大阪之旅- 倒數兩天

wow wow, 仲有兩日就去大阪了, 很興奮~
不過十天的行程忽然間變了五天, 上山睇景之旅變了市區購物團呢.....

星期天就是馬拉松喇!!! 希望波比先生跑到好成績, 代表我哋豬欄成為第一隻跑完全馬的豬!
我就只可以跑 5-10km 啦, 但都會感受吓當然熱烈的馬拉松氣氛~ :)

星期初, 波比先生話要減碳, 這是個跑者的理論, 全馬前幾天, 先少吃碳水化合物, 餓一餓身體,
到比賽前的兩三日, 再大量吃碳水化合物, 讓身體大量吸收醣份, 作為 42.195km 的儲備~

於是老婆去了牛一買了些靚牛扒, 佢D 牛扒真係好得呀,
淨係煎已經香到暈, 落好少鹽就得, 吃到牛肉的濃厚肉味!
第二日帶飯, 因醫院用蒸爐, 蒸起時又係香到史啊~~~



另配香草磨菇煙三文魚意粉, 仲有蔬菜
點知有人食完都係唔夠飽, 要再偷食我的意粉......
減碳真的唔容易呀, 食慣飯的人, 唔食真係會好唔飽 XD

[愛甜點] 桑寄生蓮子蛋茶

星期天, 開始試試跑步, 慢跑了 6 公里, 出了一身汗又曬曬太陽, 感覺很健康!

下午有點時間, 第一次整桑寄生蓮子蛋茶
我第一次接觸這食物, 是大學年代在西環的源記, 那時候從來不知道桑寄生是什麼,
但這家老字號店就是整得很好吃, 清清的, 甘甘澀澀又甜甜的,
不便宜的價錢, 只有一小碗, 但就是縛得住很多老街坊的心

這次自己煲, 都幾麻煩, 唔似煲其他糖水咁掉晒D 材料落去煲兩個鐘咁
桑寄生是一些樹枝同樹葉碎, 煲好了要隔走桑寄生, 再放蛋同蓮子去煲,
另外我仲加了雪耳, 哈哈, 補中加潤咋諗住~

煲完呢, 唔知係咪太夠火喉, 顏色有點深而濁........
哈哈, 下次唔好煲咁耐喇~

[2014 北海道] 旭山動物園再探北極熊 x 山頭火拉麵

又帶波比先生來, 目的是見見佢的好朋友 Polar Bear, 好近呀, Hello!!!!!!!!!!!!!



原來年紀大的熊熊, 已有廿幾歲了!






好可愛呀~~~~~



頭岳岳



一隻不停的行來行去, 另一隻就懶洋洋的大覺瞓
行緊嗰隻好似好驚瞓緊嗰隻, 唔敢行埋去












好想摸吓佢白雪雪的毛啊!





再過多幾年, 希望我們又有機會返來探你哋啦, 要好好保重呀!



遊完動物園, 今晚住旭川的東橫 inn, wow, 我哋終於都出返市區喇 T.T (尋晚被困荒蕪的網走...)
Check in 後就出去行行商場, 然後去食山頭火拉麵!
上次來旭川吃了峰屋同另一家有名的, 今次點都要食埋山頭火先得!

我們點了一個辣味增, 一個鹽味拉麵, 兩個都好好食啊!!!
我好肯定咁講, 同香港的火頭火分店的味道完全是兩回事!!!



喺咁凍的天氣下, 吃一碗拉麵就是超滿足!!



拉麵未來時, 因有四人一組的客人來到, 店員問我們可不可以轉去吧枱, 我們當然沒問題啦
點知後來老闆忽然間送了一碗三文魚子飯俾我哋呀, 係感謝我哋肯調位,
嗯, 日本人就是那麼好~ 香港的茶餐廳未問完你同唔同意就幫你拎走枱面D 嘢咯~
吃拉麵配飯是日本人的習慣, 起初我們覺得很難明白, 後來又覺得這樣配其實可以好夾




其他遊記: 2014 北海道道東芝櫻之旅 - 總行程目錄

[愛烘焙] 足料自家 Pizza (Panasonic PM105 麵包機版)

想整 pizza 想了幾星期, 今日終於有心有力去整喇!
而家元朗千色廣場下面開咗間 Taste, 要買些特別的材料也容易了,
一早去完晨運就去買呀買~

今次還是第一次用P 仔麵包機去搓 pizza 麵糰,
依照跟機的 Pizza 食譜, 不過兩個人食用了 3/4 的份量就夠~

45分鐘就搓好麵糰, 我由佢發酵多半小時, 就取出造型,
這食譜的麵糰偏濕, 用棍幹麵糰會有點難度, 我只是用手拉, 拉拉吓都 OK!

之後是放材料, 外國有些食譜會教先鋪芝士, 咁就可以阻隔餡料的水份滲入麵糰, 唔會濕 det det
不過我還是喜歡把芝士烘到金黃, 所以都係最後先放

順序放: 一層茄汁, 粟米, 磨菇片, 車厘茄, 大蝦, 煙三文魚, parma ham, 千島醬, 芝士碎
190 度焗爐, 焗 17 分鐘就得~

熱辣辣, 香噴噴, 材料多到瀉的 Pizza 完成了!!!



自己整, 材料用最新鮮的, 落多多的, 滿是美味, 在餐廳就是找不到 :)
呢個麵包機食譜麵糰都好令人滿意啊, 鬆鬆軟軟夠飽肚



同場加映: 佢唔係蟲蟲呀!



係 kinder 繽紛樂河馬仔, 個樣好可愛, 好味但偏甜, 送俾小朋友應該好開心~

[愛住家菜] 芝士薯蓉焗大磨菇

每次見到大磨菇，總忍不住買回來，
芝士薯蓉粟米牛肉焗二十分鐘，就是很美味，
還留了一個，聽日返工同同事分享 :)



秋天到，很想飲吓暖笠笠的老火湯，
煲了花膠豬骨猴頭菇，清甜又潤啊

[愛美食] 滬江飯店

細我幾年的紅十字會朋友, 一個又一個的結婚了,
今晚約了出來派炸彈, 一班人一兩年先聚到一次, 但每次見到總是好好好開心,
看著他們, 大個仔了, 成家立室有D 仲已為兩子之父~

今晚的話題除了結婚已 shift 到去生仔湊仔, 仲有工作, 真係笑到爆

這晚吃飯的滬江飯店, 吃上海菜, 食物都很有水準,
以尖沙咀黃金地段計, 價錢又絕不貴喎! 可以再吃!

小籠包很皮薄多汁!!!



炒飯都咁靚, 松子桂花魚整得好好啊!

[愛住家菜] 包餃子

作為一個中國人妻子, 有 D 手藝我覺得要識吓先似樣 :P
包餃子就是很傳統又很有家的感覺的一種廚藝, 結婚咁多年, 都冇試過包餃子俾波比先生食,
有一天心血來潮, 買了一堆材料就起壇~

餡料我用了豬肉, 冬菇, 芽菜,
一邊包, 一邊教波比先生包, 哈哈哈, 佢包得好肉酸呀, 似隻小籠包多D 囉~
想學包餃子, 其實 Youtube 有很多教學片段可參考o架!



上排是佢包, 下排是我包, 一隻一隻, 很滿意



在鴻福堂買了個花膠湯, 餃子煮好之後就放在湯內, 美味的湯餃子完成了!!
不過你自己包過, 就會知道一定冇出面的咁好食,
因為出面的太多肥豬肉, 又太多味精了~



夏天就是想吃沙律清清地, 在吉豬島買了支柚子醋,
拌新鮮蔬果整的沙律吃, 是好好味呀!

2014 安怡 3km 長跑

秋天的跑季又來了, 今日陪波比先生去參加在科學園舉行的安怡長跑比賽,
跑友們都玩 3km, 所以波比都玩 3km 而不是 8km

一早去到, 見到人人都整裝待發, 好腳痕呀 >.<
過埋今個月, 我就可以慢跑返吓喇!!

今日有成四千人參賽, 算是好熱鬧!
8k 組之後就是波比的 3k 組, D 人好快!!



波比先生 11分幾跑完 3km, 其實都算好快,
不過第一名的真係好好好勁, 平時喺元朗運動場見佢衝圈都知佢好癲!



今日有安怡奶送, 好好呀!!!
我一向都有飲開安怡的, 年紀有返咁上下，真係要留意補吓鈣,
其實鈣質係好難吸收到的, 一路補定, 好過老咗骨質疏鬆, 骨折呀, 先嚟後悔啦,
喺醫院見D 婆仔, 一次骨折之後就行唔到, 七八十歲仲要動手術, 好慘o架........



今日有好多跑友都有獎攞, 實在為大家好開心!
幫朋友影埋頒獎禮先走, 曬咗成三個鐘變黑炭了........ (冇帶遮, 冇搽防曬好失策....)
好肚餓, 去到科學園的大家樂, 點知乜鬼都賣晒 T.T, 好想喊..............

飛車返元朗, 去了麗聲冰室, 愛死人了, 快靚正有嘢食!!
叫了個好懷舊的茄汁炸脾飯, 好味到簡直是人間極品, 感動到想喊 T.T!!!
我很愛元朗的小食店呢~

十二個年頭的黃子華 x Canon G7 X 下的 Lion Rock

尋晚終於都到我去睇黃子華了, 呢一年, 係近幾年最好睇的一年~
每次佢都係諷刺社會民生怪現象, 今年談到佔中, 句句到肉,
講到重點時, 他忍不住哽咽, 他的心意, 收到了~
他的才華, 令佢唔會因怕得罪咩人而唔敢有嗰句講嗰句, 這是我們十二年來一直看他的原因~

多謝佢令香港人開心的笑了兩個鐘 :)

我條頸好返九成了, 呢次之後, 真係怕怕, 得閒要做吓頸部伸展運動, 留意自己的坐姿,
仲有物理治療師都話, 唔好做咁多低頭族, 真係好傷頸的!

星期六, 難得老公唔洗練跑, 去了Lion Rock 食個lunch,
而家轉了, 不是午餐加 $15 任食甜品, 而是 $168 semi-buffet
沙律, 湯同甜品都是自助, 味道都好好



主菜有中有西, 羊夠嫩,
西冷扒配法包很 juice, 好好吃~



嘻, 今天開始的相, 是用了新相機Canon G7 X 影的,
部 Panasonic GF 2 陪了我好多年, 但總想買多部 all-round 點的,
等咗好耐好耐, 終於有一部符合晒我要求的了!!!! 簡直是 Dream DC!

佢有大光圈, 景深同夜景都好有用,
又有反 mon, 去旅行自拍一流!
有 Wifi 同 NFC, 影完可即刻過相落電話再 upload 上網, good!!
有 4.2 倍 zoom, 一般去旅行都夠用,
三百幾克重, 比起好多有反 mon的 DC 已算是輕!
最緊要有 touch screen 對焦, 用了咁多年, 冇了呢個 function 實在好唔慣, 之前睇過好多部都係冇 touch screen 呢~

用了幾次, 表現算好滿意, 除非是在黃光下, 否則白平衡同色準都唔錯,
期待帶住佢去旅行呢 :)

梗咗

半夜兩點幾又失眠, 其實唔舒服了幾日, 晚晚都瞓得唔好

話說星期六開始頸痛, 星期日愈來愈嚴重, 晚上開始頭完全轉不到, 吞口水也痛得要史......
星期一早上即刻 sick leave 去睇醫生 (需知道要我 sick leave 是難過登天的事, 波比先生常常俾我激死),
因為今次真係好嚴重!!!
其實我唔應該揸車, 因為我連轉頭望鏡都好有困難, 但唔揸車要我搭巴士我會更痛到入心入肺,
好彩最後來回都安全!

睇醫生後, 是類似瞓捩頸的情況, 只可以食止痛藥同熱敷

Sick leave 在家真係唔好玩, 星期一過得好辛苦又好漫長, 有得揀, 我寧願返工!
因為無論我行企坐瞓條頸都真係好痛, 仲痛到上個頭同耳仔, 郁一郁, 那種痛真係會令人想喊

因此我只吃到流質食物, 晚上又完全睡不到, 試過出廳挨住梳化瞓, 但都難以入睡

星期二, 痛到上頭真係頂唔順, 更擔心是其他的問題, 加上身體有點特別狀況, 如果吃不到東西會好大鑊, 於是去了急症室,
老老實實, 我唔會想去屯門醫院同博愛醫院,
於是搭的士返了我之前工作的大醫院, 覺得點都可靠點!

睇急症, 我呢D 當然唔算係緊急, 一等就是五小時 (雖然我也識得急症室的副顧問醫生, 但不是必要也不想買人情, 而且前面或者有更有需要的病人)
不過就我坐喺度所見, 真係好多人濫用急症服務, 行得走得講嘢不知幾好中氣的阿叔阿嬸就多的是,
聽佢講自己的病徵, 心諗其實去睇私家咪得囉, 有幾嚴重呀?!

睇醫生, 照 X ray 好彩不是頸椎問題, 之後即刻有物理治療睇, 見我的還是高級物理治療師 (嘩!)
物理治療師真係好掂!! 俾佢按完我條頸, 個頭即刻郁得返多咗, 又冇咁痛, 教了我返去做運動, 要自己好好做!
不過俾佢按完一陣, D 痛就開始出晒嚟 (好似去按摩完通常會痛兩日嗰種),
回家的車程上, 又是痛到我想史..............

回家瞓咗陣, 那種因按壓而成的怨痛消減了不少, 最困擾我的頭痛也好了一半, 太感恩了!!
不過吞嚥仍然很痛, 睡到半夜又忽然間痛醒了,
打完呢篇 blog, 希望瞓得返啦~
有工返, 其實又要好感恩呀~