補鐘第二堂

我同老伯伯教車師傅都係早起一族, 就約了星期六的 7:45am 來個早課~

日頭揸車真係好過夜晚揸, 因為睇路面情況清楚好多!

今日揸咗去屯門碼頭 , 一路師傅都好用心咁提點了我好多嘢,
暫時為止, 有好多重點要緊記!

1) 好多情況要習慣腳放在 brake 上, 如: 就到燈位、左邊有巴士停站

2) 要好留意遠處路面情況, 今日遇上了好多修路, 無啦啦有小巴喺燈位等客唔開車, 有車打橫咁壞咗喺路中間...... 及早選對行車線

3) 停燈位: 踩 brake 空波就ok, 手要放在波棍上, 方便隨時開車

4) 多望鏡

5) 睇清楚D 路, 邊D 路會有車切入, 究竟邊盞交通燈係俾自己睇, 邊D 係俾隔離行車線的車睇

6) 遇上有人從小路出車, 要腳放在 brake 上直至過咗佢, 否則佢一開車衝出嚟我就剎唔切車就大鑊喇!!

7) 有人亂過馬路, 小心留意就可, 唔洗一定剎車俾佢過, 否則影響後面車輛

8) 前面車減速, 自己都要快D 減速

9) 避開死車時, 如對頭線冇車, 就駛開D 唔好咁貼死車

10) 早上揸車, 真係戴返幅太陽眼鏡好D, 望住太陽的方向真係好光睇唔到路上的線