聚會攪手

寫得這個 topic, 其實是有點勞氣,
我同老公都算是朋友間的活動攪手, 但相約不同 group 的朋友, 總令人覺得勞氣!

人所共知的「請完唔覆都算了」, 有D 人總係好忙, 俾佢自定時間, 都梗係「日日都話唔得」, 大家都知咩事
今次仲嬲, 夾日子的時候又冇話唔得, 到傾到 confirm 時間地點時, 又話要返教會!
吓?? 返教會係D  regular 活動, 一早你明知返教會就唔好話得,
到我問埋你幾點得, 你又話都返到中午, 下午都嚟唔到, 咁即係根本你全日都冇得過!!

我明白, 有宗教信仰的人, 返教會是很重要, 道義上一定重要過朋友約會, 唔返亦可能會有壓力, 我從沒要過朋友唔返教會來聚會,
但係如果明知自己要返教會, 又應承朋友出來, 然後反口覆舌, 信仰是這樣教導人做一個不守諾言的人嗎?
有人以虔誠信徒做自己的標誌, 但這樣的虔誠信徒行為只會令別人更討厭這些信仰!

人大了, 愈來愈怕攪聚會, 盛意拳拳的統籌和安排, 換來了放飛機啦、遲到啦、藉口啦,
有D 人忙得令人不解啦, 真係愈來愈冇癮!
最後聚會攪唔成, 自覺白痴嘥心機嘥時間,
而且D 聚會, 如果我唔攪, 好似就冇人會主動攪了! 究竟其他人有冇心嘅呢? 我常常疑惑?!
太冇癮了, 最後索性唔攪聚會了! 我重視的朋友, 偶爾約埋兩三個食餐飯就好, 唔好叫我攪大型 gathering, 一係就你自己攪!

憑朋友回覆聚會邀請的速度, 我愈來愈看到這個人究竟還是否值得 keep 喺我的 friend list 入面,
放過飛機的朋友, sorry 我唔會再邀請~

好彩最後我們的復活節約會沒有因飛機人而泡湯,
我打電話去 confirm 一個好耐冇見的朋友時, 衷心的感謝她用邀出席, 告訴她我很開心她也出席,
被放飛機後, 你會更感激每一位肯花時間出來的朋友~

4天假期開始, 今晚約了大學時代, 做 part-time 識的朋友仔食飯,
荃灣的水晶晶泰菜, 食物唔錯, 冇金坊咁多人, 坐得舒服好多~