麵館在沙田都有分店, 但實在太遠了,
如今旺角都有, 正好一試其虛實!

服務員做嘢爽手, 很好的點叉燒時, 會問你要半肥瘦定偏瘦

我的東京醬油牛骨湯拉麵, 麵質是偏硬那種, 湯底實在太咸了.........
溏心蛋一半是爛的 (還好意思上給客人 >.<)

IMG_0688

波比的豬骨湯拉麵, 都是很咸!
沒有什麼好評的地方, 都係食返上次的築地拉麵好過!

2011年5月21日星期六

超成功之日式芝士蛋糕

Yeah yeah yeah~~~ 今日終於整到理想的日式芝士蛋糕喇! 好開心!

小心地打蛋, 打到好細滑的蛋白泡, 原來煮嘢食真係要多多練習, 會功多藝熟的!

今日波比先生都有份幫手, 因為蛋白泡同熱溶後的芝士要分開處理, 又要篩麵粉, 真係冇咁多對手~
波比先生幫手拎吓嘢, 先冇咁 le hea~

焗完了, 超超超成功呀, 真係勁開心, 簡直係 2011 年度最佳出品呀!
同日本的有得揮, 呢個可以賣到 1000 Yen 喇, 哈哈哈!
芝士蛋糕非常之軟綿綿, 有入口即溶的感覺, 最好真係要喺剛出爐的時候食o架, 熱辣辣, 超美味!

01

又要一讚把陶瓷刀用嚟切蛋糕都好好用, 唔會黐刀, 切得好齊!

02

看看膨脹後的氣泡十分均勻, 所以蛋糕好鬆軟
03

因為蛋白打得起, 同上次一樣的份量, 今次整咗三兜!
右邊的係整煲仔飯嗰個煲呀, 入焗爐/微波爐都得o架, 仲要唔黐底, 非常之好用!!

05

今日會請讀 Master 的同學仔食, 仲有拜託波比先生拎D 返去請奶奶食~

2011年5月20日星期五

十幾年朋友@韓國菜

好耐冇見我一班做 promoter 時識的老朋友了,
今晚難得約得齊人, 去咗食韓國菜~

話咁快, 我哋就已經識咗十幾年, 人真係老了............
每次相聚, 總聽到朋友們說了唏噓波折的事業同感情,
大家都會話到我是最安穩最快上岸的一個, 其實也是, 我也知足~

有朋友要嫁到去意大利呀, 哈哈, 太浪漫的愛情故事啊~~

今晚的韓國菜在美麗華商場, 那粉紅色的醃蘿蔔很特別, 甜中帶果香~
海鮮薄餅都很不錯!

03

燉牛肋骨, 炒粉絲, 牛肉卷, 人參雞湯, 都是中上之作!

02

不過今晚最令女人們尖叫的, 是那些韓國型男侍應生! woo~~~~
意想不到侍應全是韓國人, 第一個 serve 我哋的成個阿 Rain 咁, 真係好靚仔!!! (趁老公唔喺度先咁講!)
見到就嚟爆衫的胸肌, 真不得不嘩嘩嘩!!!!! 簡直係目不暇給!!!
有朋友仲話今年一定要嚟呢度攪生日添, 哈哈哈!

2011年5月19日星期四

第一次淘寶

常常在人家的 Blog 見到人喺淘寶買咗好多平靚正嘅嘢, 十分羨慕!
奈何我家在 office hour 冇可能有人喺屋企收貨, 所以之前冇可能淘到

點知波比近來被同事感染到, 學人淘埋一份, 於是就展開了我們第一次淘寶之旅

其實淘寶, 都係一件幾麻煩的事, 要在幾萬個 search result 中揀心頭好,
又要睇吓間公司的評語, 最花時間係唔多識打中文的波比先生, 要同賣家 online 傾價同運費,
最後我們淘咗 6 點幾公斤的東東回來, 今日到旺角的「淘點」自行 pick up,
去到好多人呀, D 人買的東西千奇百怪都有, 真係大開眼界!

看看收穫吧!
買了很多餐具 (重死....), 不過布丁杯同咖啡杯比我想像中細好多....... 裝唔到D 乜咁..........
質素合格! 但其實價錢都唔平囉~ 同香港買差唔多, 只差在香港未必一下子見到想買的款式~

01

都係我的 - 單車用品那海棉單車座墊好得呀, 希望之後踩單車就唔會 pat pat 痛啦!
條單車褲都係特製, 在 pat pat 位有個厚厚的軟墊, 車工完全合格, 幾十蚊好抵了, 香港要兩百蚊呀~
兩個單車手柄墊, 點知, 根本都套唔到落去嘅.......... (除非先拆咗本身的把手啦)
仲有個頭盔, 不過真係得啖笑....... 我覺得係用硬身的發泡膠造, 如果 touch wood 我真係趴街的話,
我相信呢個頭盔應該救唔到我囉..........

02

波比先生都買咗好多運動用品, 平時著開成千蚊的跑步鞋, 不過聽人講呢個大陸牌子都好掂,
佢又要試吓, 今晚試咗落去跑, 波比話個樣就抄足 Asics, 但質素就真係.......普普通通啦,
幾百蚊算係咁喎~

03

另外仲有好多利物浦東東, 但布造的就甩色甩得好緊要, 手工亦好參差, 麻麻地啦~

整體淘後感: 貨品的質素一般啦, 除非真係平好多, 否則都係喺香港買嘢穩陣好多~

大阪馬拉松訓練日誌: 難得閒日放工後仲有氣力去跑, 跑咗 4.17km,
因為食完雪糕先落去跑, 攪到肚痛......... *o*!

2011年5月18日星期三

Chicken A Mok

A Mok 係柬埔寨的咖哩香料, 同事送咗一包俾我, 今晚就用佢嚟煮咖哩!

其實很不像咖哩的味道 , 是濃烈的東南亞香料味,
味道很特別, 但有「梗係差咗D 嘢」的感覺? 差咗D 乜???

A Mok

這菜還用了同事自家種的薯仔去整, 原來薯仔太新鮮, 係好會硬好難切的, 哈哈!

今日用了陶瓷刀去起雞脾肉, 嘩好得! 又利又靈活, 比平時用菜刀快好多!

2011年5月17日星期二

一屋芝士香

老公尋日話要食, 今晚就整日式焗芝士蛋糕俾佢

咁好服務, 快D 加我家用啦!

食譜是參考這裡 http://www.christinesrecipes.com/2011/02/japanese-cheesecake.html
及我的一本烘焙書,
不過真係好多個步驟好鬼煩 (有D 嘢食真係出街俾錢人賺好過, 除非出面好難搵到好食啦),
今日打第一隻蛋就穿咗黃, 攪到打唔起蛋白糊, 攪到做唔到應有的效果,
不過都膨漲得好勁!

cheese cake 1

切開睇睇, 都好夠滑啊, 有點像布丁感覺的蛋糕,
但仍未做到大阪 RIKURO'S 的輕飄飄感覺 (http://www.rikuro.co.jp/index2.html)
嗯, 忽然間好想去大阪見見這爺爺蛋糕~

cheese cake 2

係呀, 我們決定了 confirm 大阪馬拉松的報名了! 希望未來五個月日本的情況會繼續好轉啦!
紅葉之旅, 很期待!

2011年5月16日星期一

刷刷刷, 鮑魚煲仔飯

今個星期終於所有同事返返工, 最緊要老細返返工, 咁我就唔洗應付好多煩厭的 admin 工作了!

好耐冇試過可以準時放工了~~~~~~~~ 為咗慶祝, 今晚煮餐好的!
本來是想清埋廚櫃的膶腸而整煲仔飯, 最後忽然間心思思, 整咗個豉椒鮑魚仔排骨煲仔飯

鮑魚仔在街市買, 可以叫阿姐起埋肉 (去腸), 不過返到屋企都有排攪!
要用個牙刷, 不停咁刷刷刷, 刷走鮑魚仔兩邊的污糟嘢, 好花時間的.....
今次整 6 隻都好了, 再叫我刷多D 就真係怕怕!

煲好煲仔飯, 豉椒汁另外整再淋面, 香噴噴的煲仔飯就完成了!!!

鮑魚排骨飯

咁樣整, 可以食到鮑魚仔的鮮味, 唔會俾像街外的重調味蓋過晒D 味道~
波比話可以下次再 encore 喎~

同事去完柬埔寨, 買咗D 香料俾我做手信, 哈哈, 好鍾意!!
仲有 from 柬埔寨的麥兜, 真係一句: 唔係化?!

03

2011年5月15日星期日

幸福之鬆餅

今朝起身第一件事係整早餐, 第一次的焗鬆餅!

以前很愛吃 KFC 的焗鬆餅, 但唔知幾時開始就冇再賣了,
不但懷念這鬆餅的味道, 其實是懷念這鬆餅伴我走過了很多中學的難忘時光,

呢年又開始賣另一隻香蜜鬆餅, 我都好鍾意食!
不過星期六日波比先生通常都好晏起身, 冇乜機會去 KFC 食到~ (只在早餐供應)

尋晚行經 CitySuper, 就買了材料整, 原來好易整咋, 不消 20 分鐘就整好晒喇!!
面頭掃了蜜糖

01

有幾個加咗我最愛的朱古力

02

搣開睇吓, 夠熟就好了!
除了原本的 recipe , 還加了神級的金桶牛油, 好香牛油味!
食落外脆內鬆, 掂呀, 好開心, 因為在家都複製到這幸福美味, 同 KFC 的完全一樣~

03

用便宜的價錢, 造到街外的美味, 就是師奶仔的最大滿足~ :P

2011年5月14日星期六

Super Burger @ Chow Chow Cafe

波比今日扭計, 唔肯在家食午餐, 話下午要清潔家居所以要食大餐先喎~~
已成半年冇去過 Chow Chow Cafe 了, 因為上次去完食物唔掂, 所以一路都冇興趣再去,
今日食 lunch, 挽回些印象分啦!

南瓜湯: 唔...... 入面好有多未溶晒的粒粒, 應該係D 麵粉粒粒... 唔掂.......

01

炸雞扒: 雖然叫得炸嘢都預咗油, 但係雞扒同薯條都好似未隔油就上碟,
油林林得要用張紙巾去先吸油才放入口........ (麥當當的薯條都仲冇佢咁多油....)
雞扒脆, 不過肉有點硬, 一讚是蔬菜很新鮮!

02

呢個先係今日的戲肉, 超級漢堡
$98 的價錢, 等半小時的製作都值得, 豐富得令人嘩嘩嘩

03

超厚的自家製漢堡牛肉, 內裡還加了點紅蘿蔔, 鮮味十足,
不過如果肉汁豐腴一點當然更求之不得!
麵包底面都有烘脆, 半溶芝士是超 match 的配搭, 令人太滿足的漢堡!

04

準備

懶懶懶, 拖到今日是 deadline 才把那講書的 ppt 和考試問題做起,
很緊張, 這 50 多頁的 ppt 究竟講唔講到個半鐘!?

ppt

這大工程攪掂了, 就全力開始做 A 仔 program 了! 加油加油!

2011年5月13日星期五

和牛露筍炒飯

這星期終於都過了, 老細放假的日子, 我每一天都係最後走鎖大門的人, 太多濕碎嘢 admin 嘢要做,
下星期應該可以過返D 正常生活了!

今日見咗兩個 10 個月大的 BB, 好鬼攪笑~

前幾日放假煮的
和牛露筍炒飯 - 本來是想鵝肝和牛炒飯的, 不過波比先生話健康D 喎, 冇落鵝肝了
可以去 Taste 或 Jusco 買D 日本和牛, 用來炒飯係會好香好香牛的油脂味道,
另加了新買的西班牙豬肉腸 (From Jusco), 又係啖啖肉味好正!
常常覺得, 如果家住在 Jusco 附近, 一定口福無邊了!

34

還有鹽燒三文魚腩, 不過咸了點..........

35

2011年5月12日星期四

轉死性

忙忙忙, 遲走, 一個人的晚上, 難得地轉死性唔去食麥當當,
因為近來真係發胖了不少...... 還是自煮晚餐較健康!

三餸

01

一湯

02

唉, 好多嘢做, 一諗起個自閉症 Program 就好頭痛........
可能我份人太有要求, 真的接受唔到D 嘢亂做,
同同事傾電話中, 有一下子我真的認不住問: 「咁做同出面開 playgroup 有乜分別? 人哋洗乜搭成個鐘車嚟睇我哋? 其實你覺得個小朋友會 benefit 到幾多?」
來這裡, 是做治療了, 沒有 technique 的治療, 就係變成 pg (甚至出面有名的 pg 一定攪得比醫院呢個百冇的地方好)

有D 嘢, 真係連自己都過唔到, 點過人呀?
不過同朋友傾開, 朋友叫我睇開D, $60 仲想點?
又係嘅, 可能一直都係我太緊張...... 或者根本D 家長都冇咩要求,
又或者D 家長嚟之前就成日話要 training, 到真係俾 training 佢, 返到去都係奉旨唔做功課, (見得太多!)
成日都係皇帝唔急太監急,
是的, 我要學習放開D 咁睇嘅~ 同朋友傾完, 有所領悟~

2011年5月11日星期三

又跑到南生圍 (後) 敬輝農場

回程了, 要去敬輝農場參觀

這其實是一個很小的地方, 有些植物, 有些動物

酷熱天氣下, 先食個凍豆花, 波比先生負責買, 點知佢返嚟話我聽..... $9 碗, 叫咗先知.......
嘩~~~~~~~~~~~~~~~~~~~~~
$9 碗豆花都偏貴, 點知又唔滑又冇豆味, 完全唔掂......
元朗的阿玉豆腐花好過佢一千倍!

仲有枱櫈都好污糟, 連我這個對污糟容忍限度已經好寬鬆的人, 都覺得好污糟...........
唔會再嚟食嘢

14

食完完全失望地..... 行出去池塘邊, 好彩美好的景色令我心情好返點!

16

太陽同倒影, 這就是大自然之美!

17

有好多蓮花呀!

18

19

22

今日最開心係影到蜻蜓!! 好難得佢企定定俾我影, 呢頭好多蜻蜓o架, 有D 好得意係黃色翼添!

23

池塘上有一條浮橋, 一路行一路左搖右擺, 沒有年青人的勇氣去試試

25

芒果仔

26

仲有人放風箏

27

走的時候, 睇睇佢的農場出品, 有菜同瓜賣, 不過D 菜因為係有機 (冇農藥),
所以好多蟲蛀到一個個窿, 真係買唔落手.....
反而一早睇定咗要買煨蕃薯, $20 磅都唔算貴,
返屋企食, 好甜好甜呀, 正!

33

有興趣去的朋友可睇睇
http://www.yl.com.hk/kff/index.htm