睇車

早上去聯合醫院聽咗個關於 cleft lip and palate 的 workshop,
內容超超超正, 有醫生護士牙醫整形醫生治療師的分享,
了解到好多最新的 management 方法, 真係好正!

之後, 我約咗波比先生去睇車,
買車買樓都係一個好唔容易的過程, 去搵去睇去講價去諗適唔適合自己,
亦都要諗好多 PROS AND CONS, 除非我哋發咗達就可能乜都唔諗就買囉~

今日睇嗰架嘛, 個樣都 ok, 不過 10 個月車齡行咗成 22000km!?
仲要唔肯減價乜濟, 都係慢慢再睇睇先!

Tea Time! 我們去了荃灣的鈴木咖啡館,
$88 的 Tea Set 有好多嘢食, 歎杯咖啡勁寫意!

跟住我哋上咗肥仔屋企玩, 肥仔返來了!!
多謝 Lam's couple 從北海道帶回來的手信, 下次 GATHERING 到我哋派手信了!

去咗 Oliva 食晚飯, 唔錯唔錯!

飯後又打越車麻雀, 竟然羸到少少喎!
仲有幫 So So 慶祝生日, 快 D 拉埋天窗啦!

返工 Mode

成日放假的後遺症, 就係好難由放假 Mode tune 返自己去返工 Mode...
一諗到每朝要迫三程車返工, 就會令我唔想返工,
不過一返到去, 太多嘢做, 一開始打仗就唔會諗太多其他嘢!

我上星期話讚佢靚仔嗰個伯伯, 今日出院了,
換晒便服, 梳個靚頭, 比上星期更加靚仔添,
同佢傾咗幾句, 哈哈, 佢真係好可愛!
希望佢出院後健健康康, 唔好再入嚟咯, 唔好再見咯~

今日聯絡過車行的職員, 原來我哋想買嗰架車喺香港淨返幾架咋,
仲要冇我哋想要嘅銀色....
下一批貨要 6 月先到, 仲要係 09年版又會加價, 噢... 點算好?

男女大不同

放假日可以買多 d 唔同款式的食物去煮飯,
今晚有鰻魚炒蛋, 仲有香辣豬頸肉炒素雞, 兩個人的住家飯是一日最開心的時刻!

嘩, D 日元開始跌呀, 今日跌到落 0.082, 於是即刻入咗幾千!!!
之後仲見到佢跌到落 0.0818 添呀~~~
跌跌跌跌低 D 呀~~

老婆同老公商量買車一事, 老公又話要叫埋老爺一齊嚟睇,
老婆就覺得無需要, 一陣睇完兩老又好多意見, 最後攪到好似上年咁買唔成就真係搵嚟攪!

老公話咁架車買返嚟, 第一日都要搵人幫我哋泊,
老婆話洗乜呀, 包喺我身上, 扭吓扭吓就入到個位o架啦!
老公話咁如果我哋個車位隔離係架波子咁點算? high 花人哋架車就大鑊!
(因打算泊屋苑的停車場, 入面有好多 Benz 波子寶馬, 喺正我嗰座下面已經有架 08 新款 Benz...)
老婆都係覺得洗乜擔心, 對自己的 visual-spatial skill 非常有信心!
老公滴汗中.....

老公話咁由九龍揸架車入嚟都要人幫呀,
老婆話洗乜驚, 至多我行巴士線, 我唔信我返唔到屋企!!!

哈哈, 男人同女人諗嘢就係咁唔同嘛!
我係唔想麻煩人o者, 而且遲早都要自己學自己揸o架啦, right?

雪藏牌出沒注意

成大半年冇揸車嘅我, 今日去咗駕駛學院練車, 真係一額汗!

老老實實, 咁耐冇揸, 真係左邊嗰個係油門定腳掣我都唔記得,
一上到車, 簡直係零記憶, 連邊度插車匙都搵唔到 (我諗阿 sir 滴晒汗),
唔記得帶安全帶, 唔記得點教冷氣, 等等等等.....(我諗阿 sir 有小丸子三劃 =.=!!!),
我都建議喺場內兜兩個圈先出街!

今日由元朗揸咗入屯門, 兜吓 D 橫街呀,
揸車真係要好好好專心先得呀, 一唔留心真係好易出事!!!

之後就返元朗, 練吓泊 L 位同 S 位, 泊位真係最驚嘅環節呀,
一諗起第時要喺元朗嗰 D 咁窄嘅路泊個 S 位, 真係滴晒汗!!

買車同買樓方面, 因為買樓真係影響好大 (雖然近來真係見到有D 筍盤),
我諗我哋都係買車多!
仲有個幾月我哋個牌就夠一年, 係時候買車都幾好!

之前睇 Echo, 呢幾日睇緊 Jazz,
坐過 Ashley 架車真係覺得 Jazz 幾好喎!
不過今日又有朋友 suggest 我哋不如買架掃把佬 R2,
係得 700cc 的車仔, 上斜就一定唔夠力架喇, 但代步就勁慳油! 可以考慮揸返工喎!
重點係新車都唔洗十萬, 諗得過呀!!!

特別消息:
波比夫婦將於本星期日, 下午3:30至5:30 時間,
駕駛香港駕駛學院的私家車於旺角一帶出沒,
介時將沒有封路措施, 前往該區之市民請小心過馬路

南丫島遊之行山篇

食飽飽, 好多人飲到面都紅晒, 攪到成4 點, 以為會唔會取消行山活動呢?
點知大家興致勃勃, 開始行山了!

有一戶人的花園內, 有一大棵楊桃樹, 勁多楊桃啊!!!!



又見到蕉樹添!



仲有一個婆婆的農田, 種咗好靚的生菜!



同行之團友竟然同阿婆買起菜嚟, 嘩, 即買即摘, 去邊度搵?
同事職業病發作, 好似問 patient 咁問阿婆幾多歲,
嘩, 阿婆 86 歲了, 仲好壯健啊!



行咗個多小時, 去到了榕樹灣嗰便喇!
見到個雜誌都有介紹過的香草園, 小小的園地, 種著好多唔同品種的香草~
仲有好多小花, 影咗幾張自己好滿意的花花照片啊!!!






仲有個小茶座可以坐低歎杯花茶~




嘩, 第一次影到樹葉的小水點!



去到大街, 重遊多年前我好鍾意去的「南島書虫」,
係一間可以食個 Tea 睇吓書, 好 hea 好悠閒過日子的小 Cafe!



波比先生點了好香濃的咖啡, 面頭的玉桂粉好香好香!



我就點了 Chocolate Shake, 有一種唔知係咩的香草味~



旅途完滿結束了~ 這是婚後第一次重遊南丫島, 好開心~
今日仲見到 Research Team 的 T 先生, 覺得佢真係好犀利, working hard and playing hard!

南丫島遊

今日應邀出席隔離醫院同事攪的南丫島海鮮行山之旅,
去之前同師妹講笑:「嚟啦嚟啦, 有好多醫生喎」

出發前食咗尋晚買定, 好正的包包, 右邊的蕃薯包係我哋嘅至愛!

去到碼頭集合, 嘩, 好多人, 成40 人都有~
除咗醫生護士同 3T, 仲有藥劑師、營養師、足部治療師、放射治療師....
好似每個 Dept 都派咗代表出席咁!

搭船去索罟灣, 40 分鐘就到!

今日天氣好好啊!



好多海鮮酒家, D 海鮮好大隻呀~~~





開餐前再四圍走走, 買咗鳳凰卷、炸白飯魚、蝦仔 XO 辣醬~
波比先生好熟路, 因為有人有時食 lunch 會嚟呢度食 (由數碼港搭船過嚟, 點解可以咁歎?!)



準備開餐了, Catering Manager (副攪手) 自己帶埋白酒嚟!! 好識歎!!!



上菜喇, 嘩~~~ 龍蝦呀~~~ 好壯觀!



呢個象拔蚌勁新鮮爽口, 從來未食過咁好食!



其他星斑呀、扇貝呀都好正!!

最後點少得南丫島 Must Eat 豆腐花!! 好滑滑滑滑啊~~~

探 BB

今日同波比先生仲有一大班佢嘅同事, 上一個同事屋企探 BB,
係個個幾月大的 BB, 似一個可愛的飯團, 好攪笑~

近日都會傾吓要唔要小朋友的問題, 我仍然堅持要請工人, 波比先生就堅持反對,
咁等你肯向現實低頭, 明白我哋唔請個工人就根本唔可能照顧到 BB 呢個現實先生啦~

Short term goal 都會諗諗換樓定買車?
唔洗諗小朋友住, 咁都係為咗返工同第時返學方便 D,
以上兩個方案都會好認真諗諗, 話唔定喺我開學之前實行!

聽日同醫院的同事去行山食海鮮啊!
早D瞓先!

遲來的春銘

成個 Cluster 的 ENT 攪春銘, 喺一間好遠的酒樓......
本來我都唔打算去的, 不過始終是俾面派對,
廢是又俾某D 人借D 倚話我好唔合群呀, 好啦, 去就去啦~

嘩, 共有 14圍咁多呀!
平時大家見面都戴晒 Mask, 今日全部都唔洗戴 Mask, 反而好難認到 D 人!
憑對眼憑把聲估返佢就係邊個 ward 的護士~

玩超級無敵大電視, 估埋晒 D Medical Terms 同D 好抵死嘅詞語, 笑死!!!
最經典係同我拍檔嗰位 ENT Consultant 醫生都被點出去玩囉, 佢正經得嚟超爆笑!

暫時放低恩恩怨怨, 開開心心吹吓水的一晚,
算係比我想像中好啦~

季尾打邊爐

係波比先生早前送我的心心底褲麥兜, 個樣加埋個半 O 咀勁傻!
去日本都諗住帶埋佢去呀, 佢就有福啦!

日元終於都開始回落了, 今日見去到 0.0827 收市, 可喜可賀!

好緩慢地繼續睇緊書, 見睇緊本關於 FEES 的書幾好喎, 想不如買一本私伙啦,
上網 check check, 嘩, 唔係化.......
呢本書成 USD 400 咁貴o架..... 失覺晒.......
雖然我早幾個月買同一 Author 出嘅 FEES 書都成 USD 200, 但 $400 實在太貴了....

份人工呢, 好多時就係買吓書, 買吓 equipment, 上吓 course 咁就冇晒o架喇,
sigh....

今晚喺屋企打邊爐, 尋日喺 Jusco 買嘅肥牛都唔錯喎!
不過都係掛住個小肥羊湯底多 D! 最衰仲未病完....
應該都係今個冬天最後一次打邊爐了~

Spring + Warm Dinner

今日終於喺日光日白嘅時間, 影到樓企樓下嘅羊蹄甲 + 洋紫荊喇!
日本有櫻花, 香港其實都有好靚嘅港花,
上年搭火車見過太和站帝欣苑旁邊開滿了成條路咁多的洋紫荊, 好好好靚o架!

喺內園見到呢D, 估吓係咩?

哈, 我都唔知係咩花, 個型有 D 似木棉, 但係係紫色o架喎~

師奶仔下晝的節目就係去屯門吉之島買餸,
去到吉之島超市, 人頭湧湧, 呢樣又想買, 嗰樣又想買呀~~~
行咗好耐先決擇到買咩...... 今晚食西餐, 聽晚日式火鍋啦!!!

有白汁德國腸仔三文魚意粉

仲有呢個蜜糖牛油焗帆立貝!
雖然就食唔到咩牛油味, 但係焗得好脆呀~
吉之島超級市場的食物質素真係唔錯, 平時凍肉舖買的帆立貝好多時整完都腥腥地,
今次就好好食!

仲有見到燒雞、炸物我都好想買, 不過仲聲沙緊.....
忍住忍住, 好返之後, 下星期一再放假再去買過!

忙碌之假日

今明兩日放大假, 做做家務, 買餸煮飯,
我發現最理想的生活, 應該係 0.8 返工, 0.2 做一個家庭主婦, 星期六日繼續例假吖唔該!

今日為我們的8 天東京之旅行程埋尾, 好開心啊~ 睇見D 行程就勁期待了!

Day 1: 搭 CX 早機出發 --> 行百貨公司 --> 豐島園庭之湯浸溫泉
Day 2: 御殿場 outlet Shopping 睇富士山 --> 池袋行街 + Namja Town 遊樂
Day 3: 整天於 DisneySea 遊玩
Day 4: 橫濱: 横浜拉麵博物館 --> 八景島 Sea Paradise 睇動物 --> Cosmo World 坐摩天輪看夜景
Day 5: 吉祥寺 (井の頭恩賜公園, 坐小船) --> 下北沢 (閒逛雜貨小店) --> 涉谷
Day 6: Mother Farm (看小動物, 摘水果, 花田) --> 東京站 (地下街及八重州地下街)
Day 7: 築地 -->上野動物園, 上野恩賜公園, 國立科學博物館 --> 上野買手信--> 東京都廳睇日落和夜景
Day 8: 新宿御園 --> 新宿百貨公司 --> 黃昏坐 CX 機回程

哈哈, 係咪好豐富呢?

最最最希望係可以見到櫻花開, 上野恩賜公園、井の頭恩賜公園、新宿御園都係睇櫻花勝地!
三個公園都去晒, 實會見到 D 掛!?

早幾日去奶奶度食飯, 奶奶問我哋去幾多日,
我話去 8 日, 奶奶爬爬吓飯好大反應地嗌:「吓? 8 日咁耐?!」
我同波比先生當然扮傻唔出聲啦.....

8 日o者, 好似擔心我掳帶咗佢個仔走咁...

今次唔去的話, 我諗我有排都冇得去長旅行呀~
所以要玩就梗係玩到盡啦!

左右做人難

今日終於收到了大學寄來的 offer letter,
下星期前要交學費同登記了~ $$$$$$$$$ byebye......

未來兩年都要慳D 洗先得喇......

Faculty of Medicine 的學科, 終於感覺自己似返個 Medical staff

工作上, 遇到一 D 難取捨的事,
老細想我學做一D 嘢, 但有人又覺得我唔應該去做, 我應該點?

春天到了嗎?

嘩, 呢兩日成廿幾度, 又濕又熱!
濕到 D 衫晾足一日都唔乾, 喺書房開抽濕機順便乾衣, 4個鐘抽咗成 5L 水出嚟!
熱到喺屋企要開冷氣先生活到, 噢..........

見到樓下一排的洋紫荊開了花, 一條紫粉紅的長廊, 好詩意,
春天來了!!

今日起身, 把聲好返少少喇, 起碼出到聲,
但係仍然勁 hoarse 勁多 phonation break...... 如果聽日都唔好, 真係要抖多日喇~

今日乖乖喺屋企讀吓書, 好唔容易睇完一個 Chapter 嘅 Anatomy & Physiology,
好~~悶~~~ 但係唔睇的話又唔得, 之後嘅 Chapter 會冇咁明白,
希望今次唔好睇得少少就俾 Lib 催還書啦~

結婚700 日

情人節, 我哋一向都唔會點大肆慶祝, 因為我們都一起了好多個年頭喇~

不過今日都想兩個人拍吓拖, 地點就係........

估到係邊度嘛? 就係九龍站的 Elements 了!

Elements 開咗咁耐, 我同波比先生都未去過啊!
今日係做晒資料搜集先去~

先去了千両度食 Lunch, 原來佢係元氣嘅高級版, 食物質素掂喎!!!
帶子呀、蝦呀、魷魚呀全部都勁新鮮, 仲要係睇住師傅喺你面前整~

呢個帶子刺身簡單係 Excellent!


厚燒玉子又甜又滑又暖笠笠

呢個茶碗蒸都係又滑又暖笠笠, 入面有蝦有蟹柳, 好好味, 食咗有好幸福嘅感覺!

跟住去咗 Grand Cinema 睇 "Bride Wars", 有笑位又有感動位,
結過婚籌備過婚禮的人, 仲會有另一番體會~

睇完戲, 我們逛逛這個大商場, 下次要試試 Level 3 平台的露天 Cafe & Bar,
今次我哋就揀咗Caffé Vergnano 1882~

下午茶時段嘆一杯 Cappuccino, 永遠是波比先生最愛的活動

Set Tea 有好薄好脆的 Pizza, 正呀!

要一讚玻璃杯內的 "1882", 是 Espresso + 朱古力, 味道超濃~
Tiramisu 亦都好好味啊! D Mascarpone 真係好好好滑呀~

今日呢, 真係從未試過咁嚴重地失聲, 我真係好辛苦都講唔到一個字,
只可以做口型同手勢同波比先生溝通
隻衰佬仲趁我講唔到嘢係咁激我, 到我開得返聲你就知味道!

我有書讀喇!

呢排都有 keep 住上大學的網站, 睇睇個 Master Program 有消息未

今晚一睇, o依~~~ 開始有 Admission result 出喇!
用自己個 Application No. 去 check, 好緊張啊!!!
登登登鄧~~~ 嘩~~~~我得咗呀!!!
真係好開心呢!!!

其實呢排都有猶豫過, 即使佢收我, 我讀唔讀呢?
如果都諗住轉工, 就唔好讀喇, 因為讀嚟都唔啦更~

不過經過呢個星期, 好多事都明朗化,
我知道了遊戲規則, 知道了要喺度生存就要做一個聰明的玩家,
知道了邊 D 人要小心防範, 千祈唔好亂信人, 唔好講太多事俾人聽,
咁就 keep 到你安安全全地生存落去~

所以, 我會 Go Ahead 呀, 祝我好運, 為我祈禱啦!
好好 Enjoy 埋我呢半年嘅 5-day work, 往後的兩年, 就一星期六天都要返醫院了~

姑娘睇街症

今日去了第二間醫院幫手, 不過見咗三個 case 把聲已經好唔掂....
好彩同事好好人, 話叫我下晝放 Sick Leave, 佢自己睇返 D case

呢間醫院本身冇 Staff Clinic, 我要搭的士去第二區的 Clinic 睇,
點知去到登記, 先發現張員工睇醫生嘅 Form 冇級醫院印..... oh.........

我諗不如返去睇返私家醫生啦, 點知同事話叫我搭的士返醫院級返個印喎....
盛情難卻, 唯有係咁, 如是者來來回回搭咗 3 次的士

呢間 Clinic 其實即係睇街症嘅診所, 唔係我哋嘅職員診所,
同埋D 公公婆婆一齊輪街症.... 隔離個似乎 psy psy 地嘅阿婆自言自語一輪後, 仲撩我傾偈...
睇咗個女醫生, 木口木面, 一聽到我係 D URTI symptoms, 就即刻掉個口罩俾我戴, 啞咗...
聽呼吸聲時, 用勁粗暴嘅手法, 洗唔洗呀.....
查實我覺得自己都係喉嚨發炎o者, 唔係為咗張假紙, 真係唔好嘥我時間嚟睇,
開埋晒 D 最行嘅藥..... 我其實都唔會食

最後拎埋藥成四點幾先走得, 同冇放 Sick Leave 根本冇乜分別,sigh.........
早知都係堅持返元朗睇私家啦~

今個 weekend 真的要好好地 Voice Rest 了!

尋晚去咗旺角一間叫「韓食家」的餐廳食韓國嘢, 好好味啊!
呢個三色粉絲超正, 可惜我而家唔食得辣味嗰D

石頭飯的牛肉醃得好好啊!