椰汁西米露

今日返工, 忙得嚟一切都幾順利~
不過一諗起下星期老細放大假, 我又要做 i/c 就好大壓力 *o*

前兩日煮完咖哩, 有半盒椰汁剩, 呢幾夜都唔會煮飯, 就用來煲糖水,
去印尼食品店買了一種綠色的西米, 用半包就煲咗一大煲, 大到....... 應該要食三四日..........



在網上 check 到我12月2日行畢業禮了, 好開心~

感動的一天假

woo~~ 今日相信係全港打工仔普天同慶的日子, 真係完全冇諗過今日會掛八號風球,
更加冇諗過的係會掛全日!! Amazing!!!!

雖然知道聽日返到醫院會忙到嘔, 但係今日可以放假對我來講真係天大喜訊!
因為我很需要時間, 坐定定去寫我的三份 case report!
昨晚很乖的完成了一份, 今早七點幾寫到十二點幾完成了第二份,
現在第三份也完成了大半, 真係好好好感恩!!!
這一天, 邊度都唔洗去, 可讓我好專心的寫寫寫~ 真係完全冇諗過進度會咁好!

希望這兩天可以順利完成晒, 咁星期六日就可以安心的去 gathering 了!

不能外出的日子, 好彩家中儲糧充足~



嘻, 一邊寫一邊要有好多精神食糧, 在馬莎買的 Mature Silton Cheese 味道超濃超正!
配 cracker 食真要大叫 yummy!



晚上同波比去食麥當當, 沒有人迫人的感覺, 塞了很多唔健康的油同卡路里,
壓力下正正需要這一點 Junk Food Therapy~~

知驚

史喇, 下個星期有三份 Case Report 要交, 是關於我的部門內部考試的,
尋日落筆, 先發現好難寫........... 因為要寫得好詳細, 要睇返好多書做 reference, 真係好大鑊.....
所以今個星期, 邊度都唔洗去咯...........

上次打爛咗樽孜然粉之後, 終於俾我再買得返,
孜然牛肉、粟米魚柳, 很送飯~

倒數一個月

星期一可以準時走, 幸運地搭到巴士, 6:45pm 回到元朗可以煮飯, 很滿足~
簡單的泰式雞翼、蟹柳蒸水蛋、台式腸仔、腐乳通菜, 還有波比買回來的老火湯,
為這個星期打打氣~

關西之旅, 倒數一個月, 好興奮!
海膽海膽, 我哋又來食你了!!!

(2010 年大阪之旅)


不過D 日元係咁升, 前幾星期跌返去 10.0x 時入咗D,
但而家又暴升到 10.22, 有冇攪錯呀.......... 咁攪法, 真係好難再去日本喎...........

上年是在日本過中秋, 今年原來是在日本過萬聖節,
哈哈, 唔知有咩攪作嘅呢? 係咪應該入 USJ 玩返轉?

紅豆香蕉西多士

星期日的下午, 要整D 開心食物~
多謝小軍的啟發, 發覺原來在家也可做西多士~ 我們都超愛的茶餐廳食物!!!

可自選餡料, 買了最愛的紅豆同香蕉, 就動手做~
用煎的方法, 一點也不油膩, 很讚!



因為在吉之島買的紅豆都頗甜, 所以唔洗再落糖都好夠甜味,
蛋香、紅豆、香蕉混在一起, 太美味了~
配一杯即磨咖啡, 是去台灣旅行時買的咖啡豆再自己磨, 很美滿的下午茶呀~

荃灣 New Balance 10km

今日 6am 起身, 又去跑馬拉松!
哈, 不過今次淨係波比跑, 我去做攝影師咋~ 因為上星期先跑完, 怕今個星期又跑我會頂唔住!

地點是荃灣西鐵站起跑, 跑到去過咗汀九橋折返, 唔洗預早拎號碼布, 去到先攞其實仲好
(上次要特登星期六去沙田拎號碼布, 嗰日又熱又等唔到車, 真係火滾!)
由屋企出發去到唔洗半個鐘, 太方便~



寄埋行李, 都差唔多起跑時間了! D 人好早已經去晒起跑點~
種子跑手有得排第一, 又見到 Thomas, 仲有兩個意大利人, 又有好多名校的學界精英!



當人潮去得七七八八, 我都跑埋一份, 因為平時真係冇咩機會出到嚟荃灣跑,
呢段路沿海邊, 好舒服, 同馬鞍山差不多, 仲闊D~





開始上斜同埋跑到馬路上





不是比賽的心情, 一邊跑一邊拍拍照 (當然會 keep 住步伐唔會突然間停低阻到人啦),
嘩~~~ 好爽~~~ 仲見到汀九同青馬橋, 真係冇幾何可以咁跑~



我去到 3km 到折返



後面的朋友要加油啊!



我未去到 3km 已經見到 Thomas 返緊嚟, 太恐怖了, 完全拋離第二三名 幾條街,
次次都係佢拋離晒咁贏, 佢一定最清楚體會「無敵是最寂寞」呢六個字!



我都跑咗 6.33km 呀, 計好差不多時間返到去終點等波比先生,
不過回程時開始落雨, 幾驚愈落愈大呀 (咁我睇嚟就要換 iPhone 5 同埋 GF3 了),
好彩, 跑到返去終點時又停雨了, 電話相機先唔洗報銷~

哈, 波比先生用了大概 44分鐘返到來喇, 算是滿意的成績!



換好衫, 同波比爸媽去好彩飲茶, 一跑完有得食真係好 happy!!!



煎腸粉點解係點 wasabi 嘅? 太有創意了吧!



去大阪之前的比賽暫告一段落, 我們還有一個月好好練習呀~

友聚@Al dente

今早去了聽 seminar, 之後約了好朋友食 lunch
今天的 combination 很有趣, 有我、好朋友同埋新同事, 新同事就是我好朋友上年 take 的實習學生,
三個不同屆別的人眾在一起, 都有很多有趣爆笑的話題, 由 1pm 傾到 4:30pm,
幸好今日我們去的意大利餐廳環境超優雅寧靜舒適, 非常適合慢慢傾偈~

這間 Al dente 是好朋友介紹, 真的十分值得推介~
麵包有點像蛋糕的質地, 超鬆軟, 但個邊是脆脆的, 好吃~



Medium Rare Ribeye + Pepper sauce, 最愛還有下面的薯蓉, 我一個人吃光光, 還 send 了個 MMS 去引波比先生!



還有甜品, 有什麼好得過星期六的下午, 悠悠閒閒地三個女人/仔一邊吃甜品一邊談談女人心事



下次再帶波比先生去食啦~

椒鹽巨賴尿蝦

星期五, 終於都打完仗了!!! 算係攪掂得晒最難攪的 BB case, 下星期應該唔會咁 harsh 了!

成個星期都冇煮飯, 今晚要煮海鮮沖喜吓!
見到街市有好大隻的賴尿蝦, 嘩, 出去食起碼七八十蚊隻 (老婆從來都唔會俾老公嗌嚟食),
老細見就收工平D 賣晒俾我, 超開心!

上網睇過, 其實唔難整, 都係走油後, 加D 蒜蓉、辣椒、薑蓉、椒鹽兜幾兜就得!
不過整的過程, 我唔記得咗自己隻手掂完超辣指天椒同薑, 一嘢摔咗落眼度,
之後就大鑊喇~~~隻眼又紅又那又痛呀............. 要敷冰先得, 痛咗半餐飯先好D~



哈哈哈, 真係好大隻, 仲長過隻碟呀~~
加埋D 炸蒜蓉, 十足避風塘口味, 啖啖肉, 超正!
食過一次, 真係以後都未必會再食細隻的~

一年一會

今晚約了紅十字會的朋友仔食飯, 若不是其中一人從外國回來渡假, 我們都不會相約相聚, 太懶了嘛?!
傾了很多有趣開心的事, 我們應該兩三個月就聚一聚啊!

全枱個樣最baby face 的一人, 已經是爸爸了, 真係有冇攪錯?!
哈哈哈, 看見他和仔仔的相片, 大家都齊聲話:「點睇你都唔似係佢老豆, 似係佢表哥囉!」
佢真係個樣十幾年都唔變, 好恐怖! 佢而家去華都行過, 都會有人問佢買唔買舊書囉~

哈, 希望下次再約, 今次來不到的朋友都可以出席啦!

尋找擔擔麵

這星期忙得要死!
同事放無限期 sick leave, referral 多到爆, 星期一二三都遲收工到煮唔到飯.........
最大鑊係呢排好多 BB 仔要睇, 一個睇成粒鐘, 在人手短缺的情況下要睇這好花時間的症, 真係好閉.......

連續兩天都去了食擔擔麵, 近來好想食, 但搵唔到一間似樣的!
元朗恆生後面街開了間叫梅龍小鎮的上海菜, 被花多眼亂似是正宗的菜色吸引入去
擔擔麵, 一睇已經知道唔多正宗...... 食落, 淡.......... 失望



波比先生叫了鱔糊, 比較好,
還有我最期待的高力香蕉豆沙, 其實我都識整, 不過要炸嘢太麻煩, 都係出街食好D,
個皮夠軟綿綿, 但豆沙同香蕉餡太少了........... 太懷念美樂花園有一間超好食, 畢生難忘的高力香蕉豆沙



第二晚, 去了荃灣力生地下那間刀削麵, 這裡的擔擔麵比較似樣, 是好吃的, 不過仍不是心中的味道,
有時間的話, 我一定要自己整個滿意的擔擔麵呀!

可口可樂健跑樂 2011 x 麗景酒店咖啡亭 buffet

嘻嘻，今日好開心，參加了我人生的第一個 10km 跑步比賽
是可口可樂舉辦的健跑樂，在馬鞍山的烏溪沙青年新村集合，
今日我 5am 就起身了，因為 6:30am 已經要出發，感恩的車程算很順利，但都要個幾鐘先去到

今日天氣清涼，好適合跑步呀，去到已經人山人海，有千幾人參加！
見到很多跑步會的跑友，跑步真是一項很好的運動，健康之餘又可以是很好的聯誼活動
寄咗行李後，在大草坪上伸展一下，有很大的可樂罐呀



又有很大的可樂樽



8:30am 比賽開始了，不同之前的城市之王同 Lunar Run，這次是所有人一同起步，起跑時難免會有塞人的情況，
不過其實對我來說是好事，大家同樣地慢跑，我就唔會心急，可以好好 keep 住速度了！

今次我很自豪，因為十公里內沒有行過，全程都是跑的！保持住之前訂下的 6'40"/km 去跑！
係跑到最後一公里，竟然又橫隔膜痛。。。都頂住頂住的返嚟！
衝過終點的一刻，很開心同感動啊！我完成了！
一小時七分鐘完成了，是目標內完成，Yeah!



不過大會安排真係唔多掂，淨係掛住台上面攪 function 作宣傳，唔理好辛苦跑返嚟的跑手，
成千人好似輪米咁，得一條隊一個 counter 派水同香蕉，真係有冇攪錯呀？！
我同波比去過咁多個馬拉松，冇一個咁差囉！通常一行到埋去就有得攞，好多人都話點解攪咗咁多年，Ｄ安排都仲咁差？
人哋跑到死死吓咁返嚟，想飲啖水都排成十幾分鐘，你話合唔合理？！
我排咗兩分鐘已經話唔好排，嘥我時間，我排得嚟已經去到馬鐵站買埋飲完喇！
係波比先生史都話要排，真係服咗佢。。。

我排隊時，波比就去咗拎綿花糖同埋爆谷，但係咁熱天氣，Ｄ綿花糖係咁溶。。。



我們換件衫，就衝返屋企沖涼，然後去了麗景酒店咖啡亭食 lunch buffet 賀賀佢！
之前睇不眠王子介紹過好多次咖啡亭，一路都好想試呀，今日見咁辛苦跑完，有一個好的藉口去食～

一去到，嘩，地方比我想像中細好多好多，只是一間茶餐廳的大小，
不過食物非常令人滿意，雖然談不上超多的種類，但想吃的大都有，
魚生新鮮並且是厚切，印度咖哩超辣超好食！



熱盤已有齊波比最愛的羊架同豬手，午餐食埋黃金蝦，係咪有點過份？



這燒牛肉，做得竟然比朗廷酒店同香格里拉的好，非常嫩滑！



最驚喜的，是有任食鵝肝多士！



甜品也是貴精不貴多，七層的 Opera 同埋麵包布丁都十分美味



仲有部軟雪糕機俾人自己裝，波比玩咗兩次，好 happy!
Tiramisu 同埋 Chocolate truffle 都好出色，明知Chocolate truffle 超肥，都忍不住 encore 了一次！



我們都大讚這裡的服務員非常有效率，可能這就是地方小的優點，
而且服務員非常之有笑容有禮貌，又主動會問食客的需要，真係俾足 100 分呀～
十分推介這裡的 buffet 呢!

一讀就想瞓.....

滿以為我讀完個 Master, 就可以唔洗再落會所落讀書啦, 點知..........
突如其來醫院下個月有個試要考, 我從舖晒塵的書櫃中, 搵了幾本十年前讀 U 的 reference book 嚟讀............
讀一陣, 就好想瞓, 想瞓到有點唔正常, 先醒起今朝唔舒服食咗藥, 可能係D 藥力發..........
十年前後, 睇返D 書原來感覺又好唔同, 以前讀書本的文字, 根本睇完都毫無頭緒究竟佢形容的病徵會係點,
而家在醫院幾年, 有了很多實戰經驗, 再睇返書本的講解, 果然領會深好多!

讀 U 幾年, 交了學費但真係唔知讀咗D 乜.....
九成現在工作要運用到的技巧, 都是畢業後同學同事間互相傳授鑽研出來的, 大學的課程可以實際一點嗎?
來年終於要在醫院帶實習學生了, 還希望他們可以學到有用的東西, 不要像我們那年代的紙上談兵

今日去了拜見玉子將軍, 不過在一間沒冷氣的麥當奴, 加上本身超眼瞓.....
有點食而無味...........



晚上去同老爺食生日飯, 成餐去飲的餸菜, 當大家以為完了的時候,
送上一大籠超巨的壽包, 巨得嚇 c 人!!! (看看個包同茶杯的比例你就知....)



當時 share 吃一個, 回家又吃多個, 因為太美味了!!
剛出籠熱得溶溶地的蓮蓉, 加上漏晒油的咸蛋黃, 嘩, 好正呀~~~
波比妹妹話平時呢個包係賣 $19 一個的!
東海出品, 整餐飯都好滿意呢~

趁早

星期五, 超忙, 平時睇開 BB case 的同事去了第二間醫院替假, 所有 BB case 都變咗我睇......
有時D BB 出世冇咩嘢, 大大吓先發覺很多問題, 先發覺係 syndrome 係遲緩, 對家長打擊實在很大,
由出世到一歲都是用著胃喉去餵食, 都沒離開過醫院的............. 其實多的是~
同事都不停叫我:「o拿, 妳係生就快D 喇, 妳睇吓 xxx 幾慘.......」

臨放工去了 ICU 睇埋一個女仔, 超 supportive 的家人, 令人值得在 weekend 前遲放工都去睇埋佢先~
有時 early referral 同 early intervention 真的很重要, ICU 的病人, 原來有時還不是太差,
當我的電話響, 那鬼妹仔說: "Boyfriend?" 我很驚訝她會古靈精怪的這樣問!
"No!!!! This is my colleague"
"No, boyfriend boyfriend boyfriend"
"No, it is the DECT phone we use in hospital, not my personal mobile phone. I talked about you, how naughty you are!"
"Boyfriend boyfriend boyfriend"
"Hey, I have NO boyfriend, I only have a.............. husband! Look at my ring, I am married!
"You are married?!!"
"Yes~"
哈哈, 很多時病人還不太相信我這個幪面人是個已婚的師奶仔~

放工, 開心的去吃拉麵~



試了這 Lime Diet Coke, 好淡, 好冇可樂味, 很奇怪



買了個想試好耐的酒店芝士蛋糕返屋企



雖然芝士味同軟綿綿程度沒有自家製那麼好, 但唔洗郁有得食, 都算唔錯了!

流心芝士蝦餅

嘻嘻, 今日有自創新菜式! 我很愛吃芝士, 流心芝士更甚~
有一日, 想到用芝士夾在蝦膠中間, 拎去半煎炸, 有了這個 idea 好耐, 今晚見有D 時間先整呢D 手工菜~



woo woo~~~掂呀~~ 流心效果十分理想, 唔洗調味, 只是芝士的咸同香拼落蝦餅落已經好正!



我覺得呢個菜如果係用吉列方法炸會仲正, 不過唔想太大鑊油同咁唔健康, 所以都係半煎炸好了~

梗會食過的阿波羅

是香港土生土長的你, 會喜歡阿波羅雪糕嗎?
最經典的是雪糕三文治、Monaka、雪糕甜乳酪,
近年的榴槤雪糕雪條也做得非常出色,
今次要介紹這款 Black Jack Cone



上面的朱古力花生, 又脆又香口,
雪糕比牛奶公司的軟滑, 即使從雪櫃攞出嚟即刻食都唔係死實實咬唔開~
甜筒絕對鬆脆, 不會像有些牌子又林又爛..........
$20/ 4支, 平靚正呀! 呢幾日, 每日唔食過都唔安落呀!