起點是油塘, 我們要走畢衛奕信徑三四段, 到黃大仙作終點~
是日一起身, 發現下著黃雨, 九龍東的雨勢仲要頗大, 究竟會唔會取消呢?
但我們住得遠, 都不理得通知, 都要七點鐘出發了~
八點半去到油塘站, 先去大家樂吃個豐富的早餐, 一讚這個滑蛋真是超美味啊!!!
食完嘢充滿力量, 在地鐵站集合, 今天師弟妹都有出席,
哈, 我同師妹的波鞋都是 shocking pink, 忍不住要拍個合照!!
還有為我們的新背囊拍個照, 大家近來都添了不少的新行頭, 哈哈!
好了, 一行十四人出發了~
不久就是上斜, 勁斜, 是行去永遠墳場的一段路, 行了一半, 已經標晒汗!
過了斜路就走入山中, 去到山的一半已見到美麗的九龍景色~
上到「炮台山」的山頂, 我們抖抖, 雲就在我們身旁飄過~
見到維多利亞河
遠望見到東龍島
右邊的將軍澳密密麻麻的屏風樓, 第一次親眼見到它的密度, 真係好誇張!
前面的幾個山, 就是我們的行程!
這個第三段竟然比想像中易行, 可以因為上次的麥徑真係太艱鉅!!!
今次竟然係有D 下圖嘅平路, 實在好感動!!
兩小時, 比預期中快已走完第三段了, 我們去到清水灣道的井欄樹, 坐低食D 嘢,
兩小時前先食完大家樂, 本來都冇打算咁快又食嘢,
但係D 叔叔嚇我哋一陣好辛苦, 所以我哋都唔執輸人人都食D 嘢~
從井欄樹出發, 哈哈, 行行吓發現行錯路, 好彩發現得早, 及早回頭~
走完小段的平路, 我們又上山了, 嘩, 呢段真係好辛苦
全段都係呢D 濕立立的泥 + 樹葉路, 不停的上, 上咗成個鐘頭!!!!
我對鞋...... 都已經豁咗出去了, 全腳濕晒 up 住...... 有點難受..........
上呀上, 上呀上, 嘩~~~~ 就是用我們的雙腳行到這個山頂, 遠望西貢蠔涌!!!
Too amazing!!!
去到山頂, 波比拿出尋日雪定的冰菠蘿俾大家食, 正到爆囉!!!!
因為大家都就嚟斷氣同埋熱死~ 流了一公升的汗!!
之後再前進, 竟然橫風橫雨, 完全冇想像過, 自己會在橫風橫雨下, 喺個山頂行緊......
大家有遮都全身濕透, 都豁出去了, 所以都係收返埋個電話, 冇得再影相~
這次是行程, 仲要過河啦, 踏了很多的泥漿地啦 >.<
好艱鉅!
我最怕的就是落斜, 因為下雨後非常跣, 好彩波比借咗把長遮俾我督督吓先好D~
但見到有個女仔, 跳吓跳吓, 行得好快連影到冇, 真係好勁呀!
終於過晒D 山路, 行到車路, 望到成個東九龍, 好壯觀!!!!
呢班叔叔真係超勁, 落落吓山跑起嚟, 攪到我哋要追!
整個西九龍, 連 ICC 都見到! 如果今日好天, 景觀一定超美!
我們就像在雲中行, 應該有 100% 的濕度, 我們身上所有東西都濕透了!!
但如果係好天, 又可能熱到溶咗, 人就是這麼矛盾!
這裡是完結點獅子亭, 很開心的拍拍大合照~
行咗 6 個鐘, 有一班人仲未夠喉, 再行去沙田!
我們夠了, 行落去黃大仙~ 當中有兩個叔叔陪我哋行, 傾吓行山事, 獲益良多!
同佢哋行山真係好好, 起碼有人激勵你唔會半途而廢,
而落雨行山都係一種訓練, 如果得我哋兩個, 就一定唔會落雨都行啦!
不過佢哋真係行得好快, 有時想停低拍拍沿途風景都唔敢, 因為會大落後有排追返佢哋!
原來我們醫院聯網毅行的最佳時間是 17小時半, 嘩, 好瘋狂呀!
其中一個叔叔陪我哋落山, 原來佢又上返山, 再行去沙田, 返屋企再跑一個鐘樓梯, crazy!!!
唔怪之得佢 fit 成咁!!
我深深被他們對行山運動的熱誠所感動, 一兩天的比賽, 但他們用上一年的每個週六日作訓練,
一天可以用上八至十個小時, 不停的行和跑, 默默的練習, 不分晴雨,
為的是挑戰和突破自己, 不是為了別人的掌聲, (需知道實在沒可能同 14 小時完成 100公里的鐵人相比)
一種運動, 令人有恆心、耐力、健康的身體、志同道合的朋友,
辛辛苦苦的走到山頂, 就有開揚壯闊的風景, 我也被這運動所吸引~
落到黃大仙, 另一個叔叔好好人, 帶我哋去體育館換衫,
嘩, 實在好感動, 好想快快換掉一身超臭的衣服!
然後, 大家也覺得肚餓, 走了去吃譚仔,
填飽肚子, 超超超滿足呀!!
返到屋企沖涼後, 抱頭大睡, 瞓到半夜起身又食嘢, 又再瞓,
一路瞓到星期日的7 點!
沒有留言:
發佈留言