O 咀的探訪活動

早前收到 HKU e-mail , 中秋節有個探訪長者同派月餅的活動, 覺得很有意義, 於是同波比報名了
點知係十個 O 咀的開始

今朝在荃灣集合, 集合前我們去了一間懷舊茶餐廳食嘢, 很愛那櫥窗內的一排樽裝牛奶, 多年沒見過這個情景了~



店內其實只售幾種食物, 但超好生意
厚厚的多士, 外脆內軟, 多牛油, 邪惡得很好吃~
奄列不是 sell 滑滑, 是好似炸過咁, 好多油, 麻麻.....奶茶唔錯~



之後, 就是 O 咀的開始咯, O 咀之
1. 分4組, 我個組個 Group Leader 竟然遲大到, 成40 人企喺度等佢等咗半個鐘, 嚟到仲好似發夢咁, 完全唔知做咩, 冇叫人簽到, 冇 organize 到一丁點的事情

2. 咁大個活動, HKU 一個 official 的代表都冇, 同耆康會的溝通又有點唔清楚, 所有嘢掉晒俾幾個都係義工性質的 Group Leader 做, 完全覺得有點不負責任

3. 報名 website 上, 只說活動地點是耆康會(上星期的 session 是在安老院舉行), 我們都以為我們是在中心派發月餅, 從來都冇諗過原來今日係上門送月餅, 係去探訪福來村的老人家; OK , 探訪老人家是沒問題的, 我中學紅十字會時都去過, 問題是一早唔講清楚! 如果有D 學生義工唔 feel comfortable 去上樓探訪, 咁點?!

4. 頂唔順見有人自己 pack 月餅水果禮物包 pack 得慢 (成 40 人等佢兩個人 pack), 埋去幫手點知俾人一口拒絕:「唔洗喇, 人多手腳亂」, 嘩, 咩人?! 你一人手腳快嗎? OK! 40人企晒喺度睇住佢兩個人 pack 46 袋禮物囉

5. 話說我覺得呢個活動係將一點心意, 送俾有需要幫助, 較為貧困的老人家, 亦期望我們的工作係去同老人家傾偈, 關心吓佢哋, 強調我哋唔係只做送貨, 我們上午去了探兩戶, 下午又去探兩戶, 點知.......

第一戶: 有個仔喺屋企, 好似完全唔知我哋嚟做乜 (根本我諗之前負責聯絡的人沒解釋清楚), 收咗袋禮物就趕住閂門, 我哋啞晒...........

第二戶: 較為正常的一戶, 不過婆婆的嚴重失聰的, 根本聽不到我們說話! 我們只是來送貨 (當然我覺得禮物對佢係有意思的)

第三戶: 一個很精靈的婆婆, 但一家人齊齊整整一齊住, 根本唔係咩有需要幫助的長者.......
我們問佢係咪耆康會的會員? 點解會參加是次活動? 婆婆話根本都唔知, 佢又唔係會員, 又冇俾過電話呢個會, 佢都唔知點解耆康會有人會打俾佢話送嘢俾佢
嘩, 聽到呢度, 我同波比先生已經覺得呢個活動好有問題, 根本個機構連見都未見過個長者,
都唔知佢根本咩 background, 有冇需要, 就叫人參加呢個活動, 跟住就叫我哋上去探訪,
見到人哋一家咁齊整, 我都唔知有咩需要我關心囉!

第四戶: 精彩! 裝修企理的公屋小富戶, 開大冷氣, 個阿婆正準備開枱打牌, 重點係有個菲傭喺度斟茶遞水中~ 我們入屋, 見到呢個情景, 真的呆了, 這是我們需要「送暖」的對象嗎?!

我實在很很後悔參加了這個不知所謂的活動, 浪費了我一整天的時間!
港大叫人用 $250 買一盒港大 100 月餅, 收益是用來辦這個活動, 如果你是買家, 你會覺得你的 $250 用得值嗎?
這是為做而做的義工活動嗎?
港大百週年慶典攪得一團糟, 我覺得這個百週年義工活動也是一團糟