私家小肥羊

天氣咁凍, 有咩好過o係屋企打邊爐呢?
適逢今日我放大假一天, 波比先生尋日就已經 order 我今晚要打邊爐

唔知大家有冇o係超級市場見過呢款小肥羊火鍋湯料呢?
上個冬天已經見過, 今個冬天終於都有機會試喇! 究竟係乜東東?

打開入面有幾包o野, 第一包係味粉,
第二包, 嘩, 係成包辣椒碎, exactly 真係去食麻辣火鍋咁多辣椒!!!
為免變成膶腸咀, 我落o左 1/3包好喇

再睇, 嘩, 嚇死人, 係一大包辣椒油!!!
上次返深圳食o既魚鍋, 就 exactly 係咁大層辣油浮面呀, Crazy!!!
我落o左少少咋.....仲有少少香料

Finished!

今晚再去上次o個間「小樽」買肥牛, 睇到都流口水喇~
不過太多餸了, 冇上次咁興奮

仲有好多丸、魚皮角、羊肉

仲有波比先生指定話要食的鮮腐竹

今晚另一推介, 北海道帶子呀!!!
係雪藏o既, 我一路都唔係好知呢 d 可唔可以當刺身食,
今次見個盒度寫明話得, 梗係買啦!
好大隻, 好多粒, 都係 $50 咋!!!!!! 出去壽司店食點止呢個價!
嘩, 原來佢o地賣帶子壽司真係好好賺呀!

我o地當刺身食, 始終有少少雪味啦, 但都好肉厚算幾鮮味!
擺落去煲度渌一渌先食, 半生熟原來好正!

小肥羊的湯底, 真係好正啊!!!!
最後大家都超飽, 但仍然覺得唔好o徙o左個湯....
要渌個公仔麵食先得!! 肥死了!!!

真係超愛呢個電磁爐呀~~
又方便又快! 仲好細部好輕巧!
豬師奶拎起佢時, 覺得完全可以好似拎 Notebook 咁帶個爐出街,
去到邊打到邊! 哈哈哈!!! (邊爐毒上腦)