布吉之無奈 book 車 book 酒店

今日起身, 仲係好病, 仲未退燒, 唔舒服到我趴咗喺枱, 想熨衫都熨唔到,
完全冇胃口食嘢, 諗緊好冇返工......
好彩沖咗個涼, 可能幫助了退燒, 人舒服了精神了點, 都係返工啦,
總覺得去玩到病咗而唔返工實在太不負責任~

一路搭西鐵一路都仲想嘔, 落車急急忙忙買了白花油同埋檸檬汁飲, 人又再精神了點,
結果順利地完成了一天的工作~

現在, 可以開始我們的遊記了!
不過, 請先容許我發發嘮騷, 才入正題

無奈的 agent 篇
話說睇某大討論區, 去親布吉的香港人好多都係搵一個 agent 去 book 車 book local tour,
對這個人的評語好壞參半,
有人讚不絕口, 有人話佢冇禮貌冇交帶,
去之前同這個人 e-mail 聯絡, 已覺得佢唔係友善嗰種, 同我去曼谷 book 導遊 Davit 的態度截然不同,
我已經有定心理準備, 呢種人都係睇錢行頭, 你俾夠多生意佢做, 佢咪同你懶 friend 又客氣囉,
我相信 newsgroup 有些網友, 無啦啦唔會中傷這個 agent, 話晒去玩大家都只係想開開心心

去到布吉, book 了佢的車去酒店, 明明一早已講好了係佢派人去我酒店問我收埋D 尾數,
點知問都冇問過我同意, 上咗車就接到佢電話, 話而家要車我去佢 office 俾埋尾數先!
嘩, 我即刻有俾人車緊去黑店嘅感覺囉!
我落機已經係香港時間成 12:40am, 喺機上瞓唔到已經好攰, 好想即刻去酒店休息,
而家問都冇問我就迫我去佢到俾錢, 明明應該是 40 分鐘的路程, 而家用咗 1.5 hr 囉!
我喺香港時間 2:30 先去到酒店, 有點欲哭無淚的感覺.......

第二不滿, 係佢態度超惡劣,
去到佢 office, 佢一輪咀的交帶了兩個 tour 的安排, 一個笑容一句多謝都冇,
ok, 妳做生意我都唔 expect 一定要有笑容嘅, 不過老屈仲聲大夾惡就好唔掂囉!
我一早同佢 e-mail 聯絡時, 已經講明有一個 tour 回程時我要喺 Patong 落車, 佢自己都話 ok 的,
但我見單上冇寫, 就話佢聽要有呢個安排啦,
點知佢聲大夾惡話:「吓, 妳又唔早出聲? 妳而家先講未必安排到喎」
我真係火都嚟埋:「吓, 我喺 e-mail 度一早講咗o架喎」
佢當堂冇聲出, 但仲仍然當係自己啱, 十萬個不情願地幫我加上單據度,
離開佢 office, 波比先生都忍唔住問我一句:「乜佢咁惡嘅?」我都唔知點樣回應!

唔計這個人的態度, 佢安排的車同 tour 係 ok 的,
不過如有朋友準備去/有 friend 去布吉, 我都絕對極力勸籲你/你朋友唔好幫襯呢個人囉!
自己搭的士, 其實應該仲冇我 book 佢車咁貴 (明明開頭話 600baht, 到出單時又話我住 karon beach 要 700 baht, 但其實我一早已講明我係住 karon beach, 佢乜都唔睇清楚就亂報價!!),
同埋唔驚俾人載咗唔知去邊囉!
D local tour 其實佢都係中間人再食你一層佣咁幫你報, 去到周街都係, 自己報都得啦!
搵著呢個人, 係呢個旅程的一大錯誤!


無奈的酒店篇

因為是 promotional package, 深知不是五星級的價錢, 我絕不會要求有五星級質數的酒店,
不過有齊最基本的設備, 我覺得是應該的~

這間酒店, 房間是大, 不過...... 除了大我也不知還可以給予什麼的評價....
 


一入洗手間, 發現竟然冇牙膏牙刷, OMG!!! 好彩樓下就有 7-11 o者.....
波比先生沖涼, 發現竟然沒有熱水.......
應該係話只有很微溫的水, 水只是緩緩從花灑流出, 絕不是正常的射出來,
除非你教凍水就水力強一點......
看著從來受不了沖凍水涼的波比先生被迫沖凍水涼, 好慘情的樣子...... 老婆實在萬分的 sorry :(
那樽倒極都倒唔出的洗頭水同枧液, 也實在叫我印象難忘!

最 O 咀的, 是最後一天, 明明 12pm 才是 check out 時間,
我們一早外出逛逛, 被大雨淋濕了身想回到房間沖一沖,
點知發現只是 11時多, 有人將我們房間的供水截斷了, oh shit!!!!
係連廁所水都冇咁抵死囉, 布吉係咪旱災呀? 我咁大個人都未住過酒店會 cut 水.....
唉, 太恐怖了

回到自己的家, 實在很愛自己的家,
因為我們家有花灑有洗頭水護髮素沖涼液, 因為我們家有熱水, 原來這一切都是十分美好,
香港的食物差極都不會令人腸胃炎得如此辛苦,
這個 trip 之後, 我確實更愛香港!