我愛甜品

今日又是星期天, 又可以造甜品, 開心!

今日照著一本新買又口碑好的蛋糕食譜, 去造了北海道紅豆蛋糕,
食譜教是要把蛋白攪到企身的, 都係第一次咁整, 好得意!
完全唔洗用牛油去整的蛋糕, 得唔得o架?? 係就係健康D!

用了一罐北海道十勝紅豆混落蛋糕漿度,
焗 25 分鐘就得喇!



切開, 試味, 那紅豆味真係好好,
不過, 這蛋糕的質地實在好奇怪..... 唔似蛋糕, 又唔似麵包, 介乎兩者中間.....點解咁o架....?
唯有紅豆味搭救啦.....

這次的試驗, 令我懷疑嗰本人氣食譜究竟掂唔掂囉......



用唔晒整罐紅豆, 晚上再整個甜品,
嘻嘻, 一個是焗朱古力香蕉酥, 另一個是焗紅豆香蕉酥, 三種是我最愛的材料,
可以一次過食晒實在太滿足! (波比先生去飲, 我一個人獨食冇佢份, 哈哈哈!)



女生總是愛甜品, 對我來說更是甜品大過天,
主菜雖然唔可以唔食, 但如果有甜品的話, 我會預留很多 quota 給它~
食 buffet 如是, 平時同波比 family 食飯如是,
當飯局去到尾聲, 奶奶一定會指派各人食埋餘下的食物,
我永遠都會話:「飽喇, 食唔落喇」
但當侍應問:「各位要唔要糖水呢?」
我第一個舉手:「紅豆沙o丫唔該」
嘻嘻.......

如果可以食好多甜品, 又唔會肥的話, 你話幾好呢?