豬欄生活: 9月 2013

2013年9月29日星期日

[愛美食] Inn side out x 滿屋 x 豚王

行完山, 見時間比預期中的早, 師弟提議去飲返杯,
波比先生和師弟妹都不約而同的話去銅鑼灣的 Inn Side Out, 話咩係 last day 喎~
我都唔知係乜, 但呢三個爛玩的 HKU 友都異口同聲話讀 U 時最興落嚟飲嘢~

去到呢, 嘩, 好大的地方, 五點幾但 full 晒!!! 仲好多人等位!
我們 book 了六點食放題, 如等得太耐都唔會等了,
點知好好彩, 等咗一陣就有位 :)

三人叫了呢期最 hit 的 Kirin Iced beer, 我飲了一小啖, 上面的冰冰真係好正呀!!
我呢, 就都係凍咖啡好了~
一路剝花生, 一路吹吹水, 真係好正!

六點正, 去了一間叫滿屋的吃日式放題, 去到又係好多人呀!
我們個個都超肚餓, 點了好多款食物,
我想話呢間真係好得, D 食物好用心製作, 是我意料之外的好質素!
只是個焗蠔的汁料, 都加了很多配料~
汁煮牛舌, 又林又入味, 似食牛腩咁!

Sashimi 萬歲!!!! 三文魚同劍魚腩都超肥美! 只是帶子細粒咗少少~

嘩, 竟然有海膽手卷, 海膽的質素唔錯, 手卷的 size 剛好, 唔會太多飯, 兩啖食完可以再叫~

牛肉鍋

本來我們叫了火炙三文魚, 但唔知點解嚟咗三文魚腩, 當然好肥美~
不過食食吓, 忽然間停電!!!! 心諗唔係化.....
以為好快會攪掂, 點知話全幢大廈都停電了, 睇嚟有排攪,
於是經理就出來, 話大家可以走先, 重點係唔洗俾錢!!! 實在太難以置信了........
雖然我們真的很想繼續吃, 但見消防員都來了都攪唔掂, 就知唔走唔得!

不過太肚餓的我們, 只是有四成飽, 所以就再找下場, 呀, 不如去食豚王拉麵啦~
等了約 20 分鐘就有位, 吹吹水很快過,
一晚滿足晒幾個願望, 今日行得辛苦 D 都抵返晒了 :P

[愛行山] 好好行的港島徑

今個月最後一次行山了, 第一次同大家行港島徑, 十分興奮
因為麥里浩徑真係行得太多, 開始有點悶.......

相約在太古城等, 就開始上柏架山道, 一路都是石屎路, 超好行!!
都未試過行山見到咁多人, 很多人晨運, 放狗,
香港島的人, 其實真係有點唔同的, 很斯文, 晨運的婆婆也是高高貴貴的,
仲有一半以上是外國人, 不斷聽到的, 是非英語的歐洲語言~

約半小時就上到呢度

然後就落山了, 去到大潭水塘, 好靚的景色, 影咗好多相~

遇上了遊行的三千人, 其實郊野公園真係好好嘅地方, 讓忙碌的香港人有一點空間去呼吸一口清新的空氣, 幹嗎要破壞它???

之後的一段, 其實好悶, 行了足足 7km 都是同樣的引水道旁的平路, 只覺得行極都未到......
其他朋友竟然悶得跑起來, 唔係嘩........

間中見到海景, 算唔錯

仲有見到好似粒糖的植物

悶到要搵嘢食......

因為我們被最前的朋友拋離了, 我們不知道佢哋竟然落咗沙灘玩, 只是跟住港島徑繼續前行

行到去一個巴士站, 先知我們被遺棄了...... >.<
只有坐在馬路旁, 同師妹一齊捱麵包.......
同行見到呢個外國人帶住三個小朋友行了一段港島徑, 非常佩服!
當中最細的小朋友, 應該五歲都唔夠, 我在山上聽到佢唔想行, 但爸爸不斷鼓勵佢完成~
香港的小朋友, 不是玩 iPad 就是去上興趣班, 或者只係識去迪迪尼,
我想起一篇文章所說, 小朋友長大了, 其實會記得又多謝你帶佢去上興趣班同理所當然的迪迪尼, 還是記得爸爸曾經帶我們三兄弟去行山去體驗呢?
怎樣的家長, 就有怎樣的小朋友~
生活, 其實不需要太過物質化, 簡簡單單, 才會懂得珍惜~

終於完成了約 15km 的路程

等返其他人, 再完成剩餘的 9.5km
是上去一個叫龍脊的地方, 再去大浪灣, 跨過一個山就可以到小西灣

這段的風景好好多!!

原來呢度有 golf 場~

去到龍脊了, 好大風好爽呀!!

好多人都入晒 Solomon 行列, 我還是鍾情我的新平衡

咁~~~大個降落傘嘅..................

落落落, 去到山腳了, 見到拍住拖的狗狗

一路落, 其實已行了差不多 20km, 雙腳開始唔屬於自己......
落完佢哋又跑過, 我跟了一段後都係行行好了! 我驚我返唔到屋企.......

去到大浪灣, 其實好似係我人生第一次嚟呢度, 好多外國人呀~

仲有好多人滑浪, 睇住佢哋等浪, 覺得好攪笑~

之後是最後的痛苦, 1100 多級的樓梯, 上呀上.....

4pm 完成了24km 長征, 多謝波比先生去搵我, 幫我拎了一袋乾淨的衣服,
終點正有一個足球場同更衣室, 沖了一個靚涼, 好好好正!!!
然後就4 個人去搵食了, 待續~

2013年9月28日星期六

一翅都唔食

星期六跑南生圍, 水退,
望著數百條彈塗魚在泥灘彈吓彈吓，追追逐逐，好有趣 (可惜電話影唔到俾大家睇有幾攪笑)

另外, 我想介紹個「一翅都唔食」的活動俾大家
http://www.finishedwithfins.org/#!pledge-chi/cnsk
早幾星期, 喺西貢見到有佢個攤位

到日本旅行時, 見到有D 舖頭有鯨魚肉賣, 我覺得好恐怖,
好地地一條可愛的鯨魚, 你做咩要殺咗佢食佢D 肉? 冇嘢食咩???

轉頭一諗, 香港人成日食魚翅, 咪又係一樣, 咪又係殘殺了鯊魚食咗佢
其實, 我真係唔覺得翅有咩好食, 其實是一碗冇乜營養價值又令你多了鈉質會有高血壓的無謂食物!
上星期同波比 family 食飯, 套餐有翅, 你可能話, 都包埋唔係額外點的,
但係, 食少一煲, 佢下次就攞少D 貨, 又多一條鯊魚可以生存了~
不過有些愚昧的人, 把口就話環保, 點菜又是點了, 還有些老人家很難改變,
ok , 起碼要自己改變先, 我就決定自己那碗唔食喇!

今晚食飯, 是波比點菜, 我事前叮囑他不准點魚翅, 其實我相信你話改例湯的話, 舖頭歡迎之至啦~

2013年9月27日星期五

談

星期五放工, 約了朋友晚飯, 繼續談談她的婚姻問題,
其實, 從朋友角度看得很清楚, 男的就是拖泥帶水, 沒意思復合, 但又不決決絕絕,
還將我那想極力挽救婚姻的朋友耍得陀陀轉, 一聲令下她就得做這做那,
完全是賤男人一個!!!

看在心上, 我只有難過,
但朋友又依依不捨, 縱使我們這班朋友 A B C 個個都叫她放手, 她不願意就是不願意,
時間, 可以讓她死心和面對現實嗎?

愛別人之前, 應該先愛自己
而且那男的根本不愛她, 女的有需要繼續去愛嗎?

2013年9月26日星期四

[愛住家菜] 紅酒青口肥牛

閒時清雪櫃, 想用埋剩下的半支紅酒,
就在返工前, 將紅酒同牛肉燴飯塊同紅蘿蔔放進真空煲度慢煮,
放工再加入藍青口同肥牛, 滾一滾就得, 青口煮太耐會縮到好細隻o架~
個汁有牛肉味, 有紅酒味, 送飯 very good!

放工等車時, 撞到一個媽媽來醫院探小朋友,
有一個病了的孩子, 的確很折磨人, 工人在日間貼身睇住, 夜晚就換了媽媽唔瞓咁陪佢通宵~
其實兒科病房的姑娘都是超好的一群, 奈何人手唔夠, 很難貼身的照顧~

其實我知媽媽有 depression 仲食緊藥, 在這種生活模式下, 得病實在不難理解~
其實我真是十萬分佩服媽媽的意志, 明知是嚴重智障和肢體傷殘, 也都不離不棄......
佢見到我, 竟然開心地笑笑, 雖然我不知道是不是裝出來的, 也我還是衷心的叫她:「加油呀, 不過都記得好好休息呀」

不過同日見了另一個孩子, 也是本來好地地, 一次意外後, 又是嚴重智障和肢體傷殘,
爸爸沒有讓孩子返訓練中心, 我得了解一下, 因為那是雙非小朋友, 是否大陸爸爸不明白返學的重要?
爸爸道出因為住唐樓的八樓, 要抱住一個成四十磅的小孩落八層樓梯, 絕非易事
雙非身分, 靠孩子的綜援渡日, 屋主用 $2500 租了個百多呎的單位俾佢, 出面真係好難再搵到~ 根本搬不了, 解決不了這個問題........

我明白爸爸的難處, 但是因為居住問題, 而剝削了小孩的上學機會, 好像有點講唔過,
但我又明白, 尷尬的身份, 根本派不到公屋, 真的搬不了......
而且我不能否認爸爸說那句: 「返學都學唔到D 乜, 好似冇乜用」
因為說實在, 嚴重智障和肢體傷殘, 除了張眼張口, 孩子沒有其他自主的能力亦學不到任何東西,
返學, 我也是想孩子有點物理治療, 令手腳不會惡化的彊硬.......
談開了, 爸爸說想讓孩子進連宿舍的中心, 其實我見到這兩年間, 兩夫妻付出了很多努力, 照顧也令自己腰傷手傷
走到這一步, 有時真是迫不得已.....

2013年9月25日星期三

[愛甜品] 花膠椰汁鮮奶

其實呢, 我都唔係好明, 點解到了我呢個年紀, 面部還很青春, 常長了青春痘......
聽有個同事講, 日日飲花膠煲牛奶, 對皮膚實在好, 所以我就試整~

不過第一次, 冇研究過花膠的煮法, 攪到好腥!!
再整第二次, 先汆水再煮, 好好多了! 希望真係有D 用就好了!

2013年9月23日星期一

[愛住家菜] 神奇揼揼揼

續昨晚的生蠔宴, 因為太多嘢食, 有D 食物食唔晒, 一人拎了啲走,
波比帶回來兩塊牛扒, 正好今晚就整西餐吧~

不過牛扒拎上手, 有點乾乾硬硬的感覺, 唔通雪得太耐.......
頓時要諗諗辦法, 想起了我有個用來鬆肉的搥仔, 就用了來揼揼揼,
揼完再煎, 出來一吃, 嘩, 意想不到的 juicy 超好味,
所以, 我都唔知係呢間舖頭D 扒真係好食, 定係我揼完所以又林又好食了~

但係個搥仔真係有D 用o架, 前幾日波比幫我買餸, 買錯了D 鞋到極的雞柳返來....
又係揼揼揼, 又好食晒, 哈哈!

其他的剩餘物資, 都係煎晒佢! D 三文魚, 煎完都仲好好食~ :D

2013年9月22日星期日

[愛烘焙] 一呎大 pizza x 牛一生蠔宴

寫返尋日仲有下場, 晚上波比先生約了住對面村屋的同事歎蠔品酒,
老婆又要準備食物了!

屋企有好多就爛的蕉, 整了好大個我最拿手最鍾意食的特濃朱古力香蕉合桃蛋糕,
鬆鬆軟軟又好香香蕉味, 真係好正o架!

夜晚在朋友家, 嘩嘩嘩, 佢家新添了一個舖頭用的超大焗爐, 係一焗可以焗幾十個麵包那種!!! 好勁!!!
我搓了個麵糰去整 pizza, 都未試過整咁咁咁大個pizza, 足足有一呎長啊!!!

焗幾分鐘就食得, 滿滿的莎樂美腸, 蝦, 鮮磨菇, 青椒, 係D 芝士落得唔夠多, 因為買到呢包太碎了.......
波比指明要整薄脆底, 用了 Jamie Oliver 的食譜, 也算很成功, 不過中間位置唔落咁多醬的話, 可能冇咁濕會再脆D!
趁熱辣辣食, 十級滋味!!!

然後就是今晚的主菜, 在元朗有一間新開的高級食材店牛一
https://www.facebook.com/celebrate.food
有個中秋節套餐, 有非常厚切的三文魚, 3L 帶子, 牛扒, 翡翠螺等等
包 36 隻生蠔, 有澳洲、紐西蘭、法國的, um...... 不過味道沒有上次買的好啊.....