媽媽無啦啦執到平機票，所以忽然決定出走兩日一夜放放假
首先要好多謝爸爸睇住小豬嘜，讓媽媽可以放假 1.5天
今次的體驗好特別
第一次一個人去旅行，一個人的時候，想到很多東西
星期六一早，餵完小豬嘜飲奶，媽媽就出發了
好耐冇搭過 E 車，仲要係一個人搭
不過忽然想到都唔係第一次一個人搭飛機，有次爸爸去上海公幹，媽媽好掛住爸爸，就星期六去星期日返咁去了上海，哈
今次搭的是廉航來回，我發現原來都有唔少人同我一樣一個人去旅行，大家都抵唔住平機票的誘惑吧
此行去大阪，都算準時，
廉航竟然可以唔夠報關表派，要自己到埗先填，真係第一次。。。
兩點落機，買了南海電鐵 stop over 臨空城站的套票，
有車票去臨空城站，車票由臨空城站去難波，同埋一張 1000yen 的 outlet cash coupon,套票會令你賺了 470 yen, 不過真係會喺 outlet 買嘢先好買
落車，衝去西松屋掃貨先，此行其實都係買 bb 嘢為主，上個月去沖繩還未買夠
不過買得有限制，因為我來回程都冇加錢買行李，要限住行李喺 10kg 內
而只可手提一件要長闊高唔超過 110 cm 的行李
喺淘寶買了個有轆的旅行袋，超好用，但買嘢唔可以太重唔可以大件，實在有點未能盡興
買完西松屋，就係樓下的 seria 100 yen 店，買咗好多又平，香港又買唔到的家品呢
如果我冇行李限制，一定買更多!!!
三點幾，超肚餓，去了地下的大起水產食壽司，
好抵， 1250 yen 有咁多，雖然食得出唔係最新鮮的貨式，但都好美味了
此行周圍都係香港人，台灣人，
其實日本人討厭遊客，都真實可理解，
去到每一個地方，都係不停聽到廣東話同普通話大大聲咁講嘢，真係好失禮
壽司店人唔多，我全程就係聽住呢班香港阿叔阿嬸大聲談笑，我係日本人的話都會覺得呢班人好冇文化
之後去 outlet, 先要去 information center 兌換張 1000 yen coupon,拎了 coupon book, 不過 adidas, asics 都冇折嘅
好趕地行了三大運動牌子的店，不過 nike 完全唔平
Asics 就冇我想買俾爸爸的款式
只有 adidas 真係抵，買了對跑鞋同 tee 俾爸爸做父親節禮物，
又買了對涼鞋仔俾小豬嘜，啲兒童鞋堅係平過出面，不過少款少碼，我嗰對係最後一對添呀!
呢度買可免稅，抵呀！
之後又拖住個袋衝呀，趕去搭車去難波
我覺得自己完全體驗緊強國人來香港掃貨的過程囉
用套票唔可以搭特急車，只可搭急行，但其實只差幾分鐘
六點去到難波，轉地鐵去本町站 9號出口，一出就係 Akachan 了
上次來係小豬嘜喺我肚入面三個月大，已經覺得呢度太正了，但當時連佢係男女都未知，唔可以買太多嘢
今次就狂掃貨呀，最好係買到冇加鹽嘅麵，香港真係搵唔到
仲有圖書啦，噴喺衫嘅防蚊液啦，呢啲都喺香港買唔到啊
不過以為夾埋五千 yen 可免稅，點知原來玩具一堆計，食物用品又一堆計，咁唔夠就冇得免稅了
買完嘢，由本町一路行心齋橋筋去心齋橋
Uniqulo 呢幾日做 32週年大特價，買了衫仔褲仔都係五百幾 yen 一件，好抵啊
下一站係 Daiso , 其實 Daiso 同 seria 都好多旅行用品賣，100 yen 買了可摺的拖鞋，咁就唔洗著酒店嗰啲
又買了吹氣頸枕，其實仲有旅行裝洗頭水沐浴露，眼罩，行李帶，毛巾，真空收納袋等等，真係乜都唔洗帶就可嚟旅行
買咗好多嘢，又行咗好多個鐘，已經好攰，決定先去 hostel check in
今次另一突破，就係媽媽學人第一次住 hostel
話晒係青年旅館，如果我而家唔試下，相信呢世都冇機會
本來我係 book 咗床位，但諗諗吓又驚唔慣，
我太醒瞓，怕半夜 d roommate 出出入入瞓唔到
最後 book 了單人房， 3400 yen ，有床有枱櫈有四個插頭
不過成層得一格廁所同一格沖涼房，有啲人話要等好耐，我用時都 ok
呢間 Hostel Q 位置幾好，好近道頓堀，放低行李後，媽媽再去行咗陣，跟住就去食拉麵
不過中伏鳥。。。
呢間金久右衛門啲人都有讚
我見食過好多次金龍，神座，四天王，就諗住試下新嘢
黑醬油魚介拉麵，只有超咸的味道，好伏。。。
行經 sukiya 牛肉飯店，好懷念同爸爸兩個人去旅行的日子，有一次我哋玩得太夜，附近唔知食乜，就食了呢間牛肉飯，估唔到又幾好味
.jpg)
