病倒了 x 初試象印燜燒杯

星期一, 無啦啦病了, 仲有幾星期就生得, 唔好呢個時候嚟病啦............
所以放工即去睇醫生, 但好多人, 等咗成個鐘仲要冇位坐.......

流鼻水, 喉嚨痛, 醫生知道我懷孕, 開了幾隻佢認為安全的藥,
點知返到屋企上網 search 吓, 有兩種藥美國的 website 都唔建議孕婦食, 因為 side effect unknown........
最後只吃了最常見又安全那種黃色藥, 加埋自己噴鼻, 漱口消毒同食多D Vit C,
奇蹟地, 第二日好了95%! 很感恩啦!!

喉嚨唔舒服又唔想食 canteen, 早上想起了波比先生從日本買回來的象印燜燒杯,
於是第一次用佢嚟整粥, 佢係可以掉晒D 米同餸同滾水入去, 焗幾個鐘就熟就食得!
不過我喺屋企就都將材料煲一煲先放入杯內焗,
中午打開時, 好綿的蕃茄粟米粥啊! 呢個杯杯真係好用, 唔怪之得會中港台大熱啦!
第時去街, 小豬嘜餐粥仔都靠佢了 :P

[小豬嘜] ~ 麥兜搬家了~

這一天, 我們家的麥兜要搬家了!
這兩個櫃, 陪伴了我們十年多, 入面滿載了由中學時代開始儲下的麥嘜麥兜, 也有很多我們一齊的回憶



這裡的每一件, 都有一個故事, 都是波比先生或一些好朋友送的





每一件, 不是價值不菲, 但對我來說都是珍藏



但為了小豬嘜, 我們都要忍痛同佢哋 byebye 了~
有些太殘舊發霉的要掉了, 要空出位置, 放置我們訂造的新櫃來放小豬嘜的東西

之前提過, 喺實惠訂造了個櫃, 真係勞氣死我! 1月19日俾錢, 問了 n 次都冇交帶冇覆過我幾時送貨,
最後今個月我用了半天大假去門市嘈, 佢先話要四月尾先送到貨,
都離晒譜嘅, 三個月造一個櫃?!! 我成間屋裝修都唔洗三個月啦吓嘩?!!??!
要一個大肚婆好激動地同個 sales 嘈, 你話呢間嘢係點?!
最後打埋上 CS 嘈, 嘈到話如果三月唔送貨, 我就唔要個櫃, 仲會去消委會同埋小額錢債審裁處追討, 佢先覆返我又話三月尾送到

最後, 今個星期二打俾我話星期五下午送得貨,
星期三又有門市職員夜晚打嚟叫我送貨前要來俾尾數,
我話吓又唔早講埋, 我都係得返星期四放工來o者, 早唔到o架喎, 唔洗做呀??
星期四又打了兩次來問我幾點可來門市俾錢, 唔俾驚師傅唔肯星期五送,
都黐孖筋嘅, 我話咗放工咪嚟囉, 唔通請假嚟俾錢呀??
俾完錢, 最有趣係星期五個師傅嚟裝櫃時, 話我哋仲未俾尾數囉!!!!
實惠同D 師傅嘅溝通真係好有問題, 唔想勞氣都真係唔好喺度訂造傢俬!

之前點解揀佢? 因為睇過 Ikea 的櫃款唔多啱心水, 我想要有櫃桶, 又想一間有一層空的可以做個 bench 放嘢
Ikea 其實都有得訂造, 但只係跟返佢的款式而改尺寸咁訂造
街舖的, 又驚有好多黑店
後來睇實惠網站無意中見到佢有自己畫圖的訂造傢俬服務, 諗住大公司先會落搭,
其實訂完都有擔心, 因為後來喺網上睇到不少人訂實惠都中過招, 只是冇諗到真係又會發生喺自己身上~

舊的書櫃要棄置, 問實惠 quote 價, 要$450, 都黐線的! 你之前咁嘅服務, 而家掉個櫃仲要收我 $450, 我用你就真係白痴喇!!!!!
星期四我在討論區post 了可免費送出個大書櫃, 好幸運感恩, 有人肯要, 晚上仲嚟車走咗個櫃喇!
小書櫃就仍然在家, 波比先生很用心的把小精品重新安置在這擠迫的新居,
到有天我們可以搬大屋, 就再給你們一個寬敞的家吧~



星期五下午, 個新櫃終於都送來了,
手工 ok 啦, 確實有D 花但都唔會再退換了, 完全唔想再同呢間公司糾纏!

波比先生第一時間霸佔了一角做他的 coffee corner XD
個櫃勁大陣油味/甲醛味, 要開風扇狂吹, 希望D 味快D 散就就可以將小豬嘜的物品放入去啦~
呢個復活節假, 就要努力執拾了!

[小豬嘜] QE 入院記

話說星期三下午至黃昏時, 開始有點肚痛, 那是間歇性的那住痛...........
有時會痛得幾犀利, 當阿 B 一郁時, 痛到我會「嘩」出聲......
開始有D 擔心, 盤算是否需要入院, 但我又覺得唔似作動咁嚴重, 瞓低又好了點, 所以冇入院了

星期四早上四點幾, 又痛過, 唔.............. 考慮過之後都係入院 check 吓好D!
QE 產科非常體貼, 有咩關於懷孕的不適, 都可以直接去產科病房入院, 唔洗喺急症室呆等!
入到去, 就即有姑娘作初步檢查同埋分流, 然後好快就直接入了產前病房

去到又檢查了 BB 心跳, 有冇宮縮, 照超聲波, 抽血驗小便等,
醫生都話 BB 冇事我又冇宮縮唔似會早產, 聽完都放心好多!
而家得33 週幾, 如果突然間 BB 早了出來, 都咪話唔擔心呀,
妳要乖乖留到四月尾先好出來同大家見面啊~
但其實都仲間歇性個肚有那住痛, 但檢查冇嘢, 我都要求中午出院了~ 起碼都安心好多喇!

出院前姑娘叫我食埋飯先, 橫掂都送了來啦,
咁大個女第一次入院, 第一次食真正的病人餐.........



下午再去覆診心臟科, 心臟的問題算是沒有了, 以後乖乖地唔好飲咁多有咖啡因的飲品就好了!

還有而家開始真係要行慢D, 動作慢D 啦, 個肚太大了, 搭巴士出入座位都真係幾論盡啊.......

[小豬嘜] BB 聚

星期二, 實在很 O 咀, 夜晚要去上堂, 諗住唔揸車啦, 點知等等吓村巴唔對路, 先發現條村巴線取消了!!!
無奈下我迫住要揸車返工, 再揸車出九龍上堂!!
揸車兩年幾都係出過兩次九龍, 今次仲要經過D 好繁忙嘅路段, 又被 google map 誤導了而行錯路......
好彩, 最後都可以到到上課地點~

今晚課後約了舊同事食飯, 即係又要泊架車去餐廳附近, 好好彩師弟幫我揸去旺角!

終於都一班同事食飯了, 輕輕鬆鬆傾偈好開心!
今晚難得相見了舊同事, 佢的 BB 大小豬嘜兩日咋, 好有緣呀我哋個 B!
所以今晚一定要影影這難得的大肚照, 下一次這兩個 BB 再見面時, 就會是抱在媽媽懷中了! :)

[小豬嘜] 最後一節 QE 產前講座

今晚去了聽 QE 最後一節的產前講座, 也是很重要的一課,
內容介紹了見紅穿水陣痛等等知識, 同埋入院生產的安排,
仲有睇埋那傳說中的"恐怖片": 分娩過程
睇完呢, 我真係好佩服自己順產的所有媽媽!

之後同波比先生在佐敦食飯, OPENRICE search 到一間叫石仔記的麵店,
叫了炸醬麵同埋及第粥, 都好好食, 不過份量偏少........ 食完波比先生完全唔飽, 於是要去食多個麥當奴將軍漢堡餐 XD
話時話, 新出的芝士薯條唔錯喎, 一星期已食了兩次



搭車前仲買了呢間老字號明記甜品, 渣喳好足料又唔太甜, 好好味啊!

Hello Kitty 農莊好好玩!

星期天, 相約了師弟妹來元朗, 去麗聲冰室吃完個懷舊炸脾飯之後, 就去 Hello Kitty 農莊遊玩~

這個農莊去也很方便, 其實就在錦上路西鐵站行5分鐘就到, 當中指示非常清晰
錦上路西鐵站那裡又有大型停車場, $8/小時實在抵泊

話咁快, 我們就去到農莊了! 每人 $30 的入場費, 一入去就見到好多 Hello Kitty~



園區其實不算大, 不過好乾淨, 設計得好靚, 好似去了台灣/日本的小農場咁~







這裡有一格格的小農田可出租俾人種菜, 當中各式各樣的菜呀, 蕃茄呀, 士多啤梨都有~









另一賣點就是有動物, d 山羊好狼死, 周圍衝搵嘢食



意想不到的, 竟然有我最鍾意的豬豬睇呀!!!!!!!!!!!!



佢無啦啦擒咗上嚟, 嚇死人!!



呢張影到佢笑呀! 好可愛!



農夫叔叔同佢好好朋友o架!



呢個係佢嘅玩具









仲有D 好唔錯的影相位



小賣店有D 先種蔬菜/ 飲品賣, 有興趣的可也買盆香草返去~
佢仲有個士多啤梨園可俾人採摘士多啤梨, 但係唔多靚啦~



小小的園地, 影影吓都玩咗成兩個鐘, 離開時喺路口見到有附近的農場的自種士多啤梨,
買了一短, 因為好新鮮要即食, 否則會好快爛,
好甜又好多汁, 好食過超級市場買的好多呢~

這個小農莊去得好方便, 第時要帶埋小豬嘜嚟睇豬豬啊!

[小豬嘜] 我 33 週了!

今日小豬嘜 33 週大了! 仲有五個幾星期就生, 真係開始緊張了!
而家佢踢得好勁, 半夜瞓瞓吓可以俾佢踢到醒.........

瞓低時, 腰開始有D 痛, 在床上轉身實在開始有困難了.......
肚子愈來愈大, 行路時也真的開始要慢一點喇.......

30 週過後, 很多人會話要食咩飲咩清胎毒,
well, 我一向都唔係好信呢D 傳言, 覺得食得健康就得啦!
不過見到人食腐竹蛋糖水, 自己都心思思, 哈哈, 煲了一大煲, 仲落埋有益的雪耳, 夠食幾日了!

不過其實我覺得腐竹蛋糖水係一種搵嚟攪的美食.......
明明D 腐竹就係豆漿上面凝固咗嗰層皮, 而家又要煲返溶佢做糖水,
其實, 咪又即係一碗豆漿..............



今晚第一次同波比先生去食元朗好出名的永年車仔麵, 竟然唔洗等位仲有梳化位坐, 實在太感動!!
個傻佬第一次食叫了大大辣, 辣到佢變咗孖膶腸咀, 真係笑死我!!!
我就精呢, 上次小辣都太勁了, 今次要微辣, 但都係食到滴晒汗, 但佢個湯底又真係食到你欲罷不能嗰種, 配料也實在很足料好味呢!

我們的八週年 x 第一次整燒賣 x Dinner @ Carolyn Robb The Royal Touch Cafe

又來到3月17日，是我們結婚八週年紀念了!
這天放大假，先是在家清潔，因為即使有開抽濕機，家中不同的角落又發霉了。。。。
每年春天亦都如是，或者過幾年真我應該全屋油過油。。。。

中午約了大學我好姊妹，上佢屋企探望小朋友，順便聚一聚，
今日我同姐姐一齊整燒賣，原來一啲都唔難!
買了廿蚊蝦膠廿蚊免治豬肉，加少少調味攪勻佢，
皮就其實是用雲吞皮，再級個圓形，
包入餡料，上面再放少少紅蘿蔔就完成了~
然後蒸八分鐘就食得, 好好味, 味道同街賣的一樣, 又沒有味精~ 下次做派對小食也不錯!



多謝好朋友為我準備的健康餐, 好啱孕婦食啊!
看著朋友的兩個小朋友長大, 好羨慕啊,
雖然當中有很多很多辛酸史外人一定不會明白, 但看見小朋友咁生性又快樂地成長, 應該乜都抵返~



夜晚當然是與波比先生慶祝啦, 諗咗成個月都唔知食乜好........
Buffet 呀鋸扒呀其實已吃到很厭......

早兩日睇報紙, 見到海港城新開了一間叫 Carolyn Robb The Royal Touch Cafe,
店主是英國前皇室御廚, 賣的蛋糕也是皇室吃過的, 相信質素一定有保證吧!

訂了枱七點鐘到, 小小的店, 雅緻的裝修,
店員都很有禮貌又細心, 我腹大便便, 為我拉枱又加暖水

蟹肉雙重奏: 啖啖都是蟹肉的鮮味, 配上牛油果同芒果就是很清新的感覺, 兩個人 share 剛剛好!



英國Dingley Dell 農場豬胺扒配金巴利果醬
我想為了不使豬肉太 un 及失去原味, 待應說明了豬扒不會煮到全熟, 也細心的問我有冇問題,
我們都想全熟會較好, 不過上菜時見到熟度也 ok 吧~ 我就吃全熟的邊位~
這豬胺扒沒有太多的調味, 真的食到好正好嫩的豬的原味, 點些少果醬吃絕對不會令人失望~



hehe, 我太鍾意食漢堡包了, 點了一個 , 又有我最愛的薯條~



漢堡包非常有份量, 揭開太陽蛋, 下面有煙肉, 茄汁豆, 鮮味的肉腸 (波比先生最鍾意), 好 juicy 的漢堡扒, 蕃茄同生菜, 攤開就像是一份豐富的 All Day Breakfast!
麵包也有烘過及搽牛油, 整份就是超級的美味!



來這裡當然少不了甜品! 點了一份雪糕窩夫~
我一向不喜歡吃士多啤梨味的雪糕, 總覺得味道很假,
但這裡的竟然令我一吃就愛上了! 入面有很多果肉, 酸甜味合宜, 一人吃了大半球~
窩夫當然是即製, 外脆內軟, 很香蛋味 (我同波比先生講好似雞蛋餅的味道 :) ), 配上那 72% 朱古力醬, 令人一吃難忘啊!
所以不要以為這是一間 cake shop, 這裡的晚餐也很有水準!
來這裡慶祝我們的八週年結婚紀念, 實在是沒有選錯~
生完之後, 希望可以來這裡 high tea 吧!



之後拍拖行去 1881 , 想咗好好好耐嚟呢度影相了~
但周圍都只有自由行, 搵個香港人揸機都難,
最後請了一位外國遊客幫我哋影, 嘻嘻, 好開心的合照啊!



霧鎖香江的夜景, 很美很美~ 這是很開心的一天呢~

慳家小師奶

哈哈, 波比太太自從成為準媽媽之後, 愈來愈愛 online shopping 同埋睇優惠情報,
無辦法啦, 有個小朋友開支好大o架~

今日好遲放工, 想起了不如用埋 Pizza Card 的優惠去換嘢食!
上年開了張 Pizza Card, 儲了 180分, 原來已經可以換到 pizza + 雞翼 + 汽水了,
而家叫外賣自取/ 送貨又有 8 折, 用 $60 就買到個海鮮龍蝦汁闊條麵,
咁多嘢食就係 $60, 太正了吧!



自己又煲咗湯, 繼續用埋剩了的魚翅瓜, 煲了茶樹菇豬骨, 好飲呀~
茶樹菇係早幾日喺 759 特價買的, $23 一大包,好抵!



今日仲好想讚一讚 hktv mall, 尋日咪話過用 mall dollar 訂嘢嘅, 今日超準時 7pm 就送到嚟屋企!!
真係好有效率又可靠~
$93 就係買了咁多嘢喇! 如果佢之後有嘢真係抵買, 我都一定會再幫襯的 :)

[愛跑步] 油尖旺跑

第二次來到西九比賽, 次次嚟親天氣都唔好
今日大霧到冇咗半座 ICC



先起跑的是兒童組, D 小朋友好癲啊, 頭一堆返嚟的仲跑得快過我好多, 好恐怖!!!
跑友的女兒都有參加, 一個好獨立的小朋友, 自己跑完識自己去拎水同蕉, 又會自己攪掂自己再等爸爸跑完返嚟,
愈唔緊張的家長, 就會有愈獨立的小朋友, 我很相信是~



今日跑完有棉花糖呀



仲有好多遊戲俾小朋友玩, 對小朋友實在一流



之後是成人 6km 組, 波比先生成績同上年差不多咁啦~



跑完返元朗, 去試一間新新地開的日式吉列店, 點知中伏了..............



相片果然只供參考.......



同一樣的價錢, 我在日本吃到的是好十倍的質素囉........
網上食評, 有時真的不可盡信............



今日又 shopping for BB, 好正呀, 發現原來 hktv mall 有 BB 嘢買,
雖然我一路都知有 $100 Mall Dollar 優惠, 但冇諗過會用得著!
剛用了 $93, 買了兩包 nb 尿片, 一包800ML 洗奶樽液, 一條奶咀鍊, 仲有兩條吸汗背巾, 實在太正了! 仲要聽日就有得送貨~ 我又做了個精明師奶喇, 哈哈哈!

[小豬嘜] 妳的第一條裙子

今日又去 QE 覆診, 等了個半鐘, 等到我真係瞓著咗......
睇醫生的過程, 真係又唔洗兩分鐘就出返嚟....... 咁就一個下午~

睇完都成 5pm, 去了旺角寶安大廈 12樓E 室, 一個人稱寶安姨姨的舖頭買衫,
入到去, 好似個貨倉咁, 其實都幾亂, 要搵到靚衫要自己慢慢搵, 要有心機先得!

花了一點時間, 意外地搵到兩條好可愛的裙仔啊!!! 超開心!!



仲有三件夾衣, 我就係剛剛先發現我買了超多的袍仔, 但就一件去街的夾衣都未買過,
而家小豬嘜有靚衫衫去街街了!



仲有買埋兩頂帽仔, 之前喺吉之島見到好唔靚的都要 $69 起, 呢度就 $10 一頂, 好抵呀!!
買了五件衣服兩頂帽, 都係 $157 咋, 真係平靚正!!! 唔怪之得咁多人都讚~
不過揀衫都要睇吓D 質地, 有D 都會厚同焗, 有D 的公仔係熨上去似乎洗得多就好易甩,
買俾 BB 的唔需要太花巧, 最緊要還是舒服好著~



另外多謝波比先生又做咕喱, 幫我去一田托了一 set 沖涼用品返嚟!
一田 BB 展由尋日開始了~  http://www.yata.hk/tch/promotion.php?hid=35870
不過冇咩抵 (而且我都真的已買了很多!)
唯一好想買的就係 Biolane 這一個 set! 這牌子都唔少媽媽讚好用!
尤其是可去頭泥的洗頭水, 仲有支換片膏~
咁又買了四百幾蚊喇~~~~



然後都幾多贈品送!
買埋呢一批, 我相信真係冇嘢要再買了!
這個漫長的採購之旅終於都完結了! 真係要賀一賀佢!!



今晚趁早, 去了食茶木, 唔算等得耐
佢D 牛肉麵真係好好食!



今次呢個 honey toast 比上次的更好食, Happy Friday everyone :)