自家造月餅

上了兩次月餅班, 今日終於都第一次喺屋企整了~

個皮用了金桶牛油去整, 由焗蛋黃、整奶皇都一手包辦,
不過不幸地, 第一批焗燶了.............
因為完全冇諗過, 明明話要焗十幾分鐘, 但我個爐一向都太熱, 已經減溫後都係太熱,
焗咗唔夠十分鐘就燶了, 當時我在印緊第二批月餅, 所以冇睇火, 真係好失策............

焗完好香, 即刻偷食了一件, 如果唔係燶了, 其實很滿意啊!
外脆內軟, 這種奶皇真的很滑, 在街買的一定冇咁滑!
明知道超肥, 都一個人食晒成件, 嘻~



第二批唔敢行開, 兼用了下層去焗, 終於都整到唔燶喇~
為了健康, 冇掃一層糖水了~ 所以望落唔係咁令身~
今次的小熊維尼同埋肥豬都面容模糊, 可能是用了金桶牛油的關係, 個皮較軟同埋易散開呢~



嘻, 總算完成了第一次的在家造月餅, 當然仲有好多要改良的地方啦,
唔知今年仲會唔會造第二批呢?

自家製奶皇餡

呢兩日似乎作病, 全個人又攰又不時頭痛, 今晚仲胃痛 + 肚痛, 攤咗喺床抖咗大半個鐘先好D.....

雖然唔多舒服, 但都要爬起身整嘢食, 後日是難得較齊人的 team meeting, 想當日請同事食我整的月餅,
為了精益求精, 今次唔想用街買的奶皇餡, 試吓自己整, 希望香濃又冇咁甜~

在網上搜尋了好一輪, 鎖定了三個食譜, 其實也是差不多的材料,
最後決定試一個較少糖, 同埋用鮮奶(而不是花奶)的食譜 (哈, 因為屋企有盒沖咖啡用的靚牛奶飲唔晒啊)
http://www.wretch.cc/blog/ononyummy/3181825

跟著食譜一步步整, 其實不太難~
加入了咸蛋黃碎, 食譜內又有椰汁, 蒸完好香啊~ 試咗少少, 味道唔錯!
我會覺得呢款餡是較 creamy 的~
原來就咁開吉士粉的奶黃, 同咁樣整的奶皇, 味道真係差好遠的~



聽晚就開工喇, 期待~

相關文章: 自家造月餅

歐式合桃田園包

上次同波比表妹整完包之後, 我一路在諗: 如果有麵包食譜係唔洗等發酵嘅就好了~
哈, 於是上網找找, 唔發酵就當然唔得, 但係唔洗搓的食譜竟然搵到一大堆!!!
世界上有咁便宜的事嗎?! 唔洗搓就整到麵包?! 真的嗎?

見到人人都話整得好成功 , 於是我都唔執輸啦~
只需拌好麵糰, 發酵 12 小時, 見到一路一路好多氣孔冒出, nice!
然後是摺疊及加入合桃, 超多的合桃(貪心), 哈~ 再發多一小時~



話咁快就得, 要掉入個陶瓷煲度焗, 喺個開住二百幾度的焗爐度攪嚟攪去, 最終都係逃唔過辣到手的命運.....
手指公起了水泡, 痛到入心...........
好彩, 個包整得好成功, 抵返晒!! 看, 很歐式的感覺吧, 可以賣到十幾蚊呀!!



睇睇中間大大的氣孔, 是成功的象徵! 面層非常之脆, 中間就是有點煙 un 的質感, 還有很多很多的合桃
塗一點牛油, 好吃極了, 尋晚半夜整好, 我們都忍唔住吃了三件............




愈來愈體會到自家造麵包的樂趣, 可選自己喜歡的材料和口味,
熱辣辣, 又香又軟/脆的時候即刻食, 太好的享受了~

蒸糕蒸糕

唉, 今朝真係好黑仔!
先係買麵粉整包, 8:20am 行到去新元中, 先發現那間百佳原來開 9am.....
咁我行去惠康啦, 開咗門, 點知冇高筋粉賣..........
之後再行多兩間華潤, 都冇! 再行多一間百佳, 都冇!! 真係火都嚟埋!! 乜原來高筋粉係咁難買o架?!
再去埋街市雜貨店啦, 都係冇!! 嗰刻真係想殺人, 行咗 40 分鐘竟然乜都買唔到?!
為咗平熄自己嘅怒火, 其求都喺雜貨店買咗D 嘢! Shopping 係女人最好的平伏情緒方法!

之後經過"價真棧", 諗住入去博吓啦, 點知...... 真係有呀~~~~~ 嘩, 太感動喇~~~~~~~~~
細看之下, 原來入面都有好多食材同醬料攪我到手痕痕又想買.....
最後, 按捺住自己的「瘋狂購醬綜合症」, 要用晒舊的先可以再買新呀!

回到家, 足足行咗一個鐘! 起碼有三公里路, 真係夠晒運動.....

返到嚟, 今日整砵仔糕啦, 唉, 我整中式糕都真係大部分時間都失敗.....
整到一半已覺得D 粉漿好多粒粒, 打極都打唔散,
都算喇, 整咗三舊預備拎去蒸啦, 點知...... 一個唔小心打翻了托盤, 三個中有兩個都打爛了.....
超心痛, 一來浪費了心機, 二來打爛了兩隻我超愛的印花杯碗, 好傷心......
唉~~~~~~~~~~~~~

這是唯一的製成品, 是加了紅豆的, 樣子有點奇奇怪怪, 又唔夠 smooth.....
不過如果唔睇佢個樣, 合埋眼食咗佢, 都會食到砵仔糕的味道嘅~



傷心過後, 轉戰整白糖糕, 不過, 又煮得過龍了, 唉...................
發佢幾個鐘, 都唔知會整到咩樣..........
另外用了高筋粉, 測試著整歐式田園麵包, 是明天的早餐啊~



等待了六小時, 可以拎去蒸



一半落了點桂花, 不過一反就知應該唔多成功, 因為之前的氣泡全沒有了



我想是因為我一開頭失手把粉漿煮得太杰, 令到酵母點都發唔起.......
所以只見到小小氣孔, 做唔到白糖糕應有的大孔效果......
味道是似的, 但質感不對啊~
唉~ 我都不是整中式糕的材料~

我跑了 200km

我很守信的今個星期又要跑一次 10km,
今晚同屋企人在屯門食完飯, 就同波比先生由屯門站跑返屋企!

哈, 初頭都擔心究竟有冇一條路線係可以咁跑, 但原來沿屯門河邊, 係有一條單車徑加行人路的, 太好了!
今日要自己盡量學吓保持均速去跑, 大概在 6'45"/km 的速度下跑, 務求不要太快喘晒氣, 否則就好難完成 10km 了~

由屯門站跑到兆康 = 2km
兆康到洪水橋 = 3km
洪水橋到屋企 = 4.5km
1hr04min 完成

哈哈, 真係好開心又好驚訝, 驚訝自己真係可以由屯門走到元朗家, too amazing, right?!



另外, 今天的成績表啊!



哈哈, 自從用 Nike+ 去計跑以來, 我終於都跑了 200km 喇~ 好嘢好嘢!!
我要再儲多D 多D!
下次試吓由兆康跑去黃金海岸都好喎!

竊聽2 x Stonegrill

今日去咗睇早場竊聽2, 用東亞信用卡喺 iSquare UA 買飛真係好抵,
唔洗網上訂票的手續費之餘, 更可以有九折呀!
$36 就可以喺間又新D 位又舒服的戲院睇戲, 真係非常好!

如所有朋友所言, 套戲真係好好睇好緊張, 拍攝的角度也很優秀, 真是本年必睇港產片呀!

尋晚收到了同事 (兼同我讀同一個 Master course )的 Whats App, 恭喜我攞到 "Best Dissertation Award"
吓!!! 我自己都唔知喎............. 反而細我一屆的同學知道..........
嘻~ 真係好開心啊~ (不過千祈唔好叫我 publish 份 paper 呀.......)
咁啱尋日波比先生喺公司又有個傑出表現獎攞, 真是雙囍臨門~
適逢今日本身都 book 咗枱, 這餐 Stonegrill 就當作是慶祝一番!

我們都十分期望這一餐啊, 哈, 平時真係覺得太貴唔會捨得咁食個 lunch 囉~
是因為團購, 有大概 8 折的優惠, 所以就造就了我們的第一次石在燒體驗~

香草包同法包都好鬆軟, 但個皮又好脆, 非常讚!



主角來了, 厚厚的牛柳, 肉質鮮嫩, 根本唔需要調味都已經太好吃~
一塊高溫的石板, 食幾多就切幾多出來燒, 自己想燒到幾熟都得, 在最熱的時候將牛送入口, 難忘的美味~
飯後配一杯即磨咖啡, 滿意的午餐~



之後, 我們冒著三十幾度的高溫, 行咗去星光大道搵麥兜~
麥兜的銅像都豎立了個多月, 之前見過相片, 今次終於見到真身, 但有點失望......
四周圍了鐵欄, 麥兜像在坐監......
只是一個月o者, 麥兜已變得灰灰黑黑的, 實在提唔起勁替佢拍照囉..........

齊來造麵包

波比的表妹在英國讀書, 之前在 facebook 也提過了想來跟我學煮嘢食,
這個暑假終於實現了, 今日佢同阿姨上來學整麵包, 哈哈, 為咗準備, 攪到我尋晚成晚發夢都係背緊張 recipe.....

準時 3pm 我們開壇了!



表妹搓麵糰好有天份, 哈哈, 佢舊麵糰(左)發得好夠大,
我今次就整一半份量好了, 之前整八個, 真係食到傻咗.....
去 Jusco $10 店買了一款袋裝的紅豆蓉 , 味道 ok 喎, 又平過去烘焙店買
整咗菠蘿紅豆包!



今次已是第三次在家整麵包, 各方面都開始純熟了,
例如控制爐溫: 今次焗到 6 分鐘已見菠蘿包面轉色, 就熄咗上火, 淨係用下火去焗,
所以唔會燒燶個面, 又焗得熟個包~



今次係最滿意的一次菠蘿包呀! 超似在街買的! 比去上堂嗰次更好!
特地買了把麵包刀來切麵包 (又敗家.... 不過真係切起來冇咁易爛), 嘻嘻, 滿滿的紅豆餡的菠蘿包, 至愛!



第二批有芝士腸仔包, 仲有攪攪新意思的朱古力包同埋扭紋豆沙包



嘻嘻, 很金黃啊~ 暫時試了朱古力包, 呢隻入爐朱古力釘用來焗麵包都幾好啊, 少甜又夠香!
下次可以大量整!



整咗足足三個鐘, 表妹整咗 10 個包拎走, 我話當佢一個人在英國很想家的時候, 就可以整整這港式麵包喇~
表妹同阿姨話邀請我哋去佢哋英國的家, 那裡有大焗爐焗乜都得!! 哈, 實在很吸引, 不過我仍是太怕搭飛機....

之後等埋波比同埋大表妹放工來到, 我們就開餐了!!!
在對面盈豐買了很多生蠔、刺身同壽司啊!



還有自家製的芝士肉醬焗天使麵!!很多芝士啊!
波比先生話想食好耐, 但我一路都冇時間整呢D 又要煮又要焗的菜色~ 今次整到很開心啊~



這晚的翡翠螺, 超大隻, 不過我唔大興趣, 冇食~



大表妹在中環放工時, 買了支白酒來, 飯後一邊飲酒 (我唔飲得啦, 敏感), 一邊吹水, 吹到成11點先散席,
哈哈, 第一次這個 combination 的晚飯同吹水大會, 很爆笑很開心呢~

以食會友, 真是不錯~

古力杏仁曲奇 x 芝麻杏香曲奇

今朝五點幾頭痛痛醒咗.......
準備晒波比早餐後, 八點就開始整餅~

見到 Him Him 送俾我的一大堆曲奇模, motivate 了我去整印模曲奇, 都真係好多好多年冇整過了!
今次加了杏仁片, 哈, 因為上星期同事請了我食太好味的 Star's Taste 曲奇, 都係古力杏仁啊, 太令人念念不忘了!



第一盤印好了!



13分鐘就焗完



另一盤是杏香芝麻味, 食譜話係跟某人氣餅店的秘方去造



嘻嘻, 擺靚靚大合照先! 笨象冇咗條尾..... 因為太難脫模呀..........



很金黃呀~ 食落真係唔錯!



入盒 - 係 Mrs. Field, no no no, Mrs. Poon Cookies!



禮盒裝, 係今晚送俾我的好朋友們的! 希望她們喜歡啦~

黑椒蜜糖燒雞

見好耐冇燒過雞, 今晚就整吓
這是黑椒蜜糖燒雞, 估唔到已經去咗皮都焗咗好多油出嚟!! 下面D 薯仔吸晒雞味, 正~



今日又煮肉醬意粉, 事原係我買咗罐應該係茶餐廳都用的蕃茄醬, 今日試試用來煮意粉,
嘩, 不得了, 真係好似茶餐廳食開的味道!!!
不過好大罐, 又唔可以擺太耐o架, 所以我嚟緊兩日應該仲有三餐都要繼續食肉醬意粉......

聽日後日都放大假呀, 好 happy!
約晒人好多節目, 好開心~

想偷閒

呢兩日工作都很忙, 不過總算清了一大堆 admin 的工作喇!!

前日整的八個月餅, 已經食/派晒喇!
目標是要整多兩批, 一批請同事食, 一批請朋友食~

已兩個月冇去旅行 (其實又仲有兩個月又去旅行), 開始仔細安排一下最後兩天的行程喇~
這次7 日遊足京阪奈 + 和歌山白濱, 很緊湊的行程啊~
睇旅遊書見到拉麵同刺身, 愈睇愈想快D 去..........

想離開忙碌的生活......
看看這樣的風景



想和小動物一同在樹蔭下 hea~


(攝於宜蘭 2011 年夏)

太好玩之九龍酒店酥皮奶皇月餅班

woo~ 等到頸都長, 終於都到今日可以去上堂學整九龍酒店酥皮奶皇月餅喇!
今年「又」錯過了訂九龍酒店月餅的時間, 還好可以自己整~

不過今朝睇人哋的 blog, 先發現原來去二德惠的月餅班係冇教整奶皇餡的,
而二德惠本身的奶皇餡又已經賣到斷晒貨, 咁唯有遲D 我再研究吓點整個好味的奶皇餡啦~

上堂前, 去了荃灣的橘子烘焙專門店, 買了個豬仔月餅模, 哈哈, 很喜歡啊! (二德惠的月餅模款反而很少呢!)



今次好開心, 不是一個人上堂, 而是同 Ashley 一齊上,
Ashley 的手工實在很好, 無論是整花還是整餅~
我們算是整得又快又妥當的學生呀, 基本上都唔洗老師操心

老師教了些包月餅的技巧, 比我上年學的更好用~

用了豬仔模去印, 豬仔輪廓是 ok 的, 不過掃蛋漿時實在唔多唔少會令公仔化開,
焗完後更加有點面容模糊......



哈, 這一張用 software 執過, 先較清楚見到豬的模樣~



反而標準的花花圖案, 線條清楚得多~



附送禮盒包裝, 扮 Pro~
聽日波比先生又有得拎返公司食喇~



酥皮理想, 不過餡料有點偏甜, 我要努力測試點整奶皇餡先得!
哈, 食咗半個, 好似一陣風咁就冇咗.......好容易食食吓就食晒!!! 危險!!!!



相關文章:
自家製奶皇餡
自家造月餅

上堂後, 一同去了紅粉佳人食晚飯, 食物很不錯呢~ 飽死了..... 要去跑步幫助消化先得喇~

Day 7 - 台北最終回

好了, 遊記終於都寫到最後一天, 沒爛尾呀!

最後一天三時多要離開台北市, 也算有半天的時間,
來過台北咁多次, 我都知肥前屋好出名, 但一路都冇試過,
今次 planning 的時候, 在微博見到連名人都大讚, 所以第一次帶波比先生來~

我們索性由油店行去, 才 1.8km 的路, 晨早當做做運動吧~
11:30 開門, 11:10am 去到已經排了二三十人, 當中也有不少香港人同日本人啊~



慶幸唔洗等好耐, 一坐低已有心水選擇
先來個魚生片, 新鮮, 不過頗貴



來了個牛肉飯, 牛肉的肉味很濃, 日式醬汁加上牛肉汁很送飯啊! 美味~



主角大鰻魚飯來了, 在日本吃, 一客大概要 3000 Yen, 這裡只是百多元(港紙)的價錢, 可以說很超值!
那鰻魚入口很的太嫩滑, 香港一般壽司店吃到的, 實在比下去一百倍!



還貪心的來一客鰻魚蛋, 又暖又滑的蛋, 又是超好食超幸福的感覺!
這一餐實在太滿意, 實在有點相逢恨晚的感覺, 為什麼之前這麼多次來台也遺漏了這店子?!



吃飽飽, 回到台北車站同埋書局街閒逛, 最後衝刺的又買了幾本書, 重死了!!!
不忘在台北車站地下街, 買了個很香的咖啡麵包 (每次經過也被它香得暈了), 果真好軟熟好香牛油咖啡味啊!!



搭七點幾的機, 回程是國泰機, 不過晚餐超 hea!



這個旅程實在很開心難忘,
美麗及從未見過的風景,
令人幸福的民宿,
超多的美食,
探了很多動物朋友,
晚上在 hea 看台灣電視,
全程我用國語溝通, 搭車仲可以同司機吹水, 是很大的突破!

看了台灣的食尚玩家同埋地道旅遊書, 下次很想往東南走,
去我們都未去過的高雄、墾丁、台東啊!
台灣, 希望下年再見!!