林海峰 - 經典

近來聽到呢隻歌都覺得好開心, D 詞真係填得好正!

林海峰 - 經典 (<-- click)

今晚黑大家握手猛講祝福變得親善
不相識大小嘉賓讚她今晚靚得驚艷
一身金手厄頸鍊金牌掛面
金燒豬突然識飛天

一班班舊的街坊變身閃閃貴賓出現
手鬆鬆"丟"低一千嘆碗頂級翅撈伊麵
分開的親戚今晚竟然碰面
家家起萬年 拍照片

白婚紗西裝加愛神
吹一吹戀愛運
囍宴有法術能你的世界無地震
有一pair心上人
改寫千億萬人
令這個晚上人人大變身
花仔變大人

咪高峰墜手拎起佢肯嗡嗡你都感動
囍帖街係咁走音你都歡呼拍掌轟動
今晚黑乾一乾杯一場美夢
好姊妹突然挺挺胸

白婚紗西裝加愛神 吹一吹戀愛運
囍宴有法術能你的世界無地震
有一pair心上人 改寫千億萬人
在這個晚上劉華做嘉賓

甜到你震 唔使避孕
弟兄乾杯三生有幸
姨媽姑姐 部長親戚
大家歡呼等你濕吻

白婚紗真胸的女神
拋花拋俾姓鄧
主角最美麗嬴盡喝采你吻我又吻
說一生的誓盟 多麼經典動人

在這個晚上童話就誔生

唔襯到襯 登登登登


話時話, 交遊廣闊的波比先生又到了係咁去飲囍酒嘅月份,
每月平均三單, 我都叫定佢要儲錢做人情呀~

Sleeping and reading

已經吃了六日的藥, 只是慢慢的康復,
今日又竟然肚痛 + 肚痾, 噢.....
明天復工了, 希望不會因此而失聲.....
還好在有星期四的一天假來做個 buffer~

在家看看書, 藥力太強, 無時無刻都想睡, 所以連街都不願出,
原來 Neurology 是一門藝術, 雖然有好多好多名要背,
但當你明白了, 其實有好多好有趣好美麗的地方~

好多年冇試過坐低做考試卷了, (我的大學本科係冇乜試卷考試的)
一路溫習一路猶豫究竟要溫得幾深入? 究竟呢D 呢D 會唔會考嘅呢??
壓力.........

送一張花花相俾大家, 開心一點~

好深呀~~

呢幾日喺屋企埋頭睇書同打 book report,
發覺自己喺屋企真係好心散..... 讀唔夠兩段就上網攪 lee 攪路, 睇得好慢好冇效率....
睇嚟到考試時都係要困自己喺圖書館讀書先得!

好似好多日冇同過波比先生出街食, 食了日本餐, 不過病到真係冇乜胃口...



今日又返學了, 今堂好好好深...... 一下子真係消化唔到, 今晚一定要睇多次D notes 先好瞓~

元朗公園 Something more

在公園散步的時候, 聽到喵喵聲, 原來是一隻小貓咪,
牠見到了我, 望著我向著我不停的喵喵喵



噗一聲牠跳了去我前面, 繼續喵喵喵,
因為牠走得愈來愈近, 我又不清楚牠有沒有惡意, 還是速逃為妙~



還到了這裡



這是百鳥塔, 不過內裡比我想像中細好多....



要小心的行, 因為雀 S 隨時從天而降

用我的 18-55 鏡頭, 影雀仔是勉強了點, 不過 CORP 完都仲 OK ~






這些肥嘟嘟的雀仔好可愛 (我都是喜歡肥嘟嘟的東西)





離開了百鳥塔, 從半高處望望元朗這個地方~



望向另一邊, 攪不清邊座係原築邊座係翹翠峰



散步完畢, 下次再見!

病人都要鬆一鬆

Day 3 的 sick leave了, 是時候出去走走~

帶埋 SONY 仔去了元朗公園行行, 吸吸新鮮空氣, 出一身汗再返屋企洗白白, 舒服晒!

第一次到元朗公園 (因為同我家距離好遠), 原來嗰度有一大片草地
閒閒的一雙一對坐在草地上, 多寫意



又有好多小花子







好鍾意呢張的景深效果!





這些幾層樓高的大樹, 應該見證了元朗多年的變遷



有好多跑步、乘涼的老人家



下次帶埋波比先生來坐坐~

Good Friday Morning

又晨早六點幾醒咗, 看著日出天空漸漸變光變藍,
還有片片的浮雲,
This is a Good Morning~

咳到醒

唉..... 成廿幾年都冇試過瞓瞓吓咳到醒了,
半夜又要爬起身食藥, 冇覺好瞓.....

日頭都仲係間歇性咳咳咳, 如果出街肯定嚇親人!
(不過大家唔好誤會, 我唔係 H1N1, 不過因為兩種病一齊, 一定要休息否則好難好)

呢兩日開始有點涼意, 應該啦, 快中秋了~

久違了的藍天白雲啊, I love it!






一個人在家, 開收音機陪著有D 聲冇咁悶~
聽到任總的訪問, 學生問佢退休後有咩做有冇嘢想學,
佢答:「我諗我要學吓 hea , 因為真係做咁多年嘢都未 hea 過」
全場掌聲~

哈哈, 一樣或者全香港人都識嘅嘢, 原來佢唔識仲要去學, 真係奢侈得令人羨慕~

好多時工作辛苦總會呻兩句「快D 退休就好」,
但係又知道退休後的生活可能是多麼枯燥乏味,
辛勞的工作中偶爾放一天假是好事, 會令人期待及珍惜,
但退休後根本天天都是假期, 你就未必會以這假期為樂~

人總是矛盾的, 我看來也是永遠停不下來的一種人~

我不愛 sick leave

尋晚想通知我醫院的 i/c 我病了, 問問她我應否上班,
但找不著她, 留言了~

到午夜十二時多她才回覆, 波比先生竟然自行決定幫我聽電話, 汗!!!
這個最喜歡小事化大的傻佬, 一定把我的病情說得很嚴重吧??
而 i/c 則叫我放 sick leave 休息一下啦~

今日起身, 都是太擔心我病人的安排, 還是回醫院一趟~
波比先生常說「醫院沒了我不會倒閉, 返少一日工吧」
是的, 當然不會倒閉, 但是當有人 sick leave,
即是將應該負責的 inpatient workload 都加了在同事身上, 又要安排 outpatients 的改期,
而文員姐姐今個星期又放大假中, 早兩日同事們的工作已有點亂了,
不堪想像我一下了話要放三日 sick leave 會有多大的後果~

於是用了一個早上, 改走了我這三日的 outpatients,
交帶了今日 FEES 的安排, 整理一下自己的東西,
再用 i/c 的人情安排了我去 staff clinic 睇多次醫生~

今日的醫生開了五日藥俾我,
政府醫院一大特色, 就係D 藥好似唔洗錢咁, 一大包一大包的俾你~



最重要嗰隻藥, 一日要食5 次! 多年睇醫生經驗都未試過咁食藥法!
仲要食晒 5 日藥.......



好彩, 有波比先生買的甜品平衡一下~

咁大鑊...

呢一個月其實我已經不停睇醫生,
第一次係持續頭痛, 第二次係腸胃炎, 第三次係耳仔發炎,
今日第四次, 大鑊嘢......

想睇醫院的 staff clinic 要排到星期四先有得睇,
所以去了睇我睇開的私家醫生,
睇咗我的情況, 估唔到醫生會用D 我前兩日上 Master 先學完的 terms 嚟同我講病情.....
醫生:「有冇覺得成身好攰好眼瞓呀?」
我:「哈哈, 我日日都好攰好眼瞓o架啦, 返工點會唔攰.....」

多謝 $300 有7 種藥..... 護士姐姐都笑說:「嘩, 妳好多藥要食喎」
我:「好彩有D 都係需要時服o者」

醫生開咗三日假俾我先, 但我都唔知應唔應該放....
因為我仲行得走得, 但如果唔休息, 又可能會差得好嚴重
驚驚.....

09 曼谷遊- 酒店篇

今次準備曼谷之行都算順利,
呢兩日睇緊 book Centara Grand at Centralworld 定係 Grande Centre Point 好,
不過整體 comment 都係Grande Centre Point 好D,
見佢D 房又真係好大, 又有齊大雪櫃 (擺嘢食好重要)、微波爐、洗衣機 (連洗衣粉都供應埋),
真係帶兩件衫就住得!

搵 CNR Travel book 房, 服務好有效率, 好快就攪掂晒喇!

http://www.thailandfans.com/live20071017.html

冇叉電攝影@南生圍

今日放大假休息一天,
尋日同 Ernie 老師 MSN 開, 約佢今日去影相, 近近地選了我屋企隔離的南生圍~

可惜今日冇藍天白雲, 仲天陰陰攪到D 相好暗......
但又好鬼死熱, 熱到不停地流汗.....

搭了五蚊雞的街渡



一過河, 見到成班人拍嘢,
唔係龍友, 竟然係三色台拍緊電視劇, 見到唐詩詠要扮俾狗追,
成班工作人員喺度扮狗叫嚟令隻唐狗吠, 好攪笑!

我們差點成了劇集中的路人甲









行咗都未夠一百米, 我部相機就冇電了, 唔係嘛??? 簡直難以置信!
我明明記得呢粒電係叉滿咗o架喎!!!
我仲諗住「影嗰一陣, 一粒電一定夠啦」, 特登懶醒連後備電都唔帶, 點知......

嗰一刻, 真係有諗過好冇跑返屋企拎過粒電囉, 但最後都冇啦......

不停地閂機開機, 好勉強地影多幾張.....



咁就玩完喇.....

影咗個幾鐘, 我哋走時不停行雷, 好彩走得快咋, 走慢少少都俾場雷雨 dup 濕晒呀~~

之後我哋去新元中食咗個 tea, 好開心的傾吓偈!
Ernie 老師就嚟去澳洲 working holiday 了, 羨慕史~

閒日放假真係好舒服, 出街冇人, 唔洗去到邊都迫餐史,
嗰種悠閒的感覺, 先真正係放假~

唔去都對唔住自己

已經係九月中, 思前想後, 十一月究竟去唔去旅行??

近日睇緊曼谷的機票, 忽然間發現 (+ 同個下星期會去 Bangkok 的 friend 講開) CX 做緊 promotion!!!
$990 可以坐 CX 兼且早機去晚機返, 我係咪發緊夢呀???

好想星期日去, 但係已經 full 晒,
唯有星期一飛啦, 不過去唔到翟度翟有D 失望.......

想去 4 日, 點知波比先生話係就去夠 5 日抵D 喎!
驚好快冇晒機位, 同波比先生商量咗一陣就扑搥了!!!



嘩哈哈哈, 豬氏家庭話唔飛又飛喇~~~
水門雞飯、冬蔭公、大頭蝦、豬手飯..... 等我哋呀!!!

學以致用

而家讀的 Master 呢, 雖然只係讀咗兩堂, 但加埋平時自己睇吓書, 原來對工作都好有用,
因為醫院係分好多科, 當去到腫瘤科、骨科、外科的病房, 嗰度的醫生都未必好熟 neurology 嘢,
有時有D neurological sign 佢哋或者會 miss 咗~

今日我就見咗個 cancer patient, 用了點近期學的知識,
可以 suggest 返個醫生要做D neurological exam,
增進了自己的知識後, 可以有 better patient management 的~

今個 weekend 都要全日上 course, 再加星期六晚的 Master........ 史得.......
不過查實上完個 Advanced FEES 後, 我檔嘢做多幾個月就會交俾個同事喇!
終於都唔洗星期三做到冇飯食喇!

不過取而代之的, 就係去做 VFSS 了!

毅力可嘉

今個月開始, 又有一批新的 Year 5 Medical Student 到醫院實習,
其中一個, 竟然是一位坐輪椅的女同學,
四個字浮現在心頭:「毅力可嘉」

讀醫科當然要成績好先入到, 但係入到去嗰五年, 都係非比尋常的學習生涯,
實習時要輪班, 要 on call, 俾 MO 鬧, 俾護士無禮對待....... 絕對唔容易捱~

一個坐輪椅的醫科生, 相信背後有一個勵志的故事,
但她的路應該比一般人更難行,
當一個無知的病人, 見到替自己診症的醫生也是坐在輪椅上, 一定對醫生的能力有所懷疑,
有很多人不明白, 肢體的傷殘並不代表她思想能力有問題,
她應該比很多人更聰明又勤力才可以走到今日這一步,
但將來應該有很多挑戰, 希望她會好好走下去~

呢排見波比先生都幾乖, 今晚煮蒜蓉粉絲貴妃蚌俾佢食啦~
街市海鮮檔的海鮮質素都好好啊! 買咗幾次都好新鮮, 好好味呀~



嘻嘻, 偷拍成功, 跑步中的波比先生!



如果你會在這球場跑步跑多五十年,
我也會跟在你後面踩單車踩多五十年~

放工後不談公事

工作上, 有好多勞氣的事, 都係圍繞住同一個人,
不過同 Ashley 傾開, 發現點解自己返到屋企, 都要諗住煩人的工作事呢?
每日6:30am 至到 7:30 pm 都係為返工而付出的時間, 13 小時還不夠嗎?
煮飯食飯洗碗後, 其實每一日我只有 2 小時的私人時間,
還用來想工作事, 太愚蠢了嗎?
況且我想想想, 人都係唔會變的, 我深信我改不了那懶到 hea 到出汁嘅人,
結論是, 放工後的時間, 放開一點, 我應該會活得開心一點~

不要做個放工還想公事的傻人~ blog 內都唔想再用嚟記D 工作煩事~

我的學業嘛, 呢排 tune 返自己去學習 mode,
有日忽然間搵到中學的成績表, 會問自己點解當年唔再努力D 考多幾個 A,
一個 Master course 相信我一生人只會讀一次,
所以我要好好努力去讀啊~
我唔想到好多年後, 又後悔點解自己唔再努力多D 考好D~


SONY 真係好得, 咁都俾佢諗到

半天工作

今早起身後, 好乖地睇參考書同打 book report 俾老細,
朝早做嘢真係有效率過夜晚做好多!

落波後返工, 感恩, 雖然好迫但總算唔太辛苦就返到醫院~

雖然日日喺醫院走嚟走去, 今日, 第二次見到.......... 心靈很震撼.........
生命, 究竟是什麼?

放工大塞車, 冇煮飯了, 去咗食八方雲集, 有波比先生最愛的蚵仔麵線



皮薄餡靚的棒棒鍋貼



又唔酸又唔辣的酸辣麵......

八號早晨

尋晚食完藥, 九點幾就瞓, 瞓到今朝五點幾,
睇天氣, 仲係八號但都瞓唔著了, 起身吧~
橫掂 10AM 都話應該會改掛 3 號, 又要迫返工.......

只希望返工唔會迫餐死啦!

幸運的八號波

尋晚睇完黃子華, 都覺得身體有D 唔妥,
今日一起身, 發燒、流鼻水、鼻塞, 大鑊嘢.......
但我 12pm 有個住大陸的 case, 好難通知到佢唔好嚟, 於是都係返工吧........

點知, 12pm 嗰個 case 喺 11:40am 先通知我佢嚟唔到, 真係啞咗......
不過下晝都由 2pm to 5:30pm 都有 outpatients, 算啦, 都係唔敢請病假

好彩, 5pm 的case 話今日唔嚟, 我先可以5:35pm 走到, (sorry 醫院係冇得4pm 就走, 總之要睇晒你D outpatients 先可以走得)
好好彩搭到村巴, 好順利地返到元朗!
還記得上年打風, 話放早點知等車等到 成 6:45pm 先有, 橫風橫雨真係好慘.......

好開心, 7點幾就可以同波比先生食飯, 好似好耐都未試過咁早一齊食飯了~

第四次的黃子華

黃子華又開 show 了, 佢D 飛一向都係好難買~
沒有優先預訂的信用卡, 波比先生喺公開發售的第一天 lunch hour 偷偷地去排隊買飛,
攪到 lunch 都冇時間食~

點知..... 返到屋企諗住俾呢個神秘驚喜老婆,
老婆竟然潑佢冷水: 「唔係嘛, 二百幾蚊但係坐最山頂嗰行? 仲要係 weekday, 點睇呀?」
雖然老婆都知道係波比先生一番苦心去買的, 但真係好唔想坐山頂位,
不過, 買咗就算啦~

點知又過多一兩星期, 波比先生又喜孜孜地放工回家,
今次遞上的, 係另一場前返好多的座位,
唉, 似乎因為上次老婆不屑的說話, 令波比先生耿耿於懷.... 所以立心要去買過D 飛.....
真係好對唔住啊~ 其實有得同你一齊去睇, 我都好開心的了~

等咗咁耐, 今日出發喇!



嘩, 幾 full!! 在場仲見到一個波比舊同事~

今次係我哋第四次一齊去睇黃子華了~
不過又老實說, 如網友仔所言, 冇前幾次咁好睇.....
以前的都會講好多時事政治民生問題, 今次好似好冇主題,
求其講咗D 嘢就係, 但不得不承認, 笑位同拍爛手掌位係有的~ 但冇以前咁多呢~
以前睇, 真係會笑到肚痛好辛苦o架~~



Anyway, 好多謝波比先生, 陪伴著我一齊睇唔同的 performance~

第二課

期待了一星期, 終於都到今日係第二課,
返學前同波比先生去 pick up 用學生身份買的 notebook, 平咗成五千蚊!
買完新電話又有新 notebook, 呢個波比先生真 happy!

返學前, 有時間去食咗個 tea, 有最愛的紅豆冰, 非常開心~



第二堂由 clinical psychologist 主講,
可能因為讀 bachelor 時都有讀過唔少 cognitive neuropsychology, 所以內容都唔算好深~

早放咗半個鐘, 大家都好開心,
不過都唔明點解有D 同學放咗學都咁多嘢問 lecturer? 明明佢所有嘢都講得好清楚喎~
D 人死都唔肯走...... 攪到我呢個要負責執嘢的班長要留堂囉.....

趕返元朗, 仲有時間同屋企人食晚飯, good~

Relax Relax....

唉, 係咪人老了? 定係工作太攰??
夜晚想睇吓D 學術書籍, 每一晚都係睇唔夠兩頁就好眼瞓, 飲埋咖啡都冇用.....
史啦, 第時考試點算?

返學又開始有壓力嗎? 幾日都 5am 就訓唔到, 發埋晒D 返學返工嘅夢.....
以前讀中學時都係咁o架,
唯有早D 起身, 努力讀書啦~

愛惜自己

好朋友的男朋友係 chronic smoker, 我都叫過好朋友勸勸男朋友唔好食煙,
但好朋友話:「佢實話冇食煙都會有肺癌啦」
但其實食煙除咗增加肺癌機會, 仲會引致好多其他疾病

好似 COAD (慢性阻塞性肺病), 當我見住D 老人家, 終日要陀住部氧氣機吊住氧氣喉嚟生活,
係去邊都要帶住部機, 真係苦不堪言

仲有肺氣腫、肺積水、慢性支氣管炎.... 好多都係同食煙有關~ 個個病人都係抖氣好辛苦....
點解要不停吸D 塵入去個肺度塞住佢呢???

今日就係見到個 patient, 佢過幾日要做全咽喉食道切除手術,
幾日後就成個喉嚨冇咗永遠再用唔到自己的聲音說話,
問佢的病歷, 就係食咗 50 年煙, 每日食成50 支 , 係呀, 我冇打錯, 係50 支!
仲有飲酒, 飲咗 45 年.......
早知今日, 又何必當初呢?

你想點過?

我讀的 Master course 上一屆同學話係冇 textbook, 淨係溫 handout 就夠,
不過當然咁只係可以 pass 啦, 因為要攞高分係要識答埋D 課外嘢先得!

上完第一堂, 好多人都追問 Prof. 有冇 reference book 介紹,
佢開頭都話冇 , 但可能太多勤力同學問, 所以佢今日忽然間又出咗個 e-mail recommend 咗一本書~
上晒兩間大學的 library website 睇, 全部都俾人借晒......
好彩可以 hold, 不過兩間都係要去 Medical Library pick up~

波比先生叫我買, 我話: 吓, 呢本書係一科咋喎? 唔係成個課程喎, 科科都買好唔掂喎
佢: 嘻, 我讀 Master 時係一科買一本o架喎
我: 車, 讀完咪而家放晒喺我頭上面個書架唔知做乜咁囉 (你讀完之後邊會拎返出嚟睇?)

健康生活

為咗唔想第時老咗中風、高血壓、糖尿病、心臟病,
由後生開始, 係時候做吓運動了~

波比先生真係好好恆心, 差不多每日落去球場跑十個圈,
至今比兩年前瘦咗成 30 磅!

我買咗單車後, 都落咗去三次踩了,
佢跑十個圈, 我就踩十個圈,
嘩, 真係我都踩到冇力, 佢都仲有氣跑......
從後望著波比先生的身形, o依, 真係 fit 咗好多咁喎~

踩單車真係幾舒服的, 有風不停吹埋嚟, 又唔會好索氣~
希望我繼續有恆心踩落去~

太平山頂 x A330 大測試

食完個 Brunch, 同波比先生上了太平山頂~

風景篇



有 GOD 的佈景板, 好有香港色彩



行山了



真係好 sharp



D 景深效果好好了!





冇 tele lens 打雀, 不過影到貓貓



還有「草蜢」





熱溶了的天氣.... 即刻去麥當當飲杯嘢先!



Bye~~ See you next time~



有人樣的相片在 facebook, 嘩, 總之真係好 sharp, 用 DC 點都唔會影到咁 sharp 的人像照~
升級了去呢部機, 覺得物有所值!