畢業禮 x 老公生日@ Clipper Lounge

好開心好開心, 等咗好耐的畢業禮終於都到了!
明明好早起身, 都攪到好遲先出門口, 因為又要化妝, 又要洗埋個傷口先行得!
話時話, 我從未覺得 Panadol 係咁偉大, 我前晚對腳痛到瞓唔到, 尋日就食咗一粒先瞓,
對腳真係痛少咗好多!!! 起碼只係間中痛醒, 已經算好好~

出門口一路去大學, 都仲係間歇性痛, 不過已經冇尋日咁無時無刻都痛喇,
去到大學 9:15am, 換衫再始影影影~
多謝老公送俾我的麥嘜~







老公坐到有利位置, 幫我影到上台的相呀~
之後去百萬大道同同班同學會合, 跟住係頒獎儀式, 從非常敬重的 Prof. 手中接過獎項, 是難以形容的開心~ :D
我初時以為只係有張獎狀, 點知仲有成個獎座, 嘩嘩嘩, 好意外~



我們唔熟悉 CU 的景點, 只是上了那天人合一的景影了幾張相, 但因為冇人揸機, 我哋用腳架實在影唔到那合一的效果

攪到成 1pm 先走, 出到旺角已經是差不多 2pm, 餓死波比先生了~
去了風月堂食餐好的, 再搭 970 返 HKU 影相~

我一直有個心願呀, 就是要同波比先生儲齊一 set 畢業相,
我的 Bachelor 畢業, 他的 Master 畢業, 到現在我的 Master 畢業相, 要去返同一 set 景影一次,
然後 merge 埋整返 set 「當年今日」的相片,
哈哈, 我的心願今日終於都達成了, 這樣的人生, 實在沒有什麼遺憾



HKU 很多地方都在裝修, 有D 地方影唔返喇,
就嚟有地鐵站出口, 學生們真幸福呀~
我們一起想當年, 那讀書時候的感覺, 很令人回味~

閒日來真好呀, 所有景點一個人都冇, 唔洗爭!!!

多謝老公今日咁辛苦, 幫我拎住咁多嘢仲要負責影相~



5pm 離開, 去圭中環的冬日節影聖誕樹



還有好靚的 Tiffany 木馬~



之後去了文華東方的 Clipper Lounge 食 buffet, 慶祝老公生日呀!!!
上年太遲訂, 訂唔到位, 今年再訂, 個電話打極都冇人聽, 不過 send e-mail book 就好快有人覆!
今日咁辛苦, 波比先生食了足足一打生蠔, 大致回本了! 哈!



火炙三文魚, 正!



今個月係海鮮主題, 質素同種類都好令人滿意~



那有窿窿的芝士, 很卡通片!



熱盤都唔錯, 但又唔算好突出, 三文魚扒同埋燒牛肉係推介~



最重要的甜品時間, 慕思居多, 蛋糕款竟然比想像中少, 但全部都是上佳的質素~



最驚喜的, 是經理忽然間送上了生日蛋糕給波比先生, 好感動呀~~~
係我 e-mail booking 時講過係我老公生日,
最令人開心的是, 送上的是我們都很愛的文華東方 cheese cake,
在很多很多年前, 我買過了第一次, (唔記得係咪為了慶生) 拎到入去東涌等波比放工, 坐在東薈城一齊食, 我們都太記得這 cheese cake 了,
奈何文華餅店咁早收舖, 我們係唔會買到的, 所以已經 n 年冇食過, 好多謝酒店的安排, 很窩心~



最後食埋松露朱古力加咖啡, 美好難忘的一日完結了~



老公生日快樂呀~

開心海鮮賀聖誕 + 畢業相第一擊

見我呢幾日冇 update, 就知這個沒有老細的星期忙得要死......
好彩, 這星期終於都完結了, 也沒大事情發生, 感恩!

今日同 fresh grad 師妹都帶了畢業袍返醫院, 完成一日工作後, 開開心心周圍捉人影畢業相!

我仍然覺得戴了那頂帽很樣衰....



很開心的四圍影, 可惜有同事 sick leave 啊, 未齊人~
師妹的熊仔超 cute 呀! 佢件袍係同師妹嗰件一樣顏色的, 仲有刻咗 HKU 2011 同埋佢個名的,
而家的畢業生真幸福~



夜晚是老細提議的賀聖誕 gathering (哈哈, 因為我D 同事太難約, 所以明明賀聖誕的活動, 咁早要舉行)
全 team 有10個人到, 是很好的成績了!
去了西貢上次食海鮮那間舖頭, 超級大餐, 多謝老細~









之後再到滿記食糖水, 飽死了~

Baby shower x Bday gathering

我返晒工喇, 做完五點個 case 嗰吓, 簡直好似有年尾收爐的感覺!
我成日覺得自己好耐冇放過假咁 (其實三月尾先放完),
可能放親假都全時間飛咗, 冇真係喺屋企 hea 那種假,
今次是 10天的連假, 希望可真真正正的充吓電 (不過放完假返來要考最後一個 Master 考試....都係唔好諗住...)

今晚過得非常開心, 因為約了幾個好友聚會,
因為時間緊迫 (我又去旅行又要溫考試), 趕忙地擇個日只約了幾位朋友相聚,
為的是同今個月生日的壽星女賀壽, 還有是一個 Baby Shower, 要同大肚媽媽影相留念

全晚在歡笑聲中渡過, 下一次見面, 應該是讓 BB 見見我們這班低 B 的姨姨的時候了! 哈哈哈!

中場休息

我而家食完飯放緊 break,
今朝七點幾就開始寫寫寫, 完成咗艱鉅的畫 graph 過程, 寫好了 Results 嗰 part,
入最後直路- 將會寫 Discussion 喇, 仲差 1200 字咋,
目標係呢兩日寫埋佢, 咁星期一開始就可以開始溫書喇~
到下星期日再執一次, 希望 10/4 可以交到喇, 交咗就可以去玩喇~~~

趁有心情, 寫d 開心事

尋晚整了桂花酒釀丸子



睇返去上海食嘅, 應該要落多d 酒釀啊, 不過落得多咪會好酸? 哈, 下次試試改良一下 RECIPE



呢排發現d 皮膚差冇無輪, 唔明白點解已經唔係十八廿二都仍然成日爆暗瘡,
唉, 係時候要惡補一下吧~ 睇吓對完 20 支之後會唔會有改善!



曼谷之旅, 買咗個蜜瓜返嚟,
因為有d 蜜瓜話係日本種, 想起夕張/富良野蜜瓜的味道, 充滿期待下買咗一個試試



又甜又多汁, 不過又未至於有日本的咁好食, 其實又唔平, 哈, 試過就好了~

吉士蛋糕 + 漁農嘉年華

又到每周一 cake 的時間, 前兩日買咗包吉士粉, 好正呀, 可以整好多甜品都得
今日就整咗個椰香吉士蛋糕,
夠鬆軟, 不過唔知點整D 蛋糕仔先唔會中間爆開呢??



今次波比先生都有份幫手整呀, 佢咪幫手落D 吉士去蛋糕漿中間囉,
今日一問先知原來波比先生都好鍾意食吉士餡, 佢落了好大 pat 添~
呢隻吉士粉幾好呀, 好香~ 呢個蛋糕好滿意~



下午波比先生去踢波, 我就一人去行旺角的漁農嘉年華,
去到花墟, 先知被老點, 個舉行地點根本就唔係花墟隔離個公園, 行咗好遠兜咗個大圈先到....

去到人山人海呀, 不過入到去, 覺得自己好似又去咗工展會咁,
因為又見到D 美亞賣鑊呀, 貴夫人賣攪拌機呀, 無啦啦又賣牛肉乾花生糖呀.... 都唔知有咩關係.......

有好多有機蔬菜賣, 不過因為未來兩日都唔會煮飯, 所以都冇買到,
唯一係見到有極品 D24 榴槤肉賣, 忍唔住買了一 pack 遲D 試試~
我想話, 屎都有得賣! 有攤檔賣 $20/包 「牛屎肥料」, 我覺得好得囉!



帶了 GF2 去, 影花的景深唔錯啊!



勁大條咸魚!



仲有今日第一次遊雀仔街, 好多可愛雀仔呀~



GF2 的 Touch screen focus 真係好好用~



今晚返到屋企, 食食吓嘢, 發生意外......... 我...... 咬斷咗一隻牙..........
好徬徨的 7:45pm 飛的出去想睇牙醫, 點知所有牙醫都收晒工,
撲嚟撲去, 行到成身汗都冇得睇, 好無奈............

而家 book 咗聽日下晝去睇, 本來約了好耐冇見的朋友食飯, 而家又冇得去了, 嗚............

Big Big Day

今日係我好好朋友的大喜日子, 好開心被邀請為姊妹團的成員

5am 我已經緊張到瞓唔著, 好似比自己結婚仲緊張
起身就執整埋玩新郎的遊戲食物, 6:40am 出發了!
好快, 7:30am 就去到海逸酒店, 佈置, 換衫, 化妝~



接新娘遊戲, 非常之爆笑, 笑到我標眼水! 難得新郎哥好落力, 一D 都冇交行貨!
敬茶出門完畢, 午飯時間,
條姊妹裙太緊, 大力D 抖氣都驚佢爆拉錬 (絕對覺得上一手著的只有23-24吋腰),
亦都唔敢食嘢, 因為真係冇空間俾我個胃去澎漲.......
不過好處就係條裙一定唔會鬆同跌, 可以好安心跑跑跳跳都得~

話咁快, 就過咗 Grand Hyatt, 由 Ambassador Suite 影的海景真係太靚, 如果今日再好天 D 就好了~
很夢幻的場地佈置, 賓客都讚不絕口~



很開心的 sip 時間同新娘子四處影相, 酒店大堂有好高的聖誕樹添啊!
我坐 Reception, 大家都好準時, 8pm 已有 9 成的入座率了!

30 人的 live band 奏樂, 高貴的新娘子 march in 了~
律師好勁, 要全場人靜晒先開始婚禮, 攪到冇人敢出聲, 亦都人人都好專心觀禮!
波比先生就開心啦, 樣樣食物都好好味, 仲有佢最愛的鮑魚~



整個婚禮都非常之順利, 因為一班兄弟姊妹真係好幫得手,
雖然都會有攪錯嘢嘅時候, 但大家同心合力, 好快就 manage 到~

今日用新寵 GF2 + 14mm 2.5 影相,
室外夠光的表現好好, 室內就.... 好多時都手震, 可能因為光圈唔夠大/環境唔夠光,
同埋支餅鏡..... 係冇防手震的!!! (我都係尋晚睇說明書先知, that's why 我之前用 SONY DSLR, 因為佢有機身防震, 啱晒我呢D 手震王.....)
不過喺電腦睇返D 相, 好彩通常都有影兩張做後備, 通常都有一張 ok 的~
不過真係要考慮吓洗唔洗換支 20mm 1.7, 但又驚佢 zoom 得太近/ 唔夠 wide~
雖然買唔到 45-200mm, 但今日太部分時間都好夠用, 呢D zoom 鏡, 其實通常都係去旅行先用多~

好想去旅行呀~~~

老婆忽然間對老公講:「我好想好想去旅行呀!! 已經有三個月冇去過旅行喇!!」
12 月份呢D 咁普天同慶嘅日子, 真係令人好想離開吓香港,
下個 trip 要到 3 月呀, 仲有三個月呀~~~ 呢三個月我點過好呢??

忽然間, 又了起條筋好想去福岡, 一月就唔洗諗, 二月份去四日好冇呢??
至多, 三月份去曼谷時慳D 洗, 幫補吓啦, 點呢點呢???
不如, 聽日返工睇吓我二月份D case appointment 點, 再諗諗先!

不過今個月即使唔離開香港, 都真係一出街就買嘢,
樣樣都大減價, 好似唔買就笨, 買嘢開始唔睇價錢, 不停地出血再出血.....
今個月買咗三對鞋, 女人都係愛買鞋的,
家中的鞋架已經爆滿, 洗唔洗買個鞋櫃呢?

期待的 GF2

唉, 今個星期我的工作天已經完結了, 真係忙都嘔, 爬完兩啖飯又極速開工!
D 病房係咁 call 我 Direct line 問可唔可以快D 睇佢某個 case,
唉, 你估我唔想快D 睇咩, 咁少咗三個同事之下, 又日日幾十個 referral , 點睇呀~~~
聽日後日我要放假了, 終於可以離開吓,
不過放假是為了讀書, 大鑊喇科 Epidemiology 同 Statistics......

今晚波比先生買了我最愛的軟心朱古力俾我做生日禮物啊,
仲有已訂咗的 GF2, 真係好期待呀~~~
Touch screen 對焦的功能 + 淺景深, 實在太夢寐以求了~~
希望快D 有機攞啦! 多謝老公!

老公生日 - 第二激之 Dinner Buffet@ Shangri-la Cafe Kool

塞翁失馬, 焉之非福,
本來想去的酒店 book 唔到, 來了香格里拉, 但食物實在令人十分驚喜,
相信應該比我們原先想去的海逸同文華東方更好!

冷盤: 波比先生好鍾意食海鮮, 不過食之前我都祝佢聽日唔好肚痛, (成日食到腸胃炎呀佢)
生蠔反而不是主打, 那裡的蟹、蜆、長腳蟹才是主角, 太多款式了, 每樣只可以食一次,
不過一切要剝殼的東西, 我還是懶得去食,



呢個海鮮煲勁呀, D 蜆有大半隻手掌咁大囉!!! 所有海鮮都係生猛游水, 即撈即煮, 新鮮!
印度同馬來沙爹, 正!



熱盤竟然有波比至愛的腸仔, 仲要係燒的, 個皮脆脆, yummy!
牛肉、豬脾肉, 尚算不錯~



話咁快就來到甜品, 好開心, 好多選擇!
而家仲已經有好多聖誕主題的甜品添呀!
呢個朱古力波波, 超推介: 外殼係黑朱古力, 入面係濃郁的咖啡慕思, 食一啖, 好似飲咗一杯咖啡咁!



豆花, 心太軟又係一讚!
心太軟佢整得好好, 蛋糕層好軟棉棉呀, 我要學習學習! 流心效果亦令人滿意~ 咖啡是香濃的即磨咖啡, 最可愛是有一兜奶泡跟上~


食飽飽, 好開心, 酒店大堂的水晶燈同聖誕樹好靚呀,
唔該晒職員哥哥同我哋影相~



本來還想行去海港城影相, 但今日扮淑女著高踭鞋攪到腳痛........
所以, 都係回家了~ 一出酒店行幾步就係西鐵站, 方便到吖~
老公, 生日快樂呀~ ^3^

再起跑

回港已一星期, 工作、生活又回復正常, 工作很忙, 因為有同事 sick leave 啊........

不停的出街食飯, 三餐晚宴的甜品, 都不約而同是我很喜歡的桂花糕~



老細升職後, 好好客地請晒我哋食飯, 超豐富!
席間成了我們的 iPhone sharing 大會, 一齊玩 game 睇相, 好開心的一個晚上!



都係回港後先知今個星期有三日假, 太好啦, 好努力地寫遊記同 upload 相去 facebook!

在家趁有時間就要食吓日本買回來的食物喇, 否則好容易過期!
兩款長浜拉麵, 邊款好食D 呢??? (左 280 yen, 右 500 yen/3 個麵)



答案竟然是平D 的右邊那款好食D, 麵好彈牙!
今次買過呢D 拉麵, 下次去一定要再買, 因為真係好好食, 味道絕對好過杯麵呀 (杯麵都係為咗個湯, D 麵通常都唔會有幾好食)
特登去屋企對面嗰間舖頭, 買了波比最愛的鳴門卷、日式叉燒同埋帆立貝, 自製日本風味~



五月時同波比跑步, 有一次整親個膝頭哥, 之後一路都唔好晒..........
開頭連踎低起身都起唔到, 要扶住嘢借力,
而家上落樓梯踎低起身已沒大礙, 但要跑時還會感覺到有點不對勁....

停了差不多五個月, 係時候又起跑了~
呢排係咁食, 肥了之餘又驚身體唔健康, 都係做做運動, 起碼心理上都好過D!

今晚陪波比先生跑, 我只可好慢地跑, 跑了大概 6 圈, 這個開始算是不錯吧!
最緊要是跑完膝頭冇惡化的蹟像, 應該繼續都 ok 掛!

終於都捱完呢個星期

呀~~~~~~~~ 終於都返晒五日工可以放假抖抖喇~~~~~~~~~~

呢個星期真係唔易過.....
先係頭幾日都病, 日日作悶想嘔, 日日要搽白花油去令自己冇咁想嘔 (老老實實又真係 work),
連病人都問我: 「姑娘妳搽咗白花油呀?」
「係呀, 我想嘔呀」
「咁仲返工?」
「唔返工我都唔知幾時先有時間再見你....」

我們的 dept. 走了一個人, 即是少了 20% 人手.....
人人都已經好努力的睇 case, 希望把對病人的影響減至最低,
我一個上午 9am-1pm 都全部 book 滿晒 out-patient, 真係去廁所都冇時間.......
每日放工望望聽日的時間表, 又係連續八個 case..... 真的得閒史都唔得閒病........叫我點請病假....
不過曙光終於來了, 就嚟會請人了, 希望兩三個月後會有新同事啦!

呢個 trip 返嚟後, 在回程機上病緊的恐怖情況不停在腦海浮現, 真係好有陰影
對布吉同 Airasia 都好有陰影,
一向慳家的老婆就對老公講:「我哋如果去北海道呢, 我都唔會貪平坐 HK Express 喇, 我寧願俾貴D 坐返國泰」
「吓, 妳終於都明白呢個道理喇」
「咩o者, 咁人哋一向都係諗住慳 D D , 有時差一兩千錢, 夾埋就又可以去多個 trip o架喇」
但慳家老婆都不再慳, 證明呢次事件對我的影響是多麼大!

呢幾日睇緊喺書展買的北海道書



台灣出的旅遊書, 太好看, 是帶你去感受一個地方,
不是不停的終極食玩買.....

當中有好多好美的相片, 很享受閱讀的過程~



見一個廿幾歲的腦瘤男病人, 含著食物唔吞, 第一位看他的同事以為佢係差到冇意識吞 (腦外科病房太普遍)


我見了他, 覺得他是有意唔吞, 問佢:「叫你屋企人嚟餵你食好唔好?你要吞喎」
他點了點頭
我就話:「哦, 有冇攪錯呀, 屋企人餵你就吞, 我餵你就唔吞, 揀人餵!?! 即係好唔俾面我o者!」
他忍不住笑, 估唔到佢一個 dull 樣原來還會笑

今日約見了家人, 且, 真係蝦姑娘嘅, 激死呀~~~~ 雖然家人餵都有時唔吞, 但都總算可以俾佢食到少少~
咁後生, cancer 割了一大片腦袋, 或者俾我都會好 depressed .......