Ready TW Sun and Sea

台灣呢幾日其實有個風球, 好彩今日已經離開了台灣, 解除了颱風警告,
不過未來一星期, 還是預測會日日落雨, 不過都唔緊要啦, 落吓雨可能總好過曬得太勁,
我有同事剛去完台東, 搽晒防曬都攪到手手腳腳甩晒皮咁返嚟, 真係嚇死人!
於是我即刻去買多支防曬, 要迫波比先生都搽先得呀 (個衰佬成日都詐詐帝帝唔肯搽)



好彩唔係今日飛咋, 今日飛可能D 氣流好勁呢!
而且去旅行前, 真係好需要一日去執吓行李同執吓屋, 之前試過一放假就飛, 攪到又趕又冇得瞓....

今日好好天, 去旅行之前, 爭取時間跑多一次步!
大阪馬拉松訓練日誌 (12): 今日好犀利呀, 由我哋屋企跑咗去天水圍!!! 真係冇諗過可以咁跑!!!
共總竟然跑咗 10km 呀!!!! 好開心!
跑到去天水圍運動場, 好多人, 個更衣室幾好, 有風扇涼吓降吓溫,
回程時, 經過朗屏邨去麥當奴買包食, 返屋企就有得食, 好 happy~~



今個旅行唔帶電腦, 應該 update 唔到blog 了~
不過會用電話上網, facebook 應該好快有相睇, 嘻嘻~ See you!

Baby shower x Bday gathering

我返晒工喇, 做完五點個 case 嗰吓, 簡直好似有年尾收爐的感覺!
我成日覺得自己好耐冇放過假咁 (其實三月尾先放完),
可能放親假都全時間飛咗, 冇真係喺屋企 hea 那種假,
今次是 10天的連假, 希望可真真正正的充吓電 (不過放完假返來要考最後一個 Master 考試....都係唔好諗住...)

今晚過得非常開心, 因為約了幾個好友聚會,
因為時間緊迫 (我又去旅行又要溫考試), 趕忙地擇個日只約了幾位朋友相聚,
為的是同今個月生日的壽星女賀壽, 還有是一個 Baby Shower, 要同大肚媽媽影相留念

全晚在歡笑聲中渡過, 下一次見面, 應該是讓 BB 見見我們這班低 B 的姨姨的時候了! 哈哈哈!

好人好事

今日又返第二間醫院, 先經過百佳買了麵包,
有個嬸嬸見我拎住袋包行嚟行去, 以為我趕時間, 竟然話: 「妳趕時間呀? 俾妳排前面俾錢先o丫!」
香港地, 竟然仲有咁好嘅人, 真係難得~

其實我行來行去, 係搵緊藥, 好似又作病, 千祈唔好喺旅行前病呀!

開會開到成 7 點先走, 出街食越南菜! 咖哩 + 蒜蓉包, yummy!



返多一日工咋!!!!!!!!!!!!!!

小一派位

有個媽媽同我講, 小朋友派了第五志願的學校, 近來好忙四出撲學校..........
媽媽不忿地說, 佢每月三千幾蚊學費俾小朋友讀冇學劵的幼稚園, 又俾小朋友學好多嘢,
最後派小一等如抽六合彩 --> 純粹好運,
有D 新移民對社會冇貢獻攞 CSSA, 竟然小朋友就有得入 Band 1 小學,
媽媽似乎氣壞了~
我之前都知派小一是抽獎, 但冇諗過真係 worst case 應該點,
原來如果打算生仔, 除了幼稚園階段已經好貴的開資, 還要預多一筆錢, touch wood 冇好小學讀,
要拎D 錢嚟俾佢讀直資/私校了~

今晚去到百佳, 黐線的, 三號風洗唔洗搶食物搶到咁.... 乜都賣晒!!!
唯有蒸肉餅, 不過都好, 今日好成功的蒸到超滑肉餅呀~

腐竹蛋糖水

今日見了一個婆婆, 太強烈愛莫能助的感覺,
見到無親無故的老人家, 什麼事都沒有人幫, 沒有人為他打點, 常常只有覺得好心酸.........

************************************************************

去旅行前, 為了要清晒雪櫃的雞蛋, 諗到不如煲波比至愛的腐竹薏米雞蛋糖水!
好似今次係我第一次煲糖水俾波比先生飲咋~ 唔知呢, 可能覺得糖水肥, 所以一路我都冇自己煲過~
特登將部分的腐竹稍遲落, 做到有D 未完全溶晒的效果,
仲有超多薏米, 原來自己煲會冇出面食的咁林, 有得o趙吓, 唔錯啊!
雞蛋是溏心的半熟蛋, 加埋晒一齊, 呢個糖水都好滿意~~



大阪馬拉松訓練日誌 (11):
趁打大風前, 今晚又去跑了 6km, 因為恐怕往後幾日都落雨冇得跑了!
運動場超多人啊!

炎夏之菜

"Au" 緊打風, 熱到傻咗...........
上去兒科病房係冇乜冷氣的, 一路睇個 B, 一路滴晒汗..............

今日波比竟然比我早返到屋企, 好彩我今朝晨早起身已經整定一個餸, 就係涼伴泰式雞翼!
哈哈, 原來上年的 6 月19日, 我都同樣整咗呢個餸, 真巧!
http://startat712.blogspot.com/2010/06/blog-post_5435.html

今年的是改良版, 加了炸蒜蓉碎更惹味啊!!
不過凍食的雞翼始終較硬身, 有咩辦法令佢林D呢?

50km completed!

大阪馬拉松訓練日誌 (10):
今天是一個好好的 milestone, 夜晚跑了 7km, 開始識得控制均速, 做到 <7min/km



另一成績是6月以來, 一路用 Nike+ 去計里數, 今晚終於都突破了 50km 喇!!
燒咗 >2000 卡路里, 比之前輕了點, 腰圍及肚腩仔都收了點, 是令人很鼓舞的變化啊!



跑步真的好奇妙呀, 可能流汗流得多 + 全身運動, 沒有做到 sit-up, 腰圍都竟然會瘦, 真是喜出望外!

今日跑了 4km, 忽然間好似尋日咁一邊橫隔膜痛, 於是立即用尋日睇網頁教的方法,
深呼吸加拉筋, e!! 真係好 work 喎!!! 做完就完全唔痛了! 太神奇了吧, 哈哈哈!

悠閒星期天 x 鵝肝炒飯

上次話過想食鵝肝炒飯但唔成事, 今日係個好得閒嘅星期日, 一於今日整啦!!!
其實都幾多工夫, 醃牛肉, 切蘿蔔, 大蝦去腸,
鵝肝我切細粒起鑊再落飯去炒, 點知炒炒吓, 所有鵝肝都溶解到唔見晒...... 只聞到香氣
好彩還留咗一半, 最後煎煎放喺炒飯面, 不過我發覺鵝肝係唔可以切細粒咁整o架, 
因為一煎佢就溶化, 細粒的話會溶到渣都冇.......... 下次都係一件件咁煎好D!

大蝦就用黑椒汁同芝麻去煎, 很香口~
這個午餐, 出去食都要收你 $80 掛, 老公我又幫你慳咗錢喇!



不過為食老公逢星期日都要歎杯街外的咖啡先安樂 (縱然佢每天已經飲緊唔平的 UCC),
去了麥當奴, 有人記得老婆話過想食蕃薯批, 真係買咗俾我喎~ 嘻~
不過有點失望呀, 蕃薯餡唔多, 味道亦唔濃, 似吉士味多D~



星期天, 悠閒的去書店看書, 在家看食尚玩家同最後計劃台灣行程, 簡單而滿足~

合桃香蕉朱古力蛋糕

唔洗返學的星期六, 真係好寫意, 所以又可以焗蛋糕!
奶奶尋晚俾咗兩條蕉我哋, 有一條好熟, 啱晒用嚟整蛋糕

Recipe:
牛油 40 克
糖 40 克
牛奶 40 毫升
純黑朱古力 40 克
以上隔熱水座溶混合,

加雞蛋 2 隻

低筋麵粉 60 克
梳打粉 1/2 茶匙
可可粉 1湯匙
過篩拌入朱古力溶液

拌入一隻份量的香蕉蓉
拌入合桃適量

用了 10 種材料先整成呢款朱古力蛋糕, 不過呢 10 種材料屋企都有存貨,
大家可想而知我個廚房係儲埋幾多食材.......... 基本上做蛋糕的所有材料都係全部有齊的........

170 度焗 30 分鐘
完成!




我一定要盛讚呢個 recipe, 真係非常之掂!  (相比起兩星期前整嗰個, 嗰個原來一D 都唔算好食...)
呢個蛋糕質地較濕潤又軟綿綿, 精華是那中間的香蕉蓉, 焗完後非常非常之香, 全間屋都香晒!
一啖有齊朱古力, 新鮮香蕉同埋合桃的美味, 太愛了! 波比都讚好好味!
真係出面都食唔到的美味呀~



最識歎的波比, 一路吃一路飲返杯冰凍日本咖啡, 是美妙的下午茶~

Side Stitches?

大阪馬拉松訓練日誌 (9):今朝好好天, 諗住同波比先生跑遠D 啦, 點知.....
一起跑, 我就竟然橫隔膜痛, 完全史吓史吓咁跑, 都跑唔到, 一跑就痛......
本來係去天水圍的, 去唔到啦, 唯有改去球場,
不過真係好好彩呀, 一到達就落了一場好大的過雲雨,
如果我哋係去緊天水圍, 條路冇遮冇擋, 我哋一定變了落湯雞喇!!!
不過好快又出返太陽, 真係吹脹!



一出太陽就三十度, 蒸發住地上的雨水, 我完全覺得自己好似喺個蒸籠入面跑緊咁!



我唯有諗辨法啦, 我覺得痛係因為一跑時, chok 到D 肌肉/內臟攪到痛,
於是我就坐低人的重心咁跑, 即係好似快行咁, 唔會 chok 到身體, 所以真係唔痛喎!
算是勉強地完成了 5km 啦..............

咁我睇返D 外國的網頁講呢個問題, 原來叫做 side stitch,

http://www.runnersrescue.com/Side_Stiches_Running.htm

The problem may be more likely to occur if you run soon after eating because a full stomach may irritate the diaphragm when you run. Spasms can also occur if you breathe rapidly during a long race, causing the diaphragm to work harder. 

Solutions

Using abdominal breathing while running may be helpful in reducing diaphragm cramping. During abdominal breathing, you inhale slowly through your nose, hold your breath for several seconds and breathe out through your mouth. As you inhale, you push your abdomen out and relax it again when you exhale. Deep breathing while keeping your lips pursed may also help. Pursed breathing involves inhaling through the nose and exhaling through the mouth while keeping your lips together as though you are whistling.

Read more: http://www.livestrong.com/article/365025-diaphragm-cramping-after-running-a-race/#ixzz1PcIFn38


兩個 website 都係教做 deep breathing exercise, 如果下次 touch wood 再出事, 希望真係有用啦!
如果去到馬拉松比賽時先出事, 咁真係好慘啊!!! (就好似波比先生剛剛的比賽咁)
準備咁耐, 一起步就跑唔到, 實好傷心啊~~


跑完步, 去了食士林台灣麵, 而家佢絕對係元朗田中之外, 最長龍的舖頭, 夜晚去係唔洗旨意食到的! 
我哋所以都好耐冇食了, 今日真係算早先有位咋!! 
炸雞排, 好食 (又好肥.........), 不過是凍的
牛肉飯的牛肉, 又是凍的.... 好生意之後, 似乎已經冇以前做得咁認真用新鮮了




下星期日, 我們就在真真正正的士林夜市了, 嘻嘻~

味皇

當去好普通的茶餐廳食個頹飯都要三四十蚊時, 走進味皇魚蛋粉, 只覺得好食又抵食!!
$28 的撈粗, 有魚餅, 冬菇, 豬軟骨同菜, 仲另送油菜~
愛吃豬軟骨的我, 覺得呢度整得非常好, 又林又入味!



還有那即磨咖啡, 一層層的, 堅呀!



太可惜元朗冇分店啊!

芒椰

今日去了第二間醫院, 工作很順利, 開會很順利, 很多細節都 confirm 了,很 productive 及令人滿意的一天!
這院的同事都好好人, Canteen 又唔迫, 老細仲買了蛋糕歡迎我, 多麼好的開始!

今晚獎勵自己, 食新買的菲律賓雪糕!
嘩嘩嘩, 好濃果肉味, 正呀!





還有尋晚整的椰汁糕, 是用極都用唔晒的椰汁的製成品!
混埋芒果雪糕一齊食, 另一番滋味呀!

咖哩什錦

唉, 返工忙到嘔....
尋日發現唔見咗部 Call 機, 懷疑留咗喺件制服唔記得拎返出嚟就掉咗去洗......
打咗去n 咁多個地方留 record 叫人執到俾返我, 唉............

前日煮咖哩, 仲有半罐椰汁, 今日諗住用埋佢,
煮日式咖哩, 有紅蘿蔔、薯仔、牛、魚,
哈, 雪櫃有的都掉晒落去一齊煲~ 最鍾意用個汁送飯~



又要清埋D 蟹肉, 蟹肉蒸雙色蛋



聽日要去另一間醫院做嘢, 短時間的幫手攪個 program, 希望唔會做死

超推 - 榴槤雪條

之前上網見到元朗街坊大讚一間叫維多利亞的舖頭賣的菲律賓雪糕好好食,
今日放工把心一橫, 肥就肥啦, 夏天唔食雪糕, 點可以算是夏天?!

去到拎咗榴槤雪糕, 不過老細竟然 discourage 我買, 佢話菲律賓始終唔係出榴槤, 會較淡味,
佢推介我買芒果味, 相信波比先生都會鍾意食, 就買咗一盒細的

老細見我想食榴槤, 反而推介我買榴槤雪條:

莎寶雪條 (Sabo Ice Bar)：
原產自馬來西亞沙巴 的美味雪條。全部由當地的新鮮水果製成，如榴槤便用真正D24級數樹上熟榴槤，保證質優味美，非一般由人造色素及添加劑所製成的雪條可比。相信曾經到過當地及品嚐過它的貴客 ，都會被它的美味和豐富的口感所俘虜。

$10 條, 都算貴貴地~




但真係好濃郁榴槤味, 好食過甜品店的榴槤甜品啊! 一條真係好唔夠喉!



食完甜嘢, 係時候減減卡路里啦!
大阪馬拉松訓練日誌 (8): 前日的八公里令到雙腿酸痛, 今日都未好返晒,
一起跑時, 完全力不從心............對腳好似硬咗咁
好彩 warm up 完好好多, 45min/6.19km

前兩日買的 Mizuno 跑步衫, 吸汗同排汗功能都非常唔錯, good!

青咖喱 X 印度 Chappati

之前去泰國旅行, 買咗勁多泰式醬料...... 去布吉買嗰D 都未食晒, 去曼谷又買好多 (愈來愈覺得我有「瘋狂購醬症」.....)
係時候清清喇, 今晚終於都整咗個泰式青咖哩雞, 嘩, 好鬼辣呀~~~
波比食到個咀唇紅晒!!!



不過其實個咖哩唔係主角, 主角係呢塊印度 Chappati, 即係印度薄餅!!
哈哈哈, 前日去食咗 Naan 又唔多夠喉, 咁啱去 CitySuper 時見到有呢D 印度薄餅賣, 睇都唔睇價錢就買!
因為我們都好鍾意食o架, 一包有六塊, 食之前可以煎一煎或焗一焗,
脆卜卜, 加埋勁辣咖哩真係好有風味呀!!!



還有健康之選: 肉燥蟹柳蒸豆腐



好耐冇煲湯, 這個雲芝什菌煲雞腳, 以形補形呀! :)

秒殺台鐵車票

嘩嘩嘩, 我買到喇~~~~~
是台鐵的車票!!!!

話說兩星期後的今天, 就是我們由台北到花蓮的日子, 要搭台鐵,
最快是太魯閣號的班次, 2hr05min 就到了! 如果買唔到呢班車就大鑊, 其他車起碼都要 2hr45min to 3hr12min........
我們當日要去花蓮的海洋公園, 所以這天想盡早到達花蓮展開行程

台鐵可以兩星期前上網訂票, 這太魯閣號更加是一定要訂對號座, 冇自由席的!!!
睇台鐵的網站想知點樣訂票, 睇完都唔多明.......... 一大串中文都唔知佢講乜, 係台灣中文的文法同香港中文太唔同嗎?!?!!?
於是睇睇新聞組的人的講解, 明好多!

原來先要去呢個網站 check 班次
http://twtraffic.tra.gov.tw/twrail/

再去呢個網站 book 車票
http://railway.hinet.net/
如果是外國人要揀 English 先 book 到!
Booking 由兩星期前當日的 6am 開始, 於是今日五點幾就起身準備!!!
因為我早幾日都練習過做 booking 的步驟, 發現即使我 6:40am book, 想搭的那班最受歡迎的太魯閣號都已經冇晒位!!!!
我諗人人都唔想搭成三個鐘掛~ 人人都係 6am 起身秒殺的!!!

Book 到了, 真係開心萬分!!!
然後, 仲要去呢個網站俾錢, 真係唔明白點解D 步驟唔係一站式做晒?!?! 仲要係佢D 英文內容有錯漏, 真係外國人都唔知點 book........
https://ticket.chinatrust.com.tw/railway/index.php

俾埋錢, 真真正正完成了預約喇, 好開心!
跟住佢就出 confirmation 同埋俾個座位編號你, e............ 點解係 29 同 31 嘅?! 兩個鐘要分開坐??



原來唔係呀, 上網搵到原來台鐵的座位編排如下,
單數位都是在走廊左邊, 好嘢, 一齊坐!!!

台鐵的座位編排是
窗　　道　　道　　窗
１　　３　　４　　２
５　　７　　８　　６
９　　１１　１２　１０　
１３　１５　１６　１４
１７　１９　２０　１８
２１　２３　２４　２２
２５　２７　２８　２６
２９　３１　３２　３０
３３　３５　３６　３４
３７　３９　４０　３８
４１　４３　４４　４２
４５　４７　４８　４６
４９　５１　５２　５０ 


台灣之旅, 仲有13日咋!

I did it!!!!

woo~~~~ 今日有兩個創舉呀, 好興奮!

第一個創舉係我成功喺屋企拉腸粉, 話說我係腸粉痴, 平時星期一至五冇咩機會食,
星期六日都係難得有, 但我真係超鍾意食腸粉, 有時趁波比唔返屋企食飯, 我都會買腸粉做晚餐!

有一日心血來潮, 想自己試試整, 於是找食譜, 原來都唔難喎, 不過係冇工具o者!
咁我就去咗二德惠買蒸盤同埋刮刀, 今日屋企又咁啱有D 隔夜叉燒唔好嘥, 就促成咗我整喇!

原來真係好容易整到, 不過要滑就未夠功力, 因為屋企冇澄麵, 粉漿可能因此唔夠滑~
以下係錯誤示範, 其實我覺得 D 餡料係唔應該一早放落去的, 咁樣會攪到個皮穿窿.....
所以第一底係徹底失敗的!



去到第二三底, 蒸好腸粉先放叉燒, 同刮刀好容易捲咋!!!



登鄧, 大功告成!!! 好開心啊!!! 唔洗落豉油, 因為D 叉燒都幾咸吓!
我一個人自對兩碟都得呀~~~ 哈哈哈~~~~



希望下次又試試唔同 recipe 的粉漿, 睇吓點整先會最滑!
以後星期六日想造早餐都好容易了, yeah~~~

大阪馬拉松訓練日誌 (7): 第二創舉係今日同波比先生長征 8km, 由屋企跑去洪水橋來回!


為的是...... 去到洪水橋嘆佢有名的奶茶王!
果然茶夠香奶夠滑, 讚讚讚!!!!



約一小時, 跑完了 8.24km, 估唔到啊, I did it!!! I really did it!!!!
如果 keep 住恆常的訓練, 相信我應該跑得晒比賽的路程啊~

莎巴馬來西亞餐廳

去完旅遊展, 係搵食時間, 難得出到灣仔, 睇吓 openrice 有冇好介紹,
見到莎巴馬來西亞餐廳好多好評喎, 波比先生就決定去試試~

海南雞飯, 好好好得! 雞肉非常嫩滑, 亦非常之有雞味,
我對波比先生說: 這幾乎是我吃過香港最好的雞
還有那地道的黑醬油, 配雞吃實在是絕配~


油鬆餅, 十分之鬆和脆!
馬莎拉羊肉, 好辣, D 羊都好羶吓, 未必人人都頂得順, 不過波比先生就超鍾意!



仲有好濃香草味的拉茶, 唔錯!



$250 食個 lunch 有點奢侈, 不過食物絕對值這個價錢的~

之後, 我返了大學講書, 真係緊張死我!!!!
第一次在一個 lecture hall 講書, 第一次面對住咁多醫護人員講嘢,
開始的時候, 真係緊張到個心卜卜, 卜卜, 想跳出嚟!
我老細仲要坐足咁耐聽我講喎 (因為佢係下一堂的 speaker), 真係好擔心講得唔好囉!!
不過開始咗之後, 就一路掛住講呀講, 唔記得咗驚了!!
好快就講咗個半鐘, 唉~~~~ 去到最後一張 slide 真係完全鬆一口氣呀~~~~~~~
之後老細落到嚟仲讚我講得好添, 真係太太太感動了!!!!!
終於放低了這心頭大石了!

夜晚去了奶奶家食飯, 波比先生把 iPad2 送了俾兩老, 佢哋玩得好似小朋友咁開心~
iPad2 這發明真係好呀, 一隻手指就攪掂, 有咩事就 Home/熄機又唔易壞,
波比仲幫佢哋開埋 facebook account 等佢哋睇到我哋D 相,
又教埋佢哋用 facetime, 阿媽以後成日都可以見到個仔喇~

大豐收@旅遊展

一年一次的旅遊展又舉行了! 上年我們第一次去, 但因為是展覽的最後一日才去,
去到所有攤位的資料都差不多已經俾人拎晒, 可惜!

今年醒目了, 星期六一開放俾公眾人士就一早去, 去到真係好多有用資料呀!!!

展館右邊是歐洲的國家, 土以其的攤位有小咖啡試飲, 波比先生第一時間試試,
超特濃的味道, 飲完醒晒!!!



用了一小時就行完, 好多攤位都係想你留 e-mail 佢就送贈品俾你,
去了台灣的攤位, 取了兩張 NT99 的電話卡呀!!! Yeah~ 台灣之旅又慳咗!!!
仲有好多地圖同地區景點介紹好有用, 例如我們去的宜蘭花蓮, 真的甚少香港旅遊書有介紹,
今日終於攞到張好詳細的宜蘭地圖, 仲有羅東夜市的美食地圖, 太正了!!



日本亦都係重點想睇的項目, 今年會去的大阪啦, 來年想去看花的九州啦, 仲有 cancel 咗又想去返的北海道啦,
拎咗一D 地圖同介紹, 最想睇D 香港旅遊書冇介紹的景點



仲有一D 雜誌的攤位都有筍嘢!
例如去到 U Magazine 的攤位, 用 iPhone check-in U Magazine 就免費拎到一本星級名廚食譜,
急不及待翻看, 發現內容真係堅 (唔似得早前又係網上活動獎的李錦記食譜咁 hard sell, 乜餸都教人用李錦記特級蠔油煮, 真係睇到我 O 晒咀!)
仲有買咗今期的 U magazine, 又送袋又送麵, 哈哈!
仲有佢的大阪 super bible 賣 $20 咋, 不過屋企已經有太多大阪旅遊書, 冇買了~~



可以在不同攤位睇到不同國家的美景介紹, 真的十分令人心癢癢......

重甸甸的拎咗足足一袋 leaflet/書, 非常滿意今日的收獲呀~

朱古力麥皮 + 黑蒜油公仔麵

波比先生每天都以麥皮做早餐, 健康得很,
我吃麥皮, 吃幾口就想吐!
睇報紙見到桂格出了朱古力麥皮! 噢, 會改變我的想吐感嗎?
於是 $9 買了一小包試試~

這款麥皮真的沒令人失望, 朱古力味足 (試味前最擔心是有色無味的所謂朱古力食物),
又唔會太甜! 35g 的份量只有 140cal, 又含水溶纖維十分健康!
以後早餐除了麵包, 這還是不錯的選擇! 已經去買咗包大包裝了!
不過真係唔明, 點解電視廣告係賣咩杞子紅棗味呢D 咁騎呢的味道, 反而朱古力就冇電視廣告....



嘻, 今晚一個人的晚餐, 終於有機會試試呢款近期大熱的黑蒜油出前一丁了!



那豬骨湯 + 黑蒜油好香, 唔算太咸, 好味好味!


不過一個公仔麵有四百幾卡路里呀..........
睇完花家姐大結局後, 好乖地一個人去咗跑步!
因為呢幾日做運動後, 成個人的感覺好好, 行步路上樓梯都有力D!
最開心係 keep fit program 見成效, 腰圍同體重都有回落跡象



大阪馬拉松訓練日誌 (6): keep 住速度, 大概 7km/min 跑了 6.46km,
下星期要突破 7km 啊!

跑得咁辛苦, 先消耗了 316 cal, 所以近來我開始戒掉午餐的甜飲品!
飲一杯 = 跑半個鐘的話, 我寧願唔飲了...........

跑完步, 的確會令人更安心去食, 即是好似波比先生, 大家見佢愈來愈瘦但佢食量其實比以前還要大!
今日是星期五, 跑完步也獎自己食半個蛋撻, 仲有波比先生買回來的糖水~

尖椒

今日去睇 BB, 每星期睇呢個 BB 一次, 每次見佢都好似唔同咗樣,
之前一舊飯仔咁, 而家郁動多咗好多, 反應亦多咗好多,
她的四隻小手指捉緊我的指頭, 撐撐望望我,
BB 每一日都在變, 看著她變化是很奇妙的感覺~

上星期用了 1hr 20 min 去餵咗兩安奶都唔夠, 真係令我好 frustrated!!!!
每一秒過去, 就代表佢愈接近唔合格的界線, 是她考試也像是我考試 (是我餵得不好嗎?)
點知餵到尾聲, 病房文員忽然間彈一句:「哎呀, 頭先佢阿媽中午嚟到, 冇問過我哋就又餵咗佢, 可能佢太飽了」
吓............. 真係 O 晒咀............... D 嘢牌板又完全冇寫低, 真係俾佢嚇死呀..............

呀, 好似好耐都冇煮過一餐家常飯, 呢排成日都唔知去咗邊?
今晚煮了京都排骨拼節瓜尖椒, 即係釀辣椒的尖椒, 哈哈, 好辣呀~~~
呢隻醬汁都幾好味喎!



還有蟹肉炒蛋, 原來蟹肉煎香了, 比清蒸更香~

火熱熱

火熱熱的天氣, 日間最好的活動就是 -------------- 返工!
因為有強勁的冷氣房, 完全唔洗出露天地方, 放工一離開, 覺得這世界像個大蒸籠!!

前幾天去廣州, 已經預習了一次超炎熱的氣溫下去旅行, 是一出街, 行少少路就已經滿頭大汗那種
不敢想像下下星期的台灣之旅會係點..........
又想好好天, 因為我要拍宜蘭花蓮的美景,
但又怕太好天, 曬得不停流汗一身汗臭......... (廣州之旅, 每天都覺得自己是臭的, 每天最渴望的事就是回酒店沖涼!!!)

今晚一個人食飯, 於是煮了涼透心的冷麵~ 加點中華沙律原來味道很夾!



看完了高木直子的<<一個人去跑步>>了, 真是超精彩, 好好睇好好笑!!!
攪到我都希望有一日同波比先生去參加一次全馬馬拉松,
不過而家我還是超級BB 班啦...........

直子真的很有恆心, 差不多每天都去練跑,
很多有趣事, 都身同感受,
很多跑步的要訣真係好受用! 我要試試看呀!
日本真好, 有好多方便跑者的設備, 很想去見識一下~

之後, 忍唔住去買咗個小腰包呀! 連 430ml 的水都裝得落, 仲可以裝埋 iPhone,
因為前日發覺太熱了, 我一向拎住 iPhone 跑真係唔得, 會被手汗整到濕晒呀..........
所以都係買個袋仔裝住穩陣好多!



大阪馬拉松訓練日誌 (5): 今日嘗試改善跑姿, 點知可能因為跑姿太正確, 所以跑得快咗D
後段唔係好夠力添~ 不過學教練話齋, 睇跑的時間, 唔好睇跑的距離
今日就跑了差不多 55min, 6.96km
努力, 我要努力啊!