2012年9月30日星期日

[愛跑步] 超正大棠山路~

早兩日提過, 波比先生咪約咗賣車位俾我哋的鄰居去跑步嘅,
今日我 5am 就失眠, 於是一齊去湊熱鬧
鄰居揸車車我哋去大棠, 熱完身就起步, 佢哋來回跑 18km,
我今日就仲好攰, 獨個兒行山, 約好時間見

02

原來呢度就係麥里浩徑同埋大棠自然教育徑的部分, 小學中學好似嚟過燒嘢食

03

一個人行, 播著李克勤同吳克群, 吹吹秋風, 聽聽雀仔叫, 寫意到爆!

04

05

原來呢度有好多紅葉, 過一兩個月一定好靚, 到時自己有車, 揸嚟都好方便

06

行到呢度, 見到呢個牌就向青山公路方向行, 波比先生佢哋的折返點原來在大欖,
wow, 元朗到大欖!

08

這裡附近就是大欖水塘

09

10

11

我七點幾開始行, 已經見到好多人回程緊, 勁, 真係晨運!
大家說一聲早晨, 打破了香港人的 cool 性情~
仲見到唔少人練跑, 又見到好多人踩越野單車, 原來呢度係越野單車熱門路線
又見到好多人放狗, 仲見到兩隻馬騮仔添~~

返到起點, 很舒服的行了 9.5km, 遠望到全元朗的景色, 很壯觀
呢度空氣超好, 行山跑步都真係好正呀!! 必定要再嚟呀, 有車真係好方便呢, 可以去好多未去過的香港地方了!

12

2012年9月29日星期六

[愛行山] 征服全港最高之大帽山

今日又有行山團, 超齊人, 有 17人呀!!!
相約在荃灣可風中學起步, 向城門水塘進發!

01

上到城門水塘範圍就好多馬騮

04

好天, 不過大霧

05

行咗兩公里, 去到麥七起點了, 上一千幾百級樓梯......

08

中途喘到影唔到相, 去到呢度先再影, 已經好高喇!!下面唔知係荃灣定葵芳

09

前望就是第一關: 針山
今日要過三個山, 針山、草山、大帽山, 一個比一個高..........

12

好辛苦, 終於都捱到針山頂喇!! 真係好高!!

15

海拔 532m!

18

再行~

20

哈哈, 見到有人帶一大兩小狼狗, D 狗狗行到係咁 panting, 今日真係好熱呀仲, 係去到山頂位先有風~

21

向草山進發~

22

今日見到好多牛牛, 同好多牛屎!

23

辛辛苦苦行完第七段, 去到個亭休息, 見到隻肥馬騮, 不停執我哋食剩的食物來食, 肥死佢呀~~

27

再行, 去到好開揚的山頂位

32

在一個又一個的山頂上行行行

35

可能行得太激, 抽筋!!! 第一次做運動抽筋......
好彩有好多團友照住, 又有好好人的行山人土借咗支薩隆巴斯俾我噴吓, 抖抖再行
點知行到差不多草山山頂, 又抽過, 仲要兩隻腳一齊抽, 真係好大鑊.....
拉咗一陣筋先敢再行, 只可用慢速行囉.......

37

藍天背景的牛牛相, 好正~ 想不到在香港可以影到咁嘅相~

45

捱了一後堅斜的斜路, 應該有 40度的斜, 終於到山頂了, 十個感動!!
遇上了幾個日本人, 一齊開開心心影相, 點解民族要有仇恨呢?

如果大家在九龍荃灣望向大帽山, 見到呢個天文台波波, 我們就是到過這裡!
海拔 957m 的山頂啊!!!

50a

唔好開心住, 落山都好 harsh.............
不停的髮夾彎, 好長好長.....

52

有人行 shortcut , 但真係好斜, 怕怕, 我都係行大路~

54

55

行完第八段, 行落川龍搭 van 仔, 完成 20km 之旅, 全程七個鐘
好佩服D 團友仲可以行, 行去元朗添呀, 好勁呀!!

我哋去了食車仔麵, 份外好味~

57

2012年9月28日星期五

[愛美食] 荃灣正宗澳門豬骨煲

腸胃炎到今日下午都係食緊粥, 點知老公放工時話不如去打邊爐, 枱都 book 埋, 有人完全唔記得自己個老婆仲病緊.....

去了這間叫正宗澳門豬骨煲 的打邊邊, 食物又意想不到的好喎,
用料新鮮, 好足料, 仲有D 特別嘢, 好似駝鳥肉、蝦滑釀油炸鬼、自己包的餃子,
但見到一枱食物, 都真係唔多啱我食...... 我寧願食個米粉, 但又已經叫得太多嘢, 唔想浪費食物, 都係冇叫了
食完....... 胃痛加劇......... oh.........

092801

車位成交了!

呢幾日腸胃炎, 又痾又作嘔發燒........
難為了老公要陪老婆食粥餐.....

本來前晚約了賣車位的主人傾價, 我病到落唔到床冇去了, 由波比做代表,
好攪笑, 波比先生就咁就識咗個跑步朋友! 原來呢個賣家都係跑友, 仲係好勁跑全馬的!
車位在合理價位成交了, 我們好開心, 安樂晒,
相信賣家都好慶幸找到我們這個買家, 因為佢要搬, 個車位都急住放同埋套現, 而且我哋又唔趕住用個車位, 即使賣了俾我哋, 我哋都容許佢用多幾日直至佢 ready 搬走,
真係一個皆大歡喜的成交!

最攪笑賣家仲問我哋有冇興趣買佢八百幾呎的單位,
哈...... 如果前幾日中咗一億就會囉~

然後佢仲約波比先生星期日去跑步, 係揸車車佢去附近好靚的郊區跑, 有車真係方便啊!
希望我哋有車之後, 可以揸去D 好靚嘅地方跑步啦~ :D

十一月開始我就會搵師傅補鐘操車, 哈哈, 住元朗的朋友小心!

2012年9月24日星期一

有車冇位

今日波比先生負責繼續處理車位事宜

打去物業管理處, sorry 已經冇得租, 要排三十幾個籌先到,
想買亦都冇得買, 因為早幾個月先啱啱賣咗一批!為

我都真係 O 晒咀...... 之後諗係咪要泊喺附近的 $500 爛地, 或者問住村屋的波比同事租佢門口塊地.....
再唔係睇埋新元中, 西鐵站下面, 水車館里一帶的車場,
但真係好諷刺, 有車是為了方便, 但要行咁遠攞車, 好似本末倒置.....

之後去會所睇睇 notice board 有冇人私人出讓, 算係好彩, 睇咗兩個 post,
跟住就同波比去車場視察環境

A 位: 租的, 近大路, 應該好易泊, 但我們停車場是在地底, 個位係接近一大個連接地面通氣的窿, 旁邊仲有棵樹,
落大雨其實會撇濕晒車尾, 亦都可能會有雀仔喺附近痾 s.......

B 位: 買的, 價錢算合理, 個位單邊較入, 冇以上問題
不過太攪笑, 佢係喺兩條柱中間, 問過師弟點睇, 佢話可能新手時難泊D D,
但唔洗車貼車 --> 唔驚我整花人哋架車, 至多係自己撞花自己架車

同波比商量之後, 覺得呢個時勢, 可能買都係一個唔錯的選擇,
因為覺得租車位同租樓一樣, D 嘢唔係自己, 好似有D 唔實在,
又肉隨鉆板上, 如果業主話加租咁唔通唔租咩~
況且呢個年樓, 車位也可當是投資保值的一個方法,
一個車位, 已經比我哋買樓時升咗一倍了!

所以呢, 聽日打俾車位主人, 希望成交到啦 :P

2012年9月23日星期日

我們做車主了!!! 日產 Note 2013~

哈哈, 真係好開心呀, 我們榮升車主了!!

呢個頭年仲喺度睇緊樓, 但D 樓升到癲咗, 癲到冇乜可能換到近D 返工,
再者, 睇二手樓時, 發現買三四百萬的樓, 淨係厘印費都要 $8-9 萬, 仲有買賣各幾萬經紀佣金,
加加埋埋都十幾萬, 買樓愈來愈覺得唔抵同冇可能.....

當近幾星期不停地因為返 rehab 醫院搭唔到車攪到好忟,
去西貢行山又要六點幾起身, 同埋塞車走唔到, 就覺得係咪應該買架車了!

其實都諗咗好一段時間, 冇車的生活當然唔係唔得, 但搭車返工真係用得太多時間了,
而養車其實都真係唔平o架, 一個月三四千都要, 我返4 日的 acute 醫院又唔洗旨意有車位, 都係返 rehab 醫院嗰日先會揸, 所以計來計去都好似唔化算......
成日諗, 養車的錢, 其實夠我一年去幾次旅行~

不過, 近來又再諗諗諗, 考慮平時的方便程度, 最後還是認真的睇睇~
睇過 Honda Jazz, Toyota Yaris, Nissan March, 無意中發現 Nissan 今個月新出架 2013 年版 Note,
睇過晒 Specification 都好唔錯,
http://orientaldaily.on.cc/cnt/lifestyle/20120922/00302_001.html
最正係內籠非常大, 後座都坐得好舒服, 又好慳油,
今日特登去咗屯門睇 road show, 新車包埋晒音響防盜, 真係安心好多
Sales 仲俾咗少少優惠, 我同波比先生坐低諗諗, 又打電話去問問師弟意見,
最後, 拍板了!!

01

應該12月頭可以攞車, 真係好緊張呀!!
已經諗定晒要揸車去邊度玩~
不過返到嚟睇睇屋苑的車位, 大鑊, 點解咁 full 嘅........ 聽聞近來好似冇得租, 要 on waiting list
唉, 係就閉喇, 有車冇位?? 聽日管理處開工要快D 打去問吓先!

2012年9月22日星期六

[愛跑步] LSD + 麥徑第十段

嘩..... 我都懶咗足足一星期冇做運動, 真大鑊......
冇辦法, 因為真係晚晚都好夜返/有嘢做.....

今日慢跑去屯門, 之後就試新路線, 跑上麥理浩徑第 10 段,
多得睇咗本行山書, 先知道呢條路線, 其實就是在何福堂中學旁邊上, 指示非常清楚

02

一路跟住黃色欄杆行就啱, 波比仲有力跑上斜, 嘩, 我就唔得喇, 行好了!

03

04

上斜的路其實唔係好多, 但都已經教人身水身汗, 沿路見到超多行山晨運的人
第一次從這個角度看屯門~

06

呢條路真係非常之正, 全是平路, 清新的空氣, 好過跑街吸汽車廢氣~
原來呢度有燒烤場, 真係住咗廿年屯門都唔知囉!

08

見到黃金海岸喇, 去到掃管芴, 就落斜經愛琴海岸去到黃金海岸, 仲約埋阿姨食早餐~

09

下午的活動, 就是上肥仔家學扭汽球, 學唔難, 但要做得靚真係要練習多D~

10

11

夜晚第一次食有名的莎樂美餐廳, D 扒真係勁勁勁大份, 夠我食兩三餐......

12

很喜歡這種懷舊的杯仔雪糕~

13

2012年9月21日星期五

[愛美食] 旺角佳人餐廳

又忙完一星期了, 因為要帶新同事同埋自己放工後又去上堂, 閒日真係冇時間 update blog~

今晚好朋友相約食飯, 一向都係去旺角, 因為就返大家放工同返屋企,
但旺角真係食到冇嘢好食, 又度度都好多人, 好吃的都有排等位.....

忽然想起旺角火車站天橋下的佳人餐廳, 都好一陣子冇去了,
好處是冇乜人, 唔洗等, 食物都普遍 ok 的~

第一次叫咸豬手, 唔錯, 如果個皮再脆D 就更好~
pizza 係例牌叫的, 很足料好味, 羊架食過幾次都唔錯~
如果唔想迫, 想靜靜地食個飯, 這裡是不錯的選擇~

01

2012年9月17日星期一

[愛美食] 文華餅店

今日有個老公去了文華東方酒店, 買了這個寶盒給老婆

01

我們在合力清潔家居後, 攤梳化歎蛋糕, Opera 很有層次感, 太好味了!
芝士蛋糕是招牌貨, 水準穩定, 食完令人想起文華的 buffet, 今年生日要早 D book 位喇~

02

2012年9月16日星期日

[台北遊記] 最後一天的動物園及貓空纜車

最後一天的台灣之旅, 在台北想不到去什麼景點, 於是舊地從遊, 重返我們第一次搭飛機去旅行時去過的木柵動物園

73

75

和墾丁一樣, 到處都是蓮霧樹

77

上次來似乎 miss 咗睇豬豬

78

牠們的豬欄就在蓮霧樹下面, 果實熟了就掉下來, 豬豬就可以食, 幾好的 design 喎!

79

另一隻豬知道有嘢食就起身了!

92

一齊食, 好味!

94

仲有草泥馬, 佢個樣真係好卡通!

95

有上次的經驗, 今次我哋先坐小火車到最高點, 再慢慢行落嚟, 以免行到死

97

黑熊呀~~~

100


101

102

睇咗好多大班動物, 好開心, 去食個牛肉燒餅先!

104

105

估唔到重遊都玩咗兩個鐘~ 之後就去搭貓空纜車, 人人都等透明車箱, 我就冇興趣了~

107

愈來愈高喇

109

110

搭咗好耐......

111

終於去到貓空, 但又冇咩睇, 想行山又唔夠時間, 影兩張相就走了~

113

116

之後我哋搭車去中正紀念堂站, 去了一家老字號的杭州小籠湯包
麻辣臭豆腐, 非常正!!! 兩件實在太少了......

117

小籠包, 價錢唔貴, 又皮薄餡靚, 好多湯汁, 非常讚!!!

118

仲有鍋貼, 好脆呀! 十分鐘都唔洗我哋就清碟了, 太肚餓喇!

119

去了蔡瀾介紹的南門市場買豬肉紙, 真係好多款式~

之後, 去埋最後一站, 西門町的蜂大咖啡

120

121

用盡最後的時間, 買了波比最愛的阿宗麵線, 仲有日本咖啡同埋世運食品的芝士蛋糕,
去到機場再開餐, 平安地搭 9pm 的機回港了~~

不過又有小插曲, 就是拎行李時, 我發現我個行李箱俾人打開過,
密碼俾人 reset 了, 仲要個拉鍊扣扣唔返入個密碼鎖!! (因為密碼都改了)

我都唔知點算好, 上港龍個 website 睇佢竟然 website maintenance 囉!!!
我又 book 咗的士返屋企, 所以就走了~

第二朝研究咗一段時間, 同朋友傾過又上網睇咗D 資料, 先知道可能係海關開過, 但又唔明佢點解要改我個密碼,
又認識到有一種叫 TSA 的鎖, 係海關可以用佢嘅方法開到, 唔洗爆個你個行李,
我打去港龍問, 佢話其實我應該未出大堂前, 去HIS 的行李櫃位報案, 而家走咗有D 死無對證.....
但佢又好好, 叫我影D 相俾佢睇, 佢都覺得 ok, 出咗個 quotation 俾我 claim 保險

今次係買豐隆旅遊保, 因為上次的浸 iPhone 事件, 朋友推介我買呢間, 因為佢逐件物品的賠償額高,
點知攪咗成個月, 佢話呢D 通常都整到, 賠返 $100 俾我咁大把..... 真係有點嘥氣.......

Anyway, 今次台灣之旅很順利的完結了, 每次去都覺得台灣是一個很好的地方,
人情好, 地方美, 美食多又平,
下年睇吓我哋會唔會又去啦~ :P


台灣遊記 2012 之高雄墾丁台北
[高雄遊記2] 金礦咖啡、自助新村、瑞豐夜市
[高雄酒店推介] 康橋商旅六合夜市中正館
[高雄遊記] 壽山動物園 x 港園牛肉麵
[墾丁遊記] 恆春、港口吊橋、龍磐公園、台灣最南點 x 包車導遊推介
[墾丁遊記] 海岸飯店 - 墾丁大街夜市
[墾丁遊記] 鵝鑾鼻
[墾丁遊記] 墾丁森林遊樂區 x 放牛牛
[墾丁遊記] 阿興生魚片 x 貓鼻頭
[墾丁遊記] 月光咖啡 x 煙花 light painting
[墾丁高雄遊記] 海生館。東港華僑市場
[高雄遊記] 咖啡林咖啡。夢時代。花月嵐拉麵
[高雄遊記] 第五天打風日
[台北遊記] 超正上引水產 x 台北美食
[台北遊記] 花博會場 x GaBee 冠軍咖啡 x 輔大花園夜市
[台北遊記] 最後一天的動物園及貓空纜車