收爐之作

聽晚後晚都會出街食飯, 今晚呢餐係我虎年煮的最後一餐了!
這一年好開心, 因為煮咗好多新菜式, 找到做師奶仔的成功感~

本來今晚想食海鮮, 但係仲未過我一星期 soft diet 之期, 望住d 蟹都唔敢買
最後買了乳鴿, 煮咗菜、魚, 仲有呢個黃金煎肉餅, 好了, 廚房正式收爐喇!



飯後還有聖安娜的紅豆桂花年糕, 味道唔錯呀!
我懶得開火煎, 求其叮 60 秒都做到軟綿綿的質感, good!



哈哈, 明明過去一星期我應該是 soft diet 的,
但牙醫話明唔好食嘅嘢我都食勻咁滯..... 包括有年糕啦、糯米雞啦、甜嘢啦、魷魚啦.........
哈, 真係覺得自己好為食呀!!!
聽日就去黐個真正的牙套了, 希望一切順利啦!

情侶裝

今日去跑步, 同波比先生一同著上早幾日買的情侶裝跑步風褸, 嘻~



不過可能尋日大掃除得太攰, 今日跑起嚟好快冇力呀........

一月快完結了, 可幸完成了好多事,
工作的一份 protocol 攪掂了,
嗰個好難的 IT Test 竟然 pass 了! (熱烈慶祝!)
Sem 1 的考試都出了成績, 唔錯唔錯!

可以開心又安心的迎接新年, 呢兩日係咁約朋友拜年,
又報咗個日文班, 嘻嘻, 如果我學叻D 日文, 會唔會多個藉日去多D 日本呢?
今年唔洗再為考試請假溫書, 可以捕住有冇平機票, 一 book 即出發!

本來好想蒸底糕過年, 不過奶奶已經買咗好多俾我哋, 我自己又買咗兩底.......
所以冇行喇, 等出年啦......

大掃除日

今日氣溫又跌, 遇著要大掃除, 諗起都辛苦~

一起身先到自己隻手變成咁......



真係好鬼恐怖, 係自從我喺醫院工作對手先咁易爆,
上年第一次見到咁情況, 我仲以為自己生嘢 (病毒?!)
後來先知係天氣一太乾, 就會乾到D 皮爆開, 變成一個個山火口咁....
搽 hand cream 會係好D, 但都唔能夠完全避免咁爆, 有咩解救呢??

今日出去辦年貨, 整好個全盒, 入利是, 洗咗 4 機衫, 洗好大堆碗,
仲有開始大掃除喇, 抹晒全屋企廿幾隻窗, 都真係好攞命!
好彩聖誕節嗰時已經大掃除咗一次, 而家冇咩垃圾要執, 只係要抹抹抹~

今晚咁凍, 最好係又整煲仔飯啦!!
波比先生話今次要食窩旦免治牛飯, 仲有加膶腸,
牛肉加D 洋蔥會香D, 膶腸就係買了滔滔做生招牌的美味棧, 質地唔會乾硬, 好鮮味啊~
用雞蛋撈撈撈, 蛋香牛肉香混埋一齊真係好正o架~


難得又煲湯, 係什菌雪梨煲豬展, 又係用美味棧的什菌湯包 (工展會買的),
煲完D 菇味很濃, 飲真D 又有雪梨的清甜, 是唔錯的冬天滋潤湯水啊~

高危

嘩, 呢排 H1N1 又嚟喇, 隔離病房好多 Flu cases, 真係要好小心呀!

我日日返工搭車都帶住口罩, 因為 D 人真係勁咳都唔戴口罩,
呢D 人真係好衰格, 自己病就好啦, 一陣攪到人哋病, D 大肚婆同老人家一病真係好危險o架!
真係分分鐘害人死o架!
見到隔離病房有個阿婆, 只係 Flu 攪到肺炎, 就要用晒呼吸機又插咗條喉, 真係好慘.......

前日就係唔記得戴口罩搭車, 又係有個阿叔喺度勁咳,
跟住我就中招開始有 Flu symptoms 喇,
今日拿拿林去睇醫生囉! 萬一病住過年就慘喇! 好彩食咗藥而家冇咩喇!

今日見返兩個月前的一個伯伯呀, 佢見到我好開心, 因為佢仲好記得我,
無親無故, 我都擔心佢有嘢想買時冇人幫佢打點,
點知佢前排轉去第二間醫院時, 佢話遇到一個好好人的護士,
出錢出力, 買好多日用品同食物俾佢, 佢轉去第三間醫院時又陪佢, 呢個護士真係好有愛心,
正常情況下, 即使病人叫職員幫手買D 嘢, 好多人都唔肯, 避免有咩事要上身,
主動幫的, 只係少數, 還好彩始終仲有D 人係有個心去工作,
其實施比受更有福~

我愛煲仔飯

今日見到咗 99 歲的婆婆, 每次都係個仔推佢嚟, 其實個仔都已經係一個七十多歲的伯伯,
七十多歲的伯伯每天都去安老院探婆婆,
伯伯推住婆婆慢慢地來到, 伯伯每次都好緊張的表現, 令人深深感受到, 乜嘢叫孝順~
婆婆好叻女啊, 今日做檢查合格了, 希望佢可以開開心心咁過年啦~

又有另一個好感人的故事, 當好多時大陸女人都被認為係只貪香港男人的錢,
我見到有一個不幸中風後四肢癱瘓了的男人, 只是中年, 就下半生要待在老人院,
有一次覆診, 竟然是有一個自稱是他女朋友的人來了, 我萬個估唔到, 一年前的女朋友, 現在還是女朋友
那個女孩子從中國某地搭飛機來, 因為是放長假才能夠來,
那個女孩子對男病人無微不至, 不停鼓勵佢要做訓練,
那男病人竟然第一次在我面前開聲講說話~
已是四肢癱瘓了, 也沒有任何金錢利益可貪圖了罷, 見到女孩子的一舉一動, 我相信出自真心亦叫人感動~
可惜女孩子要回去了, 那病人又會繼續頹廢下去嗎?

*************************************************************************

今晚好開心啊~ 開始整自家煲仔系列第一擊喇!!!
波比先生點了臘腸冬菇滑雞煲仔飯, 我用了雞脾肉, 好滑呀~
又去榮華買咗臘腸, 加瘦臘腸雖然貴好多, 但真係健康D 同都好好食!




一大煲, 超爆滿的材料, 超滿足!!!

最開心係成功整到飯焦添呀, 好正呀~~~



同場加映: 第二次煮吉野家牛肉, D 汁撈飯又係好美味~

掃貨

哈, 今日見咗個小朋友, 佢個樣已經好卡通 (好似小新) , 我已經覺得好攪笑,
佢份人仲攪笑, 第一次有小朋友來到我的治療室話唔玩我d 玩具,
佢話:「我自己帶咗好多玩具嚟呀」
我:「我都有好多玩具喎, 請你玩啦」
佢:「唔洗喇, 不如妳都玩我d 玩具啦, 好好玩o架」隨即拎了一大袋車車俾我睇, 真係盛情難欲,
呢D, 咪叫做 Normal 囉~
又乖又好教的, 呢排都算執到咯!

放工後一個人 Happy Hour,
食咗好大個 MOS burger 後去行街街, 在日式百貨流連忘返,
最愛去廚具部, 欣賞不同的廚具, 忍唔到手, 買咗個煲!
係個有牌子的陶瓷煲, 唔減價都唔捨得買嗰種,
好正呀! 可以成個煲放入焗爐同微波爐都得, 即刻諗起焗肉醬意粉!
仲好適合整煲仔飯呀, 恨咗整好耐喇, 要快D 去買靚臘腸先得咯!

又買咗個豬頭公仔的矽膠模呀, 好 cute o架, 用來整豬頭蛋糕一定好攪笑!
所以又貴貴地都買了~

仲有, 買了禮物俾波比先生~ (衰佬返到嚟自己搵啦)

財散, 人安樂~

無驚無險

今晚去咗整牙喇, 一坐低就打咗三支麻煩針, 比我以前打過的算唔痛了!

跟住就係車牙同埋試模, 倒咗兩次都發覺未車夠, 其實係牙醫好小心車, 唔想一次車咁多,
最後用了差不多一個鐘, 終於都攪掂了!
整個過程, 其實我一D 都冇覺得痛, 係張開個口好攰o者~
真係同我想像中完全唔同啊, 本來已預了會十級痛囉!

戴上了暫時性的牙套後, 其實完全冇咩唔舒服, so good~~

多謝波比先生今晚負責買晚餐, 一間好出名的粥店, 要等成 25 分鐘~
豬潤粥同蘿蔔糕都超讚啊!



希望個牙套可以喺新年前順利完成啦!

有得食就好食!

聽日, 就係我的史期喇, 要去牙醫度整牙......
要打好痛的麻醉針, 諗起都驚驚.......
之後可能要食一星期 soft diet, 所有今日有得食就好食喇!

整了豉椒炒鮮魷, 有得咬就好咬~



甜品食咗大班買的金枕榴槤糕 (賀年糕品之一), 幾得喎!
買之前都怕D 味道會唔會好假, 但食過之後, 真的好有榴槤味.
愛榴槤的話, 值得買來試試 (好似都唔太貴)

孜然牛肉

因為星期六唔洗返學, 所以返到奶奶度食飯,
所以今晚就可以喺屋企, 煮D 平時返工煮唔到嘅嘢, 好耐好耐都未試過星期日會煮飯喇~

喺元朗買餸, 又係好迫人, 點解而家香港度度都咁迫人嘅......

因為日頭食了一餐麥當當 + 一餐雞脾沙律下午茶, 超肥, 今晚要清淡D,
煲個湯先, 係螺片豬月展湯



新菜色之孜然牛肉!
好鍾意食孜然乜乜的餸菜, 可惜香港唔多地方有得食, 係大陸先有,
上個月返深圳咪買咗好多調味料嘅, 其中一樣就係孜然粉, (香港都有, 但難搵)

用孜然粉、三色椒炒牛肉, 孜然粉一炒起就好香,
好簡單就整到這個香港唔容易食到的菜, 實在開心~

我們的馬拉松

今日好開心, 因為我們第一次一齊參加馬拉松,
今日的天氣好好, 唔太凍, 唔太曬, 又好天~

五點幾起身, 六點半出發, 七點半就去到科學園喇!
望過馬鞍山的景色, 爽~



我們換了比賽背心, 熱身, 好緊張呀~~



今次有差不多 1200 人參加, 好多一睇就知係勁人!
波比參加了 10km, 早我 10 分鐘起跑



起跑喇, 冇帶大相機, 太遠影唔到



好快又到我起跑了, 我跑女子 5km, 但周圍的女士個 look 都係好勁咁!
起跑後, 我不停見到D人過我.......... 好擔心會跑包尾..........
但我知我唔可以夾硬跟人哋跑咁快, 否則好快冇氣會跑都跑唔到

D人真係好犀利, 我跑完 1km 已經開始要行一行, 但所有我前面嘅人都係唔洗抖的不地衝呀......
死喇......... 唔通真係包尾??

我撐住撐住, 唔好心急, 見到 2.5km 可以折返喇,
呢個時候先發現, 原來我前面的一大棚人都係跑女子 10km 的, 冇乜人同我一樣折返

我繼續撐住撐住, 跑到仲有 1km 的時間, 見到波比先生都返嚟喇,
佢同成班人鬥個你死我活呀,
最後, 我用了 34分鐘衝過終點! 好開心呀, 完成了, 應該冇包尾!
完成後有證書一張!



波比先生好叻呀, 今次又快咗, 42 分就完成了 10km 喇!!



見到人哋個個都咁勁, 後生女又勁, 四五十歲的 auntie 都好勁,
令我要決心好好地訓練多D 呀~
希望今年年尾有機會亦有能力同波比先生一齊跑 10km!

會唔會肥呢??

今日返大學考咗個 IT test, 係 Master Course 畢業的要求之一,
自問平時電腦知識都算唔錯, 但我都覺得好深, 尤其是考 theory 的部分,
又要考埋有關電腦罪行的法例, 點識呀.......
唉, 真係有D 擔心會肥囉!

好了, 考完就唔好諗喇! 開開心心同波比先生去 King Ludwig Beerhall 食 Tea buffet!
因為今個星期開始, 我已經唔洗上 Master Course 的堂喇 (遲D 先仲有幾堂),
星期六又自由身喇, 太開心, 唔去食個 tea 真係對唔住自己!

三個月內食第二次, 因為真係好正, 豬手又食咗兩件!



大部分食品都同上次一樣, 今次食返上次 miss 咗的即烘芝士麵包,
D 芝士香到成間餐廳都聞到, 真係好勁!
因為太香, 波比先生食咗四件啊~~



雪糕配 pancake, 簡單但超滿足~



去旺角行咗一陣, 嘩, 迫人得太恐怖了, 成街都係大陸人,
想去花園街睇運動用品, 迫到根本好多舖頭都入唔到.............
睇嚟新年前冇咩都係唔好出旺角為妙喇!

完成兩年的任務

今日 Discharge 了兩個 case, 是一個手術後的兩年跟進個案,
由一個大 BB, 睇住佢做手術, 再 follow-up 了兩年, 變成一個有傾有講的小朋友了,
我的任務完成了, 將來他的路, 還要靠家長同學校的同工去為他鋪砌

有的由開頭的發晒癲典晒地, 到現在的乖孩子,
有的一開始是壞脾氣, 到現在更加是臭脾氣,
有的開頭是一團飯, 現在都是一團飯的懵豬豬又聽話, 叫佢做乜就做乜,
看著小朋友長大, 人人天生的性格真係會好唔同,
但後天的管教亦都非常影響孩子會變成一個怎樣的人

兩年我覺得係一個合適的時間說再見, 哈, 因為講真我好怕跟一個 case 跟得太耐.......
其實我係好怕悶, 好怕做嚟做去都係嗰D 嘢 (不過邊份工唔係做嚟做去都係嗰D 嘢?)
所以醫院真係唯一一個最適合我做的 setting, D cases 轉得好快,
如果我在第一份工的地方, 要由個小朋友讀小一睇到佢十八歲畢業..... 我諗我會有想死的感覺.... (佩服在那 setting 做的朋友)

星期五放工特別開心, 波比先生同朋友聚舊, 我就一個人做咗好多嘢,
先去係剪了個冬菇頭迎新年, 髮型屋勁多人!

跟住去食咗個一人麥當當, 新的蜜糖芥末魚柳包唔錯啊, 不過太少蜜糖芥末醬了~



食完之後, 去嘉城廣場行吓, 碰碰運氣睇吓有冇地方可以修眉,
平時去開喺旺角的地方, 近來都見唔到幫我修開的老細.
上次就錯誤地放膽一試佢的同事, 點知唔掂到修到條眉一忽忽, 完全啞晒!!!

想去試吓 Bobbi Brown/M.A.C./Benefit, 但間間都要預約冇 walk in, 我又唔會成日出旺角
所以一路都冇攪

今日算好彩, 原來嘉城二樓有一間舖頭仔有得修, 有趣的係瞓喺度修 (俾人做 facial 的床),
個美容師都好有心機, 效果都滿意, 可以再幫襯!

回家前買了三個紫心蕃薯, 返到屋企又唔覺意食咗一個....
最後, 食滯了....................呀........................

再來千層麵

去完澳門返來喇, 行返一 d 熟悉的地方, 食咗好多美味的食物~
最開心係用 GF2 影咗好多靚相,
不過今個星期六有個試要考, 呢幾日要讀書呀, 過埋考試先有時間整理D 相片咯~

今日又回到正常要返工了, 好多 case absent, 但都有好多堆積的 admin 東西同 report 要做.....
醫院爆晒床, 好多病房 case 要睇, 但係今日我 book 到滿晒 out-patient 都上唔到去睇咯

今晚又整咗千層麵, 今次好好多呀!
加咗磨菇喺肉醬度, 今次超多醬, 同埋D 麵煲得林D,
樣樣嘢都好 match, 波比先生話有 Pizza Hut 的水準o架, 嘻嘻~~~

夢想食物 - 千層麵

我好鍾意食千層麵, 如果食飯的地方有得點千層麵, 一定會成為我的必叫菜色
不過實在唔太多地方有得食, 一年還吃不到幾次

有一日睇廚藝高手 blogger 的 blog, 發現原來自己做也不太難!
於是的起心肝想試一試!

前幾日喺 Citysuper 買了 Lasagna 麵, 就是千層麵的麵, $42 盒,
今日買了肉/ 蕃茄醬, 煮好後同麵一層一層的鋪好

不過都有好多難題, 先係屋企有的焗爐兜都唔夠大 (之前仲特登諗住用嚟焗嘢), 好彩有錫紙兜,
又發現肉的份量唔多夠....... 原先打算整八層, 而家整得六層,
中間仲要有兩層用火腿搭夠 (好彩屋企時常有好多食材)
唉, 補吓補吓咁砌好六層, 鋪上芝士 (最興奮!!!) , 就拎去焗喇!!

焗到成個廚房都係芝士香, 見到芝士轉了金黃色, 嘩~~~ 太靚喇~~~


最滿足係見到佢一層層的樣子
第一次造到我很喜歡的千層麵啊~ 那種喜悅實在難以形容!
第一次用我家的焗爐去焗咁芝士的菜色, 芝士又香又脆, 太正喇!



有了今次的經驗, 星期四要整多次更成功嘅先得!! (因為D 蕃醬開蓋後要一星期內食晒啊!)

好嘢, 聽日 off, 過大海, 又係增肥之旅呀~~

Daddy 慶生

今日第二日上堂, 點知...... 講D 嘢太淺又好悶......
甚少上堂釣魚的我, 都忍唔住釣咗兩條..........

坐後排的我, 望見好多人都在枱底用 iPhone 睇 newsgroup, 玩 whatapps, Shark, scrabble.......
連某高層都頂唔順喺度玩 Angry Bird 時 (笑!)......就可想像到今日的內容, 實在是太皮毛了..........

夜晚去了屯門同 Daddy 慶生, 雖然住了碼頭好多年, 但都從未去過聯邦食飯, 因為成日都覺得好多人,
今晚 book 咗枱, 環境舒服, Service 好好, 所有餐具都好乾淨,
食物更加是唔錯, 絕對值得再來~

人, 希望不停的進步

這兩日都要上 in-service training, 可以同不同醫院的同事, 仲有舊同學仔聚一聚~

剛巧呢幾年的 training, 每次搭車去時, 都撞到我讀書時好好人的 supervisor,
一齊搭車一齊傾傾近況, 一年就只有呢次機會,
每年佢都會問我做成點, 慶幸我的答案是一年比一年好~

訓練的內容是唔錯的,
有好多 area 其實令人好想做 research 去研究一下一D治療的效果,
又或者一D Prevention Program 的功效,
當我讀完個 Master course, 而 Clinical 方面又再站穩腳後 (Target 由 BB 到100 歲阿婆, 所有奇難雜症都識做時),
我諗下一個人生目標可能就係做吓 research 了!

久未韓燒

Happy Friday!!
呢個星期每日怱怱忙忙地過了, 很疲累的感覺......
每天很多的 cases 呀, 開會呀, 仲有去了 Master Course 的實習呀, 都令呢個星期過得太快!

來到星期五, 好想賀一賀佢!

忽然間了起條筋, 想去食韓燒, n 咁多年冇食過~

去到尖沙咀, 竟然撞到舊同事, 今日係舊同事的結婚四週年啊, 恭喜晒!
看見上年還是 BB 的阿仔, 今年已經是小朋友了, 看別人的, 總覺大得很快~
朋友是一個 Super Mama, 工作湊仔都一手包辦, 好佩服~

波比先生話:「吓? 咁快四週年?」
我:「咩呀, 我哋都就嚟四週年啦!」
時間一向過得很快~

去了這間 新高麗苑韓國餐廳 , 好掂呀!
所有的燒烤食物都醃得好好味~
當然咁嘅價錢一定唔會有咩雪花牛肉, 但整體肉類的質素是好好的!



較出眾的有羊架, 墨魚仔, 腎, 牛舌! 還有三文魚刺身, 同多款韓式前菜~



雪耳木瓜糖水, 好夠潤! 仲有炸饅頭, 明知嘥 quota 都一定要食!



我最愛的豬腳薑呀, 嘩~~~~~~ 開心死了~~~~~ 仲煲得好入味!



正, 一定要再來~

被困

今日趕住走, 所以諗住行樓梯由 9 樓去 1 樓, 點知..... 被困!!!
都低能o架, 由 1 樓到 6 樓D 門全部都出唔到, 咁整條樓梯嚟把鬼呀?!
最後我由 1 樓行返上 7 樓先出到, 行咗 14 層樓梯呀! 因快得慢, 我以後都唔會唔搭 lift 喇!

跑完樓梯又跑返 clinic 再跑去搭車, 幾度的天氣下出到成身汗, 熱到全程唔洗著羽絨,
今日夠晒運動量啦~

今日趕住走, 係因為要返 HKU 聽個 seminar,
好彩都準時去得到, 聽的 topic 都唔錯呀, 早知去埋上星期嗰個啦, 因為同事話好好聽呢~

+ 20 度

當出面得 7 度嘅時候, 我實在太鍾意做 out-patient 的時間,
因為我間房有暖氣! 27 度o丫唔該!
D 病人個個入到嚟都話好暖!



今日真係凍到乜到出齊, 暖手蛋啦、手套啦, 仲不停飲熱水同食薑! (係呀, 係檸汁薑係好暖胃的)
最凍就係要行過幾座去病房睇症...... 醫生都凍到著晒厚褸先著袍........

見到D 低溫症入院的公公婆婆, 就知呢個寒流有幾凍~

第三天的粥餐, 有呢排成日都想食的咸蛋, 仲有多 XO 醬, 好好味o架~

Custard Toast

前日造蛋糕時, 整多D 吉士醬,
今日用來搽多士, 原來都好好味~



下一次想整千層酥, 不過今個星期六日都要 full day 上堂, 唔知幾時先整到~

好凍~~~ 大家要著夠衫呀~~~

牙痛 + 肉痛

嗚嗚, 今日早走咗一個鐘, 返咗元朗睇牙醫,
原本 book 了一間集團式的醫生 + 牙醫 clinic, (因為尋晚只有呢間仲開緊門)
但之前睇過兩次, 都係D 好 Green 嘅牙醫, 成日轉人...... 感覺都唔多掂 (洗完牙竟然會痛咗兩日)
今日返到元朗, 碰碰運氣去望望一間新的 Dental Clinic,
因為係出面睇, 已經知佢係個 Christian 開的, 個牙醫除咗 Surgeon 仲有 Master 的 quali,
好似有D 信心~

好好彩, 我 walk in 都有得睇呀, thanks God!
不過睇我的, 其實唔係 clinic 的老細, 係一個都幾後生的牙醫哥哥...... (又開始擔心.....)
不過傾幾句我都已經冇咁驚, 因為個牙醫好詳細解釋, 俾我覺得佢好 professional,
照完 X-ray, 可以喺電腦睇到張片, 好 pro
仲有最好的係我瞓低之後望上天花板, 上面係有............. 一部電視機!
一路整牙時一路睇多啦 A 夢呀, 睇到我 (超級電視迷) 完全冇理到佢攪緊我個口,
天花板仲有貼咗D 聖經金句, 真係見到個人都安心好多呀!
過程中, 牙科護士仲好細心, 忽然間幫我搽潤唇膏話我個咀好乾,

今日主要係暫時性地補返隻斷咗嘅牙, 但牙醫話好大機會又斷過, 所以建議我做個牙套,
我覺得佢都信得過, 同埋我都擔心真係再爆, 做個牙套或者係較完滿的解決方法,
約了後日去洗牙, 過兩星期去車牙, 再過一星期就去裝牙套,
一個月睇 4 次牙醫, 呢個一月份實在太難忘了 >o<

但整體我覺得呢間係一間好好的 clinic, 好老實,
不過今個月真係好破財, 唔只牙痛, 肉都好痛...

今晚雖然已整好牙, 但其實周圍的牙肉又被整到流過牙血, 有D 唔舒服,
而且而家的補牙物料只是短暫性的, 唔可以咬硬嘢,
所以呢都冇乜胃口, 豬肉粥 + 菜 + 五香肉丁好了~

吉士蛋糕 + 漁農嘉年華

又到每周一 cake 的時間, 前兩日買咗包吉士粉, 好正呀, 可以整好多甜品都得
今日就整咗個椰香吉士蛋糕,
夠鬆軟, 不過唔知點整D 蛋糕仔先唔會中間爆開呢??



今次波比先生都有份幫手整呀, 佢咪幫手落D 吉士去蛋糕漿中間囉,
今日一問先知原來波比先生都好鍾意食吉士餡, 佢落了好大 pat 添~
呢隻吉士粉幾好呀, 好香~ 呢個蛋糕好滿意~



下午波比先生去踢波, 我就一人去行旺角的漁農嘉年華,
去到花墟, 先知被老點, 個舉行地點根本就唔係花墟隔離個公園, 行咗好遠兜咗個大圈先到....

去到人山人海呀, 不過入到去, 覺得自己好似又去咗工展會咁,
因為又見到D 美亞賣鑊呀, 貴夫人賣攪拌機呀, 無啦啦又賣牛肉乾花生糖呀.... 都唔知有咩關係.......

有好多有機蔬菜賣, 不過因為未來兩日都唔會煮飯, 所以都冇買到,
唯一係見到有極品 D24 榴槤肉賣, 忍唔住買了一 pack 遲D 試試~
我想話, 屎都有得賣! 有攤檔賣 $20/包 「牛屎肥料」, 我覺得好得囉!



帶了 GF2 去, 影花的景深唔錯啊!



勁大條咸魚!



仲有今日第一次遊雀仔街, 好多可愛雀仔呀~



GF2 的 Touch screen focus 真係好好用~



今晚返到屋企, 食食吓嘢, 發生意外......... 我...... 咬斷咗一隻牙..........
好徬徨的 7:45pm 飛的出去想睇牙醫, 點知所有牙醫都收晒工,
撲嚟撲去, 行到成身汗都冇得睇, 好無奈............

而家 book 咗聽日下晝去睇, 本來約了好耐冇見的朋友食飯, 而家又冇得去了, 嗚............

努力練跑

仲有兩星期就比賽喇, 今個星期好懶, 因為天氣太凍夜晚真係唔想出去練,
唯有星期六日補返啦, 我唔想跑第尾返啊~

今日聽住 iPhone 的音樂, 原來係會跑得好D !
真o架, 有一個拍子去跟住慢慢跑, 唔會一下子跑得太快攪到冇晒氣, 幾好喎~
來回運動場 + 運動場跑了 8 個圈 = 7km 有多! 估唔到!



今晚同波比的一班舊同事打邊爐,
叫咗 25 碟食物, 真係好壯觀, 好似未試過打邊爐壯觀成咁!

呢個冬天真係太凍, 打咗好好好多次邊爐喇, 好肥呀.....



席間有兩個小朋友 + 兩個 BB, BB 好好玩呢~

出走成功

別人話: 機會, 係留俾有準備嘅人
我就話: 機票, 係留俾有假期嘅人
十月至到而家工作都好辛苦, 真係好想放個長假去旅行,
假期我係仲有, 不過 D out-patient booking 實在太太太滿了, 我有D booking 已 book 到四月份,
除咗 D 半年前已經 plan 好的假之外, 根本好難 ad hoc 咁在一兩個月內再安排請假......
見到淡季又好多機票 promotion 時, 得個睇字........... /_____\

今個月中有一日會放假抖一抖, 本來只是諗住 hea, 點知波比先生話見我放佢又要放,
之後, 嘻嘻, 忽然間諗諗好冇整個澳門一日遊?
Check 過不同船公司, 巨龍船務真係好好好抵, $128 來回, 不過回程最遲只係 5pm, 一日遊好似太短了~
最後訂了新渡輪, $264 來回都 ok 呀, 而且鍾意佢係喺中港碼頭上船, 我們搭西鐵過去只需 20 分鐘~
好嘢好嘢, 終於都滿足到老婆要離開香港的願望了!

在 Blog 的左邊加了個倒數器, 精神上激勵吓自己: 就快有得玩喇, 努力工作啦!

呢幾個月其實有好多大單嘢要做:
工作上要寫一份 Protocol,
讀書上要寫一份 paper,
仲有我過幾個月會去一個 Master Course 度講書要整 lecture notes 啊! 實在既驚且喜!
對著近百個醫護人員, 在醫學院內講書, 一定要做得好好睇睇呀! 所以都好有壓力的!

今日有一個病人送了一份小小心意俾我, 其實我喜歡心意卡就夠,
因為要專登就去買一張卡, 動筆寫上幾句鼓勵的說話, 其實已經最好最有心的禮物~

太開心之 Gathering

今日同朋友仔 gathering, 太開心了, 因為這一兩次 gathering 都太多開心事發生,

仲收到好多好多禮物, 有最貼心的禮物,
很多謝這班好朋友, 實在很開心的晚上~

芝士白汁

三個幾月冇見的 Pedi case, 呢幾日見返,
家長緊張的, 有媽媽請了三個月 no pay leave 去 train 個女, 個女進步神速, 媽媽真係好叻!!
家長唔緊張的, 問佢有冇做 training, 都係會答「冇乜呀/少少啦/呢排好忙呀/要做功課呀」
見到個 case, 同三個月前完全一樣, 一 D Progress 都冇.......
呢 D case , 我發現我三個月見佢一次, 同一個月見佢一次, 原來都唔會有咩分別,
寶貴的時間, 係咪應該留俾D 真正有需要, 屋企人又 supportive 的 case 呢?

*********************************************************************

因為老婆早幾日唔小心打爛咗個電飯煲蓋......
未配返之前, 豬家都冇飯開....... (其實有冇得配都好存疑)

今日為了清吓廚櫃的食物, 就煮咗芝士白汁吞拿魚肉丸螺絲粉,
第一次買了一大舊芝士返來, 自己一路煮一路刨呀刨,
雖然多功夫, 但味道一定勝過落芝士粉好多~

寒~~~

嘩, 呢幾日真係好好好凍........
雙手冇得插袋地行一段路回家, 已經凍到冇晒知覺..........

今日收到電話, 之前申請了 Training subsidy for Master course 批咗呀, 好嘢~
哈哈, 有五千大元, 可以過肥年呀~~ 不過..... 其實今個月要交稅囉..........

今日睇最後一個病人時, 見到我的 Master 同學護士,
佢請我食咗件佢親手整的芝士蛋糕啊, 好美味啊~ 收工都開心D~



今晚得一個人, 咁凍, 一心諗住買個熱辣辣的中式豆沙包食啦, 點知賣晒呀~ 好傷心~~
唯有買腸粉, 恨食咗好耐終於有機會買, yummy~