繼續努力

今日開始了睇一本 Auditory-verbal Therapy 的書, 重溫了好多 Audiology 的東西,
愈來愈多 CI/ ABI 的小朋友, 自己都要再識多D 先得呀~

在茶餐廳的凍檸茶, 是努力後的好好獎勵~

港台節目

近來叫波比先生幫我錄起每日 7pm 的港台電視節目, 留返我放假時慢慢睇,
港台的節目, 真的很有水準, 最愛頭條新聞諷刺時弊的手法, 生鬼抵死有趣,
其他探討社會問題的節目, 令我呢個不愛理時事的人, 對社會都多一點認識,
看看社會上不同的人有著不同的生活問題, 反觀自己, 已經算是好幸福, 要多珍惜~

財爺話派糖, 綜緩出雙糧, 有人質疑做法係咪有問題, 因為佢哋根本唔係受影響減薪被裁員一群,
個人覺得, 如果D 錢係俾D 老人家, 傷殘, 患病, 單親家庭人士去稍稍改善佢哋的生活, 是可接受的,
但如果話要我交五位數字的稅, 之後又將這五位數字的錢奉送俾嗰D 生三個細路又游手好閒唔做嘢的父母, 我就真是心有不甘,
拎到D 錢, 佢哋又會用嚟搭飛機去旅行同配 Gucci 眼鏡嗎?

財爺左計右計, 先話最多每人退稅 $8000, 我們交的稅都是我們每天辛苦工作得來的一部分~
但領緊萬幾蚊綜緩的家庭, 咩都唔洗做就出雙糧, 財爺的政策真令人有點摸不著頭腦......
或者要覺得我哋呢D 要自己供樓供養父母又供自己讀書的人, 很可悲......

港台節目重溫

好多日未見過咁藍的天空了!



今日去了荃灣廣場, 試咗一間叫「滇家菜」的菜館, 食物好有水準啊!


最開心係有我最愛的高力豆沙, 整得好好味呢!

Reading Day

今日終於都睇晒一本書了, 可喜可賀, 食返粒 Dark chocolate 獎勵吓自己!



讀書過程都有D 唔專心, 因為去咗 Download iPod Touch 的 application,
嘩, 真係好多好得意的 application 呀! 不過好多都要上咗網先用到~

Download 咗個好有用的 Medical abbreviation dictionary,
最攪笑的係我搵到個俾 Aphasic patient 用的 AAC software, 有好多 social phrases,
一按就會有英文讀出句句子!!!



仲有 3D 版面, 一按就係有個真人的嘴讀出句句子, 好得呀!!!
千幾蚊買部 iPod touch, 仲平過買部所謂的 Portable AAC 喎, 哈!



今日又去咗行書店, 買咗 4 本好好的教材圖書, 好滿足的一日~

努力的小禮物

多謝波比老公的神秘禮物 - iPod touch!!!!



話說前日返完 HKU lib , download 咗好多 journal 睇,
又唔想 print 晒出嚟咁嘥紙, 就研究用電話去睇~
我部 P1i 其實係睇到 pdf 的, 但 resolution 好低, 睇得好辛苦.......

估唔到波比先生今日放工, 偷偷地去買咗部 iPod touch 返嚟俾我,
嘩, 個 mon 真係好靚呀~~ 唔怪之得 iPhone 令咁多人著迷啦~!
第一時間幫我裝埋個 pdf reader, 睇到喇睇到喇, 好清呀!!!

波比先生叫我:「咁妳努力讀書喇」
未來兩年讀書書, 我會更加努力的!!
這個情景, 就像 Year 4 的時候, 波比先生送我一支高科技錄音筆 (那個年代普遍還用 MD 機),
又叫我好好努力, 我用錄音筆去幫助我完成了很多 clinical report 和 case study,
最後還不負所望掛~ :p



多謝老公 ^3^

黃雨星期日

嘩, 黐線o架, 今朝大雨到吖........
於是今日乖乖喺屋企睇書, 就嚟睇晒一本書喇, 又係寫 book report 嘅時候~
其實同人做 supervision 都好的, 會 push 到自己去睇多D 書, 去鞏固返自己嘅知識~

中午食咗奶奶買俾我哋嘅美心粽, 好大隻, 好多材料, 我覺得都好 ok 喎!



下午雨細了, 一齊去咗旺角剪頭髮, 我又剪返個冬菇頭喇, 哈哈哈!
今日的旺角街頭咁少人嘅? 因為大雨? 因為 H1N1 Flu?
Anyway 行得舒服好多~

甜品大決戰

早兩日打冷之後, 忽然發現荃灣那間小樽甜品屋竟然開到元朗來, 要與元朗各大甜品店拼個生死!

元朗歷史悠久的已有 B 仔涼粉、泛后甜品、甜心鮮果園, 較新的有石磨坊和綿綿冰,
而呢間小樽甜品賣的又與以上有些不同, 例如有椰皇焗鮮奶、白涼粉、新口味湯圓等等,
之前睇過荃灣嗰間的食評, 都係話一般, 今日都係貪新鮮一試無妨的心態, 買咗個目黑甜品試試

目= 黑珍珠, 係我好喜愛的甜品,
黑 = 涼粉條
味道嘛, 都係一般啦, D 鮮什果一D 都唔新鮮, 又唔係特別好食囉, 同佢影出嚟張相好大分別囉,
係D 黑珍珠搭救咋~



間舖頭就係喺綿綿冰對面, 都係B 仔涼粉、泛后甜品嗰頭, 或者都會有人貪新鮮去試吓,
但再幫襯的話, 都係要諗諗先~

鄉里出城日

愈來愈多的 CI cases, 真係要借多幾本書睇吓先得!
於是今日兩隻新界豬出城, 去香港島逛逛!

先係去咗 CWB 的「一生任食創作和食」度食 lunch buffet, 嘩, 12PM 去到已經好多人!!!
$138 + 10% 的價錢有咩食? 即刻去片!

先嚟兩支好少飲到的玻璃瓶裝汽水先, cool~



食物主要分三類, 有好多唔同的刺身供應, 三文魚、吞拿魚同魷魚都好新鮮, 推介!
(蝦反而唔多新鮮啊)
Total order 了三次, 乜都回本!



第二類係燒物, 有個小小的爐仔俾你自己慢慢燒, 個爐又幾好火啊!
呢個係人人食過都話要 encore 的生熟蝦 + 帶子, 個蝦真係超好食, 好爽口!
第二樣係牛肩, 好失望, 切得太厚又咬唔開!
好彩第三樣牛舌好好食, 補返數o者! total 叫咗成4 次!
其實仲有羊同雞, 但太飽冇 order 到喇~





第三類係熱食, 炸豬扒炸蠔都好正! (忽然好掛住日本的和幸炸豬扒)
炸八爪魚鬆都係超讚, 不過油咗D~
生薑豬頸肉同埋炸雞都整得好好味, 不過太飽肚了.....


最後的輕食樣樣試少少, 普遍都唔錯!


今餐真係好盡興, 好開心呀~~

食飽飽去行 Ikea, 買咗 set Finger Puppet,
又買咗個可以張開口的大 puppet, 有脷又有牙, 好啱用!


跟住返咗大學的 library 睇 journal 睇書啦, 見到好多應該係 Year 4的學生,
喺 study room 度埋頭苦幹, 應該係準備緊 Viva (我們的畢業臨床考試), 一片好緊張的氣氛啊!

咁啱借咗的一本書, 有一篇 article 係我老細同 i/c 同隔離 Rearch team 阿頭一齊寫的, 好勁啊!

整日都滂沱大雨, 多時間對腳都係濕的, 好慘.....
聽日我決定唔出街喇!

打冷

Happy Friday Night, 相約波比先生去打冷, 嘩, 真係元朗美食多籮籮,
今次又發現咗一間好正的打冷舖, 原來打冷的瀨尿蝦別有一番風味!
豬紅同鹵水拼盤的味道都好出色呢~

Food Republic

可憐波比先生喺尖咀等我食飯等到成 8:30pm, 終於試了 Food Republic,
三巡海南雞同日式咖哩飯都好正啊!

新返工鞋

太遲走了, 幸得波比先生嚟搵我, 吃了日式晚餐, 感覺好一點~

一週雜記

波比先生有一日話:「好似妳個同事走咗之後, 妳做得開心咗喎」
well, 佢走唔走其實對我冇乜直接關係, 不過或者係大圍環境改變了好多, 是是非非少了好多,
工作雖忙但係穩定了不少, 同一班我呢層的年青同事相處得較開心, 互相學習又可以傾吓無聊事,
令到返工的壓力都冇以前咁大了~

早幾會開會, 異常地有效率, 無可否認新 i/c 的確係好有 leadership 同做事好有條理~
當日我做了一個 presentation, 嘩, 老細問的問題真係好尖銳, 佢真係一個好有 research mind 嘅人, 如果佢會 lead 吓我哋做 research, 相信成個 cluster 的發展一定會唔錯!

持續地腰痛, 又間歇性地頭痛, 呀, 今年都係多病痛呀.....

今日出街, 嘩, chi sin o架, 成三十幾度咁熱, 人都快溶了......
如果呢個地球再不停暖化, 真不敢想像我們的將來會變成怎樣?

每月例牌活動

今日節目豐富, 先係約咗波比的中學同學食 lunch, 參觀其中一人的豪宅新居,
講起樓呢, 呢排有考慮過一個幾近我返工的地區, 我搭幾個站車就返到工,
而波比先生返工都可以方便, 搭一個站車就得了!
但睇嚟睇去, 嗰區要交通方便的, 全是二三十年的屋苑兼且面積略細,
較新的屋苑都要搭 shuttle 來往主要交通網絡, 所以, 都係再諗吓先.....

下一站係肥仔家, 唔知由幾時開始, 上肥仔屋企打牌成了我們的每月例牌活動,
今日仲有新成員加入, 但明明其他三家都冇人做筒子, 佢打隻筒子都要諗好耐好耐.....
每一次都係咁, 無法不令我們 O 咀.....
所以平時 6hr 可以打到 12 圈, 今日要 10hr 先打得完........

夜晚為了睇 MU 比賽, 叫了三大外賣: KFC + 元祿 + Pizza Hut, 哈, 熱氣史了!

遲來的成績表

由上年讀到今年的 course, 二月算係完晒, 但遲遲都未收到張 cert.,
尋晚先啱啱 send e-mail 去催佢問點解仲未收到? 點知今日一打開信箱就見到張 cert. 了!

嘩, 一定要多謝吓好戰友 Cora 同阿靜一齊的 teamwork,
估唔到我哋攞 A Grade 呀! (可能呢個時候 Cora 姐不屑的一句:「車, 我攞慣o架啦」)







數一數手指, 原來我只係有多三個半月的自由星期六,
好多人都叫我好好享受埋呢幾個月的日子,
之後逢星期六都要返學, 冇而家咁 Happy 了~

今個星期呀, 忙工作忙開會忙做個家庭煮婦,
連續幾日同波比先生一齊煲最新一輯 Heroes, 好好睇啊~

薯條大會

哈哈, 今日共有 7 個人一齊叫麥當當外賣, 5 包薯條的確好壯觀!
不過D 薯條同麥樂雞林晒....... 唔多好食囉.......
但點都好過樓下 canteen 嘅食物嘅~



今日見咗個 Pedi Voice case, 用咗早幾日上堂學的 Treatment approach,
呀, 又真係幾好喎~ 雖然當中有好多嘢都好抽象, 但佢嘅 analogy 又的確幫到小朋友明白多D skill~

我條腰呀, 尋晚叫波比先生幫我搽吓安美露時, 發現原來瘀咗一撻!
嘩, 真係莫名其妙???? 後面點可以整得瘀????
Anyway 今日都好D, 起碼都跑得到了, 但都仲有D 痛, 但知道唔係大鑊嘢都冇咁驚!

唉, 我有一個朋友, 佢有個 BB,
雖然出世唔係好耐, 但一睇就知佢有 Strabismus (斜視),
而且從相片中 BB 的表情同反應, 覺得..... 佢好似我哋見開的 CP 仔嗰種 style......
每次見到 BB 的相片, 都令我有一種莫明的憂慮,
因為真係一睇就好覺, 但我諗爸爸媽媽都唔會 aware 到那些徵狀....
Well..... 希望 BB 大D, 快D 去做吓各方面的 screening test 啦~

Low back pain???

今日返工, 喺病房睇第一個 case, 一彎低身想跪喺度攪床, 就忽然間覺得條腰有D 痛,
如是者睇咗第二第三第四個 case, 一彎腰都係咁.....
到放工嘅時候, 要趕車所以要跑, 點知一起步條腰就痛得史史吓, 每跑一步就痛一下, 完全跑唔到...

Ayia...... Low back pain???? 自我觀察多幾日, 如果唔掂就真係要睇醫生呀.......

聽日約咗同事一齊叫 McDonald 外賣做 lunch, 哈哈, 真高興~
所以今晚唔煮飯喇, 煮咗「肥牛什丸日本烏冬配魚湯湯底」, 好正啊!
都係要去 Citysuper 買的日本烏冬先夠好味~

喺電話度搵到張前一次去肥仔屋企打牌的相,
我食咗有生以來第一舖的十三么呀, 不過當日係血流成河地離開呀.....

母親節快樂

三日的課程終於都完結了, 今日講 Pedi Therapy 的部分, 有點 lost.....
係就係好 funny, 但真係唔知佢 target 緊咩 goal????
佢同之前上的兩個 Dysphagia Therapy courses 一樣, 開頭拋出一大堆理論,
用 anatomy/ physiology/ psychology 嚟大你, 但講到 therapy 時, 往往唔知點 relate 返去佢的 theory 度.....

不過無可否認, 我都好欣賞佢點樣包裝對小朋友說的 instruction,
令小朋友不覺得是做 therapy 而更加投入地參與~ 我返去都會同我的小朋友試試的!

上完堂去行 Toysrus, 嘩, 好耐都唔敢去喇, 因為入親去都破財囉....
今日又見到好多以前有醫院冇的玩具想買呀, 微波爐, Naughty Dogs, Save the Penguin, Piggy Bank, Thomas 積木火車等等等等......
返去問吓 i/c 俾唔俾錢我買先得! 因為我私伙真係已經買得太多了, 好窮喇....

今日是 Mother's Day 啊~ 同奶奶慶祝食晚飯, 送咗個新電話俾奶奶,
點知波比成家都話老爺小氣, 奶奶有禮物佢冇所以黑面....... 真係好攪笑......
下個月咪有父親節囉, 不過波比先生就話要煩買咩俾佢咯~

Happy Shopping Day

Day 2 上堂, 真係估唔到有真人 patient 示範!
不過 speaker 好似講得太多題外話, 佢的 Tx approach 又係咪人人都受呢?
係一種好靠 "Feeling" 的治療方法,
冇乜 instruction 又完全冇詳細的 increasing step/ descreasing step, 仲要唔洗俾 feedback,
同我們傳統做開的實在太不同了~ 我只覺得係領悟力好高的 patient 先可以 master 到呢個 technique!

放學去咗旺角行街, 去食好耐冇去過的翠苑, 係一間賣越南食物的小店,
牛油雞翼同香茅豬扒都好正o架!




之後去買母親節禮物俾波比媽媽,
自己又去咗 Bossini 買衫, 嘩, 二百幾蚊可以全數用我 HSBC 卡的積分扣呀,
好抵呀, 好似忽然間有禮物收咁, 嘻嘻~

變阿婆

我相信我身體有著超強勁的感光細胞, 無論洗唔洗返工的日子,
只要身體感覺到太陽伯伯出來了, 我就會鬧鐘都冇咁準時地 6:30am 自動起身! 想瞓都瞓唔返嗰種....

因為近來入夏, 太陽伯伯早起了, 害得我都早起了......
每天變成 6am 自動醒, 更試過五點幾就醒咗眼光光...... 拉唔拉窗簾效果無異.......

尋晚踏出了第一步, 同波比先生一齊去樓下跑步, 跑+ 行共五個圈! 以為會好瞓D 啦~
點知今朝都係 6am 就醒了, 好不容易才迫自己瞓返到 7am 先起身,
雖然都係瞓吓醒吓, 總好過眼光光兩個鐘先出門口返學吖~

所以點解我夜晚盡量都十點幾就瞓呢, 因為到夜晚我真係好攰, 唔早D 瞓真係好唔夠瞓~

送外賣

呢三日又要 full day 去上 course 了, 今次係喺九龍塘上堂, 又高估了我家去九龍塘的時間....
由出門口至去到原來只需 40 分鐘, 8:10am 就去到了......
不過攪錯咗出口出..... 九龍塘站的出口多得令人有迷路的感覺, 好不容易先去到上課地點呀!

今次除咗有好友 Cora 姐陪我上堂之外, 仲見到好多舊 workplace 的同事,
一齊食飯傾傾近況, 實在難得有咁嘅機會~

課堂內容都算充實呀, speaker 的英文雖然講得超快, 但絕對唔 monotonous, 所以都唔算太催眠~

波比先生問點解我轉咗工之後成日去上 course, D course 仲要咁貴,
過去一年淨係上 course 都上咗萬幾蚊 @.@,

佢的理論係識少D 就做少D, 其實都啱o架.......
好似上次個 course, 成間醫院計埋我得3 個人識, 如果有 patient 要做嗰個 treatment,
就其實好大機會要我做 (老細同 i/c 都未必有時間做太多呢D case)
Well..... 嚟緊讀 Master, 我唔會再上咁多呢D course 啦, 真係上 course 都上到窮呀......

落堂後, 奉波比先生之命去咗 Taste 買外賣 Dinner,
好開心啊, 三文魚腩同海膽壽司, 仲有燒雞, 隻雞脾好肥美啊!!!
D 平時賣開起碼 $50 的長柄士多啤梨, 而家特價賣 $34.9 咋, 好抵呀~

綿綿冰

久違了的綿綿冰, 終於等到回暖的天氣大條道理去食喇!
不過點解好似冇上年咁好食嘅???

今日又見 CI BB, 不過佢竟然愈來愈曳呀!
呢兩次嚟親都發脾氣, 好明顯係變得好 manipulative 嗰種,
不停出位不停指住D 嘢嚟發癲大叫大喊, sigh......
好彩媽媽都係狠心之人, 一齊 time out 佢佢就好一陣咁,
唉, 阿 B 阿 B, 你咁樣點學嘢呀.....
媽媽咁遠帶你搭車嚟都好辛苦o架, 你乖D 啦~

有陽光的日子

近幾日香港的天氣都好好啊~
從我間 clinic room 見到一片的藍天, 閒時有一兩片白雲飄過, 心情都開朗 D~

不過今日都有點騎喱事發生.....
我忽然間要用電腦 print d 嘢, 走入我哋的office 發覺同事用緊電腦,
畫面上竟然係開咗一個我嘅 file?! (係要入 My Document/我個 folder/xxx.doc)
同事即刻解釋係想搵一個我之前 send 俾佢做 monthly stat 的 file, 不過搵唔到 (.... 所以擅自開我個 folder 搵?)
佢行開後, 我喺 MS Word 的 history 睇返佢最近開咗 D 咩 document, 幾個都係我 folder 內嘅文件喎, 仲要一睇個 file name 好明顯唔係佢想搵嗰個 stat. file 喎! (e.g. VFSS form.doc)
仲要個 stat. file 明明係 Excel, 佢開我 D Word file 嚟做乜? 真係好莫名其妙!
無論有冇惡意都好, 我對同事行動的動機都好有保留!
於是我將好多自己整的 doc file 都搬晒去另一個 location 喇, 唔, 總之感覺唔太好~

另外今日的 comment, 就係我對 D 太 sociable 的人冇乜好感~
或者我始終都唔係做世界女的材料,
又或者我大中小學的好朋友都唔係呢類人, 所以見到呢D 人都真係會啞啞地!

入夏, 放工時仲天光的感覺真係好, 一路搭車見到月亮又見到星星添~

舊 game 新玩

當我哋仲係拍緊拖嘅時候, 鍾意去機舖打機, 沙搥 game 更是鍾愛遊戲之一!!
每次見到波比先生雞手鴨腳唔跟拍子的玩, 都引得我哈哈大笑!

今時今日, 估唔到 Wii 都出返陳年沙搥 game 俾一眾 fans 玩!
格價又格價後, 喺先達終於買了!

返屋企試玩, um...... 我的搖動動作兩個 remote 好似 sense 唔到咁......
攪到明明搖咗又冇分..... 後來經過反覆測試, 終於都知道點搖先會中喇,
雖然有時都仲係明明搖咗都 sense 唔到.....



呢個絕對係入夏前女孩子必玩遊戲, 我相信玩得多一定可以減到 D byebye 肉!
仲可以雙打o架, 邊個朋友想玩的可以嚟我哋屋企呀, 多人玩一定好爆笑!

今日出街食早餐, 食完之後行吓, 嘩, 唔只藥房有口罩賣,
連文具店, 報紙檔, 甚至紙扎舖都有口罩賣....... 真係啞咗......

咁快又放完三日, 嚟緊星期五六日都要上 course, 冇假放的感覺真係橙......

太陽香格里拉

星期六的午餐, 終於都有機會一試開咗數月嘅太陽香格里拉餐廳~
由屋企行過去好快就到, 賣的是印度 + 尼泊爾食物~

叫咗兩個 set lunch, 超愛澱粉質的我, 對呢個 naan 毫無保留地食咗三大件!
加上咖哩汁, 真係好正啊~
咖哩羊同咖哩牛都炆得好夠火喉, 仲要係即整, 等的時間會稍耐~



另外 order 了拉茶, 嘩, 太強烈的香草味了......
感覺好似飲緊D 有香味嘅化妝品落肚.... not my cup of tea la....



整體都唔錯, 值得再去~
元朗的餐廳, 真係多到點食都食唔晒啊~

打到嚟喇!!!

今日係五一勞動假, 不過要去上 course 啊!
去尖沙咀上堂, 諗住預鬆D 7:30am 出門口啦, 點知8: 15am 就去到.......
元朗的交通, 要快時真係好快......

同學仔都話尋日好悶, 今日...... 我到下晝都頂唔順釣魚.......
Anyway 都有 D 反思同 input 嘅, 但比期望中差一段距離啊......

最開心都係同一班同學仔見見面, 好耐冇試過中午一齊去粉麵店食 lunch 了!
(近年因為大家轉營, 相約食飯都係中高檔食肆多)
反而一班人圍住張枱仔, 食嘢傾偈仲 close 好多! 令我諗起以前一齊返學的日子啊!

上完堂, 約咗波比先生去食萬豚屋, 據聞成日都大排長龍!
我哋 5:55PM 去到, 已經排咗 16 個人喺我哋前面了!
6pm 開舖, 一下就坐滿晒喇!

食物方面: 黑芝麻豚肉烏冬- 好似芝麻糊的湯底啊, 豚肉好有水準,
不過烏冬較失望..... 我買嚟自己煮的日本烏冬仲好食過佢喎.....



炸豬扒, 唔錯, 不過同去日本和幸食的, 仲差好遠的水準


烏冬 - 呢個豬骨湯底的烏冬, 底層有隻蛋o架, 蛋白滲滿湯底, 比芝麻湯底還要好啊!


行完街街返到屋企, 就即刻睇到香港第一宗確診 H1N1 Flu 嘅個案了!
嘩, 冇必要都係唔好出咁多街喇! 同埋真係戴返個口罩穩陣D!

大家去下面 website 睇吓洗手正確步驟啦, 真係跟足嚟洗會好D!
http://www3.ha.org.hk/healthinfoworld/health_disease3_a2.aspx

仲有自己帶D 酒精消毒液出街啦, 好似今日咁, 我哋去新港中心 food court 嗰層的 toilet,
嘩, 又濕又污糟, 仲要所有梘液瓶唔係爛就係冇晒梘液, 真係火都嚟埋!
咁嘅時勢都仲咁差衛生點得o架?!
好彩我有帶酒精消毒液咋, 否則真係唔知點算!

早就應該啦

世衞棄用「豬流感」正名為「甲型流感（ H1N1）」2009年05月01日

世界衞生組織香港時間今日凌晨在網站宣佈，以後不以「豬流感」稱呼目前肆虐全球的流感病毒，而用「甲型流感（ H1N1）」，以免令人誤會豬是病毒源頭，不必要地殺豬。在此之前，中俄等多國禁美國豬肉進口，美國為免豬流感之名阻礙其豬肉出口，決定將豬流感（ Swine Flu）改稱為「 2009 H1N1」。巴西豬肉商也要求世衞，將豬流感改稱為「北美流感」（ North American Influenza）甚至「墨西哥流感」（ Mexico Influenza），免生意受重創。美國衞生部和疾控中心前日發簡報聲名：「我們現在稱之（流感病毒）為 2009 H1N1。」美國官員又重申，吃豬肉不會染病，而且迄今沒發現美國境內豬隻感染 2009 H1N1。農業部長維爾薩克解釋改名原因：「傳達吃豬不會染病的訊息十分重要。」世界動物衞生組織周一開會時也認為，至今未在動物身上發現新流感病毒，況且新型流感病毒中又混有人和禽鳥的基因，稱為豬流感並不公平，只會令豬農受罪，所以也要求正名為 H1N1流感病毒或北美流感。