豬欄生活

2015年2月13日星期五

元朗鏸園 Happy Tea Time x 吉之島折上折

放假的第二天, 的起心肝去整理一下電視機後面的幾十條電線.......
之前真係亂得恐怖, 只見一大舊繞埋一齊的電線, 我逐條分返好, 縛返好, 再 Label 返個插頭,
而家超超超整齊了, 好有滿足感~

下午出外曬曬太陽, 元朗的年宵都開鑼了, 不過D 檔仲未開晒~
見到好多幼稚園小朋友嚟行花市, 好攪笑~

行行行, 去到水邊圍村對面, 一間叫鏸園的茶餐廳仔食 tea, 係元朗 facebook group 介紹的,
唔好睇佢個餐牌好似好污糟......

啲食物好得!!
$28 有三拼的下午茶餐, 去邊度搵??
塊吉豬賣點係超巨大, 大過塊面,
有我最愛的西多, 一咬落去, 入面仲係有花生醬的! 唔係嘛, 已經食慣了大家樂嗰D 冇餡西多, 一食呢個真係好滾動囉!
個沙律都唔係開罐什果的, 係有紅腰豆紅蘿蔔等等, 夠晒營養!
講埋個紅豆冰, D 豆煮得夠林, 又好足夠的花奶味, 唔似大家樂的水汪汪~

整個 tea set 簡直是冇得彈, 超推!

夜晚就去了食團年飯, 荃灣美心皇宮的杏汁白肺花膠湯真係好鬼正!!

之後行行荃灣的花市, 不過冇咩睇

之後來到今日的重要 shopping 點, 吉之島呢幾日做特價, BB 用品部8 折, 好抵呀!
我即時整張 Aeon 信用卡, 唔洗15 分鐘就出到卡了, 然後就去 shopping!!

呢排都搵緊D 哺乳衣, 喺日本網站 Nissen 見到D 唔錯嘅 , 但好多都冇貨
難得今晚買到一件, $119 減到 $48, 太抵了!

BB 衫仔就特價咗再有8 折, 三件和尚袍都是 $24 / 件,
大的夾衣就係 $40, 超抵~ 買得好開心啊~ :P

2015年2月12日星期四

深水埗好吃好買半天遊

連續兩天的大假, 好讓我再努力打掃啊!

波比先生買了鴻福堂的芋頭糕俾我食, 都唔錯喎!
仲有佢朋友家親手整的年糕, 加蛋煎香真係一年一度的美食!

吃飽飽, 早上洗得焗爐/ 微波爐/ 雪櫃乾乾淨淨, 見到也開心!

下午就去了深水埗行街街, 目的是幫醫院買啲嘢, 同埋自己想買部收音機加 MP3 第時播歌仔俾 BB 聽~
不過以上兩樣都睇唔啱........ 最後變咗自己 shopping

先去了新香園食個蛋牛治烘底, 超正! 偷飲了 2/3 杯奶茶, 放假就俾我放肆一次半次吧 XD

行了鴨寮街, 再去行福華街同福榮街, 原來福榮街有好多玩具賣, 又有好靚的揮春利是封等等~
逐間睇玩具, 好多都好想買俾小豬嘜, 不過等佢大個D 先啦~

反而意外地買到兩套開胸睡衣俾自己, 因為仁安生仔時, 係冇病人衫提供o架,
方便餵奶的話, 要買呢D 款的睡衣, 搵咗好耐, 一係好貴一係D pattern 好騎喱, 呢套已經算係我見過之中最正常!

仲有好意外地買到麥兜口水肩, 哈哈哈, 真係好鍾意呀, 雖然明知係淘寶嘢!
仲有小手套仔都好 cute!

之後去了公和豆品食豆花, 新鮮熱辣又香豆味, 超正!!
今日行完之後, 真係發現到好多咁多年都未行過的舖頭同街道, 真係好多嘢睇,
食品日用品又平, 好啱遲D 再嚟 shopping!

臨走時, 不忘去黃金商場斜對面的麵包店, 買佢最馳名的薑蔥焗雞脾!
想當年我喺黃金做 part-time promoter 時已好鍾意食, 十多年水準不變
回家加個麵菇菜, 美味又健康的 dinner~ :)

2015年2月11日星期三

早陣子提過買了部 Dyson DC44 吸塵機, 事緣係波比有同事在外國買了返來, 親身見過好好用!
http://www.dyson.hk/zh-hk/vacuumcleaners/cordless/dc44/dc44/features.aspx

佢有好多個 model, HSBC 做緊優惠, 最 low end 的一部賣三千左右
我們在百老匯睇了又睇, 最後買了部 DC44 中階機, 有另一套防敏感吸頭送~

呢部嘢好處是叉電後可無線使用, 吸地下個頭可 360 度轉真係幾方便,
不過老老實實, 如果吸地下我還是喜歡用原本的 1800W 吸塵機,
這部 Dyson 用來吸傢俬同埋啲窿窿罅罅, 就真係幾好用~

無啦啦四千蚊買部吸塵機, 慳家師奶一向都覺得黐線咩!
不過用完有d 改觀嘅, 尤其是用來吸床褥, 床褥又唔洗得又曬唔到,
我們就試用 Dyson 去吸一吸, 點知嘩! 出嚟就係咁多污糟嘢!!!
用最 high end 的型號的話, 聲稱可吸埋塵螨, 我呢部就話吸到致敏原

說也神奇, 吸了張床之後, 每天起來都包雲吞又打乞痴的鼻敏感波比先生, 近來我發現好似好耐冇聽過佢做呢兩個動作了!!!
我唔知真係關唔關吸咗床事, 但可能真係有效啦!

此機另一好處, 就係可以拎去吸埋我架私家車,
我想話我架車兩年來只是吸過幾次塵, 次次都係返廠大檢時人哋幫我吸的,
有咗呢架機, 吸車內地毯真係好方便~

不過都係嗰句, 希望波比先生唔好三分鐘熱度轉頭就唔用啦,
我們要造一個清潔的環境俾小豬嘜居住啊~

2015年2月9日星期一

[愛烘焙] 壓力煲整紅豆蓉: 紅豆椰絲卷 x 紅豆糯米糍

星期天在廚櫃搵到一大包紅豆, 放咗好耐了, 係時候食咗佢!
第一次用壓力煲整紅豆蓉, 真係幾勁, 20分鐘就由冇浸過的紅豆煲到變成豆蓉了!!
加點糖就已經用得, 唔洗等上大半天~

紅豆椰絲卷, 焗起有椰絲香味, 感覺好正!

自家的紅豆蓉, 真材實料, 仲有些粒粒很有咬口架~

整完包都仲有好大碗紅豆蓉剩....... 就幫手清埋包糯米粉, 用來整糯米糍
我用了Christine 的 recipe, 不過覺得呢個 recipe 整出來的糯米糰好乾同 un.......
我諗加多 10ml 液體會好啲

好不容易包到六粒完整的, 哈哈, 因為糯米糰太黐手, 有D 包極都爛呀~
拎返工請同事食, 分享食物最開心 :)

2015年2月8日星期日

[愛住家菜] Happy Sunday - All Day Breakfast

星期天, 好好的煮一個早餐俾波比先生食,
芋頭糕和 scone 都是自家製, 配上健康的滑蛋同車厘茄, 還有牛尖腸, 好令人開心的早餐啊!

吃飽飽, 大半天都在大掃除, 每星期都掉幾大袋垃圾,
多餘的電器家品書籍, 盡量送俾朋友, 沒朋友要的就拎去回收, 做人要珍惜要環保啊!
有些儲了很多年的東西, 都要忍痛掉了....... 人總要向前看~

2014 北海道道東芝櫻之旅 - 總目錄

做了這個北海道之旅的目錄, 會在這裡 update blog link

坐peach 去北海道之好與壞

北海道自駕小貼士: 租車/ 入油/ 停車場/ ETC 卡懶人包

行程:

Day 1 (帶廣):
機場宮越屋珈啡 -- 帶廣鴨川豚丼 -- 帶廣おびひろ動物園 -- 六花亭本店 Cafe -- Hotel Paco Obihiro (天然モール温泉ホテルパコ帯広) -- 十勝乃長屋屋台

Day 2 (帶廣 - 釧路):
紫竹花園 -- 幸福車站 -- ぶたはげ十勝豚丼 -- 釧路湿原野生生物保護センター -- 釧路市湿原展望台 -- 東横INN釧路十字街 -- 釧路フィッシャーマンズワーフMOO 商場 -- 炉ばた煉瓦爐端燒

Day 3 (釧路 - 弟子屈):
和商市場 -- 塘路湖・シラルトロ湖の遊歩道 -- 美幌峠展望台 -- 和琴半島 -- 砂湯 -- 川湯観光ホテル -- 毛蟹海鮮盛宴

Day 4 (知床):
硫磺山 - 知床自然センター -- フレペの滝 -- 知床五湖 (上) (下) -- 知床グランドホテル

Day 5 (知床 - 網走):
オロンコ岩 -- 東藻琴ひがしもこと乳酪館 -- 東藻琴ひがしもこと芝桜公園 -- 網走オホーツク流氷館 -- 北海ホテル -- 松葉蟹宴

Day 6 (上湧別 - 旭川):
上湧別鬱金香公園 -- 旭山動物園 (一) -- 北極熊篇 -- 東横INN旭川駅前宮下通 -- 山頭火拉麵

Day 7 (富良野):
富良野四季彩の丘 -- Flowerland -- 日の出公園 -- 富田農場 -- 葡萄酒ふらのワイン工場 -- 富良野チーズ工房 -- 麵包超人館ふらのジャム園 -- Furano Marche -- 新富良野プリンスホテル

Day 8 (新千歲 - 大阪):
Rera Outlet -- 銀波露拉麵 -- Rinku Premium Outlet -- Sport Depo - 關西空港 Washington Hotel (関西エアポートワシントンホテル)

Day 9 (關西空港 - 香港):
機場 Cafe -- T1 T2 走走走

[2014 北海道] Rera Outlet -- 銀波露拉麵 -- Rinku Premium Outlet -- Sport Depo - 關西空港 Washington Hotel

最後一篇的北海道遊記了!!!
尾二的一天, 在新富良野太子酒店吃自助早餐, 食物也有很多種類

最愛是富良野產的牛奶, 一支出面買 300YEN, 飲兩支會覺得很值回房價!

北海道的水果也總是很新鮮好吃~

之後我們就駕車去最後一站, Rera Outlet, 那裡有很大的停車場啊!
因為要趕還車同搭飛機去大阪, 我們用一小時多掃了很多心儀的衣服, 這個 outlet 很好買啊!!

還完車, 租車公司載我哋去機場了, 八日間, 兜了道東一個圈, 行了千幾公里, 是很好的體驗~
到了新千歲機場, check in 後去醫肚, 上了好多拉麵嗰層, 本來想食上年食唔到的一幻拉麵,
點知今年仍然是好多人排隊....... 多人到一定唔夠時間食.......
所以放棄了, 去了銀波露

拉麵是 ok 啦, 唔算好特別的好食........ (還是掛念著一幻....)

新千歲機場真係好多嘢行呀, 去了 Calbee 專門店

點了即炸的薯片!!!

實在超超超好食! 我絕對可以一個人食兩兜~

還參觀了有趣的朱古力工場

之後是搭 peach 啦, 之前另一篇講過班機 delay 了四個幾鐘!!!!
去到大阪已經成 6:30pm, 想行的 Rinku Outlet 收八點, 點算呢???

在機上我教了波比先生自己去 outlet, 落機後就分頭行事!
佢衝去 outlet 掃貨, 我就一個人推住兩個喼, 搭 shuttle 去酒店 check in 先, 再去會合佢
好彩我哋今晚住的酒店, 其實就係喺 outlet 所在的 Rinku Station, 搭 shuttle 15min 就到
如果今晚要住大阪市, 真係不堪設想.....

這間關西空港 Washington Hotel 十分多空姐同生意人 feel 的旅客住, 就在機場隔壁咋
上網 book, 10000yen 一晚, 如第二朝搭早機的人仕, 真係幾適合

Check in 完, 我趕去 outlet 會合波比先生, 去到已經八點了, 真係好彩叫佢自己去先咋, 否則兩個人都買唔到嘢, 真係喊三聲.......
我哋再行行 Sport Depo, 然後去了食 Coco 咖哩屋, 定一定驚, 吃了美味的最後一個晚餐,
嗯, 剛才的經歷, 真係一額汗o架!!!

買到好多嘢呢! 哈哈, 成個北海道 trip 都是鄉郊地方, 要買的都是今天買了!!

第二朝, 九時多的早機回港, 六點幾就起身要搭 shuttle 去機場了!

Check in 完, 同波比去食個早餐

日本的早餐絕對唔平, 不過佢哋D 麵包同蛋真係幾時都好好食!

好得意的煮法~

我們的北海道之旅圓滿結束了!!!
這九天像去了世外桃源, 係好好好難忘的旅程啊~

今天寫到這裡, 仍然很掛念知床的美景,
待小豬嘜大個啲, 我哋好想帶佢去旭山動物園睇北極熊啊!
好期待北海道三人行 :D

其他遊記: 2014 北海道道東芝櫻之旅 - 總行程目錄

2015年2月7日星期六

蒸糕班之賀年芋頭糕

波比太太很愛吃芋頭糕, 見到網上有芋頭糕班, 就二話不說地報名了!
今天去到觀塘上堂, 去到見到已分好一份份材料......
well, 其實我還是喜歡自己由原食材開始去做, 再有材料都量好晒, 好殘廢烹飪班 feel......

今日學的 recipe 實在太簡單了, 完全冇 skill 可言........
我初時以為整芋頭糕會如蘿蔔糕一樣的繁複, 原來大錯特錯了........
不過太簡單的食譜, 出來的效果會是怎樣??

用了 Fissler 的高速煲去蒸, 十分鐘就蒸完, 快到冇朋友!!!

我的製成品啊! 個樣係幾靚, 亦都非常之容易脫模,
但回家吃了的感覺是: 頗差.......
因為就是沒有將芋頭煮成漿或溶解, 出來的是糕身完全冇芋頭味, 要吃中芋頭粒才有味....

這個 cooking class, 感覺有點被騙........
早知真係好似平時自己上網睇 recipe 學整好了!