豬欄生活: 6月 2013

2013年6月30日星期日

[愛健康食物] 水果酵素 Round 2!

人人都在談論究竟星期二洗唔洗返工, 但今日都仲未 feel 到個風的威力, 好天得嚇人~
今早去了大棠跑步, 而家跑友鄰居已搬走了, 波比就同佢喺元朗運動場跑上山 (上山嗰吓真係好黐線.... 已經 5km),
我就自己揸車去大棠等佢哋, 走時又做司機車佢哋走~

可能 Long weekend 好多人外遊, 停車場竟然唔多車~
超美的藍天白雲呀~~

輕鬆地跑了 9km 唔夠, 因為鄰居趕住走呢~
烈日當空, 流汗流到爸爸聲.......

食完飯同波比去配眼鏡, 佢終於都配了副全視線,
其實我都想佢配好耐, 眼睛真係好重要, 而家香港的紫外線又成日都咁高, weekend 我哋又跑步行山,
唔保護多D, 第時老咗有眼病真係九成都返唔到轉頭就慘......
雖然三千幾蚊真係幾貴 (有人度數很深), 不過我寧願佢配副有用的眼鏡, 好過買個無謂的電話俾我啦~

之後去了買水果, 整第二次的水果酵素!!
講吓第一次飲完點: 嘩, 唔好講笑, 飲咗嗰排, 條腰瘦咗!!! 肚腩仔又細咗! (我呢排係做少咗運動又冇食少嘢o架!)
所以, 我個人覺得係 work 的! 信不信由你~

今次整提子酵素, 其實D 網站都教要風乾先入樽就唔會發霉,
但其實我覺得D 水果本身都係有汁o架啦, 入樽一晚後咪又係成樽濕晒??
而且一切開D 提子, 咪又係濕, 所以我對要全乾先入樽的說法還是半信半疑......
求其曬一曬我就入樽喇~

哈哈, 今次唔知會唔會變葡萄酒??
試吓每日打開其中一樽, 睇睇有咩唔同先!

2013年6月29日星期六

[愛美食] 再訪倚窗閣

美好的星期六, 約了波比表妹同佢慶生, 我們又選了倚窗閣 lunch buffet
今次被安排坐落地玻璃的窗邊, 超開心~ 陽光下的午餐, 心情特別的好~

今個月同上個月的食物有少少唔同, 竟有即煎的多春魚, 超好味, 有時食 buffet 唔一定要食好名貴的食物先開心~
那個蟹黃蒸蛋白也十分讚, 炸三文魚很香口, 超愛~

其實我食 buffet 都幾蝕本吓, 嘻嘻, 因為我都係主攻甜品,
今天的芒果拿破倫很正啊! 酥皮夠脆得嚟又唔油膩, 少有的高水準! 再三 encore!

兩小時嘻嘻哈哈就過, 席間談到我們的長輩, 個個都五六十歲但都成了低頭族,
以往係阿媽叫阿女唔好玩電話, 而家係D 老家人玩得仲過份, Candy crush/ Facebook/ Whatsapp, 要由後生的叫佢哋唔好玩!
真係咩世界.......
其實幫佢哋換智能手機係咪一個錯誤呢?
玩物喪智, 凡事都應適可而止~

[2013 沖繩夏日遊記] 沖繩浮潛大比拼 Top Marine vs. Marururoa

來到沖繩, 一定要玩這裡的水上活動,
我幻想的沖繩, 就是看過一本雜誌的相片, Bikini 美女坐在玻璃船同浮潛, 水清得很, 美得很~

出發前研究了好耐究竟 join 邊間浮潛好? 沖繩有幾個海灘, 浮潛都有不同的出發點,
又有好多浮潛的專門店, 看得人眼花瞭亂

不過最重要的, 是起碼我用英文 email book 到先啦, 有啲主要做日本人生意, 佢唔識英文的話都唔知點溝通.....
真係 book 的時候, 日本人有時又好耐先覆你,
最後攪了一輪, 成功地 book 到兩間~
雖然好多人都去青之洞浮潛, 但我還是覺得海中浮潛會多D 陽光, 影相都靚D, 所以冇揀青之洞
另外, 搵咗好耐, 終於搵到間有玻璃船爬的!
先睇睇介紹:

	Top Marine (網站)	Marururoa (網站)
活動	小丑魚城堡	爬玻璃船及浮潛
地點	恩納	北谷
規模	朋友介紹, 有幾間分店, 有正式的舖頭及門前可泊車	都有幾間分店, 但我們去的一間只是一個貨櫃搭建而成… 車停在公眾停車場
語言	有能說普通話的職員在店內詳細講解流程教練會說簡單英文	教練會說簡單英文
教練	型佬	好靚仔
設備	潛水衣及潛水鏡的清潔及新淨程度滿意有防霞噴霧供稱 (噴潛水鏡用) 坐專人駕駛的遊艇仔出海由水中上返船有梯用	潛水衣有點爛, 清潔程度一般….. 竟然叫我哋吐點口水去摔個潛水鏡以收防霞之用…. 潛完我上極都上唔返隻玻璃船, 攪咗好耐…
水中拍照	教練可幫我用我的相機拍照有防水相機出租 (JPY 2500)	教練可幫我用我的相機拍照收了我們 JPY 1000 用佢部相機幫我哋影相, 不過得幾張相同埋都影唔到浮潛中的合照 (T.T 失望….)
好玩程度	***	****
多魚程度	一般, 因為在較深水的位置浮潛, 魚都離我們較遠, 較少珊瑚教練有準備麵包俾我哋引啲魚埋嚟見到不同海洋生物, 如:藍海星、海參	在較淺水的位置浮潛, 身邊好多魚游來游去沒有麵包好多唔同顏色的珊瑚, 有軟有硬, 非常難忘!
更衣室	有更衣室及洗手間, 沒有洗頭水/沐浴露供應	有更衣室, 沒有洗頭水/沐浴露供應沒有洗手間, 可去出面的公廁
價錢	JPY 5500	JPY 4800
後記	明明約咗 10am 集合, 我揸車過去要一個鐘, 點知嗰朝 8:45am 打電話來, 要我 9:30am 一定要到否則唔等我…. 莫明其妙….. 用 Map code 揸車揸到去, 搵唔到間舖, 打俾佢又溝通唔到, 前前後後搵咗 20 分鐘, 先發現原來我停車嗰度就係…. 搵唔到的原因係佢冇英文招牌 (好彩我識睇佢的日文名….) 同埋間舖頭個樣同喺 website 張相完全唔同 @.@ 以為會見到好多小丑魚, 點知得三條	佢所提供的電話, 根本帶唔到我哋去要集合的停車場…. 我打俾佢問, 講了我們的所在地附近的舖頭, 佢話嚟搵我哋, 點知等咗好耐都唔見人…. 最後我在 google map 終於知道佢叫我去的所謂籃球場喺邊, 自己再揸車去…..

第二天, 先在北谷跟 Marururoa 爬玻璃船及浮潛
和之前兩次在布吉同沙巴浮潛相比, 我覺得日本的浮潛裝備可靠一萬倍,
我終於第一次覺得件救生衣係啱身同真係浮得起我 (之前在布吉的, 想起那 size 應該係加大碼, 一路浮一路鬆脫...)
第一次穿蛙鞋, 也沒我想像中的阻手阻腳,
第一次穿潛水衣..... 我認, 我的小腿很粗, 粗得穿和除時都有想史的感覺......

前面的靚仔教練先用快艇拖我們的玻璃船去海中心

之後就叫我哋自己爬去一個紅色浮波到 (咁似求愛大作戰?!)
原來..... 不是我想像中的浪漫...... 波比先生的爬根本完全推動唔到隻船, 我不停地 coach 佢,
又被D 浪沖走, 爬了不夠三分鐘, 就筋疲力竭......

OK, 爬到去終點, 就跳落水了, 教練叫我哋扶住一件當浮板用的救生衣, 加埋自己的救生衣, 令我感到是次浮潛活動十分安全

這是用教練相機影的相, 真係好清好靚, 咁大個人第一次見到咁多活生生的珊瑚, 是畢生難忘啊!!
去過幾個浮潛點, 這裡是最美的!! 開始明白點解有D 朋友會咁醉心潛水活動了~

這是自己的 DC 仔加防水袋 (講起防水袋, 想買的朋友可上 Yahoo 拍賣場同去星際買)

冇喇....... 因為波比先生淨係識拍 video 囉...... 冇乜相.......

上水後沖身換衫就 byebye~

到出面的北谷海灘行行, 有時間的話, 這裡睇日落好靚, 仲有得租爐 BBQ

右邊遠望就是美國村~

第三天, 到恩納的 Top Marine 浮潛
是遊艇出海, 教練的背影是多麼的型, 我在船上是多麼的緊張.....

今天是老婆操刀, 很多相, 不過仍在後悔為什麼沒買防水相機, 否則相片會更美.....
很多不同形狀的珊瑚啊!

不同種的魚魚, 見到麵包就游晒過嚟

傳說中的小丑魚呀!!! 係教練可以潛得低先影到咁近的 view

唯一的合照

海參!!!

特備節目

教練好似海豚咁, 噴出一個圈呀!!! 拍爛手掌!!!

2013年6月28日星期五

[愛住家菜] 葡國雞拼手抓餅

話說我有包黃薑粉, 煮完一次擺咗喺度成年, 終於的起心肝用埋佢!
星期一晚煮了葡國雞, 不過其實又志不在雞, 在我想食好耐的手抓餅!!!

手抓餅是台灣的小食, 在台中的夜市食過之後簡直列入台灣十大美食之一!
不過之後去台灣都遇不上, 使人念念不忘......
有次行一田, 見到有得賣急凍的, 就買了來, 不過一路都冇機會整嚟食~

今次整了葡汁, 煎了手抓餅, 它在說明介紹中叫我自己抓爛佢
手抓餅是要真的用手去爐上抓鬆塊餅, 當時我們見到檔主咁整, 簡直覺得佢有鐵砂掌的功力!!!
我實在抓唔爛, 就咁啦!! 這款手抓餅味道不錯, 香香脆脆, 很香的芝麻味, 點了些葡汁食, 正!

2013年6月27日星期四

[2013 沖繩夏日遊記] Ashibinaa Outlet x 追風丸拉麵

有驚無險, 到了我們的第一站: Ashibinaa Outlet, Tomiton Mall, 開心開心~
我們把車泊了在 Tomiton Mall, 那裡有超大的停車場, 免費的, 真好!!

先行去 Ashibinaa Outlet 出血

今天算是收穫豐富呀, 先在 ABC Mart 買了對 Skechers 波鞋, 在香港睇嚟睇去都要 >$700,
今日見到對好鍾意的, 都係唔洗 HKD500, 二話不說就買了,
鞋很好著呀, 仲係彎底那種, 是聽義肢矯型師同事的介紹去買的, 佢話可以練到腳底的 muscle, 改善我扁平足的問題~

第二站是 adidas

入到去收到張 40% off 劵, 係真唔係呀???
我終於買到一條恨咗好耐又唔捨得買的跑步連身裙了 (就是日本女孩很喜歡著那種), so happy!
埋單唔洗 HKD150!!!

波比先生好克制喎! 錯了, 佢只是留返 quota 去佢最鍾意的 asics 掃貨,
買了幾件運動衫呀褲呀, 大叫好平好平~~

這個 outlet 還有 agnes b. 同埋 coach , 其實都平, 只是沒有太合心水的款式, 不要為買而買, 算了~

出血後要醫肚, 過返對面的 Tomiton Mall, 一入去地下就有個大 foodcourt, 有多家沖繩麵店,
不過走了一圈, 波比不感興趣~

反而我們到了家札幌拉麵店 - 追風丸
好多人等位啊, 多人等通常都冇衰!!
這裡攞位唔係攞飛仔的, 係自己寫個名喺本簿度等佢叫名,
好彩，我還懂得寫自己的日文名，否則都唔知點排隊
等了約十分鐘就有位了，很快速地點菜，因為我們只有半小時吃，之後又要飛車到浮潛地點

中午時段，呢度有優惠方案，就是所有湯麵可免費加大麵底!!
哈哈，又賺了!!

我點了匠醬油拉麵，是幼身的拉麵，湯底是魚介湯底，清甜不膩，
溏心蛋做得很好，最有趣是上面放了一片麵包，我也不明白點解沖繩人喜歡用這似是餵魚麵包的東東入饌
滿滿一大盆，和波比分來吃，夠晒飽

波比則點了沾麵，沾麵近年在香港流行，但很多人的評語都是湯太咸
我們倒是第一次試，把麵沾一沾在湯就好拿上來吃喇，否則就會太咸
這款麵的麵條較粗，很彈牙，
配上濃濃麵豉味的沾湯，實在很好吃啊，最後兩個麵都徹底被消滅了

用極速的十分鐘在隔離的大超級市場走走，
見到很多水果想買又擔心吃不下，沒買了
只買了些飲品，這裡有款有助消脂的可樂，哈哈，啱晒要減肥又喜歡可樂的女孩吧

2013年6月24日星期一

[愛烘焙] 最好還是你

整過湯種/液種, 冇種的麵包, 最好吃的, 始終都是湯種 + 手搓, 不過我唔係全職主婦, 何來時間手搓?
湯種始終要洗鑊, 懶人會嫌麻煩~
不過如果逄 weekend 整一次都 ok 嘅, 起碼幾日都有新鮮麵包食, 心情會特別好~

星期日就用了在日本買的紅豆蓉, 整了紅豆包,
白神 + 普通酵母, 個個都脹卜卜, 好滿意~

尋日整 egg benedict 俾老公, 仲有 n 塊火腿要呢幾日食晒.....
所以用來整芝士火腿卷

還有一大條的燕麥紅豆包

嘻嘻, 又鬆軟又多紅豆, yummy!!!

2013年6月23日星期日

[2013 沖繩夏日遊記] 日本租車自駕小貼士

對於第一次在香港境外揸車的我來說, 這次自駕之旅是緊張萬分~

租車篇

第二天的 8:30am , 約好了 OTS 的職員在酒店樓下等, 搭了他的專車送我們到OTS 的とまりん営業所取車
在營業所那裡, 有很多景點的特價入場劵賣, 但特價又唔代表真係抵, 自己格好價至決定買唔買
例如我去名護動植物園, 在酒店找到 8折劵, 其實比這裡的特價價錢還要平~

有興趣租車的朋友, 如果又睇得明少少日文, 建議你去 OTS 的日本網站租, 因為比台灣網站平一半有多
我就用了早割 40 (即最少 40 日前預訂)的優惠, 7500 yen 就租到3日2夜的 1300cc 車, 真係抵到爛!!
http://www.otsrentacar.ne.jp/okinawa/campaign/hayawari40.html

租車的價錢, 已包了第三者保險,
職員會問你加唔加下面呢個保險, 但個人覺得佢包的項目有點不實際, 除了爆軚之外, 其他根本是些可避免的人為錯誤, 所以沒加了,
反而最令人擔心的唔小心車身損毀, 就真係要靠 RSA 的保險來得實際~

填了些文件, 影印了車牌, 俾埋錢就可取車, 我訂了的是 1300cc 禁煙車, 佢話明一係俾 Jazz 一係俾 Note 我,
上到去停車場, 跟職員行好緊張呀

見到佢最後俾咗架白色 Note 我哋, 超開心!!!
因為就是我揸開的 Note, 揸上手點都安心D!
職員同我哋由前至後檢查車身一次, 記錄低所有已有的花痕作還車時的對比,
然後教我哋用 GPS, 提我哋還車時要入返滿油, 就攪掂可以出車了~

這架 Note 的外型應該是 2013 年版, 只行了九千幾公里, 但又同我們家的有點分別,
就是錶板還是很傳統的設計, 沒有我們的電子顯示,
而且好似冇咗斜路防溜後的裝置, 斜路起步時真係要好似學車時咁俾定油先得
其他功能就相約~

日本的交通規則
是我揸了三日車有時還摸不清的~
例如交通燈的向右箭咀著了燈, 應該是右轉的車可行,
在香港通常其他方向的車都不會行, 但日本就不是, 還有四方八面的車在行, 有時你要停在十字路口的中央等其他車行完先到你轉, 實在要打醒十二分精神!!

在日本, 無論是紅燈或綠燈, 只要沒行人過馬路你都可以左轉,
但我就是不敢, 覺得都唔知係咪嘅..... 所以一路都冇試過~

在 Town 內的路其實有點窄, 我們揸小車子還可, 如果你是租七人車, 請小心點睇位唔好過線

GPS System

車內有 GPS, 不過有點不習慣安裝的位置 , 每次都要低頭望,
GPS 有國語語音導航, 但是有問題啊! 我就俾佢老點了兩次!
當要轉彎時, 佢會預早 700m 同 300m 提示你, 但 300m 打後, 佢忽然間話:「馬上向左轉」
佢話馬上我就梗係馬上啦, 點知就出事......
第一次俾因為轉早了一個路口, 攪到駛咗入個小島, 第二次就駛咗入個停車場,
後來明白到佢的「馬上」根本不是馬上, 仲有一二百米先到要轉的路口, 就冇再出事了!

日本 GPS 的優點, 是會顯示未來的多線道路中, 你要靠邊條線行,
我實在超愛這功能, 因為在香港揸車, 最怕就係唔熟路,
安安全全靠左行咩, 行行吓先知入了必轉左的線, 但我明明想直去, 想 cut 又 cut 唔到返右......
這功能實在令人安心又放心啊!!

不過用 GPS 有個唔好處, 就係佢會帶你去到目的地..... 嗰頭....
但我們要泊車嘛, 停車場入口總是要兜兜先搵到,
有時目的地其實在你對面線/ 右手邊, GPS 又唔會教你點兜過去, 還是要自己 trial and error

好好彩, 日本真係一個超級好的地方, 所有司機都十分禮讓又開得慢, 謝謝日本人對小妹駕駛的忍讓~
有時忽然間要轉線, 總有人讓你, 呢D 在香港簡直是奇蹟~

輸入電話/ map code 去尋找路線後, 佢會有幾條路線俾你揀, 都有該路線的距離、時間、收費,
當你由南走到北, 建議要選行 IC (收費公路) 的路線,
因為我開始時想行不收費的路, 但發現太塞車了, 用錢買時間是一個 fair deal,
行 IC 不單只沒燈位, 又可以開得較快, 省回了不少時間啊!!!

去到 IC 的入口, 如果你沒有租用 ETC card (公路的自動繳費卡, 即香港的 Autotoll), 就記住唔好行 ETC 專用道, 否則會罰錢!!
經驗所見, 沖繩通常最左線就是「一般」的入口, 會有部機自動彈張飛出嚟, 攞咗先通過,
IC 沿路有很多出口, 跟著 GPS 的指示在特定的出口出就 OK,
出 IC 時有收費站, 把張飛同錢交給職員就過得, 好方便~

沿海行走的道路景色很美, 但很多時都是雙線雙程行車, 記著不可超車啊~ 慢慢駕駛及享受藍天白雲的景色吧 :P
在中北部的道路, 晚上沒有街燈, 記得開大燈行車啊~

訂閱：文章 (Atom)