Byebye 十一月

十一月好唔容易地捱過了,
每日平均睇十七八個 case, 真係好攰.....
攰到少有搭車瞓得著的我, 都抱頭大睡 (失儀...)

十二月, 數過返十八日工咋,
快D 過埋考試啦!

不過, 放工已攰到真係溫唔到書...... 一爬上床, 就即刻可以睡著了.........

Anyway, byebye 了十一月, 踏入十二月, 人已經開心好多!

起色

一個四十幾歲的男人, 要住老人院, 聽到有咩感覺?
出血性中風的病人, 有時其實好後生, 但通常後果都好嚴重,
四肢癱瘓, 屋企人真係好難照顧到, 唯一的出路, 就是老人院

但這個男病人, 四肢癱瘓, 但其實心智又不是太差,
當他知道自己日日就是和一班老人家一同生活, 自己不能動, 要用尿片,
不能吃, 要用胃喉,
那種感覺, 一定很難受~

不過, 這一間安老院算是不錯, 有一個很好的姑娘陪個病人嚟,
姑娘很真心的鼓勵個病人, 又很想幫病人的叫我儘管吩咐她回到院舍該怎樣做,
這樣好的姑娘, 老實說真的很很很少有囉........

這次來, 這個病人竟然有點起色, 我同姑娘都好雀躍, 原來佢仲有一點希望~
或者, 就是職員的努力對病人有一點幫助呀~


放工吃一人晚餐, 撞入了一間看似很老字號的雲吞麵店,
叫了一碗「細蓉」, 點知..... 真係好細碗......

返到元朗, 要再去買甜品頂肚!
試了「阿玉豆花」, 算是新新地的店子, 很好生意,
豆花一入口真係令人驚訝, 滑得入口即溶, 真係冇得頂!
濠江豆品都要行埋一邊啊! 值得 encore!

快到聖誕

話咁快就十一月尾了, 好快又到聖誕,
今年影的第一棵聖誕樹, 戶外漆黑一片中, 亮晶晶的聖誕樹特別靚





今日全日在家, 倒數仲有 13 日就考試了, 非必要都唔可以去街住喇 (何謂非必要? 哈)
讀書、執屋、冬夏衣服大整理,
休息、食咗超高卡路里的西多士, so guilty..........

總要有一套

波比太太平時唔會化妝, 返工唔會, 星期六日冇咩大件事都唔會,
不過一到 12 月, 又幾個大日子大場合, 嘻, 似乎都要執執個樣,
唔捨得之左諗右諗之後, 最終都係敗咗一盒夢寐以求的 eye shadow 返來了! 敗得太開心!!!



不過其實, 以上的顏色我屋企都差不多有齊,
買了, 全部用過一次半次, 之後都擱在一旁........ 因為我實在太太太少化妝了..........
今次為的, 其實是那夢寐以求的化裝掃: 究竟用呢支殿堂級化妝掃掃出的眼影, 係咪真係會靚好多??
有機會要試試先!

大大的黑眼圈跟了我廿多年, 我知佢唔會離開我o架喇,
不過聽朋友話呢支幾好用, 所以又敗埋試吓啦!



今日返了 Sem 1 Master 的最後一堂了! 仲有兩星期就考試喇, 今日我都好乖有讀書o架!
波比先生獎勵我, 偷偷地買了我最愛的朱古力蛋糕俾我食, 多謝老公~

又係我哋四個

今日好多大學同學來了我工作的醫院上 course,
個 course 我都好想報, 奈何我 Department 近來的人手真的非常緊張,
真的請唔到假去上

還好, 我們約了晚上 Dinner gathering!

次次約 gathering, 我們的同學仔都好忙, 好難約,
最後, 又係得返我哋「台灣四人組」,
我們笑說:「點解次次都好似得我哋咁得閒?」
究竟D 同學仔忙咩呢? 真係好難明白~

我們先去了又一城的 simplylife 食飯, 味道唔錯, 可惜要我哋八點鐘交枱



之後轉戰樓下 Queen Cafe, 呢餐 Tea set 仲貴過我哋食的 main course........
後來我們諗起點解唔去 Cova......
不過旨在有個地方可以坐兩個鐘, 靜靜地, 啱晒吹吹水



很開心的一晚~ 希望聖誕節又有 gathering 啦!

星級化妝師

今晚陪了朋友去試妝, 這是個索價兩萬元的星級化妝師, 平時做開藝人歌手化妝
星級的不同, 是他用的全是名牌化妝品同化妝掃,
有自己的主見和藝術家的脾氣, 覺得係咁就咁,
不同顏色層次的配搭, 很仔細的去做

其實我朋友本身皮膚又好, 又白, 眼大, 又瘦, 根本點化都唔會唔靚
不過俾佢化完了, 又真係即時變了陳慧琳一樣的眼睛, 佘詩曼的笑容,
最後, 朋友當然是卜搥了~



我對朋友笑說:「妳結一次婚, 我可以結三次了」
一句萬能及理所當然的回應:「一生人一次, 梗係唔慳得啦」
哈~

其實很慶幸自己一早已結咗婚,
每次見到人辨婚禮, 都係十萬個煩,
真係一生人煩一次就好了!

但記住婚禮只是一個一天的儀式,
往後的婚姻要幸福, 還是要兩個人努力的去維繫~

交功課ed!

塞塞塞, 搭遲咗一班車就永冇好結果, 成日都塞車!!! 真係火都嚟埋!!!
個司機仲要係一早知道大塞車, 都唔行第二條路 (我哋呢D 村巴其實好 flexible), 真係好激氣!!!!
本來預好晒煮飯, 又唔洗煮啦! 火滾呀!!!! (想噴火)

波比先生次次一見我因為塞車而發火, 就會話搬去近D 醫院住好冇,
但奈何我每隔一段時間又會轉吓返第二間醫院, 冇可能就到一達好好的地方~
況且, 我愛而家的居住環境, 附近有好多嘢食, 有餸買到, 星期六日跑吓步踩吓單車幾開心,
搬去出面, 好難搵到達樣樣都咁好的地方

唯有, 我話過以後都唔會搭遲一班的村巴,
遲走我寧願搭西鐵好了! (諗起又火滾!!!!)

冇得煮飯, 去了食扒, 超多的肉肉, 去幫我下下火!



對住一大疊書同 notes, 攪咗幾日, 今晚終於都交咗份 paper 的 first draft 了!!
開心返!

更台式的肉燥

原來上次整台式肉燥, 已經係足足五個月之前了
今日又興起想整, 在網上找找食譜, 先知道原來要整得很肉燥 , 是要時間去慢慢滷的!
不過都找到快速製法, 比上次落多了冰糖啦、蠔油啦, 還有秘密的---- 花生醬!
比上次多了甜味, 花生醬帶來了咸香, 今次好好好似台灣的味道啊! 成功成功! Yeah~~



咁大碟, 本來諗住食到兩日啦, (是晚仲有好大兜日式咖哩雞)
點知因為太好味了, 肉燥痴的波比先生竟然同我添飯食晒食碟!
做老婆的, 見到老公食晒一碟餸, 大概是一日裡最滿足的成就~ :P

超讚之北海道山頭火

今晚我們約定了, 要去食山頭火拉麵!
這間山頭火源自日本, 在北海道是真有其店, 仲好出名的!
唔似有D 乜乜拉麵, 係咪都話自己係日本正宗

一去到, 聞到四處都洋溢著香噴噴的湯底味, 知道自己冇嚟錯喇!
幸運地還有二人枱

打開菜牌, 四種湯底, 很傳統的只配叉燒,
想港式可配豬頸肉

一個拉麵都 $88, 但有D set 都係 $88-98,
只是麵細了, 但又有其他食物, 於是我們叫了兩個 set

波比的鹽味拉麵, 湯底較清, 但特出了豬骨湯底的味道, 好濃郁, 好正宗啊!!
跟 set 的壽司, 通常都唔抱咩期望, 點知三文魚同帶子都算係好新鮮, 正!
只可惜, 蛋不是溏心蛋~



我的麵豉湯底就真係好好正, 味道有點甜, 見到嗰一層油..... 就知道有多好味!



我的 set 有吉豬, 不過就麻麻啦~


整體好滿意佢的拉麵, 真係尋回去日本的感覺, 絕對要返兜啊!

落筆

距離要交 paper abstract 的 deadline 仲有十幾日, 係時候要落筆喇!
今日算係做咗唔少嘢, download 咗好多 journal, 真係有排睇  ......  #o#
開始落筆, abstract 也不是太複雜, 都算係寫了一半, 但有好多微細的東西要執,
希望快快寫完, 了咗件心事, 才可以專心讀書準備考試啊!

下午, 估吓我哋去咗邊?



見今日咁好天氣



波比先生跑步去天水圍啊! 我就踩單車啦~
去天水圍的一段路, 在一條馬路旁, 果然好大沙塵!!!
一架貨車駛過時, 係有一層沙塵冚落我塊面度, 食晒囉......

踩踩吓單車, 我又 feel 到有D 水彈落我塊面, 但冇理由o架? 咁好天!
之後發現.....竟然是前面波比先生的汗, 係咁飛落後面的我度囉........

6km 後, 去到河邊, 呢度唔錯呀, 有單車徑, 唔洗 dun 到 pat pat 痛!



但真係好攪笑囉...... 見到人喺河邊曬咸魚......
仲有喺樹上曬臘肉啊! 大開眼界......



河裡有好多雀仔~



兜了天水圍整整一個圈, 差不多十公里, 我們在天水圍西鐵站搭西鐵返歸~

之後去了飲杯咖啡



食件芝士蛋糕, 很不錯的一天~

大阪燒之變奏

仲有半個椰菜用剩, 今日 lunch 就整了個芝士大阪燒,
半熱溶了的車打芝士, 混埋D 醬, 味道好夾o架!



不經不覺, 今個 Semester 的 Master course 已經上到尾聲,
不過今個 sem 的內容實在冇 Year 1 咁精彩, 但整體D lecturer 都係教得好好的~

今日呢, 講到有個病, 醫生講了個 case illustration,
當中的主角, 原來似曾相識,
當一個人已經知道時日無多, 日日靠呼吸機去維生, 一日比一日差,
另一半會在醫院內與病者結為夫婦, 不離不棄, 這原來不是電視劇的情節, 是人間有愛~

尋日跟了一班腦內科的高級醫生/ Director/ Consultant 去巡房, 真係獲益良多,
讀了這個 Master 其實好好,
可以用自己的知識, 去教育病人, 如何注意身體/飲食, 去避免再次中風,
有時病人問到關於病情/藥的問題, 都可以幫到佢答到D,
答唔到的, 我又可以搵D 醫生問吓再覆返個病人, 做一道橋樑,
因為有時D 病人等下次覆診, 分分鐘等好多個月, 有嘢想問都真係無從入手o架,
試過多次可以幫到D 病人解決D 唔係我 specialty 的問題, 其實都好開心,
因為一個病人, 真的要 holistic care, 唔係頭痛醫頭, 腳痛醫腳咁~


今晚我約了波比先生去食 Le Grand!!!



因為波比先生同有D 人都話好食, 點知我食就覺得好失望喎....... 同普通漢堡包有咩分別?
初時我仲以為係塊漢堡靚D, 好似 MOS/Triple O 嗰D 咁, 先嚟試咋! 點知呃晒......
試埋個番薯批, 都係唔得..... 入面主要係吉士, 而唔係番薯囉............

情定大阪燒

大家估吓, 波比先生同我第一次約會, 係去食乜嘢?
嘻嘻, 八年前在尖沙咀的太陽廣場, 一上扶手梯的左邊, 有一間日式燒餅店,
每張枱都有鐵板在中間, 客人 order 好要咩餡料, 一兜二兜的材料就送到面前,
要自己動手溝, 自己動手煎, 是好好玩又好好味的一餐飯~

在睇網上教煮餸時, 見到大阪燒的食譜, 一D 都唔難整,
等呀等, 終於到了星期五可以試新嘢喇!

椰菜絲, 大蝦, 蟹柳, 加埋麵粉/水/蛋混合



大阪燒之靈魂所在, 其實係面頭的燒餅汁, 一定要買呢隻日本出的, $25
仲有又要買日本BB 仔的蛋黃沙律醬, 一定唔可以搵卡夫奇妙醬代替,
不過呢支嘢好貴, $37



一切 ready, 今晚仲有帶子刺身同埋燒安格斯牛



取適當份量落鑊





好快就煎好, 然後上碟, 唧上燒餅汁同沙律醬, 完成了!!
味道: 正! 完全係日本嘅味道, 都係醬汁的功勞! (所以去日本食成 1000 yen 真係好貴..... D 料其實好平)
我覺得仲有好食在冇出面的咁多粉, 反而是食到新鮮又爽口的椰菜, 同埋啖啖大蝦~



第二 round 我叫波比負責燒, 要燒返當年的心形,
點知...... 變咗長方形囉.............. =0= 有冇攪錯



真係好鍾意屋企個煎 PAN, 一路燒一路食, 好 Happy~~

-23

仲有23 日就考試, 剛讀完了第一遍的 Epidemiology and statistics 喇!
幸好考試只係考一些 conceptual 的東西, 如果要自己用 SPSS 計個 result 出嚟, 真係死得人了.....



今日做 X 光, 見到個七個月大的 BB, 兩塊面珠仔肉肥都跌落嚟, 可愛死人!

又見咗D 好激心的病人, 我平時都算好好耐性, 但遇著唔接受現實/ 無理要求的病人,
但有時都不得不要惡吓寸D 的講兩句, D 病人先識得收歛囉!
有D 病人在妳面前總是話得得得, 但返去係完全唔會聽妳的說話去做,
之後每一次返嚟, 又問返一堆相信的問題!! OMG!!!
今日連個仔都頂佢阿爸唔順, 阿仔好明白理事, 忍唔住都講咗句:「阿爸, 你接受現實啦!」

戒甜

近來, 腰間真係長了不少肥肉肉...... 慘......
於是今個星期開始日間戒甜: 戒飲品同戒餅乾!
亦都唔准自己食兩次早餐 (係呀, 我6 點幾食一次, 8點幾返到醫院又食.....11點幾又肚餓囉....)
暫時成功了三日喇, yeah!!!
一半是為了下個月的大 function 而 keep 吓啦, 唔想到時成條水桶腰咁著住條姊妹裙啊!

不過夜晚讀書, 沖一杯香濃咖啡總是戒不掉~

尋晚炆的豬軟骨完成了, 炆了兩個鐘, 其實都完全炆唔得軟D 骨囉.......
不過好入味, 加埋薯仔, 送飯正呀!
今日帶飯返工, 個飯盒香死D 同事了, 哈哈哈!!!
當同事被迫食完全冇肉的兩餸飯(難食 canteen 又一鉅獻), 又見到我的飯盒, 總會話同我交換~



十一月過了一半, 忙得來工作還算好,
不過我的 out-patient 已經排到出年一月尾二月頭先有得再見,
D 家長又 lur 又試探我有冇得早D 見, 我都冇辦法, 同事要放產假, 上面又話冇錢唔請替假,
咁係要有人犧牲了, 而最通常被犧牲的, 就是 non-urgent case 啦~

一個人放3 個月產假, 其實就有約 1000個病人睇少一次 consultation,
如果我有機會放, 其實都會放得幾有罪惡感

近來工作環境的轉變, 也算是定了下來,
其實現在的環境真係舒服好多, 起碼想寫排板, 而家都一定有張枱, 仲好多時都有位坐,
D 排板唔會周圍擺, 有電腦用, so good~~~
不過都係嗰句, 我覺得除了硬件, 人手都係好重要啦~

愛醬

今日老細有野要我幫佢做, "Please do it at your earliest convenience"........ 做埋先走攪到晏咗......
之後又塞車, 真係好想講粗話, 成日都塞, 唔係撞車都可以塞超過五公里的路! !*#%!*(%!)%!$!!
都唔知有冇攪錯!!!! 成 7:30pm 先返到去!!

心情壞透了, 好彩今晚波比去踢波我唔洗煮飯, 否則火都嚟埋!

難得一日可以慢慢行行食材店, 我又見到好多好正嘅食材想買,
最難忍手還是見到好多醬料又好好好想買!!!
女人通常愛一擲千金買化妝護膚品, 我就愛一擲千金買醬料食材, 哈哈~
但屋企已經有太多了.........要同自己講: 用晒先准再買~





見到竟然有豬軟骨賣, 都好似第一次見咋!
我好鍾意食豬軟骨, 所以唔點考慮就買了,
不過要炆成兩個鐘, 聽日先有得食喇~~



仲有唔夠 4 星期就要交 paper 的 First Draft 同埋要考試了...... 唉.......
又係時間開始閉關讀書,
返工買餸煮飯洗碗後, 究竟我一日仲有幾多時間讀到呢???

兩餐日式 Dinner

之前都嘗試煮過吉野家味的牛肉, 但唔成功,
在大少奶的 blog 見到原來要加味醂先得, 尋日去開對面的日本食物店買嘢, 就買咗支試試,
本來今晚的菜單是日本咖哩的, 但被老細捉住走唔到......
冇時間之下唯有改煮呢個牛啦!

用了味醂, 頭抽 (滔滔出品), 仲有紹興酒, 一煮已經覺得個香味好似了!
煮好後, 再打隻滑蛋 (純粹忽然間想起滑蛋牛肉飯)
最後, 完成了!!!!

波比太太之滑蛋吉野家牛肉飯!!!!

唔係講笑, 真係好好食!! 好食到我都唔信係自己煮出嚟的!
繼十月份的薯仔餅後, 呢個簡直係十一月的代表作呀!!! 好開心~~



追加尋晚的慶功宴 - 本案是想去 TST 食北海道的山頭火拉麵, 但見近來 comment 一般...
最後在家煮, 又係時候清一清日本帶回來的杯麵了!
喺對面買了波比最愛的帶子同三文魚刺身, 仲有自己煮了炸蝦同餃子雞翼



開了一個「大砲拉麵」, 一個「一風堂拉麵」, 兩間都係福岡好出名的拉麵店啊!

他們出的杯麵都十分之高水準!
我愛大砲的湯底, 波比愛一風堂的幼麵條



今次在福岡買回來的杯麵, 普遍水準都很高! 很想又去掃貨啊~~~~
Yen 幾時先跌呀~~???

ASICS 10km 馬拉松

11月14日, 天氣晴朗

我們都 5 點幾就醒咗喇..... 因為波比先生今日要參加人生第一個馬拉松比賽
食咗早餐, 6:45am 就搭的士去濕地公園



去到已經見到好多人熱緊身, D 人........ 個個個樣都好勁咁囉............
型仔型佬型叔都有, 一身黑黑實實的肌肉,
有消防員囉.... 仲有港大校隊囉......
覺得自己好似去咗中學的陸運會, 見到好多學屆精英添!

7:45am 在起跑點前集合,
6000 人, 真的「人山人海」





8:00am 起跑了!



由天水圍跑到差不多洪水橋, 再折返



呢個係冠軍呀, 32分14秒, 好勁~~~~~



等呀等, 波比先生都返來了! Yeah~~~



最後, 49分03秒完成了!
因為人太多, 波比話頭嗰一公里根本「跑」唔到,
哈, 當是小小經驗, 下次行前D 先起跑啦!!



很開心的過程, 要繼續加油呀!

Super 爐端燒大成功

好開心, 今日未返工已經等住放工, 舉行盛大的自家爐端燒開幕大典
準備了很多食物呀~~~



先有多春魚, 帆立貝, 豬肉芝士餃子雞翼



再有自己卷的煙肉金菇卷, 薄切牛舌



壓軸登場的是日本雪花和牛!!!!



先講講 design: 電磁爐 + 電磁爐專用平底鑊一隻,
個電磁爐之前一路只係用來打邊爐, 今日先發展原來好好用, 好多 function 教,
今日用了個煎炸 mode, 可以教恆溫 80 度/ 120度, 用來燒燒燒非常適合!

記住要買張鋁圍板, 否則屋企幅牆就會一撻撻油!

開火喇!!!



兩款牛都超讚, 唔洗落油都得呀, 一放落去就自動必D 油出嚟,
加少少海鹽/ 日式燒汁食, 滿口油香, 熱辣辣, 真係太滋味了!!!!
平時在家煮牛肉, 拎得出枱放一陣都已經凍晒, 原來每一片都熱辣辣食係咁好味的, 太感動!
不過牛舌呢, 波比先生話都係厚切好食, 好啦, 下次買厚切啦!



帆立貝都估唔到咁滋味, 因為之前都係用來煮麵多, 想唔到煎煎吓, 香口好多又冇咁腥, 得呀!
整煙肉金菇卷係純粹諗住用埋屋企包煙肉, 又意想不到的好好食喎,
因為煙肉煎得香脆了, 夾埋金菇食就唔太咸, 好 match!

反而個餃子雞翼我就覺得麻麻, 但波比讚好食喎, 可能大啖肉掛~~

自己慢慢燒, 真係好開心呀,
最可惜今日買唔到蠔啦, 下次要再尋找吓先, 仲有想燒鵝肝呀, 諗起都流晒口水, yummy!!!!
期待爐端燒之第二回 :P