抖吓氣

嗯, 今日醫院的情況終於都回到正常一點, 終於可以準時收工

但今日見了一個好恐怖的 case, 前兩日見佢, 都仲正正常常,
只係兩日, 一個後生女變得瘋瘋癲癲, 病房同事們都形容為:「好似鬼上身」,
我對住佢, 佢望住我的眼神, 真係好心寒..... 亦都覺得佢好慘..........

有個婆婆, 中風後口齒不清得很嚴重, 似乎除咗我 (聽慣了) 之外, 冇人聽得明佢講乜,
佢一見到我, 知道我聽得明, 佢就爸爸聲咁喊..... 同我訴苦,
我都明白, 住醫院真係好悶好孤獨的~
我走時, 佢問咗我幾次:「妳走o拿? 幾時再返嚟呀?」
希望我仲有時間去探吓佢啦~

而家醫院愈來愈電腦化, 我哋的 X-ray 片, CT 片其實都入晒電腦,
今日見到個醫生推住部電腦埋病床, 即刻 click 張 chest X-ray 出嚟俾個病人睇同佢解釋病情,
好型啊!
哈, 我有時都會播吓我做 X-ray 的 video 俾返我D 病人睇, 不過唔會個個 case 都咁得閒咁做啦!

今晚終於都冇塞車, 返到元朗有得買餸煮飯, 已經是簡單的快樂~
用甜甜地的鰻魚汁去煮牛柳粒, 送飯唔錯o架~



仲有百吃不厭的蝦醬冬菇蒸肉餅,
蝦醬係較高鹽份, 唔可以成日食o架, 但煮餸真係好好味囉, 次次都食到唔停得口!
帶飯叮返熱佢時, 仲香到引死食 canteen 飯的同事添!



仲有, 嘻嘻, 買咗正嘢聽晚爐端燒!!!!!
係呀, 我們的爐端燒 project 終於都鐵定咗明晚舉行,
希望用電磁爐的效果 ok 啦!!!! 好興奮!!! (最興奮的應該是波比先生, 佢等到頸都長了!)