媽媽跑半馬

成三個月冇 update 個 blog 了, 還有人睇嗎?
由十幾年前開始寫 blog , 都未試過幾個月冇 update, 哈, 生咗 BB , 個世界真係唔同晒!

我們的小豬嘜很好, 健康又愛笑, 好湊又肥嘟嘟,
而家識坐識反身, 好努力學緊爬~

戒了夜奶, 媽媽開始可以瞓多D~

早幾日, 媽媽膽粗粗報了2016 年渣馬半馬, 為的是有個目標推動自己做返運動,
生完冇工人, 真係一路都冇時間去做運動啊,
而家算係生活有返點空閒時間, 真的要運動了! 同埋要減返剩餘的 3kg!

成年冇 regular 的運動, 真的不可勉強跑, 都係由少量慢跑開始, 希望慢慢加量加速,
跑了一次 2.5km 一次 3km, 真的很慢, 今次渣馬但求 2hr 15min 完成都好了!
跑完做 cool down 真係好好好緊要, 上次六月跑完冇 cool down, 雙腳酸, 膝頭痛......
今次冇太大不良反應, 算係咁了!
很想喺終點見到BB, 可惜冇人會幫我哋湊出來呢~

波比先生今次渣馬挑戰全馬,
其實 12月會去沖繩跑佢第三個全馬, 不過當爸爸以後真的沒時間練習,
但完成了有個囡喺終點等佢, 應該即使慢速完成都好開心吧 :)

[小豬嘜] 2 個月零兩週的好玩 BB

好耐冇寫 blog 了, 一來真係冇咩時間, 二來呢度唔擺得相, 真係好似差咁D,
所以我幫阿囡開了個 facebook account, 好多嘢喺嗰度 update 算了,
因為 facebook 始終方便過寫 blog 好多, 唔洗先 upload 相去 Flickr, 又 copy and paste html code 咁麻煩........

呢度或者會變成週記或月記啦~

過了 2 個月, 我們的好日子終於來臨了!

- 作息定時, 食奶穩定, 剛加到 130-140ml x 6餐

- 29/6/15 去了健康院, 體重是 75 percentile....... 汗! 我就係一早都覺得阿囡肥, 所以冇跟人哋加到 5 安一餐
這段日子, 都是5 餐母乳 1 餐奶粉, 感恩母乳唔算超多但都算唔錯
有次仁安的姑娘打電話來 follow-up 我出院後的情況 (原來私家都有 post-discharge follow-up!), 講到一點我都覺得值得思考, 就是母乳不只睇量, 還要睇質,
有D 人雖然一泵可有 200ml, 但其實入面的營養同抗體份量可能只同我得 120ml 一樣, 多了的只是水份,
所以姑娘都話唔洗特登追求份量, 有幾多食幾多啦,
反而我飲食健康, 日日高鈣奶豆漿媽媽奶, 再均衡飲食, 我相信自己的母乳品質一定唔錯, 否則都唔會養到小豬嘜肥肥白白

- 身體發展方面, 而家條頸已好好力, 基本上坐喺度時個頭唔會 fing 嚟 fing 去

- 開始識食手, 食到o習o習聲, 笑死我

- 而家瞓得夠時, 超好玩, 兩個月真係一個轉捩點, 忽然個人開竅一樣,
很有意識地望人, 同人笑, 早幾日第一次聽到佢笑到「卡」一聲
大人同佢講嘢, 佢好有反應, 會笑到見牙(肉)唔見眼, 會有好多聲音作回應
而家日日都好多聲好多嘢講, 連續不停的依依呀呀就是超可愛

- 雖然妳仍然不太愛瞓自己的床仔, 但比之前已容易入睡多了

- 哭鬧少了很多, 雖然間中還是扭媽媽計攪到媽媽煮唔到飯, 但起碼吃飯時妳大部分時間都可以乖乖的等候, 爸媽開始有安樂茶飯食

- 爸媽一放假就帶小豬嘜去街街, 而家去街街已經冇咁驚了, 仲有好鍾意坐媽媽架車車去睇風景

媽媽 3/7 已經返返工喇, 這星期同事放大假, 一個人忙死了.......
而家真係好難煮飯, 放工真係攰到咩都唔想做.....
仲有返工泵奶, 在家時都泵三次, 希望奶量唔好跌啦, 有時真係多嘢做到泵唔到, 好擔心會愈來愈少奶啊

Combi 磨指甲器 - BB 修甲神器

波比先生二月去跑東京馬仔時, 老婆已叫佢幫手買部 Combi  磨指甲器 , 不過嗰次搵唔到啊
啱啱小豬嘜的表姑姐去了東京, 托佢買終於都買到了, 超開心!



新手爸媽最大難題之一, 都一定係幫 BB 剪指甲, 小豬嘜一出世D 指甲已好長,
等了兩個月, 都係時候要剪剪了!

用佢用指甲鉗剪過指甲, 都係心驚膽跳, 好怕剪到佢D 肉......
有了呢個神器就唔洗驚了, 真係好掂呀!
佢有幾個磨頭, 啱唔同年齡用, 我用 0-3months 的頭, 開機磨落自己 D 肉呢, 唔會痛的,
但磨落 BB 的指甲度就真係磨得走, 佢咗佢係連指甲鉗都唔洗用啊!! 超正呢~
我見萬能嘅淘寶都有得賣, $280 啦, 唔知效果點~ 但俾我都係買返正貨好D 咯!

媽媽又掃貨 - MyBB Store 開倉

今日阿姨來了幫我睇 BB, 我有時間鼠出去又 shopping!
知道 MyBB Store 開倉啊, 出了荔枝角的門市 shopping, 好多幾十蚊的用品都會平幾蚊,
重點覺得抵的是思詩樂洗衣液 $75/2 包, 平過 BB 展!
呢幾日咁啱睇緊 BB 車的 rain cover 同竹蓆, rain cover 可防埋 UV , 半價賣 $110 好抵!
個 Combi 防水椅套由 $119 減到 $69, 仲有唔多地方有得賣的游泳尿片同埋洗衫柔順劑都買了~



滿 $250 送 snack, 滿 $400 再送玩具, 媽媽真是滿載而歸啊!!



今晚煮了三文魚冬蔭公湯, 開心的美味! :P

[愛住家菜] 海南雞飯

生了 BB 之後, 即使煮了好餸, 也沒時間享受慢慢吃, 所以好好好耐冇 post 過我D 煮食照了~

呢幾日小豬嘜都乖乖, 喺媽媽煮飯時都唔算扭計, 所以都可以煮點好餸呀~
要成功煮好一餐飯, 一切從簡, 也多了整蒸的餸菜, 因為放入鑊蒸十分鐘就得, 唔洗一路炒, 小豬嘜喊的時候都可以完成~

今天整了海南雞飯, 其實只是將雞同薑放入電飯煲同飯同煮,
不過煮完要用冰水浸雞肉, 出來的效果果然很好, 雞肉很嫩滑啊!
不過個醬汁才是精髓, 用了新加坡的黑醬油, 魚露, 蒜蓉同辣醬, 點雞真係好好味啊!

右邊的是我至愛的薯仔餅, 真係好好好耐冇整, 要 BB 乖乖瞓了先有時間慢慢刨薯仔呢~



之前煮的, 有冬菇雞粒煲仔飯, 而家食飯, 最緊要係D 飯餸可用一隻匙羹就畢到晒嚟食 XD



豆腐同蝦膠釀茄子呢D 又係方便進食之作啦~

波比先生的第一個父親節

波比先生的第一個父親節, 過得很開心吧!
早一日, 我獨自出了旺角, 買了些父親節禮物給波比先生, 是他最愛的咖啡啊!
因為要多謝波比先生這段日子盡心盡力的照顧小豬嘜, 犧牲了睡眠和跑步的時間,
每天見到波比先生攰到唔願起身, 真係老婆都心痛的....
大家努力的捱過去吧!
沒有工人自己湊, 係好辛苦, 但建立了那種關係, BB 見到你特別不同的反應, 你會覺得辛苦也是值得的!

然後當晚我們去了 Pizza Hut 慶祝, 帶著這小豬嘜, 出街食飯實在冇乜選擇, 元朗裡其實就只有 Pizza hut 較好坐
爸爸單拖推 BB 車帶小豬嘜出來, 嗯, 我們都覺得小豬嘜坐 BB 車走太遠的路程實在很辛苦啊~

出到來, 小豬嘜睡了, 爸媽可享受一下二人世界, 實在很開心!
這款新 pizza 已經是第三次食了, 都係堂食最好食呢!



星期日, 約了爺爺嫲嫲去科學園的盈海火鍋飲茶, 冇人的, 落地玻璃望住海景, 好正~



食物都唔錯啊, 仲免費泊車, 值得一來
本來想飲完茶到海邊影影相, 點知一出去就落傾盆大雨..... 小豬嘜出親街, 落大雨的機率都很高....



晚上約了阿姨一家吃飯, 去了元朗的早辰餐廳, 食物的確非常好!
不過就是有少少過咸~
祝表姑姐生日快樂啊~






但連續去了兩場, 下午又冇正式的瞓晏覺, 夜晚就慘了......
小豬嘜就是很煩躁又睡不著, 爸媽用盡方法哄了很久才能使她入睡......
哎呀, 經一事長一智, 以後要好好安排小豬嘜的作息先得啊

再度重遇妳

Facebook 確實是一項本世紀最偉大的發明, 剛剛透過 Facebook , 我重遇返一位中學時代十分要好的朋友
那時我們一同日日夜夜喺自修室溫書, 一齊出席紅十字會的活動,
呢位朋友對我好好好好, 當我是妹妹一樣的
不過上了大學, 大家都忙, 我除了返學就是返 part time, 沒有時間聯繫了, 之後就失去聯絡了

現在重遇返, 大家都做了人媽媽喇, 真係感觸良多,
但大家就好像從沒變過, 一見面就雞啄唔斷的 catch up 返大家咁多年的過去同近況,
傾了兩個鐘, 真不知時日過!!!

好多謝朋友很有心思的禮物啊, 小豬嘜百日宴時希望著得到啦



我特登去買了東海堂新出的蜜瓜蛋糕, 好好味啊!



朋友帶了她的小 BB 仔來我家, BB 仔大小豬嘜兩個幾月, 但好大隻好重手!!!
抱住佢我實在捱不過五分鐘......
之後我心諗: 小豬嘜兩個月後就會變成咁大嗎? 我好唔捨得佢變大個啊!!
我想佢一路都好似小樹熊咁可以伏在我心口 T.T
媽媽真係好矛盾, 好想妳大個, 又好唔想妳大個......

妳的發展實在驚人, 我們一路都是貪方便, 將好多換片工具同埋玩具放在妳床裡,
我哋知道咁樣唔安全, 打算到妳大啲識得碌來碌去就要收起晒,
點知尋日妳自己踢踢吓, 就已經可以喺床上愈移愈高!! 高到開始碰到那些什物......
真係俾妳嚇親啊! 我們開始要收起什物了!

仲有啊, 妳剛剛告別 NB 片片, 而家開始著細碼片片了, 大個女喇~

小豬嘜的第七週 x Combi Cradling 360 ISOfix car seat 開箱了

剛剛的星期二, 小豬嘜七週大了,
她的變化實在好 match 網上的 developmental milestones

這星期視力又好了, 會追住望人, 妳開始認得媽媽未呀?

人仔大了, 獨處的能力也好了, 一擺低就喊的情況少了很多, 可以自己一個人在搖搖椅上待一會, 好讓媽媽可以去泵奶和做家務, 不過當然太耐都未得的,
見到妳咁乖, 反而是媽媽忍不住常抱抱妳讚妳叻咗, 不再是妳狂喊致媽媽被迫抱妳~

因為喊少了, 所以這星期有三晚爸媽都可以安樂地吃晚飯, 不用一邊吃一邊處理妳的哭鬧,
不過, 我們經過這個多月的訓練, 反而都習慣了十分鐘內塞晒D 食物落肚,
可以慢慢的進餐反而不習慣.....

這星期, 妳笑多了!! 是媽媽同妳玩時的開心笑, 笑到腰果眼, 媽媽見到真係甜到漏!!
最可愛是妳多了發聲, 現在的聲音:
第一聲調的 /a/ : 嗌人
第二聲調的 /a/ : 喊的前奏
/ou3/ 和 /au1/ 和妳玩時的回應聲音
/na1/ 喊到收聲時攞返個尾彩的聲音/ 鬧人!
媽媽覺得最興奮的, 是妳有三次可和媽媽互動的說 /ou3/, 是妳一次我一次的, 好像是我們講秘密!
有媽媽的專業訓練, 我相信妳會很快識講嘢 XD

爸媽而家每日都會帶妳出一出街, 落去內園行吓, 去會所坐吓, 仲有我們去了元朗公園陪爸爸跑步啊!
媽媽想妳看看風景, 於是冇帶 BB 車冇帶揹帶, 一手抱住妳行了兩個圈,
點知................. 妳全程都係瞓著咗...............
搖吓搖吓太好瞓了吧?!
之後我對手有就嚟斷的感覺, 就因為抱住了 5kg 的妳行了兩公里有多........

媽媽又試過單拖帶妳去了元朗廣場一次, 那天想好好地吃個午餐, 點知去到間間餐廳都冇位....
最後行到教育路的許願樹先有飯食, 但抱著妳就只可急急吃又急急走~
在元朗廣場的三聯書店, 買了兩 set 兒歌 CD 俾妳啊~

之後是要找 CD 機, 呢個年代已差不多絕版了! 點解唔轉做 mp3 用電話播?
哈, 我還是覺得用 CD 機播簡單又方便, 起碼第時湊小豬嘜的嫲嫲同姨婆都識攪~
行咗幾個地方都買唔到, 好彩爸爸最後喺D 好 up dup 的電器舖買到了!
哈, 呢個爸爸一聽到有嘢要買俾個女就會超級落力, 瞓晒身去搵o架喇~

這星期又買埋 Car seat 了, 之前睇過人人都讚的 Maxi Cosi, 去專門店都睇過, 但一路都未有動力去買,
近來再見到 Combi 新款的 Car seat Cradling 360 ISOfix, 上網睇已俾佢的 360 旋轉功能吸引了, 覺得超方便
佢又有埋我們一路想要的 ISOfix 功能
去了 BeBe Dream 專門店睇睇實物, 一睇就愛上了!!
佢的坐墊是用 Egg Shock 物料, 話雞蛋跌落去都唔會爛, 我哋摸上手, 真係好舒服,
再去摸吓 Chicco, Peg-Perego, 同 Maxi Cosi, 都只會覺得好硬, 真係返唔到轉頭呀!!!
最後都唔洗再考慮就買了, 雖然都覺得真係貴, 但學爸爸話齋, 用幾年除返都算 ok la



Car seat 送咗嚟, 妳坐過兩次都超好瞓, 應該超舒服吧~ :)

誰來照顧我?

Week 6, 妳愈來愈可愛, 愈來愈多反應
妳對人的反應多了, 開始有意識地對著媽媽笑, 雖然只是間中
眼睛應該又看到多了, 爸媽在妳身旁走過時, 妳會轉睛轉頭去望
這星期算乖, 有兩晚在晚飯時候睡著了, 爸媽難得可有餐安樂茶飯食
媽媽開始帶妳落樓行吓街, 唔洗妳日日屈喺屋企咁悶 (其實是媽媽悶), 但每次帶妳落去, 行不夠三座樓的距離妳就睡著了, 很 O 咀.......
每朝的四五點, 妳就是不由自主地狂叫......叫得爸媽都醒了, 但妳其實就是在發口夢已矣, 但真係慘叫得像俾人虐待.......

就來返工了, 媽媽想盡辦法再增加奶量, 最近試了個叫 Power Pumping 的方法, 似乎 work 喎!
平時一次最多得 100-120ml, 而家有時可以咁多, 好 amazing!



13/6 帶妳去了荃灣打針針同食輪狀病毒疫苗, 見妳食疫苗食得好滋味, 笑死我
但見妳打針針, 原來媽媽都會很痛, 生了之後, 才切身的明白什麼是骨肉之情, 打在兒身, 痛在母心......
之後幾日都要睇住妳有冇發燒, 原來打一次針真的要全家人嚴陣以待

這星期最煩的事, 就是炒了個保母
做了八天, 其實我很懷疑佢所講自己以前都湊過 BB 係咪真?!
換片又抹得唔乾淨, 開奶粉都唔識.......
有些錯誤話了又唔改, 最後發現了洗奶樽都有問題, 就決心炒了!

之後再請人, 好難請, 開一萬蚊一個月 D 人都嫌少,
人哋做惠康做麥當奴, 企足十個鐘都係三四十蚊一個鐘,
咁細個 B, 都係換吓片餵吓奶, 根本冇 skill 可言, 學一日乜都識,
連埋晾衫洗奶樽, 一日內 actively 工作的時間其實不過兩三個鐘, 之後就齋坐涼冷氣,
D 人都要 $80/hr 先考慮做, 仲要我俾到時D 人又都仲好揀擇, 真係黐 x 線!

最後, 家人都決定唔好請人, 因為請都未必真係湊得好同令人放心 (請了之前的陪月同保母已是很不快的經驗!)
長輩們決定幫手湊, 其實我們最放心的就當然是長輩湊, 但一路都係驚佢哋辛苦o者,
試半年, 睇睇點啦, 再決定洗唔洗搬屋或請外傭~

小豬嘜, 妳要好好珍惜嫲嫲同姨婆咁錫妳, 唔怕辛苦日日嚟湊妳啊~

倒數4星期

我的產假, 不知不覺已放了6 星期喇, 換句話說即是得返4 星期咋
單對單湊住小豬嘜的時候, 有時係好辛苦, 但我會開始唔捨得可日對夜對佢的日子
每天她也在變, 反應不同了, 多了,
等爸爸放工返來, 我會雀躍地告訴爸爸小豬嘜今天的新鮮事,
當我返工之後, 此情不再了.......

踏入六月份, 之後負責湊小豬嘜的保母姨姨都上工了,
暫時來半日, 我的日子已好過好多!
起碼有個人睇住 BB, 我終於有時間做家務, 執吓屋, 每日可先洗切定晚上的餸菜,
因為小豬嘜總喜歡在我煮飯吃飯時間扭抱, 之前真係好難煮到飯啊!

有了請陪月的不快經驗, 今次觀察呢個姨姨也特別小心, 不過暫時也滿意同放心,
監察了三日之後, 第四日我都開始放心可偷點時間外出買餸了~

屋企裝了 Cam, 我在街上用電話睇睇家中的情況, 心中不禁有點酸溜溜的感覺......
在家時我有時會嫌小豬嘜太黐身,
但離開後我見到女兒在電話影像裡要靠一個陌生人去照顧, 感覺很不是味兒.......
做媽媽, 就是很擔心陌生人照顧得女兒好唔好, 有冇背住個 Cam 亂來.........
我終於都明白, 點解好多舊同學都會生完 BB 轉半職了, 不過醫院冇呢支歌仔唱啦~

一個小朋友的頭十年, 很需要爸媽的陪伴同愛,
養不難, 教才難, 小朋友將來成了個怎樣的人, 就好睇身邊的人點對佢~
很可惜在香港生活, 實在容不了暫停工作十年先再重回崗位~
只希望我放工後還可以盡量的陪伴小豬嘜,
而家都係啦, 小豬嘜唔瞓覺的時侯, 我都會盡量同佢玩, 不要花時間滑手機和上網了~
小豬嘜睡覺後才抽一點時間打打 blog 吧~ (打這篇時小豬嘜又是伏在我身上甜睡了)

見著妳的小肥手臂, 媽媽就是很自豪啊~ :)

小豬嘜的初生 BB 尿片

新手媽媽, 發現買尿片都好有學問,
一早買定了兩包人人都話啱 New Born 的 Huggies 0 碼片片, 因為所謂的 NB 片片其實都較大,
點知原來兩包好唔夠! 五日就用晒了!! 攪到忽然間又要出去買!
D 人話 0 碼片片用兩包, 但其實唔係囉, 真係好睇 BB size,
佢話係 for < 4kg , 小豬嘜出世 3.1kg, 真係有排先夠 4kg 呀!!

之後又發現, 唔同牌子的 NB size 的差別可以好大!!!
下面張相就見到 Huggies 的 NB 同 Pampers 的 NB 個 size 真係差好好好遠!!
初頭又唔知, 有一日俾了條 sample 送的 Pampers NB 小豬嘜著, 點知因為鬆得濟D 屎漏晒出嚟.....
哈哈, 新手媽媽就係有呢D 烏龍嘢嘛!
最後拆晒屋企有的不同 NB 片片出來比較吓, 就知道又要無啦啦去買了 3 包 Huggies NB 片片,
用了 10 日之後, 小豬嘜又肥了, 先轉了 GOO.N



人人都讚日本片片好, 不過其實用了 Huggies 成個月, 我感覺又唔錯喎!
佢有條防漏邊邊喺腰位, so far 未試過爆屎上背脊
而家仲用緊 GOO.N, 因為買了兩大包, 質地的確係又棉又軟, 不過真係好鬼大條....
小豬嘜而家有 4.6kg , 我都係覺得大條~
無啦啦又搵條 Huggies S 碼嚟對比吓, 吓!? 原來 Huggies 的 S 碼係仲細條過 GOO.N 的 NB 碼, 唔係化...........

至於邊隻對 pat pat 好, 暫時小豬嘜間歇性都有少少 pat pat 紅,
其實兩隻片都會, 反而我覺得係換片換得密唔密影響較大! 同埋 BB 會唔會成日都痾 S~
通常紅得都係因為有 S 'up' 住, 多過係尿尿啦~
其實我哋換片都換得好密, 之前我仲驚我買得太多尿片, BB 未著完就要轉 size,
點知原來完全唔洗擔心, 一日真係起碼用 10 條片的!!
寧願貴D 都唔好辛苦 BB 啦~

不過學老公話齋, 一個 BB 真係製造好多垃圾,
見到家裡的垃圾桶, 大半天就可以因為裝 BB 的尿片裝到滿要倒垃圾, 仲有用好多濕紙巾同棉花抹 pat pat....
第時大個女, 小豬嘜要幫手做返D 環保工程啊~

小豬嘜滿月了

這星期也很想寫吓 blog, 但每天仍然是忙忙忙著湊小豬嘜
如她睡著了，我要把握時間泵奶，洗奶樽，洗衫做家務煮食。。。
因為她清醒的時候，根本她不讓我離開她半步，很扭抱，一放低佢喺床仔椅仔就大哭了。。。
所以每天非常不夠時間用，雖然我全日在家，但根本好多事情都做唔到

話咁快小豬嘜就滿月了，這個月是我人生中最辛苦的一個月
真的，辛苦過考會考，讀大學考畢業試
讀書和工作，盡力地做就是會有相應的回報，但湊小朋友完全不是
因為照顧一個生命，很多事情不在你掌握和控制中，即使你很努力的做，有時結果還是很令人沮喪，要氹小豬嘜瞓覺就是如此。。。



沒有陪月沒有工人，凡事就是親力親為，雖然好辛苦但一個月內令我徹徹底底的學好了做一個媽媽
其實很多謝奶奶同阿姨呢個月來幫吓我手，炒陪月一事，或者是上天的一個安排，
不是炒了，或者我也體現不到這麼多她們對我們的愛

過了瘋瘋癲癲的一個月，幸好也見到小豬嘜長大的成果
腳仔又踢得大力了，手仔常常會抓住我的衣服
發出的聲音多了很多，喊也大聲了很多
托賴而家都算食得瞓得，肥了重了很多，大概有 4.4kg 了!!!
成10磅的人仔，好重，我已經抱佢抱到手痛了。。。。
而家開始食 4安奶了，慢慢嘗試緊由三小時改做四小時一餐，如此一日餵少兩次的話，時間會好用好多

爸爸這星期病了，睇了兩次醫生都仲未好返，但他仍很落力的去照顧小豬嘜和處理家中鎖事，
媽媽好希望佢快啲好返啦

產假已過了一半，全職照顧小豬嘜也在倒數中，
很辛苦的日子，但我會很懷念每天有這麼多時間看著妳的轉變和長大吧

打了咁多字，就是因為小豬嘜伏在我身上睡了，我知我一放佢落床就等同吵醒她，就用了一個鐘慢慢的用電話打字了

爸爸的禮物

生之前, 我以為我會係主力買玩具俾小豬嘜的一個,
生之後, 我發現波比先生才是瘋狂買玩具俾小豬嘜的人

小豬嘜:
妳的玩具並不是什麼奢侈的玩意, 也不是爸媽揮霍的理由,
反而每一件, 都是爸媽同妳相處久了, 發現了妳的喜好, 特意去找給妳的小伴侶
是心意而不是物質的追求啊~

爸爸知道妳喜歡看色彩鮮艷的東東, 終於買到了個河馬仔投射燈燈俾妳,
妳看得手舞足蹈很開心啊!!



還有知道妳最叻就是腳撐撐, 爸爸星期五放工後, 飯都唔食就去一田睇玩具俾妳,
最後買到個心儀的掛床音樂琴, 遲D 當妳識嘅時候, 用腳仔一撐就會有音樂了!
不過而家妳齋睇睇又是色彩鮮艷的公仔, 又睇得好開心呢~



我們小時候那年代, 家中不算富裕, 沒什麼玩具, 妳這時代幸福多了~
不過愛小朋友不應該透過物質的滿足, 而是應透過親子的相處去表達呢,
雖然妳生活上不至缺乏, 但我們希望妳學會知足常樂, 要知道一切都是得來不易, 凡是都要感恩啊~

媽媽的成績表

今個星期一又去了健康院磅重,
6/5 -13/5 的一星期, 體重由 3.13kg 加到 3.27kg, 只有 140g, 俾醫生話差少少,
過去的一星期小豬嘜食奶叻了, 吃多了又快了,
所以 13/5 - 19/5 的一星期, 體重由 3.27kg 加到 3.61kg, 足足有 340g 咁多!!!
醫生讚體重增長得好好呀, 所以唔洗再嚟 MCHC monitor body weight 喇!!

對一個媽媽來說, 妳的 weight gain 就是媽媽的成績表啊, 代表了我湊妳湊得好唔好,
這一次的合格令媽媽欣喜若狂~ :)

不過做媽媽又真係乜都擔心一餐, 而家妳吃多了, 媽媽又擔心妳吃得太多會痴肥 XD
有時未夠鐘妳又好似想食, 我都真係唔敢俾妳呀, 因為亦都驚妳消化唔到會嘔奶奶同食滯
但見到妳開始一節節的手瓜腳瓜仔, 媽媽又好開心啊,
做媽媽就是很矛盾

今天妳一天佈痾了很多次大大, 其實我知道母乳寶寶來講是正常的,
不過做媽媽又真係乜都擔心一餐, 要上網 search 吓係咪真係正常架?

現在爸媽最頭痕的是妳有時夜晚要人抱住先肯瞓, 但我哋自己真係好想瞓,
驚抱抱吓妳自己又瞓著咗會好危險呀........
唔好同我講咩忍心D 由佢喊迫佢自己喊到攰就會瞓, 試過了, 冇用的...........
包住佢呀, 放音樂呀, 好多嘢都試過了,
BB 有時真係好想人錫同抱抱, 其實我係明白的,
不過希望妳唔好日日啦, 媽媽個黑眼圈已經好大了.............

第一次去街街

這一天, 爸爸媽媽第一次帶我去街街啊! 心情興奮又緊張!
媽媽坐月真的坐到好好好悶..........
間中可以出去買吓餸, 行吓超級市場已經是我最大的「娛樂」!
適逢吉豬島大減價, 媽媽有個好藉口外出掃貨了!!! yeah!

帶 b 出街真係唔係一件容易的事, 萬一途中要吃奶要換片, 實在很麻煩.......
怪不得有了小朋友的朋友, 生育後的活動範圍就只有困在清潔企理的大商場~
此行到屯門市廣場, 因為可揸車好方便 (暫時都唔敢帶小豬嘜搭公共交通啦, d 人咳都唔帶口罩!)
原來吉之島購物滿 $200 就可以免費泊車一小時了, 太好了吧!

經過周詳的計劃後, 小豬嘜食完九點幾餐奶就準備出發, 距離下一餐奶有兩個幾小時可用,
我們到達後, 爸爸負責揹住小豬嘜, 媽媽就負責去掃貨
第一時間去超級市場, 為雪櫃補倉, 又掃了清潔用品,
係啊, 有了小豬嘜之後, 我們家最多的就是清潔劑, 不同牌子不同功效的有十多支啊, 哈哈......

第二站係電器部, 爸爸想買過個電熱水壺俾小豬嘜沖奶奶, 但睇唔啱啊
最後竟然喺隔離的廚具部買了個象印熱水壺, 都好好用呀!
多了個小 BABY 在家, 要用很多熱水,
媽媽又餵母乳, 自己也要飲好多水啊, 所以每日就是不停的煲水再攤凍, 煲水再攤凍, REPEAT X N 次.......
遇著咁啱要用熱水開奶/ 坐奶又發覺個煲攤凍緊水時, 真係好大鑊......
所以真係幾貴都要買過個啦~

第三站係去 Toysrus, 爸爸話有一日喺 Toysrus見到個投射燈燈的玩具小豬嘜一定鍾意喎, 所以去了搵,
點知屯門店冇呀, 白行了

完成任務, 唔洗一個鐘又返返上車 lu,
最攪笑係小豬嘜全程瞓到好林冇醒過, 一返到屋企樓下泊好車, 佢就痾咗督好大的 S,
哈哈哈, 笑死我, 妳好俾面啊! 冇頭先喺商場度痾.......
爸爸就負責連人帶 S 運返上屋企換片片啦!
第一次出街街, 總算是無驚無險的順利完成了!

我們的二人世界

小豬嘜, 謝謝妳這幾天對媽媽也很好, 定時的吃奶奶, 乖乖的吃奶奶,
媽媽也漸漸適應了和妳二人世界的日子了!

雖然每天還是很忙很忙, 為妳而做的工作總是排得密密麻麻,
做完一輪工夫, 轉眼又三個鐘, 又是餵奶和新一個循環的開始,
但熟能生巧, 漸漸我做得快了, 也間中有點空閒時間可休息~

不過每次要入廚房洗嘢煮食時睇唔到妳, 總是覺得心掛掛.......
開了抽油煙機太嘈, 我怕聽不到妳哭聽不到妳吐奶, 煮一餐飯總是提心吊膽的........

有一個爸爸, 把妳寵壞了!
就是常常的抱著妳睡, 抱了很久都不願意把妳放回床仔,
雖然妳會睡得特別甜特別定, 但爸爸不在的時候, 媽媽又有很多事要做不能抱妳入睡的話真不知怎算........

妳呀, 愈喊愈大聲, 好似劏豬好似拆樓咁大聲了!
俾多兩分鐘媽媽去整妳支奶奶啦好冇? 冇可能一喊就即刻有得食o架喎.........

Full Time Mom 唔易做

而家我切身的體驗到, full time mom 真的唔易做, 真係返工都冇咁辛苦呀~

今日小豬嘜妳玩嘢喎, 平時三四個鐘先食一餐, 今日無啦啦餐餐食得少, 又兩個鐘就扭食大喊,
又唔肯自己瞓床仔, 扭人抱住瞓,
媽媽半夜已冇得瞓, 日頭妳咁樣我真係想抖吓都唔得, 我真係好無奈....... 真係攰到人都癲, 有一刻真係好想喊.......
(唔好問點解唔叫陪月湊住我抖吓, 因為個陪月好唔掂, 已炒了!)

不過向好嗰方面諗, 起碼妳肯食又有屎屎痾, 總好過妳唔食嘢嚇死我,
咁諗完, 心情就好了點

老實講, 當我覺得妳好難湊嘅時候, 我會諗返點解要生妳出嚟?
以前二人世界吃好的睡好的自由自在, 本來呢一刻我們還應該在歐遊中.............
而家見到爸爸每日要返工, 半夜也盡力幫忙湊妳, 晚上又犧牲了自己最愛的跑步時間來陪妳, 我會心痛爸爸的辛勞,
有時我會覺得很沮喪.......
不過我見到妳甜笑, 見到妳在我懷中入睡時傻笑, 見到妳捉緊我的手指頭時,
見到爸爸每次抱著妳時由心而發的笑容, 就知道這些都值得, 要努力再捱下去了~

爸爸可能知道媽媽心情唔好, 買了糖水請媽媽吃, 吃完真的開心了~

這星期妳有出世紙喇, 妳有一個名份了!
我觀察到妳在發展在進步, 手仔活動的方向和幅度多了, 妳可以用手撥撥玩具, 對我來說很不可思議!
今日妳不小心把手放到頭上, 扯到自己的頭髮而大喊, 笑死爸爸了!
妳會發出好多好多古怪的聲音, 有一次大喊之中唔覺意「媽」咗一聲, 我會很期待妳真的懂叫我「媽媽」的一日啊~

不過到健康院驗查時, 體重增長差了少少, 下星期又要再去啊........
冇辦法啦, 上星期有兩日唔舒服, 希望妳今個星期努力D 食奶奶同追磅數, 去埋下次就唔洗再去啦!

媽媽爸爸每天也和妳拍了很多照片, 其實很想放晒上網, 因為妳太可愛了!
但我唔想喺 facebook 迫大家睇妳D 相啦, 同埋學爸爸話齋, 始終網絡都係一個危險的地方,
縱然我好想在這個 blog 裡圖文並荗的記低妳成長的一點一滴, 但為了保護妳我覺得也不應在這裡放妳的照片啊~
所以除了之前的幾篇有妳個樣之外(哈, 我相信妳好快就已經會唔同晒樣了!), 之後都冇了~

我的第一個母親節

5月10日母親節, 我們三個人可以一齊在家過平淡的一日, 已經是很大的福氣~
因為尋日落住傾盆大雨, 媽媽車妳去仁安睇醫生, 已作最壞打算母親節要在醫院過, 看到妳被拮針針..........
好彩妳大步檻過, 好感激仁安醫院好好人的護士姐姐同醫生叔叔啊!

今日很多人在我們家探妳, 爺爺嫲嫲見到妳就最開心!

妳就是我最大最美好的禮物啊~
古惑的爸爸, 叫佢去買壽司, 就捧了個大蛋糕返來,
一家人一齊吃母親節蛋糕, 實在很開心啊~

小豬嘜在豬欄的第一個星期

這星期, 每一天也有很多事想記低, 但每一天都忙得沒時間打開電腦...........
開始明白, 點解好多 blogger 生咗小朋友之後個 blog 都會結束了~

這星期, 經歷了很多高高低低, 心情像過山車, 也傷心的哭了好幾次!
唔開心的事唔記了, 只想記低我們和小豬嘜很多的第一次



人人說女兒是爸爸前世的情人, 這句話又一次被引證了~
波比先生錫個女錫到燶, 之前說好了的管教理論, 當個女扮喊「吖」一聲, 有人就通通都拋諸腦後..........
除了努力清潔家居, 一有時間波比先生總是陪著女兒,
說真的, 我們都要好好珍惜一分一秒和她相處的時刻, 因為她就是一天一天的長大和轉變, 錯過了就沒有了~

小豬嘜啊..........
妳還是很難餵, 吃得少時媽媽擔心妳體重不增長, 吃得多時又怕妳好似早幾日咁嘔奶,
餵妳不能急, 要好好觀察妳的吞嚥動作以防妳濁親,
妳總是愛邊吃邊睡, 有時媽媽又會想是不是因我開刀生妳出來? 如果妳多留一星期在媽媽肚內, 現在吸啜同呼吸的能力會不會再叻少少呢?
做媽媽就是很多如果和擔心........

這星期我們買了很多次、試遍了多種奶咀頭, 妳的專屬櫃仔內就是無數個奶樽和奶咀.........
但始終未有一個媽媽覺得完全合意的.........

媽媽病了要吃藥, 使到餵母乳多了阻滯,
泵和餵一次母乳, 要洗 8 件奶泵配件, 兩個樽同一蓋一奶咀, 做泵媽媽真係會洗嘢洗到人都癲!
但辛苦一點, 就是很想對妳好一點~

妳不適時差不多兩天沒便便, 到妳忽然間痾了很很很大督的便便在爸爸身上時, 我哭笑不得,
我深深的體會到那廣告:「爸爸, BB 有便便喇」所想描述的是什麼感受,
做爸媽, 真係別無所求, BB 吃得睡得痾得就已經最大的願望, 好過中六合彩!

碰妳之前, 我們都跟足醫院規格的洗手, 一日洗幾十次手, 仲多過我返工.......

每天晚上, 我和爸爸和妳洗白白, 見到妳由驚驚變得好 enjoy, 我們也很開心

妳總愛白天睡覺, 晚上做隻夜貓子, 弄得爸爸團團轉冇覺好瞓.......
媽媽以前每天要睡八個鐘, 妳來臨後每晚有五個鐘睡眠已好好了,
有時真的很累, 半夜餵妳飲奶餵到我自己都恰著了...........

爸爸覺得妳夜晚不肯睡是怕黑, 於是在妳床邊安裝了一盞又一盞的小燈陪伴妳入睡
因為我倆都嚴重不夠睡眠, 一可以睡時總是大大聲的扯鼻鼾......
唔知爸爸搭車返工時又有冇扯鼻鼾呢?

妳的動作愈來愈多, 昨晚妳竟然懂得伸手去碰碰玩具, 雖然可能是撞彩, 但我們看得很開心,
很期待妳大個啲, 同妳一齊玩玩具~

出院了 - 人生最混亂的一日

第五日, 終於都出院了~
今日再試母乳, 已有 30ml 喇, 真係好開心!!



仁安真係好好, 有出院講座, 指導爸媽出院後的事宜,
入了仁安 BB 會, 有好多贈品送啊!



今日好多謝師弟妹揸車送我哋返屋企!
回家前我們去了買牛乳蛋糕慶祝啊, 牛奶味濃不過甜咗少少



不過, 今晚實在係我人生最混亂的一日
雖然已經準備了八個多月, 但原來還有很多 practical problem 要到 BB 返到屋企先會發現.......

最令我們 frustrated 的, 是 BB 食唔到奶,
之前聽人話 Chu Chu 奶樽好, 唔啜冇奶出, 啱母乳寶寶唔好學懶
但真係好多嘢要試過先知, 小豬嘜可能就是天生的懶豬豬, 真係唔夠力用 Chu Chu 奶樽,
回家後的幾餐, 餵成個鐘都食唔到喺醫院的份量, 令爸媽都好擔心!!
需知道食唔到奶 --> 去唔到黃 --> 又可能脫水, 所以我們真的很緊張!

最後, 我夜晚撳住個仲好痛嘅開刀傷口, 走了去千色店買奶樽奶咀!
真係行一步, 痛一下......... 上落小巴仲痛, 但為咗個女真係冇辦法,
轉奶咀後情況好了點, 但其實之後都係有好多飲奶的問題, 遲些再記........

好多的第一次, 好夜好夜都未瞓到, 真係人都癲!



抱著小豬嘜回家的一刻, 我很感動~
兩口子的小家庭, 由今日開始變了三口子了, 我還是覺得自己很像在做夢.......

未來的十幾廿年, 我們有太多要學習了, 有太多挑戰了,
還好有這個好老公在身旁一同前進~

五天沒見的屋企, 整整齊齊乾乾淨淨, 
我見到家中多了很多波比先生用心做的家居改善小工程,
一個個的掛鈎, 將以前凌亂無章的小雜物, 掛得井井有條,
家中添置了很多小用品, 都是為了令照顧小豬嘜更方便的,
以前這些小家務, 波比先生大概不會主動去理, 老婆叫, 他就幫手做,
但今天我見到的, 是他自發的做了很多, 老婆一路都想他大個仔, 現在因為小豬嘜的降臨他真的長大了不少!

我見到他很用心很落力的去做一個好爸爸, 媽媽其實很感動
雖然有時候還是力不從心, 老婆因此亦會很勞氣而禁不住吵吵罵罵,
其實之後也很抱歉, 因為人總需要時間去學習, 他肯認真和努力去做已經是很難得~
所以, 請唔好怪我有時會粗聲粗氣鬧人, 我都會盡量改善的, 我也要做一個好媽媽的榜樣啊~

仁安開刀記 Day 4 - 超好住的仁安醫院二人房 x 第一次餵母乳 (仁安醫院餵奶時間表)

之前在選擇私家醫院時, 初揀了法國醫院, 但後來聽聞住過仁安的朋友都大讚 very good, 而且呢度 support 餵母乳多一點, 就造就了我們最後選擇了仁安

入院前 search 過餵奶同探 BB 的時間, 但原來資料都非常之唔 update
所以在此 post 了張 2015 年版的時間表, 希望有緣人睇到的話有所幫助



大部分產婦都係住喺三樓, 每天有6 節餵奶時間, 只准媽媽入去,
入到去報上床號, 姑娘就會帶 BB 俾妳,
每個餵奶時後有一個鐘, 姑娘都好有心機指導大家餵母乳的技巧,
每次都會先試俾 BB 埋身餵, 餵到 20-30 分鐘左右, 就可以問姑娘攞水奶嚟餵,
老老實實, 頭三日大家都未上奶的, 埋身都係俾阿 B 刺激吓媽媽,
除非你係D 好死硬派的全母乳媽媽, 好堅持寧願阿 B 冇嘢食都唔肯補奶粉, 否則都係跟上面的 schedule 補奶
又老老實實, 我見過一個又一個因為好堅持寧願阿 B 冇嘢食都唔肯補奶粉的個案, 攪到個 B 黃疸指數好高又要照燈 (冇嘢食冇屎痾就去唔到黃), 大家都慘.....
所以我覺得餵母乳這件事就隨緣啦, 一路都係輕鬆面對,
唔好攪到食奶粉好似係罪過咁, 我細個咪又係食雀巢奶粉大, 以前D 奶粉仲冇而家咁講究添啦~

仁安的 practice 係 Day 0 食 1oz, 之後就每日加半安咁上,
即係去到第四日, 已經要食 2.5oz, 其實我覺得加得太快.......... 阿 B 個胃邊有大得咁快呢.......
所以第四五日餵到尾都好有壓力, 成日餵唔晒又夠鐘, 之後D 姑娘太盡責, 有時會質阿 B 食埋佢....
哎呀, 所為媽媽見到都真係有D 心痛架, 佢食唔落咪由佢囉,
我始終覺得個個 B 的胃口都唔會一樣, 大人都有人大食D , 有人細食D 啦, 食唔晒點解要迫佢呢??

今日開始我 feel 到我真係有母乳了, 餵完 7:30am 嗰餐就膽粗粗問姑娘拎個空樽返房, 試吓自己擠奶,
喺醫院用唔到私家泵啦, 因消毒唔到,
醫院都有電泵可借用, 但每次都收錢咁
所以都係用人手咋,
波比先生見我好努力, 話完全唔似我性格......... (因我個人好心急, 擠奶咁慢咁花時間......)
冇計啦, 一嚟初乳真係對 BB 好好, 二嚟如果唔擠吓, 我好驚會乳腺炎, 到時就慘了!!!
所以辛苦D 都唔緊要啦~
攪咗半個鐘, 先有 10ml 咁大把, 真係滴滴皆辛苦o架~
擠完就即刻交返去育嬰室俾姑娘雪住, 講定想幾時餵, 到嗰餐姑娘會幫你暖返佢~

雖然得 10ml 都真係少到可能俾人笑, 但這就是媽媽給 BB 的第一份禮物啊~
到了 10:30am 的餵奶時間, 自己去親手將這餵給 BB, 很滿足高興~



住埋今晚就出院了, 我真係好想讚讚仁安的所有服務設置, 真係冇揀錯!!!
或者在公立醫院工作多年, 我已習慣了那些病房職員懶懶閒的態度,
來到私家醫院, 簡直是覺得五星級貴賓式的招待!
起碼所有事情都是有求必應, 撳個鐘就好快有人嚟幫妳

平時喺公立醫院, 如果你撳鐘叫人換壺熱水俾你/換床單, 你得到的回覆會是:
「未夠鐘換水喎」
「夠鐘就會一齊換床單架喇」
「你估得你一個病人呀? 我哋好忙好多嘢做o架, 等陣先啦」 (但其實匿喺 pantry 玩手機)
有些貼身的護理, 做得粗魯求其, 你會覺得好不被尊重

在這裡嘛, 這幾天就是住得很舒服同安心, 真係冇得講的, 始終人手比例呢度高好多!
姑娘都超好又有禮貌, 樣樣嘢都解釋得好詳細, 令你好安心~

我住二人房, 仲要係新翼的房, 好新好靚,
最愛就是那可對講的 call bell, 有咩事搵人好方便~



每人都有有鎖的衣櫃, 呢度仲有雪櫃, 又有梳化椅俾家人休息



每張床都有私家電視, 鍾意睇咩台都得, 仲有幾個係仁安台, 播放一D 生產同產後知識的 video, 唔錯!



最最最正係個酒店式的洗手間, 每人有一格私家的鏡櫃, 梳洗用品都放進去, 用起來超方便
需知道產後去一次 toilet 要清潔其實係好大工程, 呢度的 setting 真係令人好方便
上次住進了 QE 病房半天, 那洗手間的清潔程度令人側目!!!!
廁板同地上都是濕濕的, 廁格內鈎都冇個, 都唔知點帶一堆清潔用品入去........ 多人用, 又唔勤清潔就是這樣........



這裡還有產婦膳食套餐,由 $880-1400 不等, 一日四餐仲有湯水, 不過我嫌有點貴啊~
也可以打電話落 canteen 散叫食物, 但 canteen 的 menu 望落一D 都唔好食.......
最後這幾天, 早上是一早準備好的麵包同媽媽奶,
下午同夜晚就波比先生放工買嚟俾我, 哈哈, 食返D 自己鍾意食嘅嘢開心好多!

總括而言, 這次住院的經歷實在很好~
生 BB 是件很辛苦的事, 如果再揀我都會揀返喺仁安生, 這些錢你會發現是花得很值得的 :P

仁安開刀記 Day 3 開始有母乳喇

Day 3 了，兒科醫生話 bb 食得痾得唔黃，太好了
我個肚都冇咁痛喇，行我好咗，係起身坐低時仲痛啫
今日醫生仲幫我喺傷口貼咗防水膠布，於是我就即刻沖涼洗頭，乾淨晒真係好爽呀！

多謝波比先生繼續送飯送日用品俾我，哈哈，今日食咗魚柳包同豆腐花啊，好過食 canteen 好多!
仲有奶奶的愛心湯水啦！

老公仲帶咗麥嘜嚟陪我，順便介紹吓我住院的小恩物
個象印燜燒杯好好用，用來沖奶呀，沖上奶茶好方便
個 Starbucks 保溫杯就用來焗炒米茶，係呀每日都好多嘢要飲呀，幫助上奶嘛

今日去餵奶，我開始有少少母乳了，好感動呀
不過隻小豬嘜見得太少，都仲係啜兩下就收工，食奶樽就好落力
一路食一路痾 s....... 笑死我。。。。

親子時間，影到佢捉住我隻手指，好溫馨的一刻啊
仲有兩日就回家了，到時爸爸想點抱都得啦

仁安開刀記 Day 2

入院前失眠，入院後的第一晚都唔係瞓得好， 不停地醒
因為傷口都幾痛，基本上只可瞓平，不可打側
但我已瞓平了十幾個鐘，瞓到腰都痛，
唯有間中忍住痛側少少個人，瞓到一陣，又會因腳痺而醒，又轉返平卧，如是者重複了 n 次，所謂的瞓到側朝 5 點啦

好多謝家人同好朋友來探我，又買嘢俾我食
哈哈哈，第一天本來話只可以食粥水，即冇米粒嗰啲，
但我又覺得自己冇咩事，就食魚粥食蛋撻了，哈哈

第一天我冇得落床，靠波比先生去睇 bb 影相影 video 俾我睇
大部分人都話 BB 似波比先生喎，哈哈，都係嗰句，似邊個都冇所謂，最緊要健康

第二天，我的主診馮醫生太忙了，要下午先來巡房
好彩佢打電話來叫姑娘幫我除鹽水除尿喉
然後就試落地，都冇問題，試自己去小便又冇問題，好感恩，我之前最擔心的情況都沒有
終於我可以行去抱抱小豬嘜了!

公立醫院係會擺 bb 喺媽媽身邊，鼓勵阿 b 幾時喊就即時餵母乳
但私家醫院係 bb 住育嬰室，媽媽只可依指定時間去餵奶，每日只有一次十五分鐘的親子時間可以俾爸爸都入埋去
有好有唔好啦，好多過內人朋友都話好，因為產婦可有充足休息，個個都話妳要見，之後大把時間妳冇得瞓要湊佢，叫我好好珍惜呢幾日啦 XD

第一次抱阿 b, 哎呀，這就是我女兒嘛？!
好難想像佢尋日都仲喺我肚入面，今日就可抱佢了，真係好開心的!!
不過開刀生始終未有咁快上奶，最後其實都係餵水奶，第一次餵自己個女，好難忘

仁安開刀記 Day 1

先來報個喜，小豬嘜順利地出世了!

生 BB 這一世人一次的經歷，真要好好記吓啊！

星期一下午，我們到了仁安醫院登記，本身是 book 大房的，但滿了，
加錢轉了雙人房，其實仲好啊，
住進了新翼的雙人房，好新好靚，得一個同房，一定唔會太嘈
因為是冇房下轉的，所以雜費醫生費都是按原本的大房價錢去計，實在幸運

星期一是聽姑娘講解聽日的流程，抽血，聽胎心等
攪咗兩個鐘就 ok, 可選擇喺度瞓，免費的
但我選擇 home leave 啦，始終屋企張床係最舒服

星期二  2015年4月28日
5am就起身了，沖涼梳洗之後，就搭的士去仁安
用快的 app 去 call 車，又幸運地遇上手車好安全的女司機
準時七點回到仁安了

呆坐了成個鐘，8:15 am 終於要換衫起程
第一次瞓上那張 stretcher 上面，被推去手術室
過程很像拍戲般。。。。

到了手術室，見麻醉科醫生簽了 consent, 打豆，OT room ready 就被推入去了!

一入到去就好似打仗咁，幾個姑娘圍住我幫我瞓好個位置
麻醉科醫生話咁快就已喺我背脊打了麻醉藥，很快下身就開始冇知覺了
產科的馮醫生就開工，同可以叫波比先生入來陪產，遮了塊布，其實我都唔知做到邊。。。
只知啲麻醉藥有啲上腦，想嘔，又天旋地轉。。。
仲有尋晚太緊張，三點半後就失眠，個人又攰又 wing 咁。。。


好攪笑，麻醉科醫生竟然會幫手推阿 b 出嚟!
就係佢推了三下，阿 b 就出來了!!!! 不過我同時俾佢嗰三下攪到更想嘔!!
之後個人有點溫溫燉燉。。。。只知波比先生去了剪臍帶，又抱了阿 b 過嚟合照
話咁快，馮醫生已縫好針，我被推出去觀察病房，過一陣冇咩事就上返病房了

BB 有 3.14kg 啊，仲係個大頭 BB, 如果是等夠期的順產，真係唔知點生。。。
作為阿媽，我最 concern 的只是 BB 是否四肢五官健全，係就已經心滿意足了!
因為平時在醫院，見盡太多生出來才知道有健康問題的 BB 啊，
所以小小的身體健康，就已是我最大的願望了

[愛美食] BLT Steak Lunch Buffet x 桑寄生蛋茶 X 煲薑醋

最後一個二人世界的星期天, 同波比先生外出走走~
上 Openrice 睇咗好耐, 最後鎖定了在海運的 BLT Steak,
Weekend 有 Lunch buffet 提供, $218 的價錢就可以由沙律、湯、燒牛肉吃到甜品,
大胃王的話, 可以 upgrade 到三百幾蚊連一個主菜, 但睇過食評都話就咁 buffet 已很足夠~

我們十二點幾到達, 未算多人, 但一點時已很 full 了!
在落地玻璃下, 睇住維港景食個午餐, 絕對是賞心樂事!!

先端上的是一人一個 Popover, 那是一種超超超好吃的脆身麵包, 好食得再多我也吃得下 (可惜只有一個....)
龍蝦湯配上脆脆麵包粒同芝士脆片好正, 不過就是過咸了少少
然後就是自助前菜 salad bar, 大部分食物都好特別啊, 如有蛋批, 蒜蓉烤蕃茄, 魔鬼蛋, 白汁什菌都是很好吃!
回本之作就是任吃的燒牛肉同燒羊脾, 我叫侍應俾熟D 嘅部位我, 不過那位置落了很多鹽去醃, 過咸了, 但肉質確是很不錯!!
然後就是甜品區, Tiramisu 整得好正宗, 不過因為太正宗, Lady Fingers 都浸滿了酒, 我唔食得呢....
香蕉蛋糕也很讚, 不過最正嘅係麵包布丁啊!!! 呢度係我食過最最最好食嘅麵包布丁!
可能用的麵包不同, 蛋漿也不同, 吃出來的口感就似是聖誕布丁多過是雞蛋布丁,
面頭烘得很脆, 入面還有水蜜桃片, 即使飽, 也添吃了一遍 :P
水果有西瓜菠蘿哈蜜瓜, 西瓜啱我呀, 清胎毒嘛
整體是十分滿意的一餐啊!!



今日仲有煲嘢, 今次煲桑寄生蛋茶終於都成功了, 上次煲得好苦啊!!!
因為上次係上網睇 recipe, 點知被老點,
我比較過D recipe, 同樣的 2L 水, 有D 話加幾十克桑寄生, 有D 又話要加百幾克,
上次應該係落得太多, 同煲得太耐, 苦澀得自己都唔係好想飲......

今次呢, 就用了 80g 桑寄生 + 2L 水,
滾起後中火煲了 15 min, 再放入真空煲中焗 45 min,
隔去桑寄生葉, 加入冰糖同埋雞蛋, 煲多十分鐘至冰糖完全溶化,
嘩, 出來的味道好合心意! 雪凍後仲好好飲, 清清甜甜的, 咁熱的天氣飲一口涼透心啊~



今日仲辛苦波比先生幫我去街市托了幾斤薑返來, 努力的刨刨切切, 然後煲薑醋!
本身都諗住唔好攪咁麻煩 , 去八珍訂D 現成的,
但又見自己得閒, 始終太喜愛自煮了, 又太喜愛食薑醋 , 最後都係決定自己煲

刨薑皮時, D 汁會彈到周圍都係, 冇戴眼鏡嘅朋友就要小心啊!
刨完就洗, 洗完就切一片片, 個人覺得切細舊D, 親友食起來都方便D!
然後白鑊炒薑至乾身, 再加了同珍甜醋煲了一小時, 待涼後入返玻璃樽~

之後每星期拎出嚟滾一次,
遲D 真係差唔多食時, 會再加黑米醋同埋蛋去煮, 豬腳就唔加了, 因為我都唔食, 普遍朋友亦都唔太喜好~
阿姨話原來素食的做法是加黃耳, 都幾好喎, 健康又有益~

[小豬嘜] 補記: 一切由兩條紅線開始

這篇日記 save 低了很久, 一路都打算生得才 post,
懷孕的頭幾個月, 不是迷信的怕 BB 小氣, 而是從科學的角度, 實在會有很多母和嬰的問題令懷孕不成功繼續,
保守派的我, 也從沒在 facebook 高調的宣佈, 有D 朋友都係前兩日見到我放產假的 post 才知道

事發在8月30日, 我發覺身體有點唔對路, 於是膽粗粗做個 pregnancy test check 吓,
結果, 有很很很淡的第二條紅線, 但淡得似係 error......

8月31日, 再 check, 今次紅線明顯了很多, 根據我的多次失敗經驗, 如果不是有咗, 那紅線是會狠狠的絕對不會出現, 因為你身體內根本不會有那種 hormone

眼前的, 實在完全不敢相信........

正當我很努力地準備大阪馬拉松, 一心半放棄懷孕的時候, 得到這個消息, 完完全全殺我一個措手不及.......

我想話, 過去一個月, 我每星期跑四十多公里, 還行了一次八仙嶺.......
平時滴酒不沾的我, 咁啱星期一飲了幾啖啤酒........
壞事做盡, 如何不擔心.........

突然的消息, 令我也不禁想到很多將來生活的改變, 也有很多擔憂...........
能成功走過十個月嗎? 我不敢想像..... 因為見過很多失敗的例子

但我十分十分感恩, 這是上天的一份最美好的禮物,
上天安排了BB 在我全職小醫院後才降臨, 已經是工作安排上最好的配合,
秋天陀到春天, 已經是最好的氣候,
五月出世, 入學年齡也適中,
沒有更好的了~

我真的很感恩~

9月1日
其實這日子中, 斷斷續續的有點見紅, 尋日返返吓工, 即刻落咗 A&E 睇醫生,
好擔心, 生怕難得的希望一下子就幻滅了......

我又再要感恩處處:
1. A&E 分流做緊急, 半個鐘就有得見醫生了, 這是我第一次自己 check 到之後睇醫生, 由醫生再證實了這消息
確認了之後, 仍有難以置信的感覺......
那張懷孕證明, 像是 certify 我人生要走進另一個階段

2. 醫生十分之好人, 雖然太細照 ultrasound 都 check 唔到乜, 但都叫我唔好擔心, refer 了去大醫院睇產科

3. 醫生俾我開個日期放假, 工作實在忙, 我攞了一日咁大把, 激史老公同好友

4. 大醫院的產科即個星期五就有期俾我, 好快!! 剛巧那天我是返大醫院工作的, 不用周圍走~

5. 老公幫手打電話去 QE 的職員診所預約產檢事宜, 那是個專門給公務員和醫管局員工看的產科診所, 也可在 QE 生
本身上網睇過六月時有些準媽媽打去 QE 預約, 26 週先見姑娘, 30週先有得見醫生
好好彩, 我在第 10 週就可以見姑娘, 26週就有得見醫生
或者因為我好早就 check 到打去 book 啦!
波比先生很幫得手, 我 sick leave 在家, 靠佢 fax 所需文件去醫院, 他也做得妥妥當當

但...... 西醫角度, 見紅這些問題就只可以叫你休息, 甚至是絕對卧床休息, 實在沒什麼可以做
束手無策之際, 我想到睇中醫

我向來都是個不相信中醫的人, Master 時讀了一個 module, 覺得真係任佢噏
我去了個元朗好出名的中醫, 十點去到呆坐了兩小時先有得睇, 真係好多人!

一坐低, 佢乜都冇問就幫我把脈,
把完, 話我: 感冒未清, 胃有脹氣, 先天性心臟有事, 仲有便秘
我即刻 O 晒咀囉, 我一年 365 日都不知幾暢順, 何來便秘呀??
成堆都係都市病, 你咁噏實有幾樣中喎!

我開始懷疑佢嘅專業, 仲把唔到我有喜脈.......

我話佢聽我今次來的目的是安胎, 佢一臉驚訝.......
將佢把唔到我有喜脈歸咎於我胎氣太弱, 嘩, 真係好任佢噏囉!!!

不過算啦, 我都係叫佢開D 安胎藥俾我補補, 我諗安胎藥應該來來去去都係嗰D 嘢掛,
佢埋頭寫了張有超過廿種藥材的藥單, 我就 O 住咀去執藥,
多謝 $1260, 不過幾貴都要俾


回到家, 自己第一次煲中藥, 真不敢相信, 從來不相信中醫的我, 現在會睇中醫食中藥囉!
係苦係難飲, 但為了波 B, 我願意去飲啦~

9月5日
今天在自己工作的大醫院第一次見婦產科, 心情實在有點緊張

約了十點半, 準時到達, 但去到已經是長長的人龍,
淨係排隊登記, 已排了半個鐘!!! (還好彩之前俾錢我有職員快隊可排)

之後等等等, 先是新手醫生問症,
再等等等, 見到駐院醫生照超聲波了!
我深明得 5 週應該都係睇唔到D 乜, 但已見到胎囊, 同埋證實了起碼不是宮外孕, 心情也定了點~

可惜一波未平, 一波又起, 發現了我心跳很慢, 慢到得四十幾下
其實我一路都覺得自己D 心跳有D 奇怪, 成日都 feel 到好大力,
幾年前睇過 Staff Clinic 做埋心電圖, 又話冇事喎

今次的醫生很好, 叫我去再做心電圖, 一路做已知唔對路......
醫生睇完 report, 真係有D Abnormal waveform, 即刻 refer 埋心臟科
攪咗三個鐘, 係耐, 但要明白醫生工作好辛苦, 由八點幾巡病房, 再十點幾睇門診, 到一點半都仲未有飯食,
我會感恩醫生的辛勞, 在公立醫院做不是易事,
而不是吓吓好似其他無知的孕婦喺度嘈等得耐, 有點樣嘅阿媽, 就會有點樣嘅 BB,
咁巴閉就唔好嚟睇公立去睇私家啦~

在內科門診排期, 又是一個折騰, 淨係約個期都要攪 40 分鐘,
我只係諗平時D 公公婆婆嚟覆診一定好辛苦, 排除俾錢, 等兩個鐘先見醫生, 再排半個鐘約期, 又排一個鐘攞藥, 這就是公立醫療........
我要很感恩, 心臟科有快期, 十月尾就見


9月10日

這兩天, 身體應該好了點, 沒有再見紅了! 人也安心很多~

波比先生這幾天的轉變, 足以令我目瞪口呆!
識咗佢十幾年的壞習慣, 愛理不理, 一下子 180 度轉變,
話了千萬次都冇改到的壞習慣開始改掉了, 做事也認真積極了
我不得不用「轉死性」同埋「半若兩人」去形容他囉!

不過話時話, 轉死性的也有我, 懶惰的, 求其的壞習慣, 都通通自然的改了
只覺得, 自己再不做好自己, 如何去照顧多一個人呢??


知道有咗之後, 跑步運動完全的停止了, 因為現在還很不穩定......
但呢排運動量都算大的我, 一下子徹底地停止了所有運動, 後果到底會唔會迅速變大肥婆呢??
唉, 真係不敢想像呀............

晚上不可以和波比先生跑去洪水橋了, 倍感寂寞.......

最尷尬是很多同事都會問起我練習馬拉松的情況、今年報了咩 10k 賽事等等,
我都支吾以對.......... 因不想公開, 又不想作個大話如腳傷去應對........

渣打馬拉松, 我也收到了達標選手的邀請, 今年 2hr5min 內跑完了半馬, 可優先報下年的渣馬啊
期待著參加挑戰組的賽事, 點知而家只可打打氣,
波比先生要努力呀!!!


這幾天, 都睡得不好, 清晨四點幾就失眠了 T.T
在醫院開工時, 已是起床後的四個多小時, 我開始眼瞓......
就這樣, 返工時不停打呵欠 zzzzzzz...........

吃方面, 縱然我是貪吃, 但我也開始戒掉部分食物,
我一向都吃得健康, 而家要更健康, 感覺很有壓力......

因為孕婦每天需要的營養特別多, 但不是狂吃的吃得多!
在急症室時又檢到有少少貧血, 自己也擔心.......
所以每天開始一粒 Materna 同鐵丸, 正餐都是計過度過, 有齊晒 n 種所需營養先得~
同事請我食零食, 想食但都要婉拒...........

戒口, 我又唔覺得真係好辛苦,
都係十個月唔食o者, 又唔係成世都唔食,
值得的話, 我會忍到

但中醫的戒口清單實在騎喱,
曲奇餅, 月餅, 粟米都要戒? 湯都唔飲得?? 我真係唔知咩理論囉........
我想話我日日食香蕉食到生, 一樣冇事冇幹, 中醫實在好多古怪又無稽的理論!

2014 年10月

這個月做了唐氏檢查, 度頸皮時有D 厚, 因為 book 得俾我個期已經係好遲了, 所以相對個數值都大 D.......
護士幫我抽血, 抽極都抽唔到, 又賴我血管幼.....
但我想話平時係抽血員抽, 唔洗一分鐘就抽到三四支囉...........
最後兩隻手督咗 4 次, 要換個個護士先抽到 =.=

但兩星期沒有收到電話即是沒問題了, 好感恩!

10月尾去了心臟科的覆診, 醫生又是超好人, 即刻同我做了個 ECHO, 心臟的結構功能照計正常,
幫我book 了個 Holter, 詳細用心的解釋, 建議我減少咖啡因攝取,
其實懷孕後已唔飲得咖啡, 之後心臟的問題自己都感覺到消失了~

[小豬嘜] BB 床 Ready!!

倒數三天, 還有什麼要做? 仍然是無止境的清潔工作......
有D 月頭已清潔咗的地方, 又污糟了, 所以又由頭清潔過..........

今日把廚房、焗爐、水煲、麵包機、抽油煙機、雪櫃等等也抹得一乾二淨,
哈哈, 其實自己用就冇乜所謂, 但之後有陪月有鐘點姨姨用, 見到咁污糟就唔好啦.........

仲有同波比先生夾手夾腳砌好埋張 BB 床, 這款 California Bear 的 Mercury 床仔是小 size,
其實我反而覺得個 size 好好啊! 放喺廳都唔會覺得好阻地方! 其實原來只是比張 High Chair 大小小~
第時一邊食飯/ 睇電視, 放小豬嘜喺度又可望住佢, 幾好呀~
放佢喺搖搖 high chair 瞓唔係唔得, 不過說明書都講明只係適宜瞓一小時內,
始終長時間瞓的話, 都係瞓返床仔好D 呀!



今晚駕車出去食飯之後, 波比先生就要同佢個車頭的皇位講再見了!
小豬嘜出世後, 媽媽繼續做司機, 爸爸就要坐後座照顧住小豬嘜, 有排都冇得坐前座了!!
仲有第時我都唔可以車波比先生去西鐵站返工喇, 因為我要等鐘點姨姨來, 大家出門口的時間不同了~
從此, 波比先生又要排長龍等小巴, 或三十幾度天氣下行去西鐵站 :(
多了一個人的生活, 每個人也要有點犧牲, 所以希望小豬嘜第時要學懂感恩, 知道有人為她付出過的一點點就好~

ML 第一天 - Shopping Day!!

70 天 ML 的第一天, 過得很充實!
可以造一份豐富的三文治給老公帶返工吃, 然後做家務和 shopping!

上午去了特價中的 759、日本城買嘢, 仲有去藥材舖買咗好多煲湯用的藥材~
下午又去了屯門吉之島掃貨, 呢幾日做緊會員特價, 八折九折都有!
我去超級市場買咗好多食物呀, 近來簡直要為屋企儲糧, 因為生後起碼兩個星期乜都買唔到,
而我個陪月因為上一單未做完, 攪到要 5 月7日先返得工, 即係我都有5 日要靠自己煮飯食,
所以都要儲定D 急凍食物, 等波比先生唔洗買咁多餸
今日吉之島超級市場都有九折, 好抵呀, 又買了靚牛扒同埋海膽今晚做餸添!
仲抬咗隻鑊返屋企 XD

行埋萬寧, 今個星期五的優惠唔多吸引, 不過好幸運呀! 遇上了惠氏的 Promoter!
做了一個簡單的問卷調查, 就有 8 粒藻油 DHA 送了!
我一路都有食緊, 一粒正價要成 $10, 有得送實在太開心!

My last working day!

時間過得太快, 唔經唔覺就到咗今日, 係我產假前的 last working day!
好多謝兩個部門的同事同我開大食會, 喺我生之前真係有得食就好食喇 XD!
有我最愛的 PHD 炸雞, 同事門又一人整一啲食物啊!



有男同事都特登包了壽司, 冇交行貨, 好唔話得!
米紙卷係我整的, 仲有同事的朱古力花生醬蛋糕都超好味呀!



有同事仲抬咗部光波爐返嚟, 即烤雞泡魚乾同埋日式芝士年糕,
我一向都超愛吃芝士年糕啊! 用光波爐整可全粒都外脆內軟, 好正呢!




過去咁多個月, 亦非常多謝好多好好的醫院同事, 見親我搬嘢就制止我幫我手,
病房的同事特登叫我坐, 拉埋櫈讓位俾我坐,
好多時唔想麻煩人哋, 拉 patient 都盡量自己攪掂, 但有D 姐姐見到我咁嘅樣, 都好主動幫我,
較少去的 A&E 同 ICU, D 同事對我簡直係貴賓式的招待, 不停叫我小心D~
在這裡工作, 只能說十分幸運又感恩!

幸好在放假前, 所有 admin 的工作都順順利利地完成了!! 真係可以放假放得好安樂喇!
不過冇工返的日子會唔會好唔習慣呢? 湊 B 的生活又會係點嘅呢?
真係要下星期先至知咯!!

仲有五日咋, 愈來愈緊張!!
我的好好舊同事今日剛生了, 見到 BB 實在令人好感動~