[愛住家菜] 韓式辣肥牛 x Panasonic 105 麵包機做肉鬆

星期日晚煮的簡單菜式 -  韓式辣肥牛, 超好食!

其實我一向都識整吉野家的牛肉飯, 但尋晚睇肥媽的節目後, 改改煮法,
一向煮餸我都唔鍾意落油, 所以是煮個汁再掉D 肥牛落去煮熟就算,
今次變一變, 學肥媽的先炒香蒜蓉、洋蔥、半個蕃茄、肥牛, 
再放以下汁料: 韓式辣燒肉汁一湯匙、日式醬油一湯匙、味醂一湯匙, 糖一茶匙, 水一湯匙
汁料滾起即可, 咁樣整D 洋蔥同牛香口好多, 波比幫我清晒成兜 :)



星期一, 燒雞腿, 帶子西蘭花, 仲有女人之寶八珍湯



今次煲湯買了豬林肉, 其實我都唔係好知係豬的邊度??
淨係知煲完湯超級韌, 連我食慣煲湯肉的都覺得太韌.......
靈機一觸, 學網友用來整豬肉鬆!!!

時下好興用 Panasonic 麵包機去整肉鬆, 簡直是一個好偉大嘅發明, 唔知係邊個第一個諗出嚟?!
先要裝上麻糬用的機葉,
將 100g 煲湯肉搣碎佢, 加入 10g 糖, 一茶匙日式醬油, 一茶匙五香粉,
用 Mode 19, 整 50 分鐘就完成



Mode 19 係一路發熱烘烤, 一路攪拌, 即是做出人手炒的效果
一路整, D 五香粉味已香遍全屋!!

整好了, 覺得太 amazing, 真的變了一絲絲的豬肉鬆, 冇添加劑當然冇出面的咁好食,
但係廢物利用之餘, 味道其實唔錯, 用來拌飯拌粥都 very good 啊!!!