布吉 Day 3 @ Karon Beach

今日走了, 活動很簡單, 就是半天的留在 Karon beach 一帶 hea
因為時差又慣了早起, 我還是在當地時間 6 點幾就醒了.....
連續三日都係全酒店最早去到餐廳食早餐的人!

食食吓, 有隻貓咪走到我腳下, 在枱腳擦擦頭, 擺出一副很冧的樣子喵喵叫, 似乎想我給牠一點食物
望望我隻碟, 我早上不愛吃肉, 只有 pancake, 蛋和炒麵......
掉了 pancake 同一塊蘿蔔落去, 貓貓都冇興趣..... (梗係啦, 邊有貓食呢D 嘢....)
好彩後來有個鬼妹有拎到火腿, 餵咗D 俾貓貓, 貓貓幾開心, 大口大口的吃~



食完早餐, 我竟忽然間肚痾起來..... 亦是我病的開始......
究竟係尋晚餐 buffet? 定今朝的早餐有問題??
吃早餐前, 我仲正常人一個的~

抖咗陣先八點, 波比先生話又要到湖邊跑步, 我也散步了一個圈, 的確心曠神怡!










仍是很大風浪~



跑完步波比又沖個涼, 跟住佢就急不及待的叫我出來玩, 我話今日冇嘢玩o架,
咁早D 舖頭都未開~

於是我們就去咗行山(邊), 一路漫無目的的行行行, 行了 3.3km 的路, 太 crazy!!!!
(其實係我哋搵唔到路出返西邊的海灘, 焗住要不停繼續向前行!)







沿路經過一個花農, 種了唔同的花, 開得好燦爛!


當我哋行到 kata beach 時, 忽然間風雲色變, 雷暴大雨乜都齊!
好彩有個涼亭俾我哋避雨!
其實真係好感恩, 如果頭先行緊山路時落咁大, 真係唔知點算好!!!



等到雨變細, 我們又要行喇, 行返酒店都要 2.1km......
點知行兩行, 忽然間又大雨返!!!! 半身都濕晒!!!
好彩見到有個 Tuk Tuk 亭, 司機好好人叫我哋入去避雨, 太感動~



就是這樣, 一朝早行了超過 5km 路, 等如由長沙灣地鐵站行到去尖沙咀天星碼頭...... 很 crazy!!!!

回到酒店 11am, 就係我之前話發現酒店已經 cut 咗我們房間的供水, 你話幾無奈....

換過件衫, check out, 去大街食個飯,
一間想去的餐廳 12pm 都竟然未開工, 其實 karon beach 一帶, 12pm 係得好少舖頭開咗....
於是求其入咗間啦, 食物 ok 啦~



1pm 司機嚟接我哋去機場, 我在車上瞓到死豬咁, 行咗咁多路, 咪話唔攰! 而且開始愈來愈病.....

去到機場, 這機場好細, 得一個 counter 負責我哋班機的 check-in
等好耐條隊都唔郁, 頂, 唔係嘛, 前面有D 大陸人D 行李超重, 因為 AirAsia 係吓吓都計錢,
D 人又唔肯俾錢, 於是開咗隻喼逐件衫咁拎出嚟幫件行李減磅! 後面就幾十人等佢囉!
真係 cheap 到爆!!!!

覺得唔對路, 發現隔離條已 online check in 的隊短好多, (但我哋今次冇帶電腦 online check in)
又發現原來後面有自助 check-in 機可以 check-in 完而排短嗰條隊o架!
我即刻走去攪, 點知攪完之後, 已 online check in 的隊又變得好長, 好無奈......

最後, 都係波比先生一路排住原本的隊快D, 唉......

最後, 上到機的過程已經唔想再提了.......
這次的旅程, 「太」難忘.....

布吉 Day 2 Patong & Seafood Buffet@ Holiday Inn

出完島, 返酒店洗白白, 點知執房的阿姐才剛剛整理緊我哋的房間,
於是去了酒店的泳池 hea 咗陣, 有好多外國人在曬太陽~



洗完白白, 已是二時多, 出發去 Patong,
第一次在布吉坐 Tuk Tuk, 索價 300 baht 由 Karon Beach 去 Patong, 其實有點貴, 不過懶得議價



去了人氣的 No. 6 Restaurant, 又是泰菜, 這裡的冬陰公落足料, 好好味, 不過好辣!



跟住係行街之旅, 先去了帆船商場, 那裡都是一些大路的舖頭, 冇嘢啱買.....
反而是行家樂福最開心, 買了唔同的泰式醬料返香港, 仲有些飲品、水果~





跟住係行行 Patong 的大街, 沒有高樓大廈的地方, 慢慢閒逛,
見識了酒吧街, 沿路滿是 massage 同 book local tour 的舖頭



行到攰, 走到 Patong beach 坐坐, 很 hea, 放假就是應該咁 hea 嘛~ :P



五點幾, 開始黃昏, 有人玩降落傘、跑步、踢足球
但唔知係咪因為呢幾日都係落大雨, 海灘的浪很大, 根本不適合游泳~





在這三日裡, 很難得見到的少少藍天, 不過都好感恩, 進行重點活動時都冇落大雨~



等呀等, 終於等到 7pm, book 咗枱去 Holiday Inn 食 Seafood Buffet,
那裡環境一流, 半開放式, 外面就係泳池同椰樹林



其實這個 buffet 唔係太多嘢食, 有點失望 (可能一直同緊 Bangkok 的文華東方比較),
因為主打海鮮, 就真係一D 豬/牛/雞都冇.....
甜品更是超失望, 超求其非酒店水準....

不過如果你愛吃海鮮, 都可以值回票價的,
生蠔、燒大蝦、枇杷蝦、蟹、魚、魚生、青口、魷魚沙律都有!
其實冇乜特別煮法, 不過鮮味取勝!

一路食期間, 有人在海灘放煙花同孔明燈啊~

本來我都 plan 咗去放孔明燈, 不過玩咗成日已經太攰, 食飽飽就返酒店休息了~

終於都捱完呢個星期

呀~~~~~~~~ 終於都返晒五日工可以放假抖抖喇~~~~~~~~~~

呢個星期真係唔易過.....
先係頭幾日都病, 日日作悶想嘔, 日日要搽白花油去令自己冇咁想嘔 (老老實實又真係 work),
連病人都問我: 「姑娘妳搽咗白花油呀?」
「係呀, 我想嘔呀」
「咁仲返工?」
「唔返工我都唔知幾時先有時間再見你....」

我們的 dept. 走了一個人, 即是少了 20% 人手.....
人人都已經好努力的睇 case, 希望把對病人的影響減至最低,
我一個上午 9am-1pm 都全部 book 滿晒 out-patient, 真係去廁所都冇時間.......
每日放工望望聽日的時間表, 又係連續八個 case..... 真的得閒史都唔得閒病........叫我點請病假....
不過曙光終於來了, 就嚟會請人了, 希望兩三個月後會有新同事啦!

呢個 trip 返嚟後, 在回程機上病緊的恐怖情況不停在腦海浮現, 真係好有陰影
對布吉同 Airasia 都好有陰影,
一向慳家的老婆就對老公講:「我哋如果去北海道呢, 我都唔會貪平坐 HK Express 喇, 我寧願俾貴D 坐返國泰」
「吓, 妳終於都明白呢個道理喇」
「咩o者, 咁人哋一向都係諗住慳 D D , 有時差一兩千錢, 夾埋就又可以去多個 trip o架喇」
但慳家老婆都不再慳, 證明呢次事件對我的影響是多麼大!

呢幾日睇緊喺書展買的北海道書



台灣出的旅遊書, 太好看, 是帶你去感受一個地方,
不是不停的終極食玩買.....

當中有好多好美的相片, 很享受閱讀的過程~



見一個廿幾歲的腦瘤男病人, 含著食物唔吞, 第一位看他的同事以為佢係差到冇意識吞 (腦外科病房太普遍)


我見了他, 覺得他是有意唔吞, 問佢:「叫你屋企人嚟餵你食好唔好?你要吞喎」
他點了點頭
我就話:「哦, 有冇攪錯呀, 屋企人餵你就吞, 我餵你就唔吞, 揀人餵!?! 即係好唔俾面我o者!」
他忍不住笑, 估唔到佢一個 dull 樣原來還會笑

今日約見了家人, 且, 真係蝦姑娘嘅, 激死呀~~~~ 雖然家人餵都有時唔吞, 但都總算可以俾佢食到少少~
咁後生, cancer 割了一大片腦袋, 或者俾我都會好 depressed .......

布吉 Day 2 - 蛋島 Egg Island

第二天, 約了車子 7:15am 便來接我哋出島,
車遲了, 再兜多兩 group 人, 差不多 8:30am 先去到在東岸的碼頭



不要忘記帶麵包去餵魚魚啊!



與我們同船的, 有一 pair 大陸人男女, 有兩個泰國人 family,
上了快艇, 我覺得自己算是很勇敢, 因為我真係好驚坐船拋拋吓離心力的感覺, 怕得想死!

好彩, 船只是上下拋, 不是我最驚的左右搖擺, 還頂得順!
不過三程船我都死霸住個頭位, 全程雙手扶實晒前面, 應該成船人都睇得出我好驚!

漫長的 20 分鐘船程, 終於都到了第一個島,
嘩, 那是發夢才見過的景象, 清澈的海水、沙灘、太陽傘........ 太靚了!



很很很渡假 feel 呀!!
這些沙灘椅都係要俾錢租的, 150 baht 兩張, 但係職員唔老實, 我俾了 200 baht 佢竟然冇找錢俾我?!



我們落水了!! 用麵包樽嚟引D 魚魚, 引到好多魚呀~~~~ 超開心呀~~~~





玩咗差唔多一個鐘, 我哋就出發去第二個島,
本來中間仲有一 part 係喺海中間掉你落去浮潛的, 但當日時陰時雨, 海面有好大浪,
我喺岸邊浮潛都真係驚驚地, 邊有可能喺海中間跳落去?!
個泰國人 family 就提出 skip 咗呢個行程, 大家都贊成, 於是直接去了第二個島

不過呢個島勁多人, 勁多香港人大陸人旅行團...... 好嘈囉...........
同埋勁 O 咀, 不停見到D 著三點式的大陸阿嬸香港阿姐喺我面前,
 瞓晒身落個沙灘度擺D 好難頂嘅 pose 叫人幫佢影相,
仲帶埋晒絲巾嚟一路吹一路影相, 真係睇到我哋目瞪口呆!

呢個時候, 個 tour 的導遊不停切生果送埋嚟俾我哋食,
仲有三文治汽水, 服務算唔錯!



呢個島太迫人, 浪又太大, 水又較濁, 相對冇咁好玩,
不過都有好多好多魚魚, 都算係玩得開心!



12pm 我們就回程了, 終於都搭完三程船, 真的鬆一口氣!!!!
對一個好怕搭船的人來說, 去一次, 玩過就好了~
我知道其他島的水會更清更靚, 但因要搭的船程會更遠, 所以我諗我都唔會有機會去架喇~

離開時, 導遊拿了出發前替我哋影的相, 唔係一張相, 係一隻有我哋張相嘅碟,
哈, 都影得幾靚啊, 我見到波比先生雙眼發晒光, 就知道佢會買啦~
150 baht 都唔算太貴, 總好過尋日去睇笨象時, 佢夠膽死一張相索價 500 baht, 所以佢完全冇生意~

布吉 Day 1 Mali Seafood

由 Central Festival 返到酒店, 都成 5pm 了~
窗外的景致: 遠望是海, 近望是湖, 酒店就在一個湖前面,
早上吃早餐時, 見到不少外國人在湖邊跑步, 很健康又寫意,
於是波比先生也不甘示弱, 話要落去跑個圈, 跑了半個幾鐘, 真係服咗佢!



洗白白後, 瞓咗兩個鐘 (尋晚瞓得 5hr 真係好攰!), 就起身去食飯!
過條馬路就係喇, 呢間 Mali Seafood 就係喺正湖畔, 個 view 同裝修都好渡假 feel~~

全間餐廳都係外國人, 人人都開支 wine 好有情調咁!



有西餐同泰菜供應, 我們當然都係點泰菜啦~
呢個炸蝦餅, 用了超多蝦肉, 有點咸香, 勁脆, 超正!



蛋蛋炒蟹



海鮮炒河



胡椒炒蝦, 隻蝦炸得脆脆, 又好多蝦膏



所有食物都有 10% off, 埋單都係 660 baht, 即係 HKD 165 咋, 好抵~
雖然係露天, 但不停都有好清涼的海風吹過來, 實在很享受這種天然的感覺,
如果是好天的話, 這裡還可看到日落, 單單是環境, 已經值回票價! 推介!

布吉 Day 1 Phuket Town

玩完 Island Safari, 只是 12:15pm, 本來是有車接我們返 Patong,
但我即管問問職員, 如果俾錢可唔可以直接車我哋去 Phuket Town
(因為根本個園地就係喺 Town 嗰便, 但接送的車輛又唔肯俾我哋喺 Town drop-off)
有個哥哥仔話 200 baht 就可以, 嘩抵啦, 又平又慳返唔少冤枉路的時間!!

佢車到我哋去 Natural Restaurant, 食了第一餐的正正泰國菜!
嘻嘻, 你睇佢哋兩隻嘢幾歎!



40 baht 一隻的生蠔, 正! 唔似我哋喺香港食開的咁腥, 而且加泰式醬汁真係另有一番風味!


左上是 Sea asparagus, well, 其實我哋叫嗰時都唔係好知咩嚟,
而家上網睇返都唔係好知咩嚟, 但如有D 人所講, 味道似鮑魚/ 貝類, 好鮮味!
左下有我最愛的冬陰公呀, 太開心了~ 等咗呢一口正宗冬陰公好耐!



泰國椰青, 實在太清甜了~~ 你睇麥兜個樣幾衰, 佢話唔捨得走喎!


呢度環境好得意, 好有原野 feel! 呢一餐都係食咗唔洗 HKD200, 抵!



之後我們依著地圖, 行了去 Old Town,
那裡有些古舊的房屋, 濃厚歷史色彩的大宅門, 是個拍照的有趣地方~







行經餅店, 見到呢幾個蛋糕, O 晒咀!
蛋糕上面竟然有張相, 真係好爆笑! 我話到波比先生生日, 我都要整返個咁嘅蛋糕送俾佢!



滿足完一輪拍照欲, 就展開我們 3 km 的「行路去 Central Festival 」之旅,
好多人都會搭的士, 但我們有的是時間, 何不慢慢行去, 感受一下當地人的生活?
不過當然, 路上路邊都是沙塵, 來往不絕的汽車吹起滾滾沙塵而要硬食的感覺, 絕對不是太好受...
Anyway, 行了三公里都是有趣的過程, 途中見到這棵植物, 佢大咗係咪會變菠蘿?



好了, 終於都到了, 好彩天氣大多是陰陰天, 路程不算太辛苦



但我們都行得有點累, 有藉口找間咖啡店坐坐!
可自選拉花圖案的 Cappuccino, 仲有字母餅送咁得意?!



我的 Mocha 冰冰, 涼透心啊~~~


Central Festival, 老實說冇咩好睇, 大牌子的貨品, 貴香港好多~
那些呃遊客的無聊工藝品, 我想你都唔會買~

之後去了重點行程 - Big C 呀~~~~~~~~ 等咗好耐喇~~~~~
不過今次冇掃零食了, 因為香港的百佳 SuperStore 其實有好齊的泰國零食賣, 真係講得出都有...
唯一買了香港真係冇的咖吔醬, 搽面包好好味o架~ 仲有買水果啦~

喺 Big C 內的 KFC 見到呢個小新, 可惜冇得換~



滿載而歸, 搭的士返酒店 lu~