豬欄生活: [2014 大阪] 2014 大阪馬拉松

2014年11月18日星期二

[2014 大阪] 2014 大阪馬拉松 - 我的五分一之旅

這個大阪馬拉松之旅, 總帶一點遺憾, 本來是打算兩個人一同完成人生第一個馬拉松,
但因為一些身體的狀況, 我不能跑全程了~
本來波比先生是打算陪著我 hea 跑, 我忽然退出, 就迫使他要盡力完成這初馬~
9 月10 月練了很多長課, 很多的準備, 就是為了這一天~

來了 10 月26 日了, 本來特登 book 這家東橫 inn (大阪船場東) 是因為他近起點的大阪城, 點知呢兩日觀察後, 發現其實有成個站的距離.....
以我們的腳力, 行一公里過去不是難事, 但波比還有漫漫長路要留力, 還了搭了一個站地鐵過去了
唉, 早知就唔洗 book 呢間咁荒蕪的酒店啦 >.<

八點前要去到寄行李, 已經人頭湧湧

在行李車撞到一班山友, 真係好開心, 大家也要努力呀, 很多人也是第一次跑馬拉松呀!

由行李車行去起跑點, 很遠啊, 行了足足 20 分鐘!!! 去到已剛是 cut 人的時間! (汗!)

拉拉筋等到九點, 一輪的掌聲後就是起跑了!
慢慢的移動了十分鐘, 先行到都真正的起跑門~

哈, 我其實不是完全的退出比賽, 錢都俾了, 號碼布都攞了, 唔玩太嘥吧!
我量力而為, 陪大家走了5 公里, 感受一下馬拉松的氣氛~

2011 年玩過一次, 賽道已是很熟悉, 日本人還是有很多有趣的造型!

這個哥哥, 我與他很有緣, 這賽道上我遇上了他4 次........

全速向難波前進了!

哈哈, 又遇到山友, 多謝佢替我拍了這十分有動感的照片!
我沿途也是用新買的 Canon G7X 拍拍拍, 真係好滿意佢的質素, 一陣的相片真係好靚~

過了五公里處, 我收隊了, 停在路旁拍照, 也在等波比先生,
點解波比會後過我??? 因為佢個起跑區後過我好多囉~
報名時要報個estimated finish time 俾佢, 明明大家都報了差不多的, 竟然最後個排位我前佢好多, 真係有點莫名其妙?

哈哈, 嚇死人喇!!

不錯的情侶裝

嘩, 忽然間咁多肌肉男嘅!!!! wow wow~~

我好擔心佢睇唔睇到路o架?

日本人見到相機, 總是很親切的打招呼

影到咁上下, 我就行去 17km 的位置等波比先生
我約好了佢喺17/22/25/27/33km 位置同佢影相, 去每一點, 要行或搭車再行, 這天我的運動量也不少
但去到人太多, 我好懷疑我究竟見唔見到佢......

一路都見到好多好有趣的跑手, 悟空似乎近來肥咗喎

你唔好睇佢哋著到鬼五馬六, 佢哋其實都跑得好快! 快過即使練習過的我!
日本人來跑得馬拉松都很認真, 唔似香港有D 人為了喺 facebook 打卡而練都冇練過就去玩 10k 渣馬咁

我拍得入鏡頭的人, 都大概四至五小時就跑得完 42.195km , 實在十分佩服!

真係唔好睇低呢個 Elsa 姨姨, 佢的步速不是等閒之輩

哈哈哈, 冇諗過見到大黃蜂囉! 佢係咪喺 Universal Studio 偷走出嚟o架?

仲有呢對7月7日結婚的夫婦呀, 著到咁跑馬仔, 真係唔嘢少!!
我亦覺得好浪漫呀!!!!

黃色衫個叔叔: 好驚呀, 有鬼呀~~~

好好彩, 我最後都影到波比先生, 不過不幸的事情發生了......
老婆因為肚餓, 所以去食咗個麥當奴先去下一個 point 等佢,
點知我食耐咗, 佢又跑快咗.......
我去到下個 point 時, 等咗佢好耐都唔見佢, 就心知不妙......
然後睇返 online tracking system 佢的時間, 就知佢應該過了!!!! 真係好大鑊!!!

呢個哥仔, 一路跑一路拋住三個波, 好癲呀~~~

我接著再趕去了三個 point, 行到我身水身汗,
但每去到一個 point, 都見唔到佢 T.T , 真係想喊........
最抵死係我去到每一個 point, 都重複地見返一班後佢少少的人, 包括那黃色背心的香港人.......
即是我預的時間是啱, 只是一併推遲了....... 好陰公.......

最後, 我約了波比先生在 40km 的位置見到就見, 但...... 個衰佬真係跑得太快....... 見唔到......
在 40km 處, 我又插入人群, 一同跑到終點~
因為唔跑過終點, 我入唔到會場去會合波比先生啊~