由屯門到元朗

假日時, 整個自家午餐: 煎鵝肝、牛仔骨、炒滑蛋, 還有日式冷麵, 開心~



大阪馬拉松訓練日誌 (21):今日又試試長征, 係我第一次由兆康跑返屋企, 原來全程都不夠 8km,
不過今日實在太太太熱了, 我已經醒目地戴埋手袖同帽, 但真係熱到好辛苦.......
又可能因為尋晚先跑完, 而家中午又跑, 有點吃不消
跑吓行吓地返到屋企, 51分鐘~


波比就試由屯門碼頭跑到屯門西鐵站, 搭一個站車, 在兆康 join 我一齊跑返屋企,
哈, 因為唔係好識點由屯門西鐵站跑到兆康呀? 要跑單車路?
識咗之後, 真係搵次試試由碼頭跑返屋企?!

Nike Lunar Run Stage II

話咁快就到 Stage II 的比賽了, 之前仲驚會唔會落大雨跑唔到, 點知今日天朗氣清, 正到爆!

7 點幾喺葵芳集合, 有旅遊巴載參賽者去起點, 那是香港賽馬會國際小輪車場

今天也是尊重主辦單位, 全身 Nike 出席, 連我的 Asics 戰鞋都冇著了, 著了對上上代的 Nike 跑鞋~



去到會場, 嚇咗一跳, 好認真的佈置!
不過周圍都係綠燈, 地點又係喺墳場隔離, 實在有點嚇人!



先去 registration, 領了一件 Nike DRI-FIT Tee, 好正啊~ 未試過有咁靚的參賽 tee, 仲要係 DRI-FIT
我今日係 200 號!



換衫時, 俾蚊咬咗好多啖........
換完就出去 warm up 吓, 但距離起跑時間仲有成半個幾鐘, 都係坐住等~
我見到我D 對手, 全部都係好好好 sporty 滿身紥實肌肉的男人女人, 太慚愧了~



過咗一陣, 有 Nike Training Club 的人員帶領所有人跟住音樂做 Dynamic 的 Warm-up,
像是一齊跳健康舞, 非常好玩! 又估唔到, 男人們都好肯跟住跳喎!
不過跳成 20 分鐘, 真係未跑都跳到冇晒力出晒汗呀~~~~~
所以我跟咗一陣就停了, 我真係驚我跳完冇氣跑, 但其他人都真係好努力的跳!!!



九時正開跑, 嘩, 總共要跑三次上斜, 很攞命...........
D 人如我所料, 真係好好好勁囉~~~~ 我還是抱著希望唔好最後一個返的心情去跑~
一路跑, 覺得自己好似好後了, 不過唔敢回頭望, 到第一個折返點, 先發現後面仲有些人, 先冇咁驚~
唔知點解, 路程比公佈的短了很多! 明明話 8km 的, 所以我要留力呀,
點知跑完 5km 後, 工作人員指示已經是最後一段路了, 吓?!?!
最後一段路是上斜回會場, 我有氣力跑更耐, 但冇氣力在上斜時加速啊~~
結果是 32'36" 完成了 5.28km; Average Pace 6'10"/km; 都破唔到自己的 5km 紀錄添~

點知..... 後來發現了, 原來我誤會了工作人員的指示.......... 應該跑少了半個圈呀, 唔係化........
Anyway, 呢次都係玩玩好了~



衝過終點, 很開心啊~~~ 拎返個袋, 換返衫先~~
Nike 真係太貼心了, 除了一般的水同埋香蕉, 竟然仲有大碗 Yogurt 同 能量飲品供應,
哈哈, 我想起高木直子的書, 話日本的馬拉松, 比賽完都係有嘢食的, 但香港我真係 so far 都未見過咁好囉~
哈, 我見到有人攞咗一碗 yogurt 同三隻蕉, 點食呀!? (不過我諗如果波比先生喺度, 應該都會唔執輸)
不過我跑時已經又有點橫隔膜痛 (可能 7pm 食麥當當食得太飽.....), 又跑到有點想嘔, 真的冇心情食任何嘢了~ 只拎咗隻蕉先咋~

9:45pm 冷靜了下來, 行返去地鐵站返歸了~

這兩次的 Lunar Run 都是很好的體驗啊, 當你見到其他人咁勁, 就會激勵到你更加的努力練習了!
如果下年再有, 我都一定會再參加啊!

下星期又有比賽了, 是 K-swiss 城市之王, 上次跑了夜晚的星光大道, 今次會跑日頭的!

一屋麵包香 - 菠蘿奶皇包、腸仔包 (全過程公開)

星期六, 是整麵包的好日子啊!!! 興奮興奮!
穩陣起見, 我都係跟返上星期上堂學的湯種法去整, 那本麵包書的中種法....... 真係都唔知仲信唔信好.........

呢舊就係傳說中的湯種了, 其實 Christine 的簡易食譜都有教好多整麵包的 blog entry,
簡單易學, 初學者必睇呀 (不過睇完你就會明白整一個 2 蚊的菠蘿包係幾麻煩, 跟住可能會去買個食算數)
我都係跟住 Christine 的教學去整湯種, 不過整得少份量, 都有D 難度~



跟住就同所有材料混合, 今次再用電子磅度 yeast 的份量, 果然真係度唔到,
唯有用量羹, 大概算了~



抹乾淨屋企張飯枱 (加用火酒消毒一次), 安心地搓搓搓
搓到五分鐘, 我已經開始流晒汗, 但兩隻手都黐住晒粉糰, 又搵唔到個冷氣遙控, 真係好狼狽!
最後都係要洗手開冷氣先掂...... (其實之前特登唔開冷氣, 係怕冷氣抽乾了麵糰的水份啊, 不過今次發現開咗都唔太大影響, 下次都係開住搓好了!)

十五分鐘後, 搓好了~ 好開心啊~ 似足上星期上堂學的~
之後是拎去第一次發酵~



45 分鐘後, 已經脹大了兩倍喇!



之後是分割同埋鬆弛



然後就係包餡同埋造型,
我今日整咗奶皇餡呀!!! 是真的有咸蛋黃 + 吉士的奶皇餡~~~ 太期待了! (沒有整流心那種, 因為太肥了)
包完就第二次發酵, 要 30 分鐘~



等待 30 分鐘發酵時間時, 整定菠蘿皮同埋蛋漿,
菠蘿皮我落了菠蘿味香油呀, 好過淨係落黃色色素啦!

整完個皮, 都已經發好了!!
整麵包時, 覺得我家焗爐太細了........ 看這盤麵包多麼的擠迫.......
不過這焗爐才用了剛好一年, 邊有咁快壞, 哪有藉口換新的........



蓋上菠蘿皮, 掃上蛋漿



我一向覺得我家焗爐太熱了, 於是我只用 150度去焗, 其實真係差唔多!
同一盤麵包, 掃蛋漿的只需 11 分鐘就焗好了, 今次望到實, 見到咁轉色, 於是先取出這腸仔包同奶皇包
很愛這麵包的啡黃色啊, 正正是我想要的顏色呢!!! (感動!)



這時波比先生剛好起身, 呢條友仔真係好識食, 有嘢食嘅時候就識醒!
波比試食腸仔包, 佢話好好味, 食到唔記得咗要留俾我!
Close up 看看那一絲絲的麵包同氣孔, 就代表今次的麵糰造得很成功!



菠蘿包要焗到差不多 20分鐘, 其實可以早D 出爐, 不過我想焗到個皮深色D 脆D,
嘻嘻, 完成了!!!



個皮夠脆, 真的同麵包店的一樣味道, 更有了點菠蘿味啊~
奶皇餡, 哎呀, 反而未有我想像的咸蛋味添, 因為要包餡其實幾有難度,
我想包多D 餡, 點知就封唔到口漏晒出嚟, 所以每個都只放到一茶匙多的餡咋~ (終於都明白有時出去買的麵包, 唔係人哋孤寒唔落餡, 係真係好難包)
下次要研究吓點可以整多D 餡入去!



從廚櫃的深深處找到這個在迪迪尼帶回來的盒子, 用來放麵包真係好 perfect!



嘻嘻, 雖然用了三個鐘去造這 8 個麵包, 但造完的一刻, 真係好開心~
老實講, 味道又唔會話好味過你喺麵包店買的好多, 優勝之處是新鮮熱辣,
在麵包最鬆軟的時候一口咬下去, 那滿足的喜悅是難以言喻的~ :D

還有當老公一起身時, 就有新鮮出爐的麵包食, 那也帶來做老婆的一點點成就感~

有冇朋友都想學學造麵包呢? 有的可上來我家一齊整一齊玩啊!

另外有冇朋友想學整九龍酒店的奶皇酥皮月餅呢?
我想八月去學呀, 16/8(Tue) 同埋 18/8(Thur) 晚, 或者 20/8(Sat) or 21/8(Sun) 都有班呀, 有冇朋友想一齊報名呢?
http://www.twinsco.com/g_cls_sch.php?month=8

滷水生腸 (膽小/孕婦勿看)

買了韋太的新作<<懷舊小食2>>, 是因為有教整波比最最最愛吃的豬生腸,
每次經過旺角的肥姐小食, 波比都忍不住要買兩串, 肥姐真係整得太太太好食了!
所以我也想學, 整俾波比先生食啊!

原來是要整個白滷水汁, 上網搵資料, 發現原來係唔洗逐樣調味料買的,
去到大橋街市的超齊全雜貨店, 一問之下, 真係有 prepack 的白滷水汁料賣的, 太方便了!!! (愛死這家雜貨店)



之後就係去豬肉檔買生腸, o依, 都唔見有掛住嘅.....

一問之下, 老細先由雪櫃好神秘咁拎出嚟, 可能平時唔多人買, 佢都係雪住賣

買了 $26, 好似都幾多~

食譜就真係要大家自己去買書睇睇啊 (尊重作者的版權, 唔應該 copy 食譜呀),

我再上網研究點先整得爽脆, 秘訣大概是煮完要即刻浸大量冰水, 

不過可惜普通家庭雪櫃, 點會有好多冰同冰水呢?

而另一要訣, 就是要用處女豬的生腸, 據聞鳳城的生腸很出名, 就是用處女豬的~

但這我也控制不了啦~

從膠袋拎出總共四串的生腸, 我想告訴大家, 那感覺實在有點噁心!

即時想起些恐怖片, 又想起醫院裡有時見到的恐怖手術內臟相片.............

仲要用雙手一路摔洗呀洗, 實在很核突.........

快快掉進煲裡汆水先, 拎出嚟沒有血淋淋了, 落手切開一舊舊, 仍是想起了人肉叉燒包的場面......

好了好了, 終於都整好喇!

味道呀, 我覺得不是太滿意呀, 已經落咗成舊冰糖, 都做唔到肥姐的甜味,
texture 方面都完全唔得, 都唔爽嘅? 係我唔夠冰? 定係D 生腸唔靚呢? (因為係雪到已變冰的貨仔)
勉強用豉油芥末蓋過了它失敗的味道, 唉~ 下次都唔知仲整唔整好~
可能要搵到檔新鮮D 的肉檔買, 又或者都係去肥姐度食好了~

雲喱拿蕃薯蛋糕(附食譜)

蕃薯都係我同波比先生好鍾意食的東東, 冬天時, 最愛在元朗的街邊檔買熱辣辣的煨蕃薯返屋企食~

前日整蕃薯包唔多成功, 仲有蕃薯剩, 決意要整個好食的蕃薯蛋糕!

睇書同上網的食譜, 都好少人用蕃薯整蛋糕,
我 adopt 了一D 薯仔蛋糕的食譜, 再自行加了雲喱拿 sauce (為了清雪櫃), 造一道「雲喱拿蕃薯蛋糕」

食譜:
Vanilla Sauce 60g
牛油 30g
蛋 3 隻
糖 50g
以上材料用打蛋器拌勻


篩入低筋麵粉 100g + 泡打粉 1/2 匙


加入已蒸熟的蕃薯蓉 150g


入焗爐, 180 度焗約 30 分鐘即成



ayia, 不過到我打食譜時, 我先發現我又唔記得落嘢..... (Demented!!)
好彩今次只係唔記得落泡打粉, 可有可無~

呢個蛋糕都好香蛋同雲喱拿味 (哈, 反而蕃薯味冇我想像中的濃), 是較濕潤的 texture,
可能因為而家始終唔係時節, 不是蕃薯最香甜的時候~
如果遲D 有紫心蕃薯靚, 要再造一次先得~

臨急抱佛腳

大阪馬拉松訓練日誌 (20):
突如其來的 8km 比賽, 實在令人有點不知所措~
今晚去了跑次長的, 差不多 7km, 時間都 keep 得唔錯, 6'22"/km
同埋創造了自己 5km 的新紀錄: 30'58"


連日的夜瞓, 真係好攰.........

蕃薯包 + 腸仔包

woo~ 今晚波比先生唔返嚟食飯, 我有一晚的時間, 於是.....
在家第一次做麵包!!!

我去上堂學的是湯種麵包, 不過整舊湯種有點麻煩, 於是今日是跟另一個食譜整中種麵包,
不過, 整起嚟真係唔係睇書咁易~

出了問題的, 係量度 yeast 的份量, 食譜話要 2g,
我已經係用電子磅, 但發現對1-2g 咁少的重量唔係好 sensitive.....
我係咁落個磅都唔郁, 我懷疑我落得太多了...... (一包 15g 的 yeast, 好似俾我落咗一半?!)
最後我覺得個麵糰有點發酵過度同埋太黏了......

跟書造, 不用落手搓, 係用打蛋機 + 螺旋頭去攪就得, 不過麵糰太黏, 很難攪得到~

兩個半小時後的發酵



跑完步返嚟, 開咗焗爐焗就去沖涼, 點知.....
沖沖吓聞到麵包香, 但心諗冇理由咁快聞到o架喎, 要焗 25 分鐘o架喎
似乎我個爐太熱了........沖完極速衝去睇吓咩事, 嘩, 已經係咁嘅樣



我覺得今次未係好成功, 因為麵糰未焗已經有點唔夠企身的感覺
味道還可以, 但不是湯種的鬆軟, 有很大的改進空間!
造麵包真的好大學問啊, 下次唔好唔睇火去沖涼咯!

今次整咗我同波比都好鍾意食的蕃薯餡, 嘻嘻, 滿足~



大阪馬拉松訓練日誌 (19)
大件事呀!!! 我收到通知, Nike Lunar Run 我竟然入咗第二輪的比賽?!?!?!?
可能因為太少女仔參加了, 頭6 名女仔都有得進級, 不過下場要跑斜路咯......
所以今晚成十點都要落街練吓呀!

第一次造麵包

我係一個名副其實的包怪, 可三餐都吃包都唔厭,
一路都想學做麵包, 但覺得一整要整好多個, 唔似整蛋糕可以整細細個, 兩個人根本都食唔晒~
所以一路都唔敢去開呢一瓣~

見讀完個 Master 得閒D, 終於都的起心肝去學, 我睇過麵包書,
但覺得箇中好多技巧同搓麵粉的手勢係從書本學唔到的, 於是報了個麵包班, 想學學基本的東西,
有了基本技巧 , 之後再想整唔同味道的, 應該都不會太難~

整麵包最麻煩的地方, 係要等麵糰發酵, 仲要發幾次....... 整一次麵包真係要兩三粒鐘 (真係去幾蚊買個食好過!)
最驚係發唔起, 咁就成個麵糰浪費了~ 發得唔好, 就會個包好硬囉~

同上年學月餅都係同一個老師, 不過今次的同學全都是大過我的女士/ Auntie,
感覺大家都係主婦, 佢哋都整得好快手~
唔似得學月餅咁, 係兩個滿手 gel 甲的妹妹仔, 看得我有點滴汗!

人手搓粉, 要搓足十五分鐘唔准停, 救命........... 減 Byebye 肉乎!

要整三款包, 好忙呀, 等發酵時又要準備 D 包面/包餡, 沒時間影相了~
攪咗兩個半鐘, 真係完成可以去焗了!



出爐的一刻, 真係好開心啊!!! 不過因為時間關係, 焗得未是太金黃, 但當然是熟透的~
有北海道包、菠蘿包、煙肉芝士條



開開心心的拎返屋企同波比先生食, 好夠軟綿綿, 唔錯啊!!!
同街買到的真係差唔多味道!

後記有感:
整麵包真係好唔合乎成本效益: 整三個鐘先整到幾個價值幾蚊雞的麵包, 又搓粉又要發酵攪鬼死咁耐......
整蛋糕一個鐘都唔洗, 唔洗咁辛苦, 可以賣幾十蚊一件~
麵粉又貴, 糖又貴, 難怪傳統麵包店愈來愈難生存了

原來菠蘿包的菠蘿皮真係一點菠蘿成份都冇的, 連菠蘿味的香油都唔洗落......

好好玩 - Nike Lunar Run@大暑日!

今日係大暑, 日頭熱爆, 好彩夜晚都係 28-29 度, 適合跑步!

波比太太好開心參加了(亦被抽中了) Nike Lunar Run 夜跑活動,
那是本月一連串的夜跑活動, 在香港不同的地點舉行, 鼓勵市民多作運動, 強身健體, 很好的概念~

本來我們是打算參加沙田區的比賽, 不過開頭不清楚放行李的情況, 又在星期一舉行太夜了(第二天還要工作的啊),
所以我冇參加, 但波比以為我報, 就懞懞吓地報咗....... (最後冇去呀)
攪到佢再想同我一齊報這個星期六的尖沙咀比賽時, 被 reject 了 (因為上次冇去呢)
於是今日就調換角色, 我跑佢負責影相~

在鐘樓集合, 可以去文化中心換衫, 很方便啊!!! (其仔地區的比賽就真係都唔知去邊換衫)
去到已經有唔少人了~



波比帶了 SONY DC 仔, well................. 很不滯, 大部分相都鬆郁朦........ 但又唔敢帶我的 GF2 啊~



我同波比衫褲襪都是 Nike 的, 很俾面了嘛! (之前都讚過 Nike Dry Fit/ Running 系列真係好好著好排汗的!)



9:50pm 有工作人員 briefing 同埋一齊做熱身~



哈................... 看看其他跑友多麼的強橫啊.........很戰鬥格.........
我的目標, 只是唔好跑包尾已而
應該有 60 人的比賽, 只有約二三十人出席咋, ayia, 太可惜了 (其實應該問問可唔可以俾波比先生補上)



3, 2, 1, GO!!!
本來諗住都成十點啦, 海傍應該唔會太多人啦, 點知係迫人都爆, 去到 Intercontinental 之前, 基本上要不斷的避人.....
一開始的一段, 嘩, 跑友們都跑得好快, 一支箭咁衝呀~~~~~~~~~~~~~
我確實有點壓力, 驚墮到最後, 不過心知自己不是他們的速度, 要好好忍耐 keep 返自己的步伐,
如果夾硬跟人跟得太快, 好快就會冇氣(應該係斷氣!), 之後的幾公里會跑得很痛苦!



過了新世界中心, 開始少人了, 不過...................... 點解要上橋o架?!!?!?!?!? (汗!)
我睇了 google map 的路線, 都唔知道跑去紅磡原來係要上橋的.........
哈哈, 我用了高木直子教的方法 , 但都知道頂唔順呀,
與其我要用好多力去上斜但其實只快得兩三秒, 不如我行上去抖抖好了!!!
留返D 力一陣落斜時跑好過啦! Cost-effective 一點!!!



去到橋末要落樓梯, 然後回程再上返樓梯, 又係好痛苦........
不過我想話在橋上的風景真係好好好靚呀!!! 望晒成個港島區, 仲要咁好天! 超爽~
路程呢公佈話有約 5km, 其實冇咁長呀, 我折返了一大段路, 先聽到 Nike+ iPhone App 話過了 2.5km.
除了上落橋同埋飲水, 我好努力, 全程都冇行過, 同自己講要頂住呀, 得o架, 就到喇!
如果行就會俾人過我頭o架喇!



去到最後一段, 文化中心開始 , 我儘管同埋餘下的氣力加速,
到終點了!!!! 超開心呀!!!!!! 我冇跑第尾呀!!!!!!!!



我的成績是 - 25分44秒, 跑了 4.04km, 平均速度 6'22"/km, 哈, 比我平時大概 6'50"/km 快了!
睇返分段時間, 頭 1km 真的跑得太快了, 好彩後來都 keep 到穩定的速度~



後記:
多謝波比先生做攝影師, 雖然大部分的相都唔要得,
但係佢好辛苦咁不停跑去我前面 > 等我到影相> 再跑去我前面 > 等我到影相 > repeat n 次
哈哈, 最後佢滴汗仲滴得多過我~

攪笑地工作人員誤會佢都會參賽者, 影佢相...........

又更攪笑地有參賽者以為佢係工作人員 (見佢全身 Nike 又拎住相機), 跑跑吓同佢 "Yeah" + 勝利手勢俾佢影,
波比唔好意思之下......幫佢影咗相, 但唔知點俾返佢.........

這是一次好開心的體驗, 如果不是這次比賽, 我們都不會無啦啦去到尖沙咀跑,
這次亦是兩星期後 K-swiss 城市之王的預集, 因為又係由鐘樓出發跑去尖東再返嚟,
不過到時係日頭, 應該又有另一番體驗~

台式紅燒牛肉麵 (附食譜) - 從台灣帶回香港的美味

迎接這很精彩的星期六, 造了熱辣辣熱狗做早餐, 烘脆的麵包, Ikea 肉腸,
加埋醬呀醬, 大滿足~



在台灣旅行時, 見到好多食譜, 本本都想買!!!
但係有D 太深, D 材料根本香港冇得賣......... 有D 太淺, 我上網都睇到啦~
找了很久, 買了這本很滿意的, 內容平實可行, 是講地道台菜的! 很想學!
一個老婆見到那標題「男人最愛的 101 道菜」, 似乎是非買不可!
姊妹們要學習用菜把妳家的男人緊緊縛住啊, 呵呵呵~



第一個試驗品就是牛肉麵, 台灣的牛肉麵湯總是太好喝, 在香港其實太少舖頭造到,
元朗士林牛肉麵係整得好, 不過長期太多人冇位呢~
所以 , 很想自己能夠煮到台灣的味道!

原來也不太難, 不過而家D 牛肉咁貴, 成本可不少呢!
600g 牛肋條汆水後, 加入 1400ml 水及八角甘草 (及自己喜愛的香料), 細火燉一個鐘就得!!!



牛肋條撈出切件, 牛肋條加入醬料煮
原來的醬料我覺得太肥了, 改良後為: 生抽(一茶匙)、油膏(一茶匙)、鹽(一茶匙)、糖(一茶匙)、豆瓣醬(三茶匙)、乾蔥、蒜與部分牛肉湯燉煮五分鐘, 再放返入大鍋的湯內燉半小時,
再煮個麵 (我用了日本烏冬), 加入原本的牛肉湯即成喇!!

我覺得牛肉湯做到九成似的味道, 不過牛肉可以再入味一點 (可能因為我減咗D 醬油, 健康D)~
加埋前日滷的雞翼同滷蛋, 登鄧, 很台灣風味的一餐啊~~



據聞在正街那間三星牛肉麵都好好味的, 有機會都想去試試啊!

花蓮 - 超級美食篇

以下是令人流口水的一篇 - 花蓮在地美食!

嘻嘻, 花蓮的美食店, 集中在中正、中山、中華路一帶,
大家可善用 google map, 在 google map 中打店家的名稱就可以搜尋到地點位置, 非常方便!

第一天, 民宿主人阿旺車我哋去了這鐵三角區域介紹一番, 然後就我們自己決定去邊間食
這天, 我們先試了周家小籠包蒸餃,
台灣的「小籠包」, 其實是肉包子, 我們點了兩個, 還有一籠蒸餃,
蒸餃皮非常薄, 同肉包都是一樣的肉, 非常的多肉汁, 這就是永遠在香港吃不到的美味~



小心吃, 汁會「必」出嚟的!



下一站去了食可麗餅(光復街), 雖然香港有很多類似的 Crepe 店, 但始終同台灣的製法不同,
台灣的是整塊都脆脆的, 真的很「餅」, 配上我愛的蕉蕉古古力, 讚呀!



有名的摩利東山鴨頭, 滷水中一定有很多的香料, 滷得好好味,
是我們去過台北台中之後, 覺得最好食的!



這很很很溏心的蛋, 太難忘! 第一天吃完, 第三天忍不住要再吃啊!



這家海埔蚵仔煎也很出名! 大排長龍的~
其好食在唔似得士林夜市的太多蕃薯粉漿, 它比較多蛋同蚵仔, 可說是真材實料, 值得試試!



第一晚回民宿前, 買了麻糬冰淇淋, 其實都唔知係咩 , 一開, 原來即係雪米糍..... 冇特別........



第二晚, 去了花蓮的自強夜市, 原來呢度好細咋...... 似一個籃球場咁大, 得嗰兩行........
睇咗食尚玩家的介紹, 第一樣就走去食燒烤先!



很多女生圍觀...... 觀的不是食物, 是赤裸裸上身不停流汗的老細!



有點日式的佈置, 用了音樂室的枱櫈, 有趣~



這樣的烤蝦, 第一次係喺台中食過, 連殼食都得, 又脆又鮮!



叫了 4 隻燒蠔, 波比先生超開心 (蠔怪!)
鮮味之餘, 有燒烤的香氣, 讚!



之後去了很出名的第一家烤肉, 先排隊, 在檔口好似食 buffet 咁執晒你想要的生肉串,
然後俾錢, 佢會俾個號碼牌你, 等號碼到就可以領取烤好的燒肉
我們要等 80 個號碼, 太誇張了吧!!!



等待途中, 食住其他嘢先, 呢檔蔣家官財板都好出名,
不過嚟台灣咁多次都未食過呢度的官財板, 因為覺得太嘥 quota 太滯了.....
但這夜市實在太細, 食物都唔太特別, 所以先獻出我們的第一次!

官財板即係好似西多士, 是炸的! 不是香港那焗的~
炸好後, 店員用非常純熟的手勢剪開官財板, 加入自選餡料
我要了沙爹羊, 羊肉很嫩滑, 沙爹很惹味呀, 原來官財板係好好食的!



然後去了7-11 買雪糕, 這杏仁口味的 Hershey's 雪糕香港好似未見過, 正呀



等咗差不多一個鐘, 終於等到烤肉串了~~~~
不過其實, 我們都唔覺得有咩咁特別......... 當然那甜甜辣辣的醬汁是不錯的, 但又未至於值得要人等一個鐘囉.....
其實係咪呢度太少檔口, D 人冇嘢好揀, 先個個都買呢間呢?



第三晚, 導遊放低我哋喺一間大百貨公司門前 (忘記了哪間) , 因為我們想去行超級市場,
沒有時間, 去不了瑞穗牧場, 也買了瑞穗的鮮乳要試試, 很濃的奶味, 同北海道 3.6 有得揮~



我又買咗調味料, 因為尋日喺第一家烤肉見到佢哋烤肉時, 用了一樣叫「油膏」的東西,
那是一支很杰身的醬油, 直覺覺得炒餸一定好好味, 所以都唔記得咩要重, 買了一支!

我們靠 GPS 慢慢行返去中華路, 買了很多手信,
見到瑞穗牧場的手信店



又買了一杯新鮮的牛奶, 比超市買的更香



今日去了很出名的公正包子店



都係小籠包加蒸餃, 同意阿旺說, 這一家好似較重味精/甜味~



再翻兜摩利滷水, 真的很想帶些返香港呀~

這裡的食物, 簡單, 便宜, 美味, 三天的時間, 其實還有些食店去不到, 下次啦!
I'll be back!