近近地郊遊記

當今朝上 http://www.yl.com.hk/ 睇睇有咩好去處時, 見到好多士多啤梨園開放中,
搵個近近地的, 不如就流浮山?

雖然住咗喺元朗咁多, 但我哋都未去過流浮山, 一路我仲以為係喺米埔嗰頭,
原來係喺天水圍嗰便, 我哋喺離屋企唔遠的小巴站, 搭 34號小巴, 大概 15 分鐘就到, 勁快!

去到總站落車, 就有一條街仔一路行去海邊,
兩旁都係海鮮酒家、海味店、地道食品店,







我哋買咗砵仔糕、江蘇餅、皮蛋酥,
個皮蛋酥真係超正!!! 入面係有一整隻皮蛋囉! 有一款係有埋子薑的, 味道甜甜地好好食!



出到海邊, 見到有人開蠔,



同好多蠔殼,



嘩, 好靚好廣闊的藍天白雲呀!!





之後, 我哋去咗流浮山休閒農莊 有機士多啤梨自摘園,
由市集行過去, 5 分鐘就到, 去到見到好多local tour!
呢度幾好呀, 唔洗入場費, 摘幾多計幾多錢, $50/磅,
好多士多啤梨, 唔洗驚冇得摘!
不過見到D 香港人真係得囉, 趁人唔發現就即刻摘完唔俾錢即刻食「試吓好冇食先喎」, (有泥o架喎)
呢D 人, 真係好失禮........
如果我哋去日本的農莊摘士多啤梨遇上呢D 人, 真係覺得好羞恥囉!





我哋摘咗 $36 的士多啤梨, 返屋企洗乾淨食, 但在短短半小時的回家路程,
有D 士多啤梨太新鮮已經開始爛了, 真係好快呀!



味道好甜好多汁, 好好喎!
我哋上次喺日本摘, 因為佢係吊住喺個架度種, 冇泥好乾淨, 連水都唔洗沖就可以食,
都係要咁食先至得!

Good Morning

今天的天氣和陽光, 似乎比昨天更好!






吃了好友送的 Jagabee 做早餐



今日要 Family Day, 還想到流浮山走走

醫生的英文

起身一望向窗外, woo, 唔錯的天氣!
不過有個老公尋晚去 happy 到好夜先返, 今日瞓到成一點鐘摌都唔願起身,
所以今日冇街去



今日上 Master 的堂, 講 genetic disease,
真係估唔到有咁多病都係可以由遺傳傳俾下一代, 生仔前真係去做個檢查好D,
因為有很多病都好不幸, 冇藥醫, 一家人走吓一個, 又一個......

好頂唔順其中一個 speaker, 話晒都係醫生, 仲係衛生署的醫生,
D 英文難聽都嘔, 由發音到組織都好有問題,
一路聽佢的「英文」, 我同同學都皺晒眉頭......
所有 v 同 r 都講晒做 w, 所有 consonant cluster 佢都讀唔到囉
complete 變咗 compete, brain 變咗 bing, blood 變咗 筆, 死未!!
有同學仔頂唔順, 於是舉手同佢講:「其實我哋上堂可以講中文o架」(暗裡: 講唔到就唔好勉強)
真係好經典!

又想換相機?

波比先生身痕痕, 尋日無啦啦捉咗我去旺角, 話要買 GF1,
因為有人教極都唔識用我部 DSLR, 對唔到焦, 又話我部機影得唔夠靚喎


而家屋企有三部機:
DC: 波比先生用, 只需 Auto mode, 質素麻麻
Prosumer 機: 大光圈, 影近嘢靚, 但 zoom 得太少去旅行唔夠用, 尤其是要影動物仔時
DSLR: 我用的話, 覺得質素好 OK 喎, 不過係重囉...... 使用率偏低........

就係咁, 又萌生換機的念頭?
有冇D 可以一機有齊晒: 大光圈有景深、又可以zoom 得遠、影近嘅食物都靚、又唔重??
哈哈, 太太太貪心了吧!!!
近磅D 嘅可能係 G11 掛, 但有人又話佢的景深唔夠我的 LX3 靚, 咁換好似好傻仔??

唔知去旅行前會唔會有一部啱心水的新機出現呢?

二月最後一個工作天完了, 太開心~
去剪了個草菇頭, 爽呀!

美味燒餅

財爺的預算案, 同上年差不多嘛,
我們的家庭都有 benefit 到免差餉、退稅嘅, 如果好似上年有埋減電費就好咯!
見住成千蚊的電費單唔洗交, 真係幾開心!

晚上忽然間約了好友食飯, 意想不到唔錯的大阪燒餅,



問問她婚事的進展, 真係皇帝唔急太監急,
把攝影化妝的資料都 send 晒俾佢, 佢都話冇時間睇, 又唔急去 book,
縱使我們這些準姊妹團已經催完又催佢加快行事~
實在服咗佢.....

旅行季節

嗯, 有同事放假中, 忙到史.....

三四月又是我們清大假的高峰期, 個個星期都有人放,
各位旅行精的目的地分別有大阪、印度、東京,
問一個同事有冇諗住去邊, 佢話:「放得嗰一個禮拜, 可能短短地同阿爸阿媽去 London」
大家紛紛話佢:「吓, London 都算短短地?」
「得一個星期所以短短地」

今晚應該係第一餐虎年在家煮的「飯」, 太鍾意食炸嘢了, 又炸蝦喇!

解凍

用「解凍」來形容今天的天氣, 最貼切不過!

終於都唔洗著住厚厚的羽絨, 終於都唔洗凍到縮埋一舊, 終於都洗手唔會俾水凍到痛!
早幾日真係凍到坐低咗就完全唔想郁, 唔想洗碗、晾衫、清潔、倒垃圾.......
今日回暖了, 要把之前堆積落的家務做返晒喇!

又唔知係咪因為天氣凍, 日日好似生積咁不停搵嘢食, 晚晚都好似唔飽咁, 噢~

今日收到了兩個病人送俾我的賀年朱古力, 開心~

今晚整咗吉列炸蝦食呀, 哈哈, 十年都唔會喺屋企炸一次嘢食,
好彩今次冇失手! 否則D 油就嘥晒喇!

公司球賽

波比先生的公司辦了足球賽, 佢出戰數碼港隊, 要迎戰其他 office 的隊伍,
點知, 今日遇著的球隊, 球員很高, 身型已很輸蝕,
球員又很矛, 推撞扯衫乜都有....... 最後......

期望下一場賽事會正常一點啦~



估唔到我竟然有朋友仔買咗個 YOHO Midtown 三百幾萬細單位,
天價呀.....
我問佢覺得值嗎?
但原來我們這些元朗人, 真的對元朗的環境情有獨鍾,
係o架, 其實呢度真係好好住,
環境寧靜, 唔會樓對樓, 買咩都有, 又多食店, 最愛係有好多老字號小店,
出市區有西鐵真係好快, 係校網差D 囉~
元朗人住開, 真係唔會想搬的~

再執執大阪行程

仲有四個星期就飛喇, 開心又緊張!

有一日問波比先生: 「點解我哋 Honeymoon 去東京時都係三月尾, 但係嗰次冇櫻花睇嘅?」(嗰次係波比先生 plan 行程)
波比先生面有難色:「呀........ 嗰次我...... 唔知道原來會有櫻花睇.......冇去嗰D 地方.......」(隨即閃身離開我的書房)
「吓??? 有冇攪錯!? 唔怪之得完全冇得睇啦! >.<」

所以以後都真係唔敢叫佢 plan 行程!

網上資料搜集中, 發現了一個幾得意的 iPhone app,
去日本的朋友, 可以 download 個 Free 嘅 Lite version 用吓, 有真人讀D 日文出嚟, 學兩句旁吓身都好!
我就買咗 Full version, 不過發現同 Lite version 只係差少少,
內容亦冇我想像中咁全面....
http://hk.myblog.yahoo.com/jw!g43eFlqTBB.sqJ9KZ_kNZA--/article?mid=2902

其實我一早已 plan 好了不同行程的交通工具, 不過忽然間發現了這個好好用的 website
 http://transit.map.yahoo.co.jp/
你打兩個站名入去, 就會 show 晒搭咩線去邊度轉咩車咁, 超好用!
唉, 早知之前唔洗嘥咁多時間啦......

Plan 大阪的車程都幾煩, 因為一個路線圖就淨係得 JR, 另一個就淨係得地鐵/私鐵,
要 correlate 返都真係用好多時間!

(攝於新宿御園, 2009)

點解會咁凍o架?

嘩, 都凍咗幾日喇喎, 幾時先暖返?
好彩我間 Therapy room 有暖氣, 屋企都要長開暖風機, 否則真係唔知點算!

今日做 X-ray exam, 見到個好可愛的伯伯,
人人都話難食的 Barium, 佢食完一羹, 我都未叫佢就自己食第二羹, 真係唔知好嬲定好笑!

以前做內窺鏡檢查, 見的都是較年青的鼻咽癌病人,
可能仲有好多日子要過, 唔合格的都會嚴厲的叫他面對現實吧, 除插喉外他根本沒有選擇~
而家做 X-ray 檢查的, 都是公公婆婆多,
我都同意今日那個伯伯的太太所講:「佢都八十幾歲人啦, 算啦, 食到幾多得幾多」,
唔合格的病人, 我心中還是有很多的 allowance, 公式上我都要叫佢用喉,
但實際上, monitor 住, 幫得就幫啦,
八十幾歲咯.......

今晚不用煮飯, 一個人在元朗行了一陣, 好多舖頭都未開~
咁凍天時, 煨蕃薯絕對係我的最愛!



聽新聞, YOHO Midtown 終於開賣了,
高層要 $5500/呎, 低層都要 $4500/呎, 元朗嚟講真係好天價!
令人想起 97 年時, 要三百幾萬先買到的嘉湖山莊! 又會是一個負資產的陷阱嗎?

初四 - 開工喇!

四天假期後, 開工了!

搭車返工, 成個車站都冇乜人,
放工回家的路程, 公路上前所未有的暢通, 7pm 正就回到元朗了, 天天如此就太好了!

天氣實在很寒冷, 在街上走走, 雙手可以凍得沒有感覺.....
這種天氣, 一定要打邊爐啦!
不過去買食材時, 好多舖頭都未開工, 有開的話, 都開天殺價!!!
「老板, 豆苗幾錢斤呀?」
「六十蚊o丫」
「吓?!!?!?! 六十蚊????!!!!」(下巴跌了在地上)
「係呀!」
「咁菜芯幾錢?」
「十六蚊啦」(平時都係十蚊斤, 真係搶錢.....)
「咁菜芯啦......」
還有一個月就是三週年, 開始倒數日本之旅, 日元開始跌返少少咁多, 唉~
日日都留意櫻花情報, 預想開花日係 3月25日呀, 希望再暖D, 開得再早D 啦!

大伙兒拜年團

今日去了同波比先生的大學同學拜年

有一對超可愛的孖仔, 哥哥被我們叫做「豬肉仔」,
圓咕碌的頭頭, 笑起來見牙唔見眼, 超級得人鍾意!
最攪笑佢開始識大大聲叫「爸爸」同「媽媽」, 又識扮恐龍叫,
逗得他的爸媽同長輩開心到暈, 超幸福的家庭~



家中還有一隻貓貓, 可憐牠喵喵喵的叫, 都冇人同佢玩 (個個掛住玩 BB),
最後, 牠唯有孤獨地縮回牠的枱底.....





還有為二月壽星仔慶生的蛋糕, Happy Birthday~

Love through its life

年初二, 都係拜年同食開年飯啦

呢兩日拜年都有小狗同小白兔玩,
但見到已十多歲的小狗, 由佢仲係 BB 我睇到佢百年歸老,
而家周身病痛, 腳和腰都有問題, 行得好辛苦,
已經唔可以走來走去同我玩, 亦好怕俾人掂, 同上年來時, 完全是兩個光景~

望住這些小動物, 知道做一個負責任的主人,
唔可以只係佢得意好玩時才愛佢, 當佢有病時就唔要佢o架~
佢老了, 你都要俾心機照顧佢,
但知道有一刻佢一定會先走一步, 其實會很難過.....

所以養寵物前真的要「停一停, 諗一諗」

下午竟然有兩個鐘空檔, 兩公婆忽然興起, 走去唱 K!!
今次都係第一次我哋兩個去唱 K 呀, 哈哈! 唔係新年的話, 絕對唔會有咁嘅雅興囉~
估唔到 Neway 又接受我張學生證, 有學生優惠呀, $79/person 抵呀!!

我們的第八個情人節

第八個了嘛? 原來這麼快?

去了兩個地方拜年後, 終於有私人時間,
到了屯門市中心食個 tea, 行行街,
街上好多著了華服的小朋友, 好可愛~

我們的情人節, 在家撐枱腳,
有波比最愛的帶子刺身!



還有和牛牛扒



兩個人要食晒兩底蘿蔔糕同黃金糕, 要好好努力!



行經屈人寺, 買了呢 set Full & thick 洗頭水套裝,
Blogger 話好好用, 可以令到我呢D 頭頂頭髮薄薄的人, 頭髮更豐厚,
等我試試又係咪咁好用先! 而家減價, 係分開買的 8折價錢咋,
有興趣可以去入返 set!

年初一

情人節和年初一, 一起身就聞到花香,
原來波比先生尋晚趁我瞓咗, 又走落去樓下花市掃平貨,
買了一盤水仙, 好靚好香!

尋晚 12am 仲有人放煙花, 好靚添~
今日天空就一片白濛濛了, 要準備去拜年派利是喇! See you~

正宗日式拉麵

年三十晚, 節目豐富,
先係去睇<<72家租客>>, 查實個戲名真係同套戲嘅內容冇乜關係,
太多熟面口的演員, 睇咗大半都未記得邊個係曾志偉嘅仔女, 邊個係張學友嘅仔女.....
睇到完場, 先記起哨牙珍係廖碧兒, 嘩, 真係完全認唔到!
戲的劇情都唔錯, 有笑位, 但又未至於會連環狂笑嗰種,
賀歲片的話, 開開心心的心情去睇, 都係一個唔錯的選擇!

早幾日去食農夫包, 同一條街見到有間日本拉麵好似好正咁,
今日去行旺角花市之前, 就特登去試試這間「權之助」!

三個字: 好日式!
舖頭係有日本人師傅, 賣的真的很日本...... 只有麵和叉燒 +- 紫菜/菜/蛋,
想搵牛呀雞呀海鮮呀 --> 冇!
So called 有成廿款, 但其實張張相都差唔多, 玩咗好耐 "What's different?", 都只係湯底/配料的分別,
不過好似身在日本咁, 可以揀湯底的濃度、麵的硬度、油的多少


叫了一個橫濱叉燒拉麵, 一個博多叉燒拉麵,
麵來了, 見到那濃濃的湯底, 相信我們冇揀錯地方啦!
博多叉燒拉麵的湯底咸了少許, 但兩個湯底都係好美味, 是濃濃的醬油/ 豬骨湯底,
麵質彈牙, 叉燒就一塊塊啦, 有D 好 'un' 有D 好滑 (肥)
整體我覺得好滿足啊, 真係好難得喺香港食到的正宗日式拉麵, 感動!


之後逛逛旺角的花市, 人不算太多, 見到桃花水仙花都開得燦爛, 香氣撲鼻,
買了些傳統小食, 嘻嘻, 又食!



之後行又一城, 為的是買定餸煮聽晚的情人節晚餐~
今晚嘛, 哈, 買了些鵝肝醬去整 pizza 呀 (一粒粒好似午餐肉嗰D 就係)
哈, 不過 Pizza 本身太多料了, 雞、蟹柳和勁多芝士的味道似乎遮蓋了鵝肝醬的味道~



飯後還有湯圓紅豆沙呀, 團圓最緊要~



祝大家新一年,
事事順景, 心想事成, 身體健康, 恭喜發財!!

收爐了!

因為尋日有同事放 sick leave, 已堆積了些 referral 未睇,
尋晚喺屋企一 check, 夜晚又出了幾個 referral.....
生怕今日睇唔晒, 又要好似有一次咁睇到 7pm 先走得.......

不過好彩, 日間的 referral 不算太多, 好忙好急趕的, 總算收到工~
不過年尾的日子, 在病房見到喪親者, 聽到從前以為只有電視劇才有的對白, 特別傷感

醫院派發的牛奶布丁同曲奇餅, 代表這一年完結了!



放工後, 去了行百貨公司, 嘩, 迫到o丫......
買了很多拜年用的禮盒, 哈, 都係日本貨, 否則都唔知買乜好?
不過尋日喺百佳, 見到真係有人買 10 盒藍罐曲奇咁o架, 拎去拜年唔重嘅咩???!!!



回家睇咗<畢打自己人>大結局, 大團圓的結局令人最開心

團年飯

今晚與波比家人食團年飯, 一家人, 齊齊整整的, 最緊要~

在酒樓見到好多家庭都係食團年飯,
有老有少的, 老人家見到小朋友時最開心~

農曆新年其實係我都幾怕的節日,
放得嗰幾日假 (仲少過清明 + 復活), 日日又要去例行公事的拜年,
一去就係幾個鐘的坐同悶..... 年年都係俾人問D 相同嘅問題 (e.g. 幾時生返個?)
想走又唔走得......
搭車走來走去, 真係仲攰過返工!!!
新年, 往往都係一個令人唔 enjoy 的假期~

所以今年企硬, 年初一二好去晒D 親戚度,
年初三我要返自己的私人時間!

Happy Latte

買了一個新的打奶泡工具, woo, 好得喎!!!
打出嚟的奶泡好好好滑, 不過又要摸索一輪打泡的力度, 因為今天的太泡了, 沖唔起D 咖啡,
但綿綿的泡泡飲進咀裡, 叫人很開心~

一定要試的農夫包

嘩嘩嘩, 大發現, 超好味道的農夫包!

本來今晚講好了在家煮意粉, 放工時收到波比先生電話, 知道有人又身痕痕想出街食,
佢話要帶我食好好味的「農夫包」, 究竟係乜東東??

去了花墟附近一間完全唔起眼的茶餐廳, 但原來內有乾坤!!
係一間澳門茶餐廳, 有好多澳門式的食物!

叫了個咖哩牛腩農夫包, 噢, 原來係好大個包入面裝住了咖哩牛腩, 仲有一兜咖哩汁另上~
個包嘛, 嘩, 包你一食就會愛上佢, 外層烘得好鬆脆, 裡面又十分軟綿綿,
加埋咖哩汁(唔會太辣), 絕對係一個極品的包!
(身為一個好鍾意食包的人, 憑我多年的食包經驗, 呢個包真係好得!)
牛腩都煮得好好, 好林好入味, 切晒細細粒, 容易食!



還有一個常餐, 呢個係「越南海防米線」, 即係咩呀???
原來係真係自己煲的豬骨湯+ 蕃茄蛋肉碎的米線,
個湯好真材實料, 好飲呀!
跟餐有牛油豬仔包, 又係好脆好好食啊! 太滿足的一餐了~



飯後行行花墟, 見到D 好靚嘅桃花, 有點像櫻花,
想買不過屋企冇咁大個花樽喎~
等元朗的年宵開, 再去睇睇有冇啱啦~

好開心, 有煲用!

波比太太今早起身一 check e-mail, 發現 HSBC 的獎賞天地, 竟然有我想買咗好耐的真空煲!
仲要減價, 勁平, 好抵!!!

我都睇咗一段時間, 呢款 4.5L 真空煲賣緊 $1099, 一路都唔捨得買,
諗住等吓有冇 promotion 啦, 但最多都係減 $100 囉~

今次 HSBC 賣 $650, 真係好抵, 用埋我D 積分, 最後俾 $510 就買到了!YEAH~~~ 好好好開心呀~~~
因為我做咗醫院之後, 返工日子完全煲唔到湯了, 冇法啦太夜先返到屋企呀......
而家有真空煲, 可以一早煲一煲, 夜晚就有湯飲! 仲可以炆餸, 真係諗起都興奮!!!



星期日, 話咗要大掃除, 執呀執, 我一個人執咗 6 袋垃圾出嚟!!!話時話, 有好多我唔會用嘅嘢, 睇吓有冇人想收留:
1. Mickey mouse 記事本
2. Mickey mouse 銀包
3. Hello Kitty 相架
4. Mickey mouse 杯
5. Precious Moment 擺設
全部全新, 免費, 元朗西鐵站交收!

我的麥兜 collection, 已經佔用完一個又一個的大櫃了,
哈, 舊嘅又唔捨得掉, 新嘅已經好刻制盡量唔亂買, 但都有好多好好朋友送俾我呢,
如果第時生仔的話, 我相信我要將全部麥兜 pack 箱收埋先得咯, 否則邊有咁多位放嘢!

努力了大半天, 波比先生因落雨冇得踢波,
所以可以陪我去甜甜咖啡屋慢慢食個 lunch, 太開心~

我愛宜家

話咁快又一個星期了! 仲有一星期就新年喇, 波比太太已經開始封利是,
家中亦開始小掃除, 明天真的要大掃除喇, 打算大執一次客廳的大書櫃,
內裡一層又一層大學時代印的 notes , 相信我都唔會咁神心拎返出嚟睇, 一於掉掉掉!

今晚去了食期待以久的宜家傢俬咖啡室,
有分別一年多的肉丸啊~ 太感動, 不過而家冇得配薯條喇, 想食薯條要另外加錢買,
還有燒牛肉, 冇上次食咁生, 不過 $39 其實不是太抵!


仲去食熱狗食軟雪糕, 好滿足!



之後行行 CitySuper, 買了新的咖啡同埋北海道 3.6 牛乳, $30 有點貴, 但真係好香奶味!
返到屋企想沖杯 Espresso 啦, 點知...... 架機壞咗, 唔係化.......

細碼的驚喜

今日返工, 打開我房那個裝白袍的箱子, 竟然見到有細碼的袍!!!
吓, 點解會咁架?!
穿上身, 太 fit 太啱身了, 太開心!



點解有咁大反應? 因為我房的箱子一向只有中碼和大碼的袍, 我一向以為係冇細碼袍攞,
於是, 每一日就像是個小矮人穿起了大巨人的白袍,
又長又闊, 坐低起身都成日俾櫈腳夾住咗長長的袍尾,
常常要喺病人面前用力拉呀拉, 拉返件袍出嚟, 多麼的狼狽!!!!
今日, 我終於有細碼袍了!!!

點知同 i/c 講起, 佢先話:「吓, 乜妳都係著細碼o架?」
我:「梗係啦, 但我間房一向只有中/大碼」
「哎呀, 我唔知妳都要呀, 我以為成個 clinic 得我一個係著細碼, 我間房D 細碼多到著唔晒」
「吓, 我一路唔知有細碼攞呀, 可能上手用我間房嘅同事都係著中/大碼啦」
就是這些細碼袍, 令我今日工作都工作得開心好多!

晚上又去了那間新開的越南餐廳,
今次要咗咖哩雞 + 蒜蓉包, 超正!
還有好入味的香茅豬扒飯同埋好脆的越式春卷, 正正正!