2009年12月31日星期四

Looking back 2009

轉個眼就是 2009 年的最後一日, 一年實在過得太快
望著那本用來記錄我的病人約期的時間表,
好像早幾日才剛用第一頁, 今日已經用到 12月31日的最後一頁了,
一整本, 記錄了這一年我看過的病人,
合上那本時間表, 我的 2009 年過去了~

今年有很多事要感恩,
感恩工作還算順利, 雖然有時還因為那覺得被騙的人工問題有點忐忑,
但有著 5-day work 同很多的大假和進修假, 工作滿足感算是三份工中最高的, 還是算了~
感恩讀書方面應付到, 不是太吃力,
感恩生活方面已習慣了因放工路途遠而很長的交通時間, 煮飯方面亦算可照顧到,
感恩我有好好的朋友, 和常來這個網誌的你, 聽我的開心事嘮叨事,
感恩波比先生這一年還算乖, 不過如果唔好再自作主張買嘢俾老婆會更加好!

除夕夜, 我們在家吃了早幾日買的長腳蟹, 正正正!
還有自製的厚肉漢堡, yummy~
123101

Happy new year!
新一年希望大家過得更好!

2009年12月30日星期三

肥蠔

今日天氣回暖, 加上唔太多 case 可以準時放工,
天未黑晒可以離開到醫院, 好耐都未試過!

好似好耐冇煮飯了, 今日試試整了薑蔥焗蠔, 就係用前幾日買的日本肥蠔呀,
煮完原來都會縮細幾多, 但入口好肥美好滑啊!!!
先知道原來之前喺美心中菜食過的薑蔥焗蠔質素原來幾差,
因為我從未喺街食過咁滑的中式煮法的蠔~

不過真係日本嘢先敢食, 街市買嗰D....... 當你諗到香港的水域有幾污糟, 你就唔會敢食
01

今日用新電話, 好爽呀, 上網快個 Mon 又大,
但用親上網都要好小心囉, 因為我係用緊 SmarTone 的每日 20MB 淨睇網頁 plan,
萬一唔小心用咗D 要上網的 application 就大鑊喇!

2009年12月29日星期二

新玩具

唉..... 敗家老婆的銀包於十二月嚴重出血,
不過好彩比波比先生快一步買到, 否則會激死我!
002

下個月仲要交稅, 仲要報個 $5000 的 course, 攪到我有D 猶豫應唔應該讀??
因為啱啱同 Artsberg 買咗本 OM 的書, 入面教的 technique 都幾好喎~

2009年12月28日星期一

寒冷返工日

今個冬天第一個寒流 - 我哋身在泰國
第二個寒流 - 遇上了我放假讀書的日子, 整天開著暖風機吹呀吹
第三個寒流 - 終於都要返工了, 真係好好好凍.....
凍得戴住 mask 的我, 一呼吸個眼鏡不停有水蒸氣
要著制服加白袍, 入面打幾多層底都係好凍......
由一個  block 行去另一個 block, 真係凍死人......

今晚一個人去行街街, 見到呢款 crocs 鞋, 有兩個朋友都讚好著,
原價二百幾, 但呢款有 Miffy 的可能賣唔去, 半價百幾蚊咋, 諗咗一陣就買咗,
哈哈, 真係好舒服呀~~~~~
04

2009年12月27日星期日

深圳探B團 + U-mates gathering

繼續的節目豐富, 首先係無啦啦跟咗波比先生返深圳探 B, 係波比以前的大陸同事的 BB,
無啦啦的原因係我一早唔諗住去, 不過波比先生又誤會咗我會去,
而我睇 openrice 搵緊深圳有咩好食時, 見到D 上海菜好似好正....
為食精驅使之下就去咗喇!

第一次喺落馬州過關, 好攪笑呀, 原來係自己行過香港同深圳分界的河,
橋的另一邊就是深圳了!

大陸的健康申報, 原來係可以用回鄉卡一碌, 入個電話就攪掂, 有點令人 O 咀!

07

我哋去了大劇院站附近的「留園」食上海菜, 真係好好味,
小籠包真係有上海的水準! 不過好多食物都好油囉, 粒炸湯圓入內係可以倒D 油出嚟....

06

跟住我哋上咗大陸同事屋企, 嘩, 佢哋的六百呎真係等如我哋的八百呎,
間主人房喺香港冇五百萬嘅樓都唔洗旨意有咁大間....

睇 BB, BB 好得意啊~ 仲有另一個同事帶埋個女上去, 個妹妹又係超可愛~

夜晚約了大學同學 gathering, 返香港嗰程就激氣了,
有近的羅湖站唔去, 去了落馬州站, 由落馬州站開出的火車原來要 10 分鐘先一班,
真係火都嚟埋! >.< 攪到我遲咗成半個鐘呀, 老公不停俾老婆鬧啦!

01

多謝大家的生日蛋糕啊, 好開心!

08

有 Cora 最貼心的禮物, 唔係講笑, 一戴咗真係有D 料到, 條頸 feel 到係暖咗囉!

02

還有青青最美味的禮物, 哈哈, 肥 c 了.....

03

2009年12月26日星期六

大豐收之冬日美食嘉年華

早前有次食飯收到冬日美食嘉年華的入場贈劵,
我同波比先生只有今日係大家都得閒, 就揀咗今日去喇~

因尋晚通宵今日瞓到勁晏, 出得門口都三點, 去到四點, 人頭湧湧,
真係好好好迫..... 仲迫過暑假嗰個

即食篇:
好多 counter 唔係太多人就係賣晒, 今次即食食物冇乜驚喜......
係食咗一個台灣三色腸覺得好好味, 同我哋喺淡水食過的有過之而無不及!
砵仔糕、魚旦、同埋呢個廣島燒餅, 其實都好普通

01

上次俾人搵笨用貴價買咗D 以為出面買唔到的韓國麵, 今次發誓唔會再買麵喇!
有了上次的經驗, 我哋好有目標地買咗以下幾樣正嘢!

登登登鄧! 急凍生蠔 1kg 裝 (重死我....)
D 蠔好肥好大隻呀, 用薑蔥焗一定好好味 (流口水ing.....)

02

仲有呢款半殼生蠔, 用芝士焗呀, 一定好好味!

05

另一主角 - 松葉蟹兩隻
上次賣晒呀, 今次買到太開心!

03

還有純牛肉漢堡扒, 唔係上次間公司, 呢間仲平, 不過冇咁大塊,
係抵到波比先生要諗諗好冇買多三包

04

本來波比先生仲想買帶子刺食, 但太貴了, 俾我 ban 咗~ 唔好咁為食啦你~
我哋仲要儲錢去黑門市場o架!

2009年12月25日星期五

Busy Christmas

今日第一日假期, 好充實,
波比先生嚷著要帶我跑到南生圍, 話嗰度好多雀仔睇,
我部封麈咗兩個月的單車終於都重見天日喇!

嗰隻衰佬家吓真係跑得好鬼快, 定係唔知係咪我架單車耐冇踩 D engine 唔夠順,
全程我都踩得好鬼辛苦, 好用力踩都係行得好慢 (=.=), 追極都追唔到嗰隻波比先生......

入到山貝河範圍, 真係有好多雀呀!!

01

















如果天氣好, 一片藍天白雲的話, 呢度應該都會幾靚

03

不過條河就臭咗 D 囉.... 好多工業污水.....
點解D 雀食D 污糟水入面嘅魚都唔會死嘅??

02

跟住我哋去咗食勝利牛丸, 超好味!
佢平時 7pm 就收工, 唔係放假基本上唔會食到! 真巴閉~
04

去千色店行行玩具部, 買咗兩份玩具送俾小朋友,
我都有聖誕禮物, 係麥兜散子包, 好靚啊, 多謝波比先生!

竟然見到失傳多時的玩具洗衣機有貨喇, Hello Kitty 款, 賣 $169!!!!
今日拎得太多嘢, 下次一定要買!!

下午朋友仔謙謙來了我們家玩, 打機同俾佢玩電腦,
由三歲幾教佢, 轉眼佢已經九歲了! 已經不再是那我可以隨手抱起的小朋友了~

晚上去了肥仔家剪片和打牌, 自從返咗學之後好似都冇打過!
打到成三點幾, 一離開時忽然間先知道好眼瞓.... 老了真係唔可以玩咁夜~

2009年12月24日星期四

Merry Christmas X Love Mi 2009

今日叫了 Pizza Box 同同事一齊食, 雖然好多人都放晒假唔算好熱鬧,
雖然冇獎抽冇交換禮物, 但一班好同事傾傾偈又一齊講去旅行嘢最開心,
因為我哋成班都係旅行精!

01

準時放工, 先同波比先生去了佳人餐廳食 Pizza, 哈, 一日兩餐都 pizza,
再去新世紀影影相!
07

八點就到了紅館, 期待已久的演唱會

13

差唔多兩年冇睇過演唱會喇, 原來而家唔興用螢光棒, 改了用呢D 閃燈棒,
廿蚊支算 ok 啦! 不過過了大半的時間, 竟然 fing fing 吓成個套飛咗出嚟,
好彩冇掟到人咋 (應該話好彩我坐嗰個 block 的第一行, 前面冇人), 汗!

14

全場爆滿, 呢個 Concert 真係一票難求,
紅館裝修完後, 還是第一次重臨, D 櫈大咗又舒服咗好多喎!

15

忽然間見到有閃光燈勁閃, 用我相機有限的 zoom , 影到原來係安仔呀!!
佢坐喺成個 VIP 區最中間的位置, 證明佢的地位, 還是很重要~

17

開 Show 喇!!! 全場尖叫, 紅館的音響強勁了好多嘛?
感覺到全身都被那強勁的音樂震動到! (你去了就會明白)

19

好似好多年冇聽過 Sammi 把聲, 是否人大了, 把聲亦都沉厚了,
唱功亦有進步, 唱腔去到低音位竟然覺得有點像梅姐~

23

看著她你會感覺到咩嘢叫「天后」, 佢真係好有舞台女王的風範

24

26

呢套衫好似...... 聖鬥士........

27

30

百老匯式的英文歌

36

34

一高潮是 rock 版的福音歌, 那雷射衫真係好得!

40

42

Sammi 話今次演唱會講感情事, 但最終都係遊花園,
佢好抵死的問: 「我睇死今晚好多人都係D 年過三十, 平安夜冇人約, 好似我咁嘅中女先會一支公買飛嚟睇演唱會, 邊個係嘅話, 就同我一齊「唉」一聲啦
最後全場唔係的人就大「唉」一聲, 係嘅就反而唔敢出聲

43

之前睇報紙話安仔同 Sammi 一齊排舞會做嘉賓, 但原來今晚唔係喎,
不過, 竟然係華仔呀~~~ 全場再尖叫呀!
華仔當咗好似係自己開演唱會咁, 好 high 仲繞場去同人握手, woooooooo~

好期待有一日佢哋再做螢幕情侶~

48

52

呢張係全晚我覺得最靚的相啊!

57


55

呢個係 Sammi 極力推介的靚聲監製, Sammi 話如果佢靚仔少少真係不得了!
哈, 靚聲的人好難靚樣

59

有一環節係請了兩位觀眾上台, 每人唱一首 Sammi 的歌,
邊個唱得好就有一萬蚊的手錶~

綠色衫的人兄真係好攪笑, 佢係從四川特登飛嚟香港睇今次演唱會的,
佢一上台真係興奮到好似成個細佬咁, 好似中咗六合彩咁 high 爆, 講到唔停得口,
跟住仲拎咗部手機出嚟, 喺萬幾人面前同 Sammi 玩自拍,
佢揀咗唱「拆曲」, 哈哈, 真係唱得唔錯, 最後大獎當然俾咗佢啦!
60

最後的一首歌, 「唯獨你是不可取替」, 如果有埋安仔一定仲 lum!

61

通常演唱會都會預咗 encore at least 一首歌啦, 點知 Sammi 真係話冇就冇.....
大家賴死唔走之下, 都只係上返嚟唱咗半首「唯獨你是不可取替」,
話拜拜就真係拜拜, 有點啞咗.....

62

well, 整體今次演唱會都真係好正, 好期待下一次再來睇 Eason 呀!

2009年12月23日星期三

向京阪神出發

Yeah, 我哋訂咗去大阪的 package 喇,
鐵定三月尾去慶祝結婚三週年!

大阪的 package 普遍都比東京貴, 其實我在考試時已成日不停睇 package 的價錢,
當時都未出到三月的價, 不過早幾日都睇定了 CX Holidays 的 package,
點知因為咁啱上 zuji 八掛吓D package, 俾我發現咗有間酒店的 package 好抵!
係09年7月先開的 Hotel Monterey Grasmere Osaka,
喺正難波 JR 站上面, 又新又好似幾靚!
希望張相唔係 wide angle 的錯覺啦!
20090715-4

最正係佢 D 房可以睇到好靚的大阪夜景,
望著地平線的感覺, good good good!

20090715-3

zuji 網頁話個 promotional price 剩係做一日, 於是我同波比先生商量完畢, 就快快手 book 了!
今日再 click 返去個網頁, 嘩, 真係貴返晒!
今次真係太幸運了!

因為要避開星期六返學, max 只可去 6 日,
去程揀咗晏機, 實質只有 4 日半時間玩, 嘻嘻, 要好好 plan 行程喇!

返埋聽日就放假, 今晚打電話去元祿想訂外賣聽日 lunch 同D 同事食啦, 點知 full 晒....
打去元氣, 都 full 埋.....
好彩最後想起了 Pizza Box, 成功 book 了, 唔知好冇味呢?

聽晚睇 Sammi 演唱會喇, 好開心呢,
Merry Christmas!

2009年12月22日星期二

二人做冬

當人人都放早趕回家做冬時, 今日竟然要 5pm 去第二間醫院開會, sigh.....

開始有好多人放大假, 醫院也開始冷清清了,
在病房遇上了兩個我 OPD 的舊 case, 半年冇見, 兩個婆婆都由食得變到唔食得,
同病房第三個睇的 case 都係唔得, 連續寫了三個都要插 tube 的 recommendation, sigh.....

有一個廿多歲的癌症女病人, 尋日走了,
聽說佢今次入院時已完全唔醒, 成個病, 都好似拖拉了一整年.....
臨走時, 她接受了洗禮, 還希望她在天家有新的生活~

夜晚, 波比先生負責買食物打邊爐, 安格斯牛牛好好味啊~
122201

2009年12月21日星期一

令人懷念的日本美食

「大門橫丁」, 一聽個名就令人想起新宿和札幌的拉麵橫丁,
睇咗食評後今日去試試, 果然好正!

好彩早去到, 7pm 已經 full 晒,
叫咗招牌的蟹膏蟹肉烏冬, 十個正!!!
完全冇諗過會有一隻蟹喺個碗入面囉! 而隻蟹真係有膏o架, 唔係講笑!
個蟹膏湯底未食已經聞到好好好香, 入口真係不得了呀!

122101

另一開心係食到好好味的溏心蛋, 老實講, 喺香港真係冇幾何食到日本拉麵有真正的溏心蛋!
不只溏心, 仲整得好入味, 超正呀, 食一啖令人好懷念日本的湯麵呀!

122102

早兩星期訂的 agnes b. 仲於貨到了, 考開心!

122103

係個鏡盒同唇彩, 好鍾意鏡盒那櫻花的圖案,
明年三月, 我們又會見到櫻花嗎?

122104