豬欄生活: 12月 2013

2013年12月30日星期一

[愛烘焙] P仔 105 麵包系列

用了 P 仔麵包機一整個月, 好開心常常都有新鮮麵包食
這個月試過唔同的食譜, 覺得始終有雞蛋的食譜會令麵包質地冇咁鬆散同較好食

這是斑蘭紅豆包, 再額外添加自製紅豆蓉會更美味

有次波比先生話想食排包, 我就用了湯種排包的食譜, 還添加了椰汁~
本來呢架機的的麵包已經夠好食, 我覺得從來唔洗加湯種咁麻煩,
點知今次整完, 發覺有埋湯種的話會是相得益彰, 更鬆軟可口, 又有一點像丹麥吐司的感覺,
仲要擺兩日都完全唔硬, 很犀利!

這批是黑芝麻提子杏仁包包, 香香脆脆~
有了這部機, 每一天吃麵包都成了樂趣~

2013年12月29日星期日

今日仍然好凍, 但都有一早起身練長課, 下星期就是美津濃半馬了, 今日是最後的長課練習
屋企來回屯門西鐵站共 18km, 練習的話真係甚少跑咁長呢~

跑完好攰, 不過就有十足的 quota 吃大餐,
好開心中學好友從加拿大回港旅遊, 可以約到出嚟短聚,
見到好友的小朋友好攪笑, 哈哈, 唔百厭就唔係小朋友啦,
下次記住三年後北海道見呀! :P

晚上又再食食食, 是波比大學同學為我們攪的生日飯, 超美味的 Tony Wong 蛋糕,
仲有好可愛的蝦仔小朋友為我們吹蠟燭, 很多謝你哋啊!

2013年12月28日星期六

[愛行山] 嘉道理探豬行山團

波比先生嚷著要去嘉道理探豬豬好耐, 今日天氣唔錯, 就起行了!
去到十點幾, 是餵食時間, 所有豬豬都出晒嚟開餐, 好嘢!

o習o習o習好攪笑

但正所謂隔離飯香, 有菜菜唔食, D 豬係要去欄邊偷食地上的植物
養豬嬸嬸見到, 就摘了兩條樹葉俾佢哋食, 食到津津有味!!!

唔好再偷食喇! (被發現, 一臉扮無辜!)

最溫馨的場面, 是原來豬豬冬天都要搽 lotion 的,
見嬸嬸幫豬豬逐隻搽, 愈見佢哋感情深厚, 嬸嬸好錫佢哋每一隻~

哎唷，啲豬豬真係好可愛! 嘉道理請唔請豬欄義工呢?

此行另一目的，是想由嘉道理行去大帽山，
上網研究過，有人的確是行到這樣的路線，不過不是一些很大的路
我們先要去觀音山那邊，走了蝴蝶徑的梯級路上山
上到一半已熱死我，由四件衫除到得返一件

見到野生的聖誕花，很驚訝，我一路以為聖誕花是些矮植物，點知原來是可種到好大好大棵樹的，又學到嘢!

再上，見到啡啡紅紅的山林，好靚啊
當人人都迫來大棠睇紅葉，我們實在要離開一下，
在嘉道理睇，清清靜靜，感覺很好

差不多到觀音山頂，我們要轉左，呢度可行返去兄弟亭
我們行入一片樹林，竟然有超大發現!!

就係見到櫻花!!! 這就是傳說中的嘉道理櫻花嘛，雖然只是零星的幾朵，但都好靚同令人十分驚喜呀！

上完好多樓梯，有分岔路時向右行，走在山邊
漸見一片金黃色的稻草原，同見到大帽山了

呢個山頭種咗好多小樹苗，都被細心的包裹著

穿過樹苗區，是更斜的山路，
不知不覺，已上到很高的位置，錦田就在腳下

再繼續前進，可惜路愈來愈模糊，要行入草叢中

行到差不多這個山的山頂，覺得路不清又太斜了，再行好似好危險
雖然已望到大帽山的波波在不遠處, 但安全起見都係坎回頭了~
下次多D 人先再挑戰呢段啦~

回程時, 指示不清晰, 有點迷路, 嚇死波比先生,
走得返出大路時, 佢先鬆一口氣!
行了六公里, 但爬升了 500多米, 行完雙腿都真係幾攰吓!!!

臨走前同豬豬 say Goodbye, 大家也在和暖的陽光下睡午覺, 多寫意,
最百厭的一隻豬仔叫蘇兒, 很喜歡攪人同撩是鬥非, 哈哈, 下次嚟都會認得佢

2013年12月27日星期五

[愛住家菜] LC 煲 - 窩蛋牛肉煲仔飯

今年打了幾次邊爐, 都是用 LC 煲, 真係好好用, 傳熱好快, 變相很慳電!

今日再用 LC 煲整煲仔飯, 佢比我用開嚟整煲仔飯的煲大個好多, 所以可放更多材料
這個窩蛋牛肉飯, 牛的油份滲入了飯內, 油油香香的!
臨整好時加兩隻蛋焗一焗, 半熟的蛋混埋飯和牛肉食, 真是一絕!!

吃到最後, 還有飯焦, 是小煲仔做不到的效果~
太好吃, 兩個人差不多 KO 了一大煲呢 :P

LC 煲雖然話係師奶仔的奢侈品, 但佢貴得嚟真係有料到, 單單是佢易清潔的特性又已令人深深愛上~
如果我第時換大屋有大廚房, 一定會買多兩個!

2013年12月25日星期三

[2013 台北] 超好吃的瘋麻辣- 麻辣火鍋吃到飽

跑完台北馬拉松之後, 當然要好好大吃一餐獎勵自己,
素聞台北的麻辣火鍋好正, 嚟咁多次都未食過, 今次就要拜訪一下!

在網上有幾家都好出名, 鎖定了去食「馬辣」
我都知道好多人, 人人都話要訂位, 但我諗住而家咁多分店, 應該唔會好 full 掛, 所以又冇訂位
11:30am 開門, 我們 12:00pm 先到,
點知去了, 真係 full 咗, 冇得 walk in (T.T)
真係晴天霹靂的感覺............. 尤其是波比先生............... 冇得食佢真係想碌地下發爛渣架喇!

好彩, 我呢個導遊總有兩手準備, 知道附近其實還有其他麻辣火鍋店,
去了斜對面的「瘋麻辣」看看, 又係超多人, 職員問我哋有冇訂位......
心想死喇, 唔通又冇?? 點知今次好好彩喇! 有可能係最後一張的二人枱~

未坐低, 已見到其他人已經食緊滿桌子的精美打邊爐食物, 睇都已經興奮!!!
職員先叫我哋選湯底, 要咗一個養生藥膳, 一個招牌麻辣湯,
NT539 任食至 3pm, 建議大家食幾多攞幾多, 唔浪費食物,
如最後枱上的食物食得晒 (鍋中只有湯, 冇食物), 全單 95 折~
然後就點了豬牛羊同蝦滑等等各一 set, 其他食物就自己出去拎~

嘩嘩嘩, 呢度真係超超超多食物, 香港實在冇咁多款, 又自己出去夾的火鍋店~
新鮮蔬菜, 丸類等等已經幾十款, 每樣試一粒都飽史了......
我們就是攞得太多丸, 攪到唔夠肚食其他食物.....

要大讚呢度的海鮮, 超多種類, 有好多香港都冇得食,
有D 睇個名都唔知係乜, 例如上右邊的是「飛管肉」???
下右邊的是曼波魚, 是一種台灣同日本先有得食, 個樣好攪笑的魚, 含超豐富的骨膠原啊!

鯊魚皮?? 是否真的? D 蟹好鮮甜! 不過唔記得咗攞帶子食......

呢度D 魚真係好好食呀! 冇骨, 啖啖肉, 很鮮的海魚味!

我們 order 的豬牛羊到了! 牛肉叫了幾盒都好穩定的水準, 唔會過肥, 切得夠薄, 入口唔洗點咬就吞得!! 正!!
波比就很喜歡松阪豬, 話香港都難吃到咁好食的豬肉~

蝦滑墨魚滑的味道其實同香港的差不多, 早知唔洗叫, 免得浪費肚子空間......

兩款湯底都很美味, 食物煮完都完全唔洗點醬都好入味,
仲有職員不停地加湯, 十分讚的服務!
如果喜歡重口味的, 也有自助醬料 corner 可以自己混醬~

汽水啤酒果汁都是任飲, 還有另一亮點, 就是任吃的 movenpick 雪糕!!! 實在太興奮了!!!

還有很多蛋糕, 甜品, 水果, 點試得晒???

2013年12月24日星期二

聖誕邊爐

今天把自製的蛋糕仔送了給同事, 又送了給另外兩個相熟的部門,
同事收到蛋糕, 都很開心,
自製食物可帶給人歡樂, 自己也覺得很開心~

平安夜, 約埋師弟妹來我家打邊爐, 因為出去食又怕好迫, 又怕好貴,
自己買材料, 每人唔洗二百蚊已經好好餸!

在牛一訂了生蠔: FDC, Normandy 同 KYS

由波比同師弟開蠔, 自己開真係好正呀~

又買了 M9 和牛同埋美國牛肩肉, 淥一淥就入口, 即溶好美味~

仲有糯米粟米, 都係貪玩試試, 我還是喜歡正常的粟米~
又有波比同事俾的長洲魚蛋, 超彈牙!!!

今日貪得意, 整個日式牛乳鍋, 點知就出事, 攪到個煲底燶咗 T.T
有排洗......
最後唯有轉個 Sukiyaki 湯, 好彩屋企有好多煲可用~
多謝大家賞面, 仲有 Tokyo Banana 做甜品~ 平靜又美滿的平安夜啊~ :)
聖誕快樂!

[愛烘焙] 斑蘭聖誕樹

早幾星期, 為著買什麼給大家做聖誕禮物而煩惱
行經 LOG ON 時, 見到個聖誕樹蛋糕模, 超超超喜歡, 就決定繼薑餅人之後, 今年要整聖誕樹!!

一提到斑蘭, 大家就是想到戚風蛋糕, 在網上完全找不到不是戚風的食譜,
但用這小小的模具, 實在不宜用戚風的 recipe, 所以就用了 pound cake 的 recipe, 自行加椰汁同斑蘭油

焗好了, 好合心意的綠色啊!!!!
背面會成個火山咁高起, 要切平佢先得 (留俾波比食D 頭頭尾尾 XD)

準備 Icing Sugar, 唧上再貼上裝飾, 這一步很花時間, 開頭貪快又怕糖霜好快凝固, 求其貼......

之後第二批, 有D 心機揀顏色, 逐粒貼就靚好多 :D
祝大家聖誕節快樂, 同自己喜歡的人有個溫暖的晚上~

2013年12月22日星期日

[愛美食] 做冬

今日真係凍到震!!
今早練了 11km跑，雙腳很酸痛。。。
呼吸很辛苦, 寒冷的空氣被急速地吸入是非常刺鼻, 甚至痛得我標眼水.....
不過還是要練習, 下一個半馬只有兩星期咋~

從來不喜歡 shopping 的我，見放假也要出動了，
有一年多沒行過荃灣的商場，估唔到好多收穫!

之後是做冬，豐盛的晚餐後，再去了荃灣的明師傅甜品，椰皇西米露湯丸好正啊!

[2013 台北] 礁溪溫泉暖呼呼推介 - 礁溪溫泉公園

完跑後的第二天, 我們再去浸溫泉, 今次去是更遠的宜蘭縣的礁溪, 那裡是個溫泉鄉
出發前兩星期就要上台鐵的網頁秒殺台鐵車票, 點知嗰朝我完全唔記得咗,
記得時, 已是七點幾........ 買唔到 9am 的自強號, 只好買 7:30am 的~

個半鐘的車程, 吃著台灣 KFC 獨有的雞扒酥餅, 是每次來台必吃的東東~

到礁溪車站, 還是下著雨

到處都是溫泉旅館, 出車站後各右行, 不用一公里就是我們的目的地

途中見到些公眾溫泉公園

有免費的足湯

好快就到礁溪溫泉公園, 日式庭園設計, 好靚的環境啊!

一邊是男湯, 另一邊是女湯, 都是裸湯的
我帶了一條毛巾, 但原來應該帶兩條, 大的可遮掩身體, 上水時避免著涼, 小的是最後用來抹身
還規定一定要戴浴帽, 沒有帶就要現成買了~

溫泉有限定人數, 不會太擠擁~

入到去有入錢的 locker, 如無貴重物品就用 open 的儲物櫃都得~
內裡的裸湯, 當然唔俾影相, 唯有從其他網站引用相片, 因為內裡的環境實在太太太好了!!!
我們都很喜歡露天的溫泉, 因為唔會焗,
四周都是樹林, 就像是身在日本, 怪不得這裡的賣點就是「三十分鐘就能到日本」

有三個池, 溫度是 39/40/43 度, 我只能浸到 39度那個, 其他的都太熱了!
浸了差不多一個鐘, 好舒服呀~
旁邊仲有好多太陽椅, 俾人可浸一陣, 又瞓一陣, 這時浸的全是阿嬤, 很養生的樣子~

雖然從台北來是有點遠, 但 NT150 的價錢, 真係乜都抵返晒!!

浸完溫泉, 成個人精神晒, 今日對腳真係都幾痛吓呀.......

外邊有間溫泉拉麵店, 可一邊浸足湯一邊吃拉麵, 太爽了吧!!

出面的免費足湯就好多老人家浸呀~