很開心的聖誕假

開心的聖誕假完結了, 星期六我還要返工啊, 因為醫院太忙了

星期五, 好開心日頭約了中學好友到我家, 兩個龍鳳 lovely kids 真係好可愛又好攪笑!!!
多謝大家送給小豬嘜的禮物啊, 這是她第一份收到的禮物~ ^3^

因為我家冇咩俾小朋友玩, 出面又落雨玩唔到滑梯, 於是就諗到同小朋友整 cookies!
印呀印, 大人應該在旁指導, 就是要放手讓小朋友自己做,
學會放手, 小朋友才會長大



之後一齊去咗薩莉亞意式餐廳 Saizeriya Italian Restaurant
嗰度有得泊車, 食物又多款又平, 每樣都係二三十蚊, 呢個價位今時今日喺香港食飯好似真係冇乜可能!
咁多選擇, 總有D 小朋友會鍾意食!



星期六晚, 就是大學同學聚會, 開心都好齊人呀!!!
在同學家有工人幫手煮飯, 我就買準備了香茅雞翼同埋元朗的有機烏頭魚,
家常便飯, 有個地方一齊聚舊傾偈, 已經係好開心了!

日頭同了 Twins 玩, 夜晚又同了同學的活潑女兒玩, 波比先生今晚返屋企時謝晒, 笑死我.......

星期日, 到了大學老師的家吃飯, 大學老師最愛有機健康食物, 又喜歡下廚,
剛買了部製麵機, 就即席整咗意粉食, 真係幾好食啊!
今晚我就準備了烤豬肋骨啦, 有韓或燒汁味, 同埋香茅味,
加埋其他老師秘製的菜色, 真係口福不淺啊!!



同完D 幾歲大的小朋友玩, 今日的是大朋友, 小三同中一的女兒,
老師沒有催谷, 不是那些恐怖的怪獸家長, 但兩個女兒也讀到好學校,
大女兒給我看協恩中學的功課, 嘩, 真係好深.......
有D 家長迫D 仔女讀呢D 名校, 其實個小朋友應付到的就 ok, 應付唔到的, 真係好辛苦......
睇完D 功課, 真係有令人心寒的感覺........

小豬嘜大個係點, 由佢自己決定啦,
家長只可以盡能力俾應有的機會佢, 最後得唔得, 做唔做到一個成功的人, 還是好睇小朋友本身~

呢個假期, 波比先生見盡不同年齡不同性格的女兒, 也多了好多心理準備吧 :)

[2014 大阪] 高木水產鰻魚飯 x 難波道具屋筋商店街

真是最後一篇了!
大阪的第五日, 起身後都是市內遊, 因為搭 7pm 機返香港, 今日的時間都幾好用

先由酒店行去難波的 Bic Camera, 那裡有著新穎的日本電子產品同家電,
波比先生就豪買了一部 NDS 嚟玩新出的 Monster Hunter (係呀, 有人就嚟做爸爸還是像小朋友一般),
我就見到好多有趣的家電, 有D 其實都好想買, 不過都係唔敢咁快買住~

之後就直去黑門市場



因為所有美味的魚生刺身我都唔食得, 唯有做定功課有咩熟食好食
最後去了這家高木水產



清一色得鰻魚飯, 不過有不同的 size, 見時間尚早, 點了個細細的試吓,
新鮮烤的鰻魚, 真係好好食!
仲有一碗暖暖的蜆湯附送, 吃完很滿足



之後就是逛逛市場



嘩, 見到有藍色蝦籽的蝦刺身呀, 勁想食 T.T



最後喺我慫恿之下, 波比先生買了一盤豐富的刺身獨吞了!
此行我好多嘢都唔食得, 波比先生怕引到我心思思, 就陪我唔食, 其實好慘了.........
都最後一日, 今次唔食, 我都唔合幾時先會再同你嚟日本喇......
所以不斷慫恿佢買啦買啦!
我自己就買咗盒牛奶飲住等佢, 為了小豬嘜, 我會乖的!



吃飽飽, 繼續行, 去了難波站隔離的道具屋筋商店街
嘩, 呢度簡直係我呢啲愛煮飯的師奶仔的天堂, 其實好似上海街, 有著款多, 尺碼齊的煮食用具
睇到我唔捨得走!!!
最後我買了把神刀啊!! 二千幾 yen, 返來試了超好用!!!





難波站就鎖定了行 Uniqulo, 我想話喺日本買 Uniqulo 真係好平,
香港賣 $199 的貨品, 日本賣 1990 Yen, 乘返 0.07 的兌換價, 變相七折了!!
老婆瘋買了很多冬天衫之餘, 老公都瘋買埋一份!
買到要老婆嗌停, 因為仲要去超級市場掃貨, 再趕機場巴士!

我們先去機場寄存行李, 再去 Rinku Oulet 掃貨,
你可能話 outlet 都有 locker , 點解唔直接寄 outlet 度?
因為由 JR 站行去 Outlet 都唔係近, 仲要上天橋, 真係會史人的!
由 outlet 去機場, 搭唔到 shuttle bus 的話 (哈, 真係搭唔到呀, full 晒!), 又要拖返個好重嘅喼去 JR 站, 真係史多一次.......
所以為咗玩得輕鬆, 建議大家都係先去機場寄行李好啲!

最好彩係搵到呢D 3 小時的 locker 呀, 超級啱晒我呢啲寄幾個鐘嘅人,
否則都有好多寄 24 小時的 locker, 但當然個價錢會貴D 啦



去到 Outlet , 我同波比先生分頭行事, 我去西松屋, 佢去 Sport Depo 睇運動用品,
之後再一齊行大 Outlet



掃完貨又急急忙忙的聲返機場, 取行李同 check in
再食埋此行的最後一餐: KYK 炸豬扒
咁多間餐廳, 係得呢間要排隊!



好美味!



食完就過關, 入去免稅店再買手信,
其實要買一盒盒的麵呀餅呀糕點手信, 真係唔洗一早買定,
永遠過關後的免稅店都好齊, 免稅後又平了!

五天大阪之旅, 瘋買後, 波比個喼一上磅, 剛到 30 kg, 哈哈哈, 笑死我, 計到咁準!!
我嗰個都唔弱, 差不多 20 kg, 仲有幾袋 hand carry~

日本嘛, 想去的地方呢幾年都去晒咯!
有了小豬嘜之後, 更加唔知幾時先可以再飛,
老老實實, 今次都去得有D 擔心o架, 好彩都平安回來了!
有咗之後, 我那瘋癲的旅行癮一下子冇晒........ 一切還是以小豬嘜為先~
一世人流流長, 好多嘢還可以慢慢做, 但有D 事而家唔做, 就可能冇機會做~

下次去旅行, 可能係等小豬嘜一歲時先會再去 lu~

[2014 大阪] 瘋買 Akachan x 西松屋

嘻嘻, 想寫呢篇大阪遊記好耐, 但要而家先得, 因為係講買 BB 嘢!!

去大阪時, 已懷孕三個月, 聽聞去日本掃 BB 嘢好抵, 今次就行了兩間人氣店: Akachan 同埋西松屋
呢間 Akachan 就係喺我哋間酒店附近, 有幾層高, 入到去真係嘩嘩聲
先係地下的嬰兒車部, D 款多到好多喺香港都未見過, 又靚,
唔怪之得之前有個舊同學去東京會買咗部 BB 車返嚟啦!



入內逛逛, 嘩, 每種貨品都有齊全的型號, 有好多奶樽奶泵喺香港仲未見過的,
最正係呢部自動沖奶機囉, 一邊放奶粉, 一邊放水, 自動煲水加沖奶, 懶爸爸如波比先生見到真係雙眼發光 (哈哈哈, 真係好似一部咖啡機)



仲有呢個好攪笑! 唔知係咪真係好過就咁用布蓋住



我真係萬分佩服日本人的頭腦智慧, 他們本土發明出來的 BB 用品, 有好多喺香港真係未見過!



呢系列的垃圾桶係專門 for 掉片片用的, 每掉一塊, 個垃圾袋就會自動 twist 一下, 防臭又抗菌, 太先進了!!!



上樓上的, 有好多兒童同孕婦衫, 但我乜都唔識, 而且總覺得時間太早, 好多嘢好想買但又唔敢買,
最後只買了好大路的沖涼盆, 紗巾仔, 同埋衫/裙



要買孕婦衫, 真係要去 H&M, 聽講香港有一兩間 H&M 都有孕婦裝賣, 但全部對我來講都好遠,
今次逛逛心齋橋的 H&M, 真係好多選擇, D 款仲都幾靚添, 我都未試過去日本買咁多衫啊!!



最後的一天, 上機前去 Rinku outlet 那邊再掃貨, Rinku Seacle 那裡有一間西松屋, 都是媽媽的掃貨熱點!



舖頭當然不夠 Akachan 大, 主要是賣衣服, D BB 衫真係睇到我尖叫, 好靚好靚好靚!!!
可惜當時未知道係仔定女, 好忍手只買了一套中性的黃色衫,
只是三四十蚊港紙一套, 如我一早知係女一定買到失心瘋!!! 所有粉紅色的都全部一套吖唔該 T.T




所有衫都真係又平又靚, 有D 仲寫明係 Made in Japan, 好好好想生完再嚟掃貨啊!

開心聖誕 - Outback Steakhouse

聖誕假期開始了, 今日同波比先生去咗屯門UA 睇翻生侏羅館3：古墓的秘密
好好睇, 冇冷場!

之後就喺屯市搵食, 見到有 Outback 喎, 剛夠鐘開門, 波比就話要食啦
Outback 食 lunch 還是第一次, 原來佢都有 set lunch o架, 仲好多選擇

一點好菜, 勁快送上餐湯沙律同最愛的黑糖包包
不過個湯好好好咸呀...... 好彩沙律同包包好好食
有咗之後, 那口味的轉變真係好神奇, 明明我以前好唔鍾意食沙律, 有咗之後可一個人食一大碟 XD



主菜來了!! 我的 ribs 好多肉又好滑, 啲薯條超超超脆, 超正啊!!!



老公的牛扒, 嘩, 好濃的牛味, 好似 dry aged 過的感覺, 好好食, outback 食扒真係一流, 估唔到 lunch 都咁好!
這個聖誕 Lunch 實在好叫人滿意啊!!

呢度仲有二人卡位, 坐得好舒服,
心想第時帶埋小豬嘜來都唔錯, 因為第時可能去邊都要揸車, 呢度有大停車場,
又多餐廳選擇, 最緊要還是D 位坐得舒服, 元朗都有好多好餐廳, 但都是小小的, 帶住 BB/ 小朋友總未必太方便呢~~

補記: 2014 城門河皇者之戰

剛過去的星期日, 波比先生又參加了跑賽, 這個城門河皇者之戰倒是第一次參加
老婆又做司機, 車老公去玩了, 七點幾就到了耀安邨, 好好彩停車場仲有最後兩三個位

我今日又做埋攝影師啦, 幫波比同埋幾個跑友影相,
帶著小豬嘜去睇爸爸比賽, 爸爸要加油啊!!
今次攞第十一名, 哈哈, 飲恨.......

好高興其中一個跑友奪得組別的獎項啊, 睇人攞獎又會想返起自己攞獎, 都係咁開心



難得揸車去到沙田, 就去埋行 Ikea, 先去食嘢醫肚,
好多年冇嚟過, 多咗好多食物啊, 樣樣都想試, 但最後只試了四款,
不過覺得食物有點過咸呢, 但用料味道都唔錯



買咗好多家品, 呢排都係不停地執屋, 掉嘢, 設法將屋企變出空間來,
shopping 完又食過, 哈哈哈!!!



冬至那晚上, 打邊爐, 試了牛骨髓, 不過唔係太好食



做冬的甜品, 一家團圓最開心

[愛美食] 平安夜之自煮大食會

今日自己同隔離 department 幾個人夾埋再開 party, 就好似中學生開 party 咁,  抽籤一人整一樣食物帶返嚟 share
同事們整的食物都好好味啊!! 咁樣好過次次都叫 Pizza Hut 同 PHD 啦, 真係食到好厭了......



呢個果撻真係超靚, 仲靚過喺街買的!!



長假前的 case  順利睇晒了, 最喜歡安安樂樂放假的感覺

我們的平安夜, 照樣唔會出去同人迫啦, 今日炆咗蕃茄牛肉配意粉,
在家過一個溫暖的三人平安夜 :)
大家聖誕快樂啊!!

最好的聖誕禮物

今日考試合格了!! 應該話係小豬嘜考試合格!!

今日去了照結構， QE 俾我的結構期太遲了，所以我搵咗一個私家醫生照，
因為夾唔到我本身睇開嗰個醫生嘅期，今日呢位潘錫昌醫生係上網搵的

睇完，好感恩，一切都好正常，好感恩!!!
潘醫生如傳言中好風趣，成個過程都好輕鬆唔會緊張 (不過尋晚我緊張到失眠。。。)
佢部機比起我睇開嗰個醫生清好多，度 measurement 都準好多
今次睇小豬嘜睇得好清楚呀，所有度出嚟的長度頭圍肚圍都達標，不過係好似唔多肥 (但我已重了十磅)

我哋都覺得潘醫生好細心又好人
今日仲有好多相同 DVD 俾返我呀，超開心

過得今日呢關，真係安心好多好多了，
需知道我常常在醫院見到無數有缺陷有病的 BB 同小朋友，真係會特別擔心的
雖然結構檢查只是排除到部分問題，但都已經好好了
檢查合格, 真係會開心過中六合彩!! 這也是最最最好的聖誕禮物了!!

今日一路照, 一路見到佢用力踢踢踢, 頂頂頂, 哈哈, 唔怪之得我平時都 feel 到佢渾身是勁!

繼續向前走，就要安排邊個湊，同洗唔洗搬屋等等問題
其實真係好煩惱, 希望一切也順順利利啦

Merry Christmas ~ Two Parties a Day

今日好鬼開心啊, 中午就係醫院幾個 department 攪 Christmas Party, 夜晚係同我班師弟妹同事攪 party!!

今年做了個有名無實的「老細」, 就要做返D 老細會做的事: sponsor 大家的聖誕禮物大抽獎
買禮物確係好好好頭痛, 我交了給兩個 assistant 去做, 哈哈, 抽獎時大家都好開心啊!!!



今日食物主要有另一部門的阿頭贊助, 我就係咁倚整咗個 wasabi 蟹籽手撕雞返去,
撕咗我成晚o架!!



夜晚去了其中一個同事屋企, 自己整D 又買D 食物!
辛苦晒兩位男士開了 18 隻生蠔~



我整咗青口、煎牛扒、羊架、仲有 Parma Ham 配蜜瓜
望住D 好肥美嘅三文魚腩..... 冇得食......



吃飽飽就玩遊戲, 笑爆咀, 笑到碌地 XD

最後, 同事們仲偷偷地買了蛋糕同我慶祝生日呀, 好開心又感動~
有這一班好同事實在太好~



今日係小豬嘜滿 20 週了, 40 週的旅程不知不覺已走了一半,
我還是滿滿的感恩, 還有多謝波比先生對我的照顧, 也比以前勤力的做家務~
希望下半部的旅程, 也順順利利渡過 :)

[愛美食] Cafe Superior 三代同堂

今晚好高興呀, 約了師姐又有師妹一同食生日飯!
想搵間坐得舒服D 嘅, 想起了很多年前我同師姐好鍾意去的朗豪坊 Italian Tomato,
點知原來而家改咗名, 叫 Cafe Superior, 但其實都仍然是 Italian Tomato, 但食物意外的好食咗唔少!

點了兩個 pizza, 呢個四重芝士 pizza 真係好正!
個餅底是超脆的, 大家都覺得好食過某D 所謂的 pizza 店!



Ribs 同溫泉蛋牛肉飯都很不錯!
不過就係服務超差, 咁細間舖頭雖然有幾個侍應, 但永遠好似睇你唔到,
應完你又可以冇咗件事, 冇拎到D 嘢俾你, 淨係杯水都叫咗三次先斟到, 仲有口黑口面咁囉.....



朗豪坊呢期係冰雪動物做主題呀, 有排都去唔到日本探 Polar bear 了,
不過同波比先生喺度影張相都一樣咁開心~

靚景 BBQ

今日上了波比同事家 BBQ, 位於山上的老牌屋苑, 之前買才三百幾萬, 話六百幾呎但實用率超高
一入內簡直是像八百幾呎的豪宅, 可憐而家被迫在樓價高企都要上車的人,
三四百萬只可買到個蚊型單位同古怪則,
點解D 新樓唔可能好似D 舊樓咁方方正正, 實用四正呢???

超大露台, 腳下盡是荃灣葵芳的美景



我整咗蛋糕仔, 波比又帶了在日本買的咖啡粉上去,
波比一定超羨慕朋友有很多煮咖啡的設備, 就連 syphon 壺都有,
一班人 coffee tasting, 試了三種咖啡豆, 食件蛋糕做下午茶, 人生就該這樣~
當有一日我哋都搬到大屋時, 我都會俾你買返個 syphon 壺同冰滴機 XD



入夜就開始 BBQ 了!!! 超大的露台, 坐到五六個人, 放埋枱同 BBQ 爐都得, 這才是真正的露台啊
而家新型屋苑所謂的露台, 一個人行出去只係企到, 真係有點不知所謂......
對住呢個 view 慢慢燒慢慢食, 真係好正!!!
不過太夜的活動下次都係唔好預我啦, 我真係一到九點幾就恰眼瞓, 要捱住真係好難頂......

恭喜恭喜

今日好開心呀, 係波比先生的大學 Best Friend 的大喜日子!
波比要做兄弟, 我都請咗半晝假, 先要返屋企瞓一瞓, 否則頂唔順去飲捱到咁夜~

六點正去到酒店觀禮, 簡單而感動, 看到朋友結婚了, 總覺得好幸福!
我們聚會有 5 PAIR 人, 兩年前多了一個小朋友, 而家就嚟又多了小豬嘜,
希望好友早生貴子, 一班小朋友一齊玩一定好開心!



我之前識扭汽球就係呢個好友教的, 今個婚宴, 佢的師父扭了兩座好大的汽球公仔送俾佢啊, 超可愛!!



今個星期, 還發生了一件很甜蜜的事情, 就是我開始 feel 到小豬嘜踢我了!!
起初其實我都好唔 sure, 只是上個 weekend 開始覺得下腹會跳一下,
但我都分唔清究竟係D 腸郁定阿 B 郁~

由星期三開始, 感覺愈見強烈同頻密了! 我開始肯定了!!
有一個小生命在自己的肚內, 有時佢會郁郁吓、頂頂吓、了了吓, 那種感覺實在太奇妙了!
吃飽了和趟平了, 那感覺更多更明顯 XD

我叫波比先生手放在我肚子上, 他也可感覺到那頂頂吓的郁動,
現在即使不用胎心機去聽, 我也可確定她的存在, 感覺實在多了~
很感恩上天賜了這份可愛的禮物給我~

[愛美食] 舒適好坐 Super Sandwiches

嘻嘻, 今晚繼續好友飯聚, 是我第二份工的舊同事,
相約在旺角新世紀四樓的 Super Sandwiches, 唔講都唔知有間咁嘅舖頭喺個咁隱閉嘅位,
但又因其隱閉, 所以勁多位, 仲有好多係梳化位, 超好坐超適合二人相聚慢慢傾偈~

這裡的食物也不錯, $60 就有三種食物再加一個湯~

兩個女人講生仔講工作, 就是超開心的三小時~
生仔湊仔嘛, 總有好多人俾好多「意見」, 但還是這個舊同事的思想觀念和我最似

[2014 大阪] 天神橋筋商店街 x 阿倍野

大阪之旅, 繼續要發掘D 未去過的地方, 但真係好好好難搵.......
最後去了一個叫天神橋筋商店街的地方, 都近剛剛食完神戶牛的梅田站,
一出地鐵就已經是商店街的入口



呢條商店街, 又意想不到的好行喎, 可能因為賣D 嘢夠平民化,
好多小店都值得入去睇睇, 唔覺唔覺竟然買完一間又一間, 都是家品文具等~



商店街有成 2km, 慢慢行完都要兩個鐘, 之後又攰了, 又返返梅田站, 去了有名的丸福咖啡店



之前飲過佢哋出的樽裝咖啡, 都覺得唔錯, 既然佢喺大阪有咁多間分店, 應該都有D 實力!

下午茶時間, 我又唔飲得咖啡, 唯有叫了個 pancake
賣成 600-700 Yen, 對一個平時都會喺屋企煎 pancake 倏早餐的師奶嚟講, 好唔化算!
不過見日本呢D pancake 好似好多人叫, 就點一份, 一試其虛實!

well, 真係好鬆軟, 又好香牛油味, 不過, 師奶仔還是覺得收咁貴是物非所值



波比就例牌咖啡加 cheese cake, 睇杯咁黑的咖啡都知道好堅啦,
成間咖啡店都充滿了咖啡香, 日本人都是靜靜的, 我十分喜歡這種咖啡店的感覺~



之後, 我哋返東橫 inn Check Out, 去了入住新的酒店, 那是我們第一次來大阪所入住的 Hotel Monterey Grasmere Osaka
由擠迫的商務酒店仔, 轉住豪華的四星酒店, 住客、服務、設施都完全是兩回事,
波比先生開心極了!
冇啦, 有了小豬嘜之後, 如果三人行再去旅行, 你都唔會有機會再住東橫 inn 啦! (我好努力儲的十送一優惠沒有了 T.T)

一入房, 嘩, 比上次住過的房間更大!! 仲有那同一方向的無敵美景!



入夜了更加美, 五點幾就天黑, 我都要瞓返陣先有力再出撃!



好了, 最後一晚, 趕趕忙忙, 去了一個新地方, 叫阿倍野,
那裡即是天王寺站, 近年新開了幾個超大的 mall, 又有五星級的酒店!
不過我瞓得太晏, 去到已經七點幾, 只夠時間行了運動用品部
見到 Kobe Marathon 的 Tee 啊, 靚過大阪的好多!!



行行吓竟然撞到行山朋友, 嘩, 佢哋住樓上的 JW Marriott, 太豪了!!
我同波比先生講: 到我人工加到 max 時, 我都會帶佢嚟住返晚 XD

山友好好人的送了D coupon 俾我哋, 波比可D 有折買到佢發夢都諗住的 JAPAN 版 Asics 跑鞋呀~有人太開心了!



行完運動部, 個 mall 都閂門了, 我們都唯有去搵食啦
一早我已 search 定一間好 local 的韓燒店, 冇遊客的~



2880 Yen 就有 100款食物的燒肉放題, 睇個 menu 都興奮死!



仲有咖哩呀、菜呀、麵呀、salad、湯、韓式石頭飯等等,
不過我哋都係想食燒肉多, 所以好可惜試唔到太多......



推介的三程上等牛, 真係超好食!



牛舌好爽






呢個韓式冷麵好彈彈彈牙, 超好食!



落了柚子醋的沙律, 很清新



哈哈, 有好多不同味道嘅雪糕啊, 我偷食了一次又一次呢~