[小豬嘜] 我30 週大了! 第2次 QE 產科覆診

二月份過得很快, 每星期都係返吓工又放吓假就完了!
今天小豬嘜 30 週大了! 我還是很感恩過去的三十週平平安安的過去了~

小豬嘜而家愈來愈有力, 晚上躺平或坐定定時, 見到個肚波浪形咁郁郁吓, 好攪笑~
尋日下午去聽 seminar, 一路聽佢一路狂踢, 踢到我個人都彈彈吓 , 攪到坐隔離的同事都望望我咩事......
還有我會同小豬嘜玩遊戲, 而家摸摸肚子, 係摸得到哪裡是水, 哪裡是小豬嘜,
相隔一塊肚皮, 我摸摸她, 她就郁郁吓作回應, 生命是多麼的奇妙 :)

今日下午返了 QE 覆診, 我早了 15 分鐘到, 但最後還是等了個半鐘先有得睇........
見醫生的過程只有兩分鐘, 其實真係好花時間...........
如果唔係要喺政府醫院 KEEP 返個 RECORD 買個保險, 真係唔想嚟咁多.........

之後去了佳佳甜品吃了個合桃糊加湯圓, 好滿足~~



之後想行護協, 點知冇開!?
轉戰花園街, 終於買到加大碼的短睡褲了!
而家個肚大到大碼褲都著得好辛苦, 醫院制服已轉到 XL 碼,
近日非常之熱, 晚晚要開風扇先瞓到..........但屋企冇短褲啱著............
好難得喺花園街搵到咋, 因為好多時裝店都未轉賣夏天衫, 搵咗好耐都搵唔到..........

再行行新世紀的 BB 店, 睇睇 BB 車同床, 只差幾樣嘢未買咋, 差唔多都要買埋, 就可以安心待產了~

[愛住家菜] 路飛帽子飯

波比回港第二天, 公司很忙中午也只可以吃包, 老婆晚上就要煮好餸慰勞吓佢啦~

我們在日本去過 One Piece 餐廳, 見過路飛帽子造型的飯, 今天忽發奇想, 自己試試整~
參考過網上圖片後, 整蛋包飯應該會最容易~
於是先造好叉燒炒飯底, 放到碗中壓實再倒扣在碟上,
然後煎了一塊蛋皮鋪在上面, 按出帽子形狀, 再唧上帽子邊的茄汁即成~
哈哈, 還插了前年在沖繩買的 One Piece 小牙簽, 完成了!



另外還有麻辣粉絲豆腐蝦煲, 有菜仲有湯, 健康的一餐啊~
始終在日本旅行, 很少機會吃到蔬菜呢~

波比先生回來了!!

三日三夜之旅, 波比先生終於順利完成歸來了!
這幾天不停同佢 whatsapp 聯絡, 看見他大部分事情都順順利利, 又自己識照顧自己, 都好安慰

好幸運地, 我星期一返工見醫院唔多 case 要睇, 問老細可唔可以將我本來星期四放的大假改星期二放, 老細又俾喎!
Yeah, 我就揸車去機場接波比先生機了! 好興奮又緊張!
機場有幾個停車場, 研究完發現泊 P4 最好, 因為係有蓋的,
去到唔知泊幾多樓最方便呢? 最後泊咗地下, 然後先知二樓就係通去 T1 的, 泊二樓的話 lift 都唔洗搭~

回家總是坐自己的車舒服嘛, 有時搭的士, D 司機飛車飛得太勁, 又 dun 又會想嘔的......
同埋波比先生買咗好多嘢, 老婆幫吓佢手拎都好應該!

馬拉松開心的跑完了, 我其實都真係好想去陪佢o架, 不過東京真係唔敢啦~
這些年, 每年都去了一次海外的比賽,
今年年尾, 睇睇有冇機會去沖繩吧 :)



波比先生有成 25kg 寄倉行李咁返嚟, 大部分都係我指定要佢幫我買俾小豬嘜的東東,
要開心 share 吓, 因為真係好靚!!
西松屋真係會令父母破產的地方, D 口水肩幾可愛!!! 紗巾仔都好平呀!



嘩嘩, D 衫仔好鬼靚呀!!! 仲只係廿幾至四十幾蚊一件~



另外有D 和尚袍, 簡單的 pattern 就是在香港找不到~



同事話我聽, 原來 Uniqulo 都有BB 仔衫賣, 求奇又買了幾件~
小豬嘜半歲前的衫仔都買晒了!



這些是波比先生自己揀俾小豬嘜的



仲有必掃的 Chu Chu 奶樽, 平過香港好多!



另外波比先生都買咗好多手信俾老婆呀!
最服咗佢係買咗兩大包好貴的白神酵母, 我暈了 @.@!
仲有買了好抵的燜燒杯, 佢好辛苦先搶到最後一個, 仲要係我愛的粉紅色
把負離子梳都好好用, 仲有個好 cute 的車尾貼呀, 呢D 真係喺日本先買到~



行咗三日, 又跑完馬仔, 今晚買了靚牛扒, 同埋煲咗雞腳湯俾佢補一補!
落咗合掌瓜真係好甜呢 :)

年初三 - 摩天輪的簡單快樂

尋晚波比先生飛了, 今日老婆也有少少掛心, 所以都一早就醒咗同佢 whatsapp,
今天波比先生的一個人旅行都算預利, 仲買咗好多嘢俾小豬嘜添, 辛苦晒了!

中午 Him Him 來訪, 呢幾日都食得太多中式食物, 今日點都要整D 西式嘢,
呢次呢個 pizza 都係用麵包機的食譜去發, 加了香草, 好鬆軟啊!
三個人竟然食得晒咁大個, 哈哈~



好多謝 Him Him 同媽媽送了呢份咁可愛又實用的禮物俾小豬嘜啊!
這是她收到的第二份禮物呢 :)



家中的水仙, 開晒了, 成間屋都好香呀~~



今日搭港鐵半價, 點都要出吓去啦!!
咁啱我抽獎中咗張免費的摩天輪飛呀! 所以出了去坐摩天輪~
第一次搭港鐵, 有人讓座俾我, 真係好感動!

好好好耐冇去過中環碼頭一帶, 而家靚咗好多,
一出港鐵站已人頭湧湧, 因為好多人去 AIA 嘉年華呀, 聽日就完了~
好快就行到去摩天輪了, 好多人排隊呀......



排咗足足 45 分鐘先上到去



在摩天輪看嘉年華



看維港景 , 不過摩天輪的方向實在有點不三不四, 睇景影相都硬係差咁D.......
同埋D 玻璃好污糟囉, 開咗咁耐都唔知有冇抹過......



有 20 分鐘坐, 轉了四五個圈啊~ 不過如果要俾錢的話, $100 真係太貴了.........



新年時候, 嚟呢度感受一下歡樂的氣氛, 也實在不錯啊 :D

[愛住家菜] 第一次蒸蘿蔔糕

做一個中國人的太太, 新年整糕我覺得點都要學識~
講咗好多年了, 今年終於的起心肝去整~

今次用了大少奶的食譜, 加埋 Fissler 高速煲去整,
波比先生都有份刨蘿蔔絲o架, 我冇用蝦米, 反而落了冬菇粒, 感覺健康D,
整個過程原來不算難, 一個小時已攪掂了!!!

今次只整了一斤都唔夠的蘿蔔, 炒蘿蔔絲加粉漿時真係覺得好杰, 自行加了點水,
不過可能加得多咗 D D , 都擔心整出嚟會唔會太削

我冇買錫紙兜膠兜去整呀, 一嚟覺得唔環保,
二嚟D 蒸糕膠兜我成日覺得雖然佢話蒸得, 但有冇釋放有害物質真係冇人知!!
最後搵到個可甩底的蛋糕模整, 都好方便啊!
放涼後脫模



第二朝煎嚟食, 好彩都切到一件件!
自己整的, 真係超好味啊!! 出面的翠園美心都比唔上!
因為自己會用好多蘿蔔絲, 又冇味精, 真材實料又健康!!
下一年大家也要試試自己做啊 :)



波比先生今晚食過開年飯後, 就一個人往東京去了~
希望佢一切順順利利, 唔好撞板擺烏龍啦, 我已經幫佢 plan 晒行程了!

上一次佢一個人離開香港, 要想到 2007 年去上海出 trip 了~
當時未有智能電話, 未有 whatsapp Facebook, 現在太難想像當時我們是怎樣溝通的?
是 MSN 還是 email 呢?? 仲有用 web cam 囉~ 但都只可以返到酒店用電腦先得~

而家科技發達, 隨時上網一路 whatsapp 住, 拍片影相報告行蹤都得, 老婆也安心多了~

羊咩咩年初一

大年初一了! 要同各位讀者拜個年先 :)

祝大家喜氣洋洋，心想事成~
愛吃的人食極唔肥，
返工的人加多啲人工，
愛玩的人去多啲旅行,
愛跑步的, 就今年快過舊年, 
有小朋友的, 小朋友就快高長大, 學業進步,
最緊要係大家都身體健康, 心靈富足常樂, 事事感恩~

年初一, 又失眠了, 因為樓下的花市成晚都好嘈, 四點幾我就瞓唔返了.....
於是就索性落去花市行個圈, 睇吓會唔會買返盆花,
落到去, 好多花檔已人去檔空, 只剩四檔, 得兩檔有水仙,
但我好幸運啊! 搵到一盆唔錯的水仙, $50 咋!
帶佢返屋企時, 只係開咗五朵, 我淋水同放了一日, 嘩, 開多咗好多花呀!
而家成間屋好香, 希望真的好意頭, 花開富貴~



踏入羊咩咩年, 小豬嘜這個羊年寶寶每天也在努力的長大,
這個月肚子大了很多!! 開始會俾街上的途人認到係大肚婆, 那種感覺好攪笑~

今天大年初一, 小豬嘜更渾身是勁, 肚子左右一同被撐開,  哈, 知妳叻了!

一些 3rd trimester 的身體不適也有出現, 每晚都有胃酸倒流的情況, 腰骨也會痛,
不過我會慢慢適應的, 仲有不足十星期咋, 愈來愈緊張了!

[愛美食] Kitchen buffet @ W Hotel

今個月, W Hotel 做緊一個買一送一的 buffet 優惠 , 多得朋友報料, 波比先生 book 了年三十晚去食, 當作我們三的團年飯

去之後睇過亦聽過朋友的 comment, 其實都會話唔多好食,
所以都係冇乜 expectation 之下咁去~
第一 round 的凍海鮮, 果然係冇味的...... 同 Yamm 差太遠了.........



有個酸辣蟹湯反而不錯, 很啱大肚婆的口味 :P



我只可主攻熱食啦, 沙爹串燒是值得一讚的, 個沙爹汁好正!
左下的是鵝肝多士, 平時D 酒店都會大排長龍, 呢度多到擺晒喺度,
但正因為咁, 係凍的, 感覺冇咁好......
乳豬的皮又薄又脆, 真的很讚!



甜品了, 其實唔算多款, 沒有波比最後的芝士蛋糕, 嗰個混合甜品杯樣就靚, 但食落真係甜到喊..... 食完一啖就冇食了.....
麵包布丁同埋榛子蛋糕就還不錯!



有哈根大師雪糕, 同埋菠蘿, 蜜瓜, 都好甜好好食!



這餐除返每人 $350, 這個價錢我覺得還 ok , 但如果要我俾正價 $700 嚟食, 就真係喊三聲了.......
這價錢真係去 Yamm 好過啦............

Elements 的羊咩佈置, 好可愛呀~~

馬年收爐了

波比太太的廚房都收爐了~
這幾天波比先生話要食減碳餐, 去迎接星期日的東京馬拉松,
好吧, 就煮D 健康唔高碳的食物吧!

這晚用了在農田摘的新鮮梅菜去煲湯, 我咁大個女都係第一次見識到新觧的梅菜係咩樣, 好大棵o架~
加了紅蘿蔔、瘦肉、扁豆赤小豆去用 Fissler 壓力煲去煲, 半個幾鐘有得飲~
不過呢, 我真係覺得 Fissler 煲湯唔多好飲囉...........
佢只係用壓力令到D 材料林晒, 但D 味一啲都入唔到D 湯度, 成個湯似滾湯多D

第一晚飲唔晒, 我將湯放晒入真空煲 , 煲完再焗了一日,
嘩, 第二天才是超好飲, 成個湯好甜好甜呀!!! 這才是真正的老火湯呀~

另外煮了葡汁肉碎豆腐, 還有芥末蜜糖煎三文魚,
今次整個芥末蜜糖汁, 整到麥當當點麥樂雞個醬嘅味, 我超愛呀!
食譜係: 2茶匙芥末, 2 茶匙蜜糖, 1 茶匙日本柚子醋
哈~ 下次再整嚟點炸嘢先 :P

[愛住家菜] Fissler 高速煲 紅燒牛腩蘿蔔

是時候熟習多D 用個 Fissler 高速煲了!
今日用來炆牛腩, 是台式牛肉麵的食譜

先切好白蘿蔔、一個蕃茄、半個洋蔥、大蒜、薑片
牛腩汆水後放入煲內, 加入調味: 兩湯匙醬油、三湯匙豆辨醬、八角、甘草



用高速煲的二速, 加熱到綠色就炆 20 分鐘, 真係用好細好細火炆就已經 ok
話咁快就整好喇!! D 牛腩好林呀!! D 蘿蔔比尋晚更加入口即溶!



用來造牛腩麵真係好一流!! 仲有用農場蛋整的滷蛋啊! 開心的星期天晚餐呢~ :)

情人節摘菜去

今日係情人節, 約了阿姨一家食 lunch, 然後去了一個錦田的菜田度摘菜,
這裡不是那些很商業化的 xx 農莊, 只是一塊私人的菜田, 七十幾歲的公公婆婆自己種田為生,
係呀, 新界還會有這些地方的!
每天就把蔬菜收割拎去市集賣, 咁就一日~

有幸阿姨識得農夫婆婆, 今日才有幸到訪,
婆婆就是好客的叫我們鍾意食乜就摘乜, 大片的田野, 有好多唔同種的蔬菜,
貪心的我們樣樣都摘D, 共摘了十幾斤菜



D 菜真係好靚呀, 仲有白蘿蔔同埋蕃薯都係推介!
滿載而歸!



情人節晚餐, 一早決定了打邊爐, 有咁多新鮮蔬菜確係開心!



阿姨還俾咗D 農場雞蛋我哋~



開動了!! D 菜真係好嫩好鮮甜, 超好食呀!!! 兩個人食了一大籃還覺得不夠~
洗菜時還見到有小菜蟲, 哈哈, 就證明了冇(乜)農藥嘛!
白蘿蔔更是入口即溶, 有剩的打算過幾日整蘿蔔糕!



農場蛋又大隻, 又香蛋味, 沒有刻意去睇火但就成了這溏心效果, 好鬼正!!



我們的第十三個情人節快樂啊~

元朗鏸園 Happy Tea Time x 吉之島折上折

放假的第二天, 的起心肝去整理一下電視機後面的幾十條電線.......
之前真係亂得恐怖, 只見一大舊繞埋一齊的電線, 我逐條分返好, 縛返好, 再 Label 返個插頭,
而家超超超整齊了, 好有滿足感~



下午出外曬曬太陽, 元朗的年宵都開鑼了, 不過D 檔仲未開晒~
見到好多幼稚園小朋友嚟行花市, 好攪笑~




行行行, 去到水邊圍村對面, 一間叫鏸園的茶餐廳仔食 tea, 係元朗 facebook group 介紹的,
唔好睇佢個餐牌好似好污糟......



啲食物好得!!
$28 有三拼的下午茶餐, 去邊度搵??
塊吉豬賣點係超巨大, 大過塊面,
有我最愛的西多, 一咬落去, 入面仲係有花生醬的! 唔係嘛, 已經食慣了大家樂嗰D 冇餡西多, 一食呢個真係好滾動囉!
個沙律都唔係開罐什果的, 係有紅腰豆紅蘿蔔等等, 夠晒營養!
講埋個紅豆冰, D 豆煮得夠林, 又好足夠的花奶味, 唔似大家樂的水汪汪~



整個 tea set 簡直是冇得彈, 超推!



夜晚就去了食團年飯, 荃灣美心皇宮的杏汁白肺花膠湯真係好鬼正!!



之後行行荃灣的花市, 不過冇咩睇



之後來到今日的重要 shopping 點, 吉之島呢幾日做特價, BB 用品部8 折, 好抵呀!
我即時整張 Aeon 信用卡, 唔洗15 分鐘就出到卡了, 然後就去 shopping!!



呢排都搵緊D 哺乳衣, 喺日本網站 Nissen 見到D 唔錯嘅 , 但好多都冇貨
難得今晚買到一件, $119 減到 $48, 太抵了!



BB 衫仔就特價咗再有8 折, 三件和尚袍都是 $24 / 件,
大的夾衣就係 $40, 超抵~ 買得好開心啊~ :P