事緣係我的一班參加了毅行者的同事, 要同醫院隊伍 training, 行麥四去獅子亭,
我聽到就不請自來, 仲拉埋波比先生添, 當做每週一次的長 training 嘛~
本來是 9am 在西貢水浪窩等, 點知我出咗門口先發現唔記得帶電話, 返去攞攪到遲晒.....
八點幾先去到沙田, 去 M 記食埋早餐, 再搭 299, 去到都已經 9:30am 了~ 朋友當然早已起步~
下車後向前行少少, 就見到個公廁, 前面有勁多蝴蝶飛, 好壯觀!!
好了, 見到這個牌就是開始, 要往左上山去~
嘩...... 長命斜.....
之後就是....... 繼續的長命斜.....
頭 3km, 都是 12min/km
之後更加想死, 第3-5公里係幾百級的樓梯同亂石, 一路通上山頂.....
比著我以前, 應該氣喘得不斷要停, 不過近來的訓練有功, 只是間中停停的步伐下, 終於追到了我的朋友~
好攪笑, 我以為是有一百幾十人的訓練, 點知只有幾個真正要練習的人, 和幾個好強勁的 leaders 睇住佢哋,
朋友們已經累得停了下來, 好一陣子才可以繼續前行
當我們去到山的高處, 回望自己行過的路, 環顧四周的高山, 就覺得自己的努力沒有白費
實在太壯觀了, 沒有想過自己會站在這樣的山頂向下望!!!
左邊可以見到西貢, 右邊就是馬鞍山市, 可惜好大霧, 睇得唔清楚
話時話, 今日最熱有 36 度, 我們在山上真係人都癲.......
慶幸我有一把超強的防 UV 遮!!!
行到呢度, 如果想放棄的人可行落恆安邨, 不過都要行成粒鐘.......
我們坐低抖抖, 見識到專業毅行者的裝備, 例如好攪笑的水袋同令人羨慕的冰果汁,
這天熱得想死, 其實由未夠一公里開始, 我們的汗已經未停過咁流流流........
我那條抹汗的毛巾, 是多次可以擰得出一攤汗水的, 好嚴重!!!!
Leader 建議大家每人帶 3L 水, 其實我同波比先生都帶了共 4.4L 了, 但估唔到真係流咁多汗要飲咁多水,
最後還多得我的朋友捐出飲品俾我哋, 否則都唔知點捱到終點.....
另外要萬分佩服男同事, 佢一人孭咗 6L 水, 因為好有風度, 幫女同事孭埋!!!
此行真係幾開心, 因為又可以從有經驗者身上學到啲嘢, 又體驗到 team work 的可貴,
當我俾D 不知名昆蟲咬到條頸又紅又似被火燒時, 不同的人都會伸出援手,
有同事行唔郁時, 又有人幫佢拎嘢同擔遮~
後來, 我和波比獨自先行了, 因為唔想停太多, 想早D 返屋企沖涼,
其實過了大金鐘山, 一路都是下山路多, 不過又走唔得快, 因為大多是一級級亂石的路, 唔小心的話會跣腳跌親,
不過都見到D 專業「跑」山人士, 一跳一跳的就超前了我哋, 好似忍者咁, 真係睇到目瞪口呆!!!
下面張相可見, 有D 路就係在山邊, 一叉錯腳你就可以碌落山涯, 攪到我不停要叫住波比先生行慢D小心D
大概 2pm 我們到了分岔路口, 好彩今次做足功課知道點行, 如果唔係咁細個牌真係好易 miss!
我尋晚去書局睇過, 係搵唔到相關的地圖遠足書,
有就真係地圖一張, 睇咗都冇用, 佢都冇講D 地標, 你唔知喺分岔路口應該轉邊一邊~
好彩有 google map, 一早 plot 好晒今日要行的路線, 山上一路行一路睇, very good ar!
我們見到上面個牌就右轉上山, 然後就係一路落山了, 淨係行到返落車路都要半個鐘.....
見到車路就向左走, 要行到去恆生商科學院先會有車到市區,
不過中途都幾驚呀, 有野狗聲呀!!!
去到恆商, 冇諗過有的士!!!! 即刻跳上車, 新城市廣場o丫唔該!!
3pm 終於完成了我們的旅程喇!! 好感動呀~~
去到新城市, 即刻去茶餐廳食嘢, 其實我又唔太肚餓, 只有口喝.......
雙腳開始有點酸痛, 不過唔算嚴重, 好彩有拉筋先出發!
波比就慘了, 今日著錯船襪, 攪到腳踭被鞋磨到損咗, 貼咗膠布都冇乜用.......
醫完肚返屋企, 都差不多5pm 了~
很開心完成了今日的旅程, 間中行行山真係唔錯, 因為行山要用多好多大腿的力, 又是另一種好好的鍛鍊~
不過下次唔要再咁熱嚟行喇......
今次用 Runkeeper 嚟 track 住路線, 第一次覺得佢 track 得準, 因為平時在元朗屯門用, 都見佢條路線斜晒好唔準......
波比話其實唔關個 app 事, 係 GPS 的問題,
相比起以前我用 iPhone 配 Nike+ , 其實以前真係 track 得準好多呀, 有咩解救呢??
今日過咗 12km 佢就死機, 跟住D record 冇晒...... 又有咩解救呢?
今日我們只是行了一段的麥徑, 真正的毅行者要連續行十段囉!!! 真係好瘋狂呀!!! 100km 呀!!!
能完成的, 真係好好好犀利, 好令人佩服呀~
無論最後同事們會唔會俾選中參與醫院的隊伍, 我覺得大家一齊練習, 其實都係好好的過程~
同事年紀還輕, 假以時日努力練習的話, 終有一日可以走到一百公里的!
沒有留言:
發佈留言