[愛跑步] 第一次完成了 20km@ 萬宜地質跑

今日超 high, 因為我完成了人生的第一次 20km 跑!!
上個月跑友鄰居撩我哋參加呢個在西貢北潭涌的萬宜地質跑, 嘩, 一聽西貢其實都冇諗過玩, 太遠了!!
不過鄰居的朋友會揸車去, 有車坐就唔同喇, 好啦, 參加啦, 當是渣打半馬前的試賽~

我們約好了 6:15am 在屋苑出發, 去西貢其實揸車都真係好遠, 朋友都揸得唔慢, 但都要成 50分鐘!!!
大家都未瞓醒, 但佢要好集中精神揸車! 真係辛苦了朋友~
去到 7:05am, 我哋泊完車後, D 車位都已經迅速爆滿, 大家都好早啊!!!

氣溫是 10.7度, 人人都凍到雪雪聲, 不過唔知係咪做運動後我而家身體好咗, 冇以前咁怕凍, 去日本時得 4 度個身都覺得 ok~
反而波比先生愈來愈瘦, 冇晒D 脂肪, 所以愈來愈怕凍呢~~



有車太好, 在車上避寒, 等到 8:10am 先捐出去熱身, 8:30am 起跑了! 氣氛超好!!



這個比賽冇市區的咁墟冚, 但參加得的 (咁遠咁早又咁凍), 都是很有實力的長跑者!
一出發, 斜路..... 唔係嘩..... 我以為今日的賽道大多是平路, 仲呃咗波比先生添......



跑 (行) 了一公里的斜路, 入到山邊, 再到堤壩, 風景怡人,
可惜今日太太太大風了, 恐怖得把我成個人都吹到跑唔到直線, 呼吸也有困難, 大風得令人吸唔到氣......



跑呀跑, 辛辛苦苦上完山, 都必有落山嘅時間, 衝落坡賺回點時間啦~
由北潭涌跑到破邊洲就是 10km, 然後原路折返, 這裡是折返點了, 1hr7min, 好嘢~




跑跑這些新路線, 感覺新鮮, 同埋唔覺唔覺就跑咗好多, 唔認得路, 唔會成日諗住到未呀~
見到有個六七十歲的婆婆伯伯都跑, 好堅呀!!!



由破邊洲上返去, 是令人卻步的大斜路, 慢行.....

其實呢段路真係超多上斜落斜, 上斜時我都跑到D, 但好多時候都行罷喇, 跑都唔快得幾多, 又嘥力~



到終點前的大斜路, 已經覺得雙腳有三個 point 痛, 都唔敢再博了,
最後, 我用 2hr8min4sec 完成了這個 20km 的賽事, 是超超超開心!
其實這兩星期我也很懶, 只是練了 4 次跑, 有這樣的成績, 又是第一次跑到 20km 咁遠, 很滿意了~
波比先生今日就 1hr37min 呀~ 都好犀利喇, D 路咁斜!



離開又是朋友車我哋, 太好了, 不需一個鐘就返到屋企~
如果自己搭車, 巴士轉小巴轉火車轉西鐵, 冇兩個半鐘都返唔到呀!

今晚去了食 Outback 慶祝完跑!! 話說 Outback 好好呀, 我係會員, 佢今個月寄咗張生日 coupon 俾我,
食滿 $300 就可以有一份免費的 Ribeye steak!

先叫了拼盤, 肉汁雞搥真係多汁, 豬肋骨就切好埋, 都好美味呀~



這就是送的 Ribeye Steak, 很有肉味, 波比很喜歡~ 少不了的是焗蕃薯, 是香港最好吃的, 又甜又軟~



波比的羊架, 生熟剛好, 很嫩滑, 讚!



然後, 波比先生送了聖誕禮物俾老婆,
仲有個幾月就去北海道, 都有買定D 禦寒衣物,
鞋方面呢, 去過的人話要防滑同防水, 因為真係可能會成隻腳踩入雪堆中! 否則雪溶了滲到腳上, 就凍死喇!
睇咗好一陣子 Gore-tex 的鞋, 通常都是行山大牌子, 要千多元啦~
揾揾吓發現 Gigasport 有款 Adidas 都是 Gore-tex 的! 行山款, 六百幾~
今晚齊齊試過都覺得唔錯, 就一齊買了, 情侶裝啊, 多謝老公~ ^3^