第五堂長跑訓練班 x Lion Rock

今個星期六, 冇 join 朋友行山了, 反而陪陪波比先生上長跑班啦
唔記得買麵包, 好彩醒起有包從日本買回來的 pancake 粉,
超方便, 一包粉, 一隻蛋, 100ml 奶, 攪勻一煎就食得!!
配上日本買回來的蜜紅豆, 更是十級的美味!!



出門口前落好大雨, 大到一定擔遮都濕晒, 所以就揸車去,
第一次享用了信和的環保車泊車優惠, 話說如果你嗰架係佢指定型號的環保私家車,
可向佢申請呢個泊車優惠, 俾個八達通號碼佢, 就幫你 register,
去佢指定的停車場泊車就有 6 折, 例如今日泊去御庭軒個車場, 折完都係 $8.4/hr, 好多位又唔洗淋雨, 真係正呀!!!

今堂可能因天雨關係, 得十幾個人,
說是第五堂, 我其實是第三次上, 中間大家都練咗好多新嘢喎~
波比先生都真係有D 進步, 冇咁似機械人喇 XD
我呢排跑步都真係有應用教練所教的姿勢去跑, 姿態改善了, 真係更加慳力, 冇咁易攰,
可能我之前一路都用錯力, 淨係識用小腿力, 攪到呢一兩年間小腿粗咗好多, 有一舊結實的肉肉....
希望改善跑姿後, 小腿唔會再繼續發達落去啦!

跑得咁辛苦, 之後去了旺角帝京酒店的 Lion Rock 食 lunch
呢間餐廳喺我的 wish list 好耐喇, 今日終於有機會去喇!!
我們坐在落地玻璃的位置, 望著整條鐵路同獅子山, 個 view 好正!!



都係得幾枱人, 寧寧靜靜
充足的陽光, 超舒適的環境!



我們一人點了一個 SET LUNCH,
我點的日式 SET LUNCH $148, 用 STAFF CARD 有 7 折, 抵
先來了新菜, 茶碗蒸超滑滑啊!!



還是第一次在酒店食 set 的壽司, 真係有過人之處, 魚生都好新鮮, 同 buffet 食的絕對是唔同級數
人手握的, 壽司飯夠實淨, 有恰到好處的壽司醋香, 讚!!



還有日式 Udo, 美味~
波比點了白汁焗雞飯, 估唔到係用了 risotto, 好 creamy 及濃奶味的白汁,
雞肉一食就只係新鮮雞, 唔同一般餐廳的無味雞肉, 呢個飯是估唔到的出色!



每人加 $18 有任食甜品, 共有六款之多, 我真係對每一款都非常滿意,
燕窩北海道牛奶布丁: 好滑又好濃奶味, encore 了!
白桃果凍: 白桃很鮮甜, 果凍酸酸的, 很開胃
羅勒朱古力慕斯: 不會過甜, 有點羅勒的香草味, 真有趣~



藍莓芝士蛋糕: 超超超得呀, 未入口, 放到口唇都已經 feel 到那濃郁的芝士味, 絕對真材實料, 一小件剛剛好!
Brownie 反而有點點過甜, 另有斑蘭蛋糕, 很香的椰汁同斑蘭味, 焗得夠鬆軟, 又係十分讚啊!



波比先生加了 $20 點了 Starbucks 咖啡, 送 cheese cake 食幾開心!
這餐實在萬分的滿意, 下次一定要再來試試 high tea!!