十二月之星生日會

今日有個很開心的活動, 就是探訪 Twins 小朋友
波比先生, 我, 同埋小朋友都係十二月頭生日, 哈哈, 份外啱 key!

今天焗了一個朱古力香蕉蛋糕去, 我的小蛋糕模話係防黏但實在唔防, 恐怕整完成個蛋糕脫唔到模.....
於是用了焗爐焗麵包的大圓盤, 哈哈...... 焗了又大又扁的蛋糕~

我買了藍莓, 聰明豆同埋棉花糖, 俾小朋友自己放上去做裝飾
還砌了個「2」字, 因為小朋友兩歲了~
嗯, 兩年前第一次見面還是在 NICU 的箱仔入面, 而家識行識走識玩識講好多嘢,
有一對健康的小朋友, 真係要好感恩呀~



今日個蛋糕呢, 其實都打得起D 蛋白霜, 但唔知點解又唔係好焗得起, anyway, 希望你哋鍾意



亦都恭喜一對小朋友有 K.1 收了, 其實返幼稚園開開心心近近地咪好囉~
我返工時, 日日都見到D 住元朗/荃灣/美孚的家長帶住個幾歲大的小朋友搭車去九龍塘返學,
其實咁辛苦為乜呢?

Shopping shopping!!

哈哈, 今個星期超懶呀, 一晚都冇跑到......
鬼叫波比先生晚晚都出去 wet 咩, 冇人迫之下, 我晚晚都有過衝動想去跑, 但又在家攪呢樣攪嗰樣最終都係冇跑過 XD

星期五放工一個人鬆一鬆, 去 shopping 慶祝 12月的來臨!
每年的十二月都係我最開心的日子, 通常會放吓大假啦, 我同波比都生日啦,
過兩星期去旅行啦, 好多 X'mas gathering 啦, yeah yeah yeah!!

一個人的 Burger King, D 粗薯條真係好好味 (波比不在的日子, 我常常吃不健康的食物)



次後去行書局睇書啦, 去反斗城睇玩具啦, 最衰冇帶張星卡, 冇折添~
見到呢舊嘢, 好攪笑, 好想見到人用! 係咪真係點掟都唔爛先!?



仲有 iPad 版囉!!! 唉.... 不過我都真係唔主張俾小朋友睇咁多呢D 嘢囉~小朋友玩吓真正嘅玩具咪好囉~



最後去了 Bobbi Brown, 冇睇價錢就掃咗幾樣嘢俾自己,
又老一歲..... 每年呢個時候都覺得要補養吓, 但係又會發現上年買成 set 搽面的仲有大半支未用....
我都係一個好不顧儀容的 c9~ XD

[愛美食] 慶功@ 宮崎燒肉

我們行完毅行, 就約定了要食返餐好嘅嚟慶功!!!!
成千隊, 我哋總排名二百幾, 點都要賀賀佢啦!!
商議後決定去食燒肉, 這間在旺角雅蘭中心的宮崎, 我想試好耐了!!!

牛肉有很多種類, 當中的胸腹肉最正, 很有雪花紋, 再三 encore



食物種類多, 不過刺身俾得好孤寒!!! 初時揀呢度, 係貪佢又有燒肉又有刺身, 點知只係咁質素, 十分失望......
比起上次去銅鑼灣吃放題, 實在太大差距了......



食物雖然都唔錯, 不過D 服務態度真係衰到貼地,
例如叫咗佢又冇咗件事, 發晦氣, 落多幾次單就俾說話你聽,
Openrice 好多人都話服務差, 絕對真確無誤!!
不過算啦, 有個地方俾我哋吹水同發洩一下近來工作上的屈怨, 三個鐘都冇趕我哋就算係咁啦

[愛住家菜] 芝士肉醬千層麵 (附食譜)

去 BBQ 的一晚，波比問我整咩去食，見前排喺一田買了盒千層麵，就決定整俾大家試試

先要把洋蔥，紅蘿蔔，大蒜切粒粒
大火炒香

再落免治牛肉炒呀炒，聞到都香了

跟住就係調味，有四個蕃茄打成的蕃茄蓉，半罐茄膏，喼汁，鹽，糖，黑胡椒，bay leave, thyme, cinnamon
加適量的水，煮 20分鐘成肉醬狀

有時間的話，放在真空煲內炆佢幾粒鐘仲正



千層麵有兩款，有啲要先煮熟再焗，有啲直接焗就得
今次買了我偶像 Jamie Oliver 出品，其實可直接焗，
但我總係覺得唔放心，一陣焗得唔熟就浪費了所有心機，都係煮一煮到軟身較安全

之後就係一層麵，一層肉醬加鮮磨菇，重覆再重覆，我整了六層

最上面放幾片蕃茄同磨菇，灑上芝士碎，
放入 180度焗爐焗半個鐘就得



熱辣辣，又滑又多種口感，有時間的話整吓真係幾開心架

[愛跑步] 珍惜好天氣

尋日入南生圍跑了 10km, 今日又跟長跑教練一齊跑,
8am 的大球場, 好好天氣~



明明話今日「輕鬆跑」同埋「練長課」, 點知都唔係嘅......
波比、教練、兩個勁人, 加我一個女仔........
去南生圍佢哋就輕鬆, 我已經跑到死死吓, 鬼咩, 用緊 5'30'' 嘅速度喎...... 唔係化......
入到南生圍開始橫隔膜痛, 痛到要停低~

今日見到超多大雀呀, 好多人拎住長鏡係咁影!



熱到死的天氣~



回程時, 佢哋三個仲要練加速跑, 一支箭咁標咗返去球場......
得返我一個, 好彩教練等埋我, 又教我兩招~ 但佢都 2km 後走埋, 我一個人自己跑埋 4km 返去, 來回 13km

南生圍有張通告, 政府又想拎塊地出嚟俾人起樓...... 唉......
如果起了一排樓, 上圖的雀仔可能就唔再返嚟了,
請愛惜現有的大自然~

[愛美食] 燒燒燒蠔情夜

秋天到, 最好梗係燒嘢食!!
波比先生最開心啦, 又有得去村屋同事屋企 BBQ~

今次又去牛一買了好多生蠔, 有四款之多, 打算自己開~



我喺 Youtube 睇定D 教開蠔嘅 video, 其實都唔係好難, 不過真係好用力, 我開了十多隻已經好攰了!!



不過即開生蠔真係正好好好多呀! 新鮮的海水味, 加埋用完勞力去開, 就覺得份外好味!!



有幾隻珍寶蠔就用來燒, 燒完呢, Auntie 炒了些蒜蓉灑上面食, 真係一流!!!! 好肥美呀!!!



仲有好多其他的食物, 同事揀食材真係專業, 不同的食材就不去不同地方先買到最好~
呢塊牛扒又嫩又燒得外邊好香口, 激讚!!

炒青口就辛苦晒 Auntie 了, 用了好多辣椒同九層塔, 炒的時侯好大煙,
出來好惹味, 好快就清晒成盤了!



燒雞翼, 我鍾意食~~ 同事又有埋嗰支長針督住嚟燒, 每個位都燒到脆卜卜呢!
仲有燒茄子, 加少少豉油已經好正, 原汁原味~



最後有 Auntie 自己整的豆腐花, 真係好好好勁呀! 係由黃豆開始整的, 特別濃豆味~
仲煲埋薑糖水, 太好吃太令人滿足了!

仲有自家整的沙律同埋麵包, Auntie 都係超喜歡自己整嘢食, 每次去都交流不少整嘢食的心得, 實在開心~
好有口福的一晚啊!!!

[愛跑步] 最大的敵人

今個星期一, 放假時去了運輸處續行車證,
架 Note 話咁快就揸咗差不多一年了, 呢一年安安全全, 冇出過意外, 冇俾人扣分, 實在感恩~
接載過的朋友, 都話後座好寬敞舒適, 我們也很滿意這架車子~

難得去到深水埗, 點可以唔去食返轉合益泰?!
呢間長期都大排長龍, D 腸粉真係好好好滑, 又夠醬, 好好味, 我一個人食兩碟都得o架!!
閒日來到, 竟然有位坐 (星期六日來, 絕對是要企喺污糟的後巷食, 但又都迫到冇定企.....), 好開心~
其實真係好鍾意閒日放吓假, 出街都唔洗咁迫~



今晚去了食 KFC, 用了報紙的 coupon, $69 就有咁多嘢食, 正呀!
新出的薄脆點芝士醬, 真係好好味!



咁涼的天氣, 是跑步的最大敵人.......
真係好唔想落樓, 但係毅行之後, 星期日至星期三都腳痛然後就喪瞓, 今日再唔跑就唔得了.....
來回藍地跑了 13km, 感覺又唔錯, 因為對腳好返後, 今日跑起來特別的輕~

星期六日再來長課, 要努力喇~

[愛住家菜] 暖笠笠酸辣湯

天氣轉涼, 放工時很想很想食D 酸酸辣辣嘅嘢,
但屋企已整咗個醉雞, 否則我一定去元朗的上海麵家食個酸辣麵!!

真係好想食, 就臨時決定要自己煮!
上網一查, 見到 Christine 的食譜 http://www.christinesrecipes.com/2013/04/hot-and-sour-soup.html
快快買齊材料就開火, 很快就整好, 味道好得, 完全係喺街食嗰種味, 冬天吃一碗, 無比的快樂~

[愛住家菜] 和牛滑豆腐 x 牛肉蝦餅

今晚很牛, 先是有尋日喺牛一買多了的和牛片, 非常靚的油花, 心想就咁煎一煎都一定超好食,
就在下面墊個滑豆腐, 讓牛的油香滲埋落豆腐度, 一齊食雙重口感滋味~

今日唔知係咪全世界都打邊爐, 街市豆腐檔完全冇晒豆腐
去到惠康都買唔到百福豆腐, 得返一款叫「壹品」的牌子, 就都試吓啦,
不過意外地好食, 好滑, 簡直有點 creamy 狀, 令呢個餸更好食!



另有蝦餅, 今日懷疑被街市阿姐呃稱, 買了四兩蝦膠但拎上手得超少.........
主婦就是要即時變通, 就去買了盒免治牛肉, 牛肉粟米蝦餅仲好食~
如果冇溝貨, 呢碟嘢應該少得可憐.......

[愛住家菜] 酥皮焗牛柳 (附食譜)

今日放大假, 鬼咩, 行完幾十k 咁辛苦, 唔抖返D 點得!

問波比先生想食咩, 佢忽然間話想食酥皮焗牛柳, 好啦好啦, 就整俾佢啦~

在牛一買了塊靚牛柳, 又都唔算好貴~
兩邊煎香, 放在酥皮上



灑上鹽同胡椒, 搽上 English Mustard



包好酥皮, 用叉在四邊壓穩, 畫上花紋



掃蛋漿, 灑上芝士碎



200度焗爐, 焗半個鐘就得~ 同時焗埋薯仔, 仲有煎鵝肝~
完成了!!!



切開, 剛夠熟, 我想話呢件牛柳真係好食到飛起, 入口即化, 一D 纖維都冇, 極品呀!!!!
今次仲整埋蘋果醋汁點鵝肝食, 個汁都係亂整, 點知酸酸甜甜又係超好食, 忍唔住要俾十個正自己 XD
呢餐一定好食過出街的多多聲!

毅行過後

今日的 facebook, 都被朋友的毅行相片洗版, 有朋友行了兩個晚上先完成, 很替他們高興~
毅行其實不是挑戰別人, 我們怎樣也不會同頭十名的隊伍相提並論,
我們挑戰的, 只有一個, 就是自己

很想和大家分享蔡東豪先生的一篇網誌, 相信他說中了大部分毅行者的心聲
http://trailwalkerasphilosophy.blogspot.hk/

尋晚雙腳的酸痛開始浮現出來, 本來一行完我打了電話 book 枱食 buffet,
點知5pm 波比瞓到死豬咁腳又痛都唔想出九龍, 於是去了元朗的 Lam Tei Grill,
吃了一頓很豐富的晚餐, 再買埋甜品返屋企獎勵吓自己~



今天, 雙腳的酸痛更加嚴重........ 我想話我真係好好好耐冇試過對腳痛成咁.......
唯有用盡三個方法去解救
1. OSIM 美腿按摩機: 尋晚俾波比霸住咗, 今朝我先用, 嘩, 真係好爽! 按了兩個鐘, 好明顯好有效, 小腿的痛即時少了7 成, 同兩個鐘前的分別實在太大! 呢部嘢用了十個月, 真係只有買遲, 絕對冇買錯!!!
2. OTO 揼揼鬆: 大腿用唔到按摩機, 唯有放個揼揼鬆去按, 嘩, 一揼正最痛嗰兩舊肉時, 真係痛到想喊......
3. 浸熱水: 朋友都說這方法很有效, 但我一路都冇試過~ 但今日真係痛得太犀利, 於是開了一缸熱水浸了十五分鐘~ 浸完即刻鬆咗, 但又唔係維持得好耐, D 乳酸都係要俾時間佢慢慢散~

今日, 行路似企鵝.......
但我仍然很快樂~

上一篇: 最感動的毅行者

最感動的毅行者

2013年11月15日晚, 我們要出發去支援毅行者了!
放工回家後, 睡了兩小時, 波比先生負責出去買點心, 我就煲了薏米腐竹糖水, 12am 出發了!

去西鐵站途中, 先發現唔記得帶行山杖 一.一!
於是叫波比先生跑返屋企攞, 也一讚這個跑得快的老公, 沒有他就趕不上尾班西鐵~



西鐵到荃灣, 轉的士上城門水塘, 上到去已塞到入唔到,
去到 BBQ 場, 1am, 我們在城門水塘等你們



那裡人山人海, 仲有人真係透爐燒嘢食, 香死人咩 >.<!!!!



1:38am 我們的隊伍終於都到了, 快快招呼佢哋坐低食返餐好的!
波比買了腸粉燒賣牛肉春卷鳳爪蘿蔔糕, 吃得大家津津有味!!

仲有我的腐竹蛋糖水, 兩大壺都唔夠分, 下年要再煲多D ! :)



食飽飽, 被趕走, 也多謝大家的趕, 使整體時間縮短了! 有時就係在休息站待得太久, 會損失時間~

有兩個朋友陪行了之前的六十幾公里, 他們要走了, 我和波比接力守護這班毅行者
波比就幫朋友孭袋孭水, 減重後希望朋友行得輕鬆
我就帶了食物, 電, 藥物等等, 供大家不時之需

2:03am 上針山了



這段不遠, 但行了很久, 因為朋友都行了六十幾公里, 又零晨時份, 又攰又眼瞓,
我係完全明白點解只可慢上~

我行在最後, 要讓行得最慢的朋友不感到被前面的朋友拋離, 叫佢撐住慢慢嚟¬
記得睇過一條 KK (毅行達人) 演講的片段, 令我很印象深刻的, 是他說四個人要一齊行, 唔好各有各行,
一齊的意思是四個人都見到, 你行得快都冇用, 計時間都係計四個人到達的時間,
有隊友行得慢, 點解你唔在後面幫幫佢呢?
我明白, 有時真係冇力行得後, 那總感覺不好受

上到一半, 回首一望, 美麗的荃灣夜景就在身後,
第一次見到這樣美的夜景, 你們在睡覺時, 我們在默默的行行行



長長的毅行隊伍, 形成了點點燈光的針山

不過到針山頂後, 有一朋友真係好眼瞓, 波比先生就施展佢嘅絕技: 就係講嘢!
眾所周知波比先生好吹得, 帶佢上山另一大功用就係不停撩D 眼瞓人講嘢, 講到佢醒!!!
呢招真係異常地成功!!! 過了落山的一截, 那位朋友成個人醒咗, amazing!!!



右邊是沙田的夜景, 好靚~



今晚仲有又大又圓的月光



3:12am 過針山抖一抖



再繼續前行, 3:43am 見到另一個小小的 support area,
太古地產我愛你!!!!! 那裡有腸仔, 好甜的蕃薯, 同埋好多唔同的飲品, 正好幫眼瞓的朋友提提神!
義工們熱情的招待, 實在難忘!!!



4:32am 到 CP7 喇!!! 等朋友食完個麵就又起行, 那裡的薑茶真係正到冇朋友!
然後就是上成個毅行最高的大帽山, 其實我好有陰影, 因為行過兩次大帽山, 兩次都抽筋,
如果一陣又抽, 會變成朋友的負累, 都唔知點算......

唯有不停提醒自己放鬆雙腳, 唔好急, 最後竟然是安然無恙地過到了四方山同大帽山一帶, 真是感恩!!
在我次次都抽筋嗰個位, 見到有個毅行者行到嘔, 希望佢最終都冇事啦~



6:07am 開始天光了!
不過我想講, 原來行夜山又唔係想像中恐怖, 我之前常以為四周黑媽媽會好難行,
但原來帶咗頭燈之後, 睇路完全唔會係問題, 同日頭行冇分別~
相反, 我覺得落住雨行就真係好恐怖, 想起練習時個山成條河咁, 行一步跣兩步的舉步為艱, 真係好痛苦~

行夜山唯一大敵就係周公囉!! 天光了點, 成個人都差好遠, 睇路冇咁用神, 精神點易行點~



晨光呀~



我們望著大帽山山頂的波波, 努力地向前



無盡的長命斜, 不停鼓勵 (呃) 大家就到喇就到喇, 上埋呢個山就唔洗再上喇!!!
行到頭痛, 我都要啪返粒 Panadol...........





呢個時候見到日出, 好開心又好難忘!!!



人生有幾多次同D friend 喺大帽山頂睇日出先?!



令人感恩的好天氣, 造就了這美麗的旅程~



7:28am 到 CP8 了!!! 會合支援隊伍有早餐食~
又見到宣揚唔好食魚翅的鯊魚隊呀, 著住件鯊魚衫行一百公里, 真係好堅好佩服, 希望更多人會明白你們的心意!



放低了不必要的行裝 (如行山杖同外套), 輕裝再上路~
初時以為大帽山好凍, 著了件勁厚的風褸, 點知上山後唔夠十分鐘就除唔切, 拎足全程......
下次都真係唔洗著咁厚.......

仲有 20km, 睡魔已走, 但係見到有朋友腳痛得行到 gat gat 吓, 但冇埋怨過一句就是默默的行,
心中萬分佩服, 這個年青人大有可為!

第九段會是不停的石屎落山路, 風景不變, 行起來的確很悶........
行到中段, 不幸的事發生了, 就是師妹剛才換了的波鞋好夾腳,
行了八十多公里, 腳腫了, 平時啱著的波鞋都會變得唔啱著,
我隨身帶了兩對襪, 俾了對薄身的襪俾佢換, 但情況仍然嚴重......
隨之而來的, 就是一步一痛, 同因磨擦而起水泡, 我實在明白那種痛, 因為自己都試過~
但仲有十幾公里, 沒人可攞鞋俾佢換, 問佢想唔想同我交換鞋著, 佢可能覺得唔好意思又婉拒了~
看著她捱著痛, 做支援的我也感到有點無助.......



9:47am 到 CP9 了!!! 每年呢度都有麵包



最後的十二公里, 隊長都想做出少過 27hr 的時間, 但會有點抆,
波比就起帶頭作用, lead 著大家快行/跑





過了最沉悶的水塘段, 波比說真的要跑了, 我很佩服師妹, 強忍著腳痛都願意跟我們跑起來!!
最後, 大家手拖手衝線了, 完成時間是 26hr53min, 比預期中的27 hr 快,
衝線之後, 大家都喜極而泣, 因為可能冇人諗過可以 27小時內完成~
見到佢哋喊, 我都忍唔住喊, 除了自己結婚嗰日, 呢日係我人生第二次感動到喊~
因為大家走在一起, 一同完成了一件很艱辛先完成到的事¬



我很開心, 能夠有機會陪著大家完成了這個創舉,
又好好好感動! 要有強勁的 Support Team 同陪行員, 四個堅毅不屈的隊員,
一 Team 人才能完成了這 100km 路程, 少了任何一個, 都做唔到 26個鐘的成績~

毅行呢, 係超超超辛苦, 但年年都咁多人玩, 多到好多人抽籤抽幾年都抽唔到, 就知佢有佢嘅魅力所在~
呢個活動都真係要用「有自唔在, 攞苦嚟辛」去形容,
先要用你好多時間去練習, +/- 買好多唔同的裝備,
比賽時捱眼瞓行二三十個鐘行天光, 腳痛周身痛起水泡抽筋狂嘔,
雖然係咁, 我相信冇人會後悔玩過毅行者, 因為這個經驗實在是難忘和難得,
會後悔的, 只有是因傷因練習不足而不能完成~

人生好多嘢總要試一次, 毅行者都是狂人, 但瘋得會令人無悔今生~

今次我亦都要多謝波比先生在過程中出錢出力出口出腳, 幫助這班朋友超額完成,
為了這個老公今天我很自豪~ :D

我自己嘛, 初時我諗我行完七八九段都會死咗, 可能行唔到第十段,
點知又 ok 喎, last 3km 仲帶著大家跑, 哈, 第一次連續行了 36km 山呀!!!
咁我諗我練多一點時間, 應該都可以跑到個全馬喇!
No pain no gain , 辛苦和肌肉痛完, 肌肉都會強化, 我下一次又會快了 :P