[愛烘培] 跑山 x 自家紅豆蓉麥包

今日多謝鄰居又車我哋去大棠跑步, 涼爽的天氣, 好正呀~



沿途有好多人帶狗狗行山, 呢隻大白狗好可愛!!



用 1hr45min 跑咗 14km, 爽! 不過好多上斜落斜, 上斜真係頂唔順, 全行啦~
見到好多蝴蝶、蜻蜓同雀仔, 走訪大自然的感覺真好~
見到D 人好過份囉, 九點幾就上到嚟燒雞翼, 引死人喇~~~~
波比先生跑 21km, 返到嚟成十點, 去美都食個早餐, 歎!

之後去 shopping, 買咗好多食物~
第一次整紅豆蓉, 因為嫌街買的太甜了~
七蚊雞半斤整到勁大兜, 其實同整栗子蓉差唔多, 浸豆, 煲半個鐘再用真空煲焗一個鐘,
當豆林晒就放入攪拌機打成蓉, 傳統的會再落鑊加糖加澄麵炒, 會香D,
但我怕麻煩, 成蓉後加糖攪勻就算了~



補給了麵粉後, 整了紅豆麥包~



今次唔記得咗落牛油, 但又發得好鬆好正呀!!! 整包真係唔可以心急~



晚飯煮咗簡單的肉鬆皮蛋豆腐, 原來加點醋有提味效果~



仲有用前幾日喺大澳買的蝦醬蒸肉餅, D 蝦醬好滑呢, 不過我諗冇平時的咁咸, 下次要落返多D D~