2015年1月30日星期五

2015 年1月 BB 展血拼 x QE 第一次見醫生

今日小豬嘜 26 週大了, 真係不知不覺, 又過了一個月,
仲有大概三個月的時間, 我們就見面了, 真係愈來愈緊張
今個月個肚極速增長, 個肚臍而家仲突咗出嚟, 好攪笑........

今日特登請咗日大假, 因為下午去 QE 覆診, 上午就想去 BB 展行吓
去 BB 展原來有攻略的, 好彩事前上網做定功課!!

1. 先上荷花 website 睇定 floor plan, 睇定有咩平嘢, 劃低要去邊個 booth 買
2. 印定已有自己姓名電話地址 email 等資料的 label 紙, 去到萬一要填資料換禮品時, 一貼/ 一釘就得, 唔洗填到手軟

我 10:05am 就去到了, 當時都未算好迫, 今次喺 Hall 5 攪, 原來算係小規模咋
入場前要買埋本 coupon book, 有D booth 要用 coupon 先換到禮品
一入場, 就去晒D 大牌子 booth 度換嘢, 原來換禮品都分好幾種方法:
1. 用 coupon 填資料
2. 就咁 like 廠商的 facebook
3. 又要填資料又要 like facebook, 有D 仲要 share 埋先得!!

咁多個牌子, 係惠氏最闊綽, 送一大罐媽媽奶, 仲有八粒藻油丸, 加埋都成二百蚊
但我又唔多飲..... 又成 1kg 咁重..... 仲有美素佳兒都係送媽媽奶, 我已拎住差不多 2kg 去行.....

另外思詩樂同埋 Goo.n 尿片, 只要 like facebook 就送, 唔洗填嘢, 即係你唔怕羞可去十次拎十片
有人真係拎咗好多o架!

03

今日真係好失策, 我去之前唔知道原來好多 booth 都唔可以簽卡, 身上只有 $800 就去
買完一樣嘢, 已經冇咗三分一........ 最後攪到好多嘢想買都買唔到 T.T

朋友推薦我買順順兒的濕紙巾, 係平過護協少少添, 不過買完返嚟 check 吓網上訂原來都係差唔多
訂滿 $600 有送貨, 但只有星期三五送新界, 查實我都唔知夾唔夾到時間收貨, 唉, 只係訂咗先算
相中的是贈品, 即自己拎走, 令我個好重的袋更加重......

另外 join 了Kinetics 的兒童疫苗計劃, 即係幫 BB 打多幾支政府唔包的針
http://www.kinetics.hk/vaccine/baby/plan.html
今年已加咗少少價了, 我 join 咗 $4500 的 plan, 送一支成人流感針,
哎呀, 我早兩日先叫波比先生去咗打........ 蝕晒喇............... (有人成日病囉, 為咗一家大小, 迫佢去打咋)
仲送了一 set Mustela 同一個學習杯

04a

之後的是自己俾錢買的, 都比出面市價平,
母乳圍巾 $50 真係好抵, 我見有D 舖頭賣到二三百蚊, 一塊布咋喎, 我一路都唔明點解咁貴囉!

仲有訂咗好多思詩樂的乾棉同洗衣液, 洗衣液出面賣 $68, 會展價 $40 咋, 真係好鬼抵!!!

02a

之後就是小豬嘜的靚衫仔喇! 好開心呀, 買了好多粉紅色好 cute 的衫仔被仔俾佢
可惜我冇 cash, 又冇力拎更多....... 否則應該不只咁多

01a

行到 1pm, 其實有D 舖頭我都未仔細睇, 就要走了, 2pm QE 覆診呀........
拎住咁樣的兩大袋, 真係好重, 舉步維艱........
1:40pm 去到 QE, 好彩仲有時間俾我喺 staff canteen 食個光速飯先去覆診

IMAG2408


之前幾次來 QE 都只是見助產士, 今次係第一次見醫生咋,
等了一個鐘, 但其實入去到如朋友所說只是聽一聽 BB 心跳, 摸吓個肚就走得, 前後不用五分鐘.....
之後的覆診也會如是, 政府嘢係咁喇, 不過今日醫生 refer 咗我去產前運動班, 都幾好嘅......
又要拎住呢兩袋嘢, 行去柯士甸站, 再由元朗站行返屋企...... 真係好漫長..........
終於都長征完畢了!! 我諗人生也只會去這一次見識見識吧~

2015年1月25日星期日

2015 渣打馬拉松 - 晨咁早的半馬挑戰組

轉吓眼已一年了, 又是渣馬的大日子, 不過波比先生唔爭氣, 病了成個星期, 攪到今日差D 冇得跑
波比先生今年報了半馬挑戰組, 佢就話因為好早所以寄行李輪廁所都好快,
但我個人覺得真係太太太早了,
5:30 起跑, 4:30 要到尖咀, 3:45 要出發, 2:45 要起身.........
跑一個半馬, 2:45am 要起身, 即係差唔多冇瞓過, 實在太影響生活了!
喺日本跑馬拉松, 九點起跑, 可施施然六點先起身, 實在相差太遠

波比起身時, 我又被嘈醒了, 所以我都係 2:45am 就醒了 T.T

波比出發後, 我五點幾都出發了, 預定七點前去到維園睇波比衝線,
喺糖街轉入維園的路口, 發現到一個冇乜人的影相位, 實在 very good 呀!
最後波比先生 1hr37min 衝線了, 病住 PB 唔到, 唔緊要啦! 人生還可以有很多很多場比賽~

05

之後去食個早餐, 等跑全馬的元朗跑友,
今年最後一段路轉咗跑軒尼斯道, 感覺開揚好多~

IMG_2884

翠華的早餐, 大滿足!!!
吃過早餐, 等幫跑友影相, 可能因此仲係好早 (未到九點), 街上冇乜人, 好容易有個好位,
可以幫跑友影到好靚的正面相~

IMG_2886

影完相就回家了, 搭 968 時見到沿路仲有好多跑手呀~~ 大家都加油啊!!

IMG_3045

希望波比先生快D 好返, 佢下個月要去東京跑著名的東京馬拉松了!!
撞正農曆新年, 機票貴到癲!!!
但東馬實在好難抽到, 兩年前佢抽到過, 但嗰年咁啱二月我哋已 plan 了去北海道雪祭, 所以放棄了
今次又抽到, 而家我馱小豬嘜又算穩定, 就叫佢放心去吧!
唉, 話晒東京都真係近近地福島, 我同 BB 點都唔會去了, 未來十年也不會, 所以難得有機會, 佢想去就自己去啦~

不過今次係波比先生第一次一個人去旅行, 做老婆的都咪話唔擔心,
平時所有行程, 搭車, 食嘢買嘢都係我 plan 的, 佢從來帶個人去就得!
今次阿大爺一個人去, 會有咩事發生?? 哈哈, 真係唔知!
不過東京點都算係好城市, 佢都係去三日啫, 應該攪得掂掛?
而且我第時對小朋友要學習放手, 對老公都一樣啦, 唔應該幫得佢太多
佢上到網又 whatsapp 到我, 點都唔會盪失路返唔到嚟掛?
佢此行仲有另一大任務, 就係幫我掃 BB 嘢, 哈哈哈! 希望佢可以完成任務啦!

2015年1月24日星期六

[愛美食] 合一咖啡屋 x 天台 BBQ

星期六, 第三堂 QE 的講座, 聽完就去咗行護協, 嗰度如傳聞所講, 啲 bb 用品真係好平啊!
跟住喺附近搵食, 途經一間叫合一咖啡屋的餐廳, 我記得喺 openrice 見過佢都好多好評, 見環境又唔錯就入去試試

點了兩個 set lunch, 個西蘭花忌貳湯好飲, 不過咸咗少少

IMAG2393

兩個主菜, 水準都唔錯啊!!
我的蕃茄三色椒扁意粉, 好多茄醬, 三色椒配料也多, 感覺好健康也合乎我的營養要求啊!
波比先生的牛尾也不錯!

IMAG2394

夜晚去了同事屋企 BBQ, 第一次見識用風筒透爐原來係好得o架!!!
一班人燒燒吓吹吹水, 實在很快樂, 可惜明天渣馬要早走, 期待下次 gathering 啦!

IMAG2398

2015年1月23日星期五

[愛美食] 元朗新泰菜 - 亞萊嘜嘜

今日放大假,又係打掃,仲有收電器攪傢俬
新的洗衣機送咗嚟喇,好開心,
舊嗰部用了十一年,洗得慢又嘈
呢部 Whirlpool 7080 又大咗,洗一個鐘就洗完,又靜
用了一次已經好滿意!!

IMAG2380

今晚 happy Friday 出街食,試了元朗新開的泰菜「亞萊嘜嘜」
據聞晚晚都大排長龍,我哋七點去到仲有位算好好彩!

IMAG2383

呢個就係馳名的蒜香包, 每條包的六面都滲滿了牛油香, 底面再有蒜蓉同香草香,
真係堅好食!!!! 點埋咖哩汁仲正, 好食到飽都要食埋佢!

IMAG2387

咖哩牛, 牛肉較 un, 但好多蔬菜的配料, 當食菜也不錯!

IMAG2384

豬手飯, D 豬手肉好嫩滑, very good!仲有我喜愛的酸菜, 超級下飯~

IMAG2385

小食方面諗過叫串燒定燒鱔好?
串燒好似太多肉了, 就叫了燒鱔啦, 點知冇叫錯!
D 鱔肉好滑好肥美, 仲用予香茅去醃, 燒到外皮脆脆的, 十分好吃!

IMAG2388



IMAG2389

埋單後, 竟然有心的送上送完即止的小糕點, 太開心~
這裡像是家庭式經營, 侍應的服務很好, 不時幫我加水, 又問我要唔要張椅放手袋,
絕對值得再來啊!!

IMAG2390

2015年1月21日星期三

[愛住家菜] 芝士什菜焗蛋 (附食譜)

又係 post 吓我啲健康餐嘅時候, 懷孕後要吸收多元的營養, 每餐都計過度過要食得好均衡~
今日整咗個芝士什菜焗蛋, 超級營養豐富
先將佢哋切晒粒粒, 再落鑊炒四分鐘

IMAG2370

三隻蛋加牛奶, 打勻成蛋漿, 倒落鑊同什菜炒兩下就即刻熄火, 蛋漿是半凝固的狀態
將所有材料倒入焗盤, 將已切粒的 cream cheese 加入其中拌勻
放入已預熱200度的焗爐, 焗 20 分鐘即成~
這盤東東有豐富的蛋白質, 又有蔬菜的維他命, 真係好健康架~

IMG_2765

即使不懷孕的你, 每天也要吃兩份水果啊! 但返工的人, 實在很難......
有時我都會帶生果返工食, 但主要還是晚上飯後食,
這是我的水果拼盤啊, 小豬嘜每當我食嘢就會郁郁郁, 看來她和爸媽一樣都是隻為食豬 :P

IMG_2768

2015年1月19日星期一

[ 2014 北海道] 富良野芝士工房 -- 麵包超人館 -- Furano Marche -- 新富良野太子酒店

再來北海道遊記, 富良野的下半天, 就是到訪不同的工房,
第一個就是富良野チーズ工房, 即芝士工房, 是在林間的一列小屋, 好可愛的環境

20140523-058

20140523-056

入到去, 有各國的芝士介紹, 有好多多關於芝士生產的知識可以學習到

20140523-053

20140523-054

20140523-055

哈哈, 我們最鍾意當然是試食環節

20140523-051

有款黑芝士好好味又好得意架!

20140523-052

行過幾間屋, 仲有 cafe 同雪糕屋, 有時間的話, 在屋內有陽光透入來, 吃一杯雪糕一定好開心!

20140523-057

下一站係麵包超人館 ふらのジャム園
其實本來完全冇諗過會嚟, 但因為上午去的花田都冇咩睇, 太多時間剩了, 就來這裡行行 sip 時間....
不過, 這裡是一個可愛的地方

20140523-059


20140523-060


20140523-061

反而一定要到的是 Jam 工房

20140523-064

入面有一百幾十款果 jam 可試可買, 嘩, 真係好大開眼界,
當西瓜同南瓜蜜瓜都可以做 Jam, 你會發覺世界冇咩不可能

20140523-065


20140523-066


20140523-067


20140523-068

任取的小麵包來搽果 jam 試試, 試得太開心!!

20140523-069

賣店那邊, 二樓有麵包超人的手繪畫展覽著

20140523-072


20140523-073

地下就是 fans 見到會發瘋的賣店, D 玩具都真係好可愛, 會令人唔買返件湊吓熱鬧都唔得!

20140523-095

由麵包超人館揸車再上的話, 有一片花田架, 不過我哋去時未開花, 夏天去的朋友可睇睇

20140523-097

好了, 行程完結, 我們就駕車前程手信店 Furano Marche, 揸車入去市中心地帶要泊車, 始終都係我擔心的地方,
好彩舖頭附近有個好大的停車場
去到見到好多香港人, 不過覺得所賣嘅嘢都係機場都會有, 所以都冇買了~


最後一站, 去我們住的新富良野太子酒店 (新富良野プリンスホテル)
呢間是五星的酒店, 我真係冇諗過住, 因為好貴, 旺季要成三千蚊晚都唔出奇
但淡季中, 我們用 14600 Yen 就住到了, 即係一千蚊港紙, 真係好超值!
間房好鬼大呀!!!

20140523-075

在半山上, 居高臨下的落地玻璃望到呢個 view, 真係好喜出望外!!!

20140523-074

我們的 package 仲包晚餐, 又覺得更更更抵了!!!

20140523-106

食物是較傳統的和食, 用料新鮮, 味道不錯!!

20140523-101


20140523-102


20140523-103


20140523-104

哈哈, 地下有好大的賣店, 竟然見到 solomon counter!

20140523-108

飯後就更係要去浸溫泉啦, 係呀, 萬四 yen 有飯食仲有好正的溫泉浸呀 , 我們的北海道最後一晚太完滿了!!


hehe, 浸完溫泉再食雪糕飲咖啡, 爽死了 XD

20140523-109

第二天的清晨, 見到出面仲有熱氣球玩, 不過我們要走了, 下次有機會吧!

20140524-076