給自己的手信

或者妳的 Clinic 都會有呢 set 嘢, 簡直係我的最愛之一,
係我喺日本買俾自己唯一的 non-food 手信!

雖然 log-on 都有得賣, 但去到日本, 不停地喺唔同舖頭都見到佢哋,
就覺得必定要帶佢哋返香港!

今日拎出嚟用, 個媽媽問我喺邊度買, 我話「日本呀, 呵呵呵」

今晚 farewell 了同事, 五月又有新人嚟喇....
唉, 我哋個 cluster 係全港不停請新人請得最快嘅囉

無奈

今日簽咗份三年的賣身契,
不過, 好好好無奈.......

有時理想同現實真係兩回事,
正如愛情和麵包, 你會揀邊樣?

Sweet Cafe

星期日的午餐, 第一次來到這間 Sweet Cafe

元朗實在冇乜邊間真係有心做菜的 Cafe, 嗎哪廚房已經是不錯的選擇,
但原來深藏了這間有 Heart 的 Sweet Cafe, 今日有幸遇見~

西餐 Set Lunch 有十多個選擇, 小小的店子只有廿多個座位, 但都差不多坐滿人,
好寧靜的環境, 有點陽光從窗外透入, 加上輕鬆的音樂, 好悠閒的感覺~

點了兩個 Set Lunch, 先來了濃濃的魚蓉忌廉湯, 睇賣相已經唔係隨手畢俾你就算,
還有兩個暖暖的牛角包, 又香又脆, 單是湯和包已經好滿意了!

主菜全是即叫即製 (睇到廚師即刻做的), 絕對唔係大量煮熟再翻叮之作!
熱和脆的薯條可以一口氣吃完, 拌碟的蔬菜有四種之多, 好夠健康,
我的雞扒煎得皮脆肉嫩, 下面仲有惹味的什菇,
太大份, 但又好味得要吃個清光!
最後還有即磨咖啡, 入口香醇的感覺, 知道我們今日真的沒去錯地方!

有心有誠意的 Cafe, 有朋友來元朗的話, 找我們一同再去試試啊!

心郁郁....

去日本的時候, 喺秋葉原行咗一間好大好大的百貨公司,
唔係 0101 淨係賣衫賣袋的百貨公司,
而係我搵咗好耐, 有玩具部有電器部的百貨公司!!!!

玩具部的玩具真係靚到殺死人, 至今我仍念念不忘一部玩具洗衣機!!
真係有點後悔冇買佢返香港....

另一令我流連忘返的, 就是相機部!!!
嘩嘩嘩, 實在太不誇張了! 有齊晒唔同牌子的DC/ DSLR 俾你任試任玩,
仲有幾百支唔同鏡頭任你試完先買!!!
(當時第一個諗起 Ashley, 如果妳捧著妳的 5D 來到, 一定十個 Happy!!!)

我玩咗 Pentax K-m 同埋 Canon EOS Kiss X2(應該係香港的 450D),
K-m 對焦之快真係好唔錯!!
回港後真係有 D 身痕, 不過睇完唔同的 comment 後,
有人話 K-m 的畫質仲差過我部 LX3 (咁嚴重?), 所以令我卻步了!

還是繼續鍾情於我的 LX3 去拍拍拍吧~

心血來潮, 搵返 LX3 隨機附送的 software 出嚟,
一路都懶得去裝, 今日終於有心試試用,
用了 Photo Stitch 整出來的 Panorama 相, 如果天色的部份我影得好D,
相信整體都算唔錯呀~

東京的夜景, 真的叫人讚嘆的美

送這張羊咩咩相俾大家, 我好鍾意呢隻羊,
好想問吓佢個頭係去邊度電的, 好 cool!

終於到週末

星期六, 行行花墟, 行行旺角, 再去 Cafe 飲個咖啡

同波比先生第一次捉波子棋, 哈哈, 睇吓我幾快去晒對面!

解毒

中咗太深的日本毒, 今日同波比先生去食個 Domon 札幌拉麵,
點知完全地失望, 一 D 日本風味的湯底都整唔到,
豬軟骨仲要整得唔夠入味.... sigh.....
我哋都異口同聲話返屋企食日本杯麵好過!

好彩飯後還有個哈根大師香蕉船補數,
朱古力夠濃, 夏威夷果仁夠香, 士多啤梨又唔會太甜, good!!!

行行日式超級市場和日式店子, 暫時解一下毒啦

Tilt Shift

東京拍的照片, 加了移軸的效果

球迷變了玩具人

元町的小屋變了菓子玩具屋

從東京都廳前看的東京全景,
高樓變了玩具小樓, 很好玩!

如果我用的是 DSLR, 一定要買支 Lensbaby 玩吓~

今日喺 Online Album 中寫了三天的遊記, 剩餘的五天希望唔好爛尾.....

鼓起勇氣打開醫院的 e-mail, 成百個 e-mail, CRAZY!!!
最 O 咀係有個 e-mail, 老細無啦啦交咗我個名去每月的聯網總監飯局!!
OH~~~~ WHY ME???????
呢餐飯, 真係食咗都消化唔到.......

最後一日假期, 篩走咗好多之後, 仲有三百幾張相覺得非曬不可~
終於洗完了八日的衣服, 煮咗兩餐住家飯, 三餸一湯添

兩週年之後, 我要做個更稱職更乖的老婆啊!

So Sweet~

未去日本之前, 睇到廣告, 已經好想試了!

這是美心新出的流沙奶黃包

初頭的一兩口, 未感受到它的威力,
食到中心, 嘩, 流沙奶黃如泉湧出, 真係流o架!!!
佢唔係用一般嘅吉士餡, 真係用酒樓嘅蛋黃流沙餡, 好好味!
$6.5 的價錢, 算是超超超值了!

尋日去了師姐的診所派手信, 估唔到佢哋預備了小禮物給我呢, 很窩心~

八天不見的香港

回來後, 忙著見見雙方家人派手信,
忙著 call call 朋友相約派手信

終於試了杜如風介紹的蛋糕

日本嘢, 包得靚到吖....


OH, 白雪雪, 睇見都想食

切開了, 蛋糕不是主角, 面頭的奶油香香的, 仲有脆脆的糖霜碎,
加起來吃一口 = 幸福的感覺
男孩子送一個俾女朋友, 必得女朋友歡心 :P

八天不見, 忽然覺得好多嘢都唔同咗,
麥當當的食物唔同咗, 巴士的電子顯示唔同咗

一出門口潮濕的空氣, 與東京乾燥的天氣太大對比,
陰陰天, 又和東京的藍天白雲太大對比,

We miss Tokyo Tokyo Tokyo Tokyo Tokyo Tokyo Tokyo

不過好彩我哋選擇了星期六走, 如果尋日先走就大鑊了!
成田機場一片混亂, 我哋嘅公司機票真係唔洗旨意上到機咯!

星期三就要返工了, 其實喺日本尾兩日已經開始成日發夢見到老細.... *o*!
今個星期的時間表真係 tight 到嚇死人, 一諗到就唔想返工.....

呀, 我下星期一係咪放假o架? 我自己都真係唔記得......

快快整好 D 相同 Video, 要收拾心情返工了~ 現實是現實, 我仲未中六合彩!
想睇相的, 我的 facebook 同我的 online album 都有啊~

橫濱八景島

回港後, 努力地 upload 相片到 facebook,
努力地 upload video, 有幾段可愛的動物仔 video 送俾大家~

Sakura Sakura!

wu wu wu..... 最後一日了, 好唔捨得日本呀~~~

今日最開心的事, 就係見到幾棵全開的櫻花樹!!

好難得先見到幾棵全開的櫻花樹咋, 覺得自己已經萬分的幸運了!
見到一排排長滿了花蕾的櫻花樹, 幻想所有樹都全開的時候一定超超超靚呀!
可惜還未是時候呢...... (可惜工作上安排唔容許我下星期先放假啦....)

以下相片全部冇用 Photoshop 執過, 用電腦睇返已經覺得好靚了~~~

回程登機一切都好順利, 最開心係喺機場的最後 moment,
俾我見到杜如風都有介紹的蛋糕店!!!!!
之前去涉谷唔啱時間買唔到啊, 估唔到佢喺機場都有分店, 而且仲有細個裝賣添!
買咗一個返香港, 聽日要試吓究竟有咩咁巴閉, 杜如風次次都要帶幾個返香港咁嚴重!

返到屋企都係九點幾咋, 太好了!
數一數, 嘩, 我哋買咗 17 個杯麵呀, 好 crazy!!!
我會好懷念日本超正的湯麵呀~~~

仲有一大堆的薯片! 下次帶去肥仔度開餐啊!

真係從未試過放過一個咁 relax 嘅假期呀, 仲要 8 日咁多,
今次真係好 honeymoon feel 呢~
我們的兩週年, 實在很滿足亦幸福啊~

望住本新假期, 幾時我咃先可能再去日本呢?

回到清境

第 6 天的行程, 我們坐了三個小時的 JR + 巴士, 去了千葉縣的 Mother Farm,
一入到去, 有如重回清境的感覺!
高山上, 一大片的藍天白雲做背景, 一大片令人想趟下去的油菜花田,
我們摘了士多啤梨和蕃茄食, 嘩,
士多啤梨多汁到滴晒出嚟, 甜到好似食糖, 一入口即溶的質感,
實在太難忘了! 唔係新鮮摘的, 相信好難可以重拾這種滋味!!!

還有摸摸羊咩咩, 黑白乳牛, 小白兔,
看小豬賽跑, 我們「投注」的一號小豬果真勝出了,
令我們贏到一隻大媽媽豬回香港喇, 嘩哈哈哈!!!

(除了走水貨杯麵同薯片, 而家仲走埋水貨豬肉.... 會唔會俾海關拉?)

流浪了五天

不知不覺, 原來已過了 5 天,
實在有太太太的第一次了,
第一次到 DisneySea, 超美的風景,
第一次親手摸摸海豚同勁近接觸北極熊同企鵝,
第一次看 J-League 球賽,
第一次看櫻花,
太太太多美麗如畫的風景, 令人樂而忘返....

發現帶來的 Yen 唔夠添, 點算.....

Hi from Tokyo!

各位朋友大家好呀! 我哋安全到埗了!
今日一切都好順利, 非常感恩!
喺機場遇到好好的地勤, 仲安排到窗口位俾我哋,
CX 的機真係好好好得!
到了東京, 間中微微雨都算唔錯喇!!
酒店勁近 JR 店, 好方便!
短短幾個鐘, 已經食到波比先生俾我鬧佢唔准再食!!!
激史人了!

好了, 聽日再續!

東京, 我們來了!!!

今日返工忙到嘔, 打衝鋒完成了手頭的工作,
不過仲有醫生未覆我 call , 攪到仲有D 嘢未做得完晒添.....
都唔理得咁多, 返嚟再攪~

7點收工, 嘩, 一出醫院咁鬼史凍嘅.....

返到元朗食飯, 波比先生好擔心我哋聽日上唔到機....
因為佢公司同國泰傾唔掂數, 以後一年冇平機票,
我哋手上的機票好彩拎得早, 但就擔心聽日去到機場, 會俾D 空姐留難,
所以聽日我哋要 'formal dressing' 咁上機囉, 唔係就俾D 空姐有位入話唔俾我哋上機!

天氣勁潮濕, 我哋發現睡房嘅牆竟然開始發霉了!!!
好彩發現得早, 希望今晚開一開抽濕機會好 D 啦!
否則好似上次去東京咁 , 返到嚟成間房D 牆發晒霉都唔知點算咯~

不再姐姐

今日睇 am730, 讀到一篇可愛的文章

「中女」是一個頗新的形容詞, 有一個大學同學仔常講笑自嘲自己已達「中女」階段,
但好同意筆者所說, 所謂的中女, 其實魅力比少女有過之而無不及,
眼見身邊各位同學仔的變化, 個個都愈來愈靚、有品味、懂得打扮, 真係一個字「型」!

眼見行內的師姐們, 真係保養得十分好!
有D 將近 40 的, 看來還似 30 出頭, 明艷照人, 勁~

似乎只係得我懶懶閒, casual 服裝唔洗化妝返工,
後果就係上星期見新 case, 有個小一的小朋友叫我:「姨姨, 可唔可以俾我玩呢個玩具呀?」
聽了, 即刻唔識反應......你嗌我呀?
尋日去街市買餸, 個賣菜阿姐竟然叫我「靚姑, 五蚊吖」
吓?! 我尋日著 T-shirt 牛仔褲, 邊忽似阿姑呀? 你話我聽吖?
你咁樣亂講嘢我好難以後再幫襯你喎! 我會幫襯返隔離叫我「阿妹」嗰檔囉!

還有些時間先到 30 先到真正中女的階段,
雖然我唔會再要求小朋友叫我做姐姐, 但叫我姨姨之前最好都係俾D 心理準備我,
否則我真係會唔知你嗌緊我, 唔識應你!

今晚去咗板前食飯, 正啊!!

今日係 Eva 生日啊! 祝妳生日快樂, 好事滾滾來呀!

海嘯價

今晚去咗新星集團的二宜樓食飯, 叫咗 $88 條東星斑,
嘩, 上枱嗰吓真係嚇親! 乜咁大條?! 大條到三個人都食唔晒!
蒸得啱啱好, 好味! 平時叫冇二三百蚊都一定唔得啊!!!
逢星期日至四供應, 新星同二宜樓都有, 大家要去試吓啊!!!

返到元朗, 去鴻福堂買龜苓膏食, 俾錢先知買一送一,
平均 $19 一盅, 嘩, 洗唔洗咁抵??? 真係海嘯價啊!

兩日都返學, 好似好耐冇陪波比先生了,
今晚一齊玩新買的賽車遊戲, 嘩~~~ D 畫面超正呀~~
如果有埋個軚盤, 一定玩得仲開心!

又要返學呀

星期六日去上堂, 是一個用「電療」去醫治吞嚥困難的 course,
自己俾錢上, 都貴貴地, 醫院又冇 subsidy, 所以其他較新嘅同事都唔肯上.....
但係我覺得如果我識嘅, 可能可以幫到多D 人, 所以貴就貴啦唉~

講真, patient 嚟睇我哋, 係政府價錢,
唔會因為我識多D 唔同 Treatment technique 而收佢貴 D,
而我識多 D 更加唔會影響我有得升同加多D人工,
所以有D 人嘅角度就係冇咩需要上咁多 course, 尤其是要自己俾錢嗰 D!
甚至或者有人覺得, 識多 D 就要做多 D, 呢個社會就係咁嘛~
不過個人覺得, 睇吓你想唔想 provide quality service 啦~

冇熟人陪, 不過好好彩, 去到見到一個 Rosa 的同事, 同佢都好好傾!
呢個 course 都算上得唔辛苦喇, 因為經過咗 1月的 DPNS 的鞭策,
Anatomy & physiology 都仲熟, 聽起上嚟就覺得容易好多!

最感動係佢有 Interactive 3D 嘅 anatomy illustration 囉!
嘩, 個 software 真係超勁呀~~
書本內仲要有彩色嘅圖片, 嘩, 幾不可思異呀! (平時上開嘅 course 都永遠係D 黑白圖)

今日就係做實習了, 仲要考試, 勁難的 MC, 不過都順利過關~
咁啱我星期二就會見一個 patient, 應該都會同佢做呢個 Treatment 了,
希望真係有用啦!

呢兩日又係去九展上堂, 都係去咗 "Menu" 度食 buffet lunch 呀!!!
嘩, 真係好開心, 三文魚, 蝦,全咖喱宴, 格仔餅, pancake, 蛋糕, 雪糕, 生果......
一邊食, 一邊同 D 唔同醫院工作嘅同事傾吓偈,
好難得有咁嘅機會 share 吓大家工作事, 無聊事, 攪笑事, 真係好開心o架~
呢個 course 總算冇上錯啦~

負離子

近來見的新 case, 好多都係好可愛嘅小朋友, 真係人都開心 D!

個個小朋友入到嚟我間房, 都被我新買擺喺枱面嗰盒多啦 A 夢停車場深深吸引住,
我話係新買, 仲未開仲未拆袋玩唔到住, 個個都扁晒咀好慘情咁嘅樣.....
停車場嘅吸引力實在太大了!

終於都頂唔順個草菇頭慢慢好 /hiu3/,
今日放工去咗整負離子, 嘩, 對上一次好似係 Year 1!!!

諗住近近地喺元朗整, 去第一間, 個老細竟然話佢哋收八點, 唔做我生意!
嘩.... 原來元朗D Salon 咁早收....

去第二間, 有得整, 整咗兩個鐘, 已經係十點幾,
到俾錢時, 先發現佢哋冇得簽卡 =.=!!!
真係 O 晒咀.....
附近又冇 OK 便利店或者櫃員機喎, 最後, 要個職員同我行去好遠嘅匯豐攞錢囉,
真係勁唔好意思.....

元朗的髮型屋, 真係咁都得?

草菇頭直咗又好扁呀而家, 不過就唔 /hiu3/ 囉!

Get ready for our trip!

今日又放假呀 (不停被人話:「妳又放假呀?」), 其實我都係迫晒喺呢一兩個月放o者,
到 5-8 月人人放暑假好 happy 時, 我就冇得放假了

今日要 finalize 我們的日本行程, 印咗好多好多 map 呀, 搭車時間表呀等等,
因為我喺嚟緊的星期六日都要 full day 上堂呢....

真係覺得 Google Map 係好好好偉大嘅發明,
有時旅遊書根本冇想去景點嘅 map, 又或者你唔係好清楚一個景點同另一景點究竟差幾遠路,
Google Map 就真係好有用, 好幫到你清楚自己的行程路線,
連出邊個 JR 站都可以清楚好多!

我 create 咗一個 map, plot 咗大部分會去嘅地點上去, 睇到就開心唷!

有人奇怪點解東京都可以去八日,
係因為我哋其實會去好多周邊的縣市添,
向東的千葉縣, 向西的神奈川縣都會去呢!

又學車了

今日最後一堂學車了, 遇返我第二堂學嗰個阿 sir,
佢好好人, 又好有心機教!

今日行咗: 元朗 > 上水 > 沙田 > 青衣 > 深井 > 屯門 > 元朗, 兜咗好大好大的一圈!

呢幾堂 Advance Course 我真係覺得幾有用,
不過都好睇運氣, 睇吓你遇唔到到好嘅阿 sir,
有D 好嘅就會好主動教你嘢, 有D 冇咁好嘅就淨係坐喺度睇你揸....

我同波比先生都有各自問自己的阿 sir 買 1300cc/660cc 車好唔好,
我個阿 Sir 就話好唔夠力喎, 一定要買 1500cc,
波比先生個阿 sir 就話其實 1300/660cc 都冇乜分別, 如果唔上斜的話~

3月了, 倒數東京之旅仲有 13 日咋!!
近來真係超淡季咁, 一向個價企得好硬嘅國泰都竟然減價, 去東京 $2040 咋!!!!
加埋 Yen 又跌, 唔知會唔會多返D 人去呢?

多謝 Ashley 的櫻花情報, 真的好希望見到沿路開滿的櫻花,
不過我們去的日子又似乎早了一點......