元朗農夫包

今個星期都會很忙啊, 因為有兩個同事放大假,
已經很夏天的感覺, 又開始踢拖返工, 爽!

因為夜走又冇煮飯了 (好似好耐冇煮過飯......), 今晚喺元朗試新嘢,
喺新 B 仔旁邊有間泰國菜, 上網見到有農夫包食, 就心郁郁去試!

舖頭好細, 人滿滿的, 應該唔錯掛

先來了大蝦金邊粉, 味道唔錯, 不過大蝦不是大蝦, 很硬的雪藏 feel......


再來農夫包, 嘩, 好大個, 比翠苑的還要大!
包烘得好脆, 咖哩充滿椰汁香亦偏甜, 是我愛的口味,
不過內裡的薯仔炆得不夠腍 , 牛腩亦多肥膏同筋,
不看配炓, 只係主要嚐嚐包的美味~



值得再來呀~

廿幾年後重訪藍地

今日繼續好天, 同波比先生又一新嘗試, 14km 來回長征到藍地

我的幼稚園年代, 住在藍地的村屋, 養了三隻唐狗,
屋前有空地玩, 有果樹可以揀龍眼黃皮食,
雖然那是三四歲的事, 但我仍然很有印象~

去程 7km, 去到會食返餐, 波比更有動力跑呀跑, 而且要備戰月尾的比賽, 要加緊訓練!



去到洪水橋, 穿過隊道去了對面, 對我踩單車好D, 因為冇咁多上落位, 唔會 dun 到個 pat 咁痛!
不過近馬道, 好食塵!



到了藍地大街, 這裡的印象, 深刻但蕪湖



本來有想過食好出名的季季紅 (好多電視雜誌食家都來o架), 但因此太熱了,
實在想飲凍 OT 多過熱中國茶............


找到一間有露天位的餐廳, 見到有懶洋洋的貓咪



辛苦完有得食, 真係好開心的, 乜都變人間美食!!



這裡的奶茶果然不錯, 愛奶茶的波比大讚濃茶味又滑奶味, 少甜後味道很讚!



往大街直入, 我的故居相信已經拆了, 就在現時綠怡居的腳下~
這條村, 變了兩個新地屋苑, 已找不到舊日的回憶了~



可幸的, 是有一些老商店還在
賣 $2 支水的士多, 大概因為平租,
證明了我們平時在些粉買的 $6 支水, 有 $4 是用來交租俾地產商同業主.............



臨走在季季紅, 買了叉燒包回家吃, 好味~

回家途中, 去埋昌緯單車店買個鈴鈴, 店員超好人, 順便幫我 check 埋個轉波 system,
整完後, 成架車爽晒好好踩呀!

夜晚當然是母親節飯, 6 個人食了差不多 8人餐的份量, 飽史了~

近又日式吉列豬扒

美好的假日, 中午去吃越南菜, 美味,
之後閒逛, 經過烘焙店買了包現成的朱古力蛋糕粉, 同埋傳說中超香的金桶牛油,
烹飪高手都話用呢種牛油整的蛋糕曲奇會好香好鬆化~



咁我就整啦, 點知就衰咗喺D 預伴粉手上........
一向整蛋糕, 我都係自己溝材料的, 今次一時貪方便, 就出事喇.....
蛋糕太濕了, 焗完後完全脫唔到模, 攪到甩皮甩骨咁, 還嘥晒我另外加的比利時黑朱古力......
味道是可以的, 但賣相唔得, 冇影相了.........

夜晚約了朋友食飯, 出街時發現自己原來今日曬燶了......... 好兩截色的一個手錶印.....
鬼咩, 今日完全冇諗過咁曬 (明明出門口時仲好密雲), 所以對手完全冇搽防曬之下就出事了



是日目的地是朗豪坊 11 樓的近又日式吉列豬扒, 去日本就食過三次吉豬, 在香港反而一次都未食過,
因為在微博見到朋友的相片太吸引, 攪到我即刻去食咗
揀呢間純粹因為近朋友屋企同埋波比今晚仲要去踢波, 不過質素只是一般, 一路食我哋一路講下次要去 Don 吉~





最先上的, 竟然是店員送了一隻炸蝦俾我哋, 不過三個人分了試過後, 都覺得唔嗌係應該的,
因為一食就知係死實實的雪藏貨, 和之後去福岡食過太好食的簡直差天共地......

右邊的是炸芝士, 是水牛芝士? 好濃滑的芝士, 但原來不是我們心目中會流動的那種,
因為都幾漏, 一人一粒剛剛好!



咖哩吉豬, 咖哩汁調得好好, 這裡的吉列皮脆得來不會太厚, 唔錯的,
不過豬扒肉質就不是太優質





由期待變失望的芝士千層豬扒, 看相片是有洶湧的芝士流出的, 但實際是.....沒有......
又吃不出強烈的芝士味, 千層豬扒的肉都算嫩的, 就此已而......



飯後波比去踢波, 我哋兩個女人行街街!
Shopping shop 到十點先捨得走, 行了好多百記同凶宅想買 iPad 2, 間間都話冇,
再去先達睇 , 嘩, 多貨到o丫, 間間都一棟棟 iPad 賣, 正常舖頭的貨就係俾人買晒嚟呢度炒.....
16GB Wifi 版最平 $4180, 多三舊水, 好冇買?

今日最緊要還是買返支防曬, 試吓好多人讚的 Sofina 好冇用先~

好開心 - 踩入南生圍

哈, 南生圍我們去過 n 次, 但次次都係行落樓行兩條街就搭船仔入去, 未試過兜個大圈咁入去

今朝睇屋苑的 forum , 見到有鄰居踩單車入去, 其實我一路都想試, 但又唔識路,
於是睇 google map 做定晒功課, 我踩單車, 波比跑步, 實行踩入南生圍的大計!!

但係, 我部單車原來好耐冇出動係會有點緊晒郁唔到的情況.............. (上一部已經係咁所以掉咗)
好彩而家呢部放屋企, 即刻用支 WD40 噴噴佢, 都只係好咗D............ 很擔心部車又唔要得
拎落街踩順了, 發覺好咗D, 但都係有點問題, 踩極都踩唔快, 好用力踩到我氣來氣喘都只係 10km/hr,
好慢, 攪到要波比成日停低等我, 咩事呀????

踩了 3km, 突然覺得架車D 聲好似有D 唔同, 好似一路剎住擊咁踩,
跟住就發現, 吓..... 乜原來個單車籃壓住咗個 brake 條線, 就攪到之前踩極都踩唔到!!!!
原來真係一路好似落住 brake 咁踩囉! 唉~~~~ 點解會咁o架?!
即刻鬆返條線, 架車即刻順晒, yeah!!!!!
不過我已經好攰好攰, 因為頭先真係用咗好多力, 已經滴晒汗喘晒氣!!

我哋都好享受今次的新路線呀, 因為超好天, 沿途藍天白雲青山綠水的景色真係好靚呀~
不過踩單車驚震壞部 GF2 , 所以今日只係用 iPhone 影相咋, 下次一定要帶埋相機先得!









兩個滴晒汗的人, 終於都去到終點喇, 全程 7km,
買咗一罐 Coke zero, 太涼透心太爽的感覺! :D

遺產財富 - 是好是壞?

如果到你百年歸老的時候, 你有一筆遺產財富, 你有沒有想過怎樣去安排?

有時在醫院, 見到有些爭產個案, 總覺得很心酸,
無財, 便是福?

我見過的, 大部分的突發中風/意外而導致喪失認知語言能力的老人家,
因為事出突然, 事前當然沒有吩咐落財產的安排,
最記得有兩個仔女帶伯伯來睇我, 關心的問:「佢神智清唔清醒?」
答這問題很小心, 我深明佢想試探什麼:
「精神上佢當然清醒有知覺有反應 (佢而家又唔係昏迷), 但佢已經喪失語言能力, 連最簡單的是非問題都答唔到」
那試探是小甜甜案那種「神智清醒下立遺囑」的清醒,
家人想要一個「清醒」的診斷, 然後要伯伯簽名作認同將身家轉移俾佢哋!
但伯伯根本做唔到, 這情況下, 政府也生怕有些不孝子女會侵吞老人家的財產,
可能會搵社工做佢的監護人, 確保老人家的錢是用在自己將來的生活醫療開支~

今日又見到一個個案, 伯伯沒能力作決定, 按法例妻子成了他的財產接管人,
但仔女竟然申請 secondary guidanceship, 要動用他的財產作非伯伯生活開支, 要申請到上高等法院,
究竟是一個不可靠的母親, 還是又一班不孝的子女?

當子女拿到錢後, 那些老人家就會被放在老人院不加理會,
我問過第一個個案那些子女:「你哋會唔會探佢? 我教你哋一D 治療訓練, 返去幫伯伯做好嗎?」
子女一口拒絕, 聲稱沒時間要返工云云.........

有很多錢又如何? 生著一班不孝子的話, 老來的境況的十分可憐及淒涼的.........
當沒有能力照顧自己, 就是在老人院等日子
在這份工作閱人無數, 我都見過孝順我令我佩服的子女, 那些老人家真的很有福氣~

五代同糖

吃過築地拉麵, 見到對面竟然有五代同糖, 是近來有點人氣的甜品店,
雖然飽, 還是忍不住要幫襯 (哎呀, 明明有人在減肥喎.....)

我試了榴槤河粉, 是椰汁糕條的河粉, 配上椰汁再掉舊榴槤入去,
味道嘛, ok 啦, 食完只覺滯.....



波比的蛋白杏仁茶, 又是 ok 啦, 算不上是滑得細膩, 亦唔值呢個價錢



整體而言, 真係冇咩驚喜, 應該都唔會有第二次~

同同事講起旅行, 呢排的日本自遊行 package 真係平到喊,
坐國泰去東京, 大阪, 福岡都只係二千幾就三日兩夜, 真係好心動好想去 (什麼幅射, 香港人已經唔記得了)
北海道更是 $3580 就得, 嘩, 之前我淨係買機票都五千幾呀~~~
可惜我呢兩個月都 book 得超爆 case, 都唔會有機會去到,
六月亦已經鐵定了去台灣嘛, 冇行了..............
唯有引誘吓下個月會放三星期大假的同事去啦 (魔鬼!)

http://www.jnto.go.jp/eq/chc/06_video.htm#camera

我都仲引誘緊波比先生 10 月去大阪馬拉松, 仲有幾星期就要決定喇~

築地拉麵

今日成七點先放工, 為著開會傾一個自閉症的 program,
俾我的感覺係重量不重質, 我已多返強調太低能力的小朋友怎可沒有個別訓練?
但高層為了交數, 只是不斷關注開組谷數,
看見第二間醫院的 Tx Plan 竟然是 2;0-6;0 的 grouping, (心裡「吓」了很大聲!)
同一個組內十堂中可以由 pre-verbal task 去到有 sequence description, 天呀............. 太神乎奇技了嘛?!!!!
我想俾我專業的舊機構同事見到這個 Tx Plan 的話, 一定貽笑大方同成為業界的笑話!

長唉一聲........... 唉~~~~~~~~~~~~~~~~~~

*****************************************************
好了, 太夜走冇煮飯喇, 去旺角又唔知食咩之際, 忽然想起近來雅蘭開了間築地拉麵
築地唔係食刺身壽司的嘛? 哈~ 怎會變了拉麵?

整體食物唔錯呀, 先來了另外叫的溏心蛋, 幾好的水準, 是已調味的, 溏心有點似啫喱的蛋黃好正呀!
是香港少有的好質素!



我的豬軟骨拉麵, 豬軟骨炆得好林好入味, 豬骨湯底很濃郁, 不過稍咸



波比的叉燒醬油拉麵, 湯底味道清一點, 叉燒超大塊, 不過其中一塊稍硬



波比同我都覺得呢度的拉麵都好唔錯, 做到大部分的日本風味,
服務員效率高有禮貌, 絕對值得再幫襯!

元朗剪小丸子頭

呢兩日作病中, 本來都想下午 sick leave, 但約咗個超可愛的 case , 今日仲要係佢生日, 唔捨得請假!
他是一個十分討人喜歡的小朋友, 又靚仔皮膚又白雪雪, 簡直想搣佢兩下錫佢兩啖嗰種!
因為父母工作都太難請假, 即使佢有需要見密D, 都見唔到, 真係好可惜........

波比介紹我食恭和堂的龜苓膏, 真係易入口過養和堂的, 不過超貴啊~



今晚去了剪頭髮, 去到髮型屋, 竟然話我剪開的髮型師俾人炒咗, 唔係化?!?!?
好不知所措之際, 唯有求其入去附近的另一間髮型屋,
吓?! 竟然俾我見返我個髮型師?! 唔係化?!
原來佢已經走咗一個月了, 波比先生早幾星期去搵佢, 原來俾人呃話佢唔喺度, 攪到俾個不知名髮型師剪咗個好 hea 嘅頭 (陰公.....)
呢個髮型師叫阿龍, 好有心機剪的, 而家在安寧路47號 的 X-Square, 推介給元朗的朋友呀~

很難的量出而入

Keep Fit Keep Fit! 今日要去跑步, 點知曬死咗.......
搽咗 130 度 PA+++ 的防曬, 著埋防曬衫, 戴埋 cap 帽, 都係曬到熱又滾..........



深深體會到「烈日當空」四個字點解...........



跑咗 3km, 已經唔係好頂得順, 生怕自己會中暑.........
回程 3km, 大部分是行的
回家一看, 30 度的氣溫, 唔係化............



沖了 2011 年第一個凍水涼, 很爽!!!

之後就是老公的外賣, 這個魚生碎飯真是百吃不厭!!



今日試新嘢: 京蔥三文魚腩邊 - 很肥美的感覺, 不過下次都係叫返三文魚腩啦, 差唔得幾多錢



懶健康的烏冬, 不過失望在都唔係用日本滑滑烏冬嘅, 豬扒不過不失,
不過要讚一下有一兜配菜, 感覺健康D



對面的舖頭成了我倆的假日飯堂, 平靚正!

不過做完運動又食返咁多嘢 (真的太難忍口.....), 入過於支喎 (減肥是要入不敷支的!)
唯有希望自己有多點恆心去做運動吧!

玩具

老公買了新玩具, 不是 iPad 2, 是 Acer 的 tablet, 佢話擴充性好過 iPad 好多,
終日不停的督督督, 出街喺度睇小新漫畫, 真係服咗佢!
女人不明白男人為何要買玩具, 等如男人不明白女人為何要買化妝品一樣, 哈~



最低工資後, 覺得食肆都好似加晒價, 幾個人去茶餐食個午餐的價錢, 其實同去飲茶的差唔多!