假日@ HAD

今日天氣太好了, 有藍天白雲, 氣溫還升至廿六度,
嗯, 十足十夏天一樣, 一定要外出走走!

一早已想著要到這個展覽看看, 今天實在是天公造美!




這是在荷李活道舊警察宿舍的一個香港文化展覽, 有著好多我們的兒時集體回憶!
有點像 JCCAC, 但更地道一點!
到達時, 已經見到好多影友在影影影!



是地道嘛? 還很 updated!





有多少年你沒有玩過氹氹轉?



大家也很悠閒地, 在享受一個美好的下午!





很愛這種燈泡, 令人想起小時候住的村屋



更多相片明天 upload

不明所以的痛

近來常被兩種痛症纏繞

第一痛是肩膊痛, 由出嚟做嘢, 開始要坐矮櫈對小朋友就慢慢產生,
又抑或係我單邊膊頭成日孭重嘢而產生? 我都唔清楚...
三年前太嚴重去了睇物理治療, 家中又買咗部按摩器, 仲有轉孭背囊, 好轉了些
轉到醫院工作, 其實已經少了好多時間要坐矮櫈, 肩膊痛也漸漸的好起來,
係唔知點解近月又愈來愈痛, 痛得甚至有痲痺同埋針拮的感覺,
根據我讀而家呢個 Master, 知道這是一些不正常的 positive sensory symptoms.....
又要去看看物理治療嗎??

第二痛是腸胃痛, 經常性的發生, 通常在夜晚, 痛得像抽筋的要命,
近來又係愈來愈頻密, 好影響生活~
有睇過醫生, 佢寫了 referral 叫我不如去自己醫院的腸胃科睇睇, 並開了些腸胃藥囉~
但腸胃科...... 一做就差不多係去照胃鏡, 聽到都真係驚驚!!!
喺未有一次痛到我要入院的話, 我諗我都唔會考慮去照住囉......
問題的根源是精神緊張壓力大嘛? 醫生都有咁問, 我答: 「梗係大啦, 喺度做點會唔大呀?」
暫時, 還只有 symptomatic 咁醫住先囉~

所以呢, 當有一日冇呢兩種痛時, 已經係一日好日子~

自私的欺騙

今日俾我發現了一年令我好嬲的事情,
係關於一個家長, 從來冇話我哋聽原來小朋友已有 EETC placement 成年,
之前仲又話冇 ST training 所以焗住要我俾密D 堂佢,
今日我了起條筋打咗去 CAC, 先知佢有 EETC ,
打去 EETC 問個 ST, 先知佢已經 biweekly 有 ST!

個阿爸之前仲應承過我, 如果一有 schooling (其實已有), 咁小朋友有 ST 的話我就要 cut 返佢堂,
但個阿爸原來冇守信用, 一路都忍瞞住我,
唔係我自己去 check, 相信佢會繼續唔講!!!!

知道嗰一刻我真係好嬲! 佢的自私其實令另一個等緊 service 的小朋友就冇咗上堂的機會!
呢D 人真係好過份! 好嬲好嬲!!!
放工去食麥當奴, 下一下火!
芥末魚柳包和新出的蜜糖芥末醬點薯皮真係唔錯!

拉花小豬

今日畫咗隻小豬, 嘻!


新聞報導了一單屯門醫院院霸事件,
老實講, 如報導所指的院霸真係度度都有,
有D 係為咗霸住醫院的一站式服務, 唔想出院後少了 rehab service 而唔肯走,
有D 就根本喺醫院已經冇嘢好攪, 冇住院的需要, 但D 家人死都唔肯接個病人走,
有D 又扮晒照顧唔到個病人, 幫佢搵埋安老院又唔要, 自己又唔請工人, 究竟佢想點??
呢D case, 醫院病房的角度睇, 真係好無奈!!! 唔通病房可以踢個病人出院咩? No la~

拉花小太陽

今晚約了兩個師姐食飯, 為了慶祝我們考試大成功,
很開心的暢談了一個晚上!

第二晚的練習, 嘻, 今次整到D 咖啡上嚟喇,
不過未控制到D 奶泡的質地, 今次浠的太多, 令到臨尾的奶泡不夠多,
畫了個小太陽, 飲的時候好開心~

尚未成功之拉花

很享受今天的假期, 好好的做一個師奶仔, 十點幾就出動,
逛了很多地方, 買了五大袋東西回來, (新年快到了, 好多東西都要換新的)
路上遇到很多工人老人家接小朋友放學, 又有好多師奶同我一樣大包小包的搭小巴回屋苑,
做師奶, 其實要有一雙很強而有力的手臂!

下午又再出動, 去了屯門市中心再逛逛, 又大出血......
買咗個袋、廚具、調味料、餸、咖啡、油....... 通通又托返元朗~

今日又買了個新玩具, 就係一個打奶泡的杯,
我同波比先生都係很愛咖啡之人, 近來又心思思想買部咖啡機,
其實屋企已經有一部, 不過好耐冇用了, 就因為咁驚又買過部又會使用率偏低... 所以還是放棄了~
但買了部打奶泡機, 就可以滿足一下自製 Latte 同埋拉花的願望!

不過要打出濃到適中的奶泡其實是很難的, 睇了一輪教學網頁, 都知道預咗要嘥好多奶嚟練習!
今日打的...... 第一次倒出嚟以為太浠啦, 於是又打多陣, 點知就太杰了,
沖唔到D 咖啡上嚟添, 所以未有圖案做到,
anyway, 都有一杯滑滑的 Latte, 明天要再練習先得!

港島半日美食團

返完兩日學, 唔放返兩日假唔得呀,
不過今朝 book 了個大陸來的 outpatient, 費是改期所以只放了下午

其實咁樣放半日都幾開心的, 當人人返緊工, 街上車上都冇咁迫人,
可以行吓, 坐吓, 感受一個美好的下午~

要返 HKU 還書, 一心就想住去食那令人回味的炸雲吞,
我諗都有六七年冇去過了, 唔知執咗未, 好彩上 openrice 一 search 仲喺度!
店子換了少少的裝修, 下午兩點幾都仲好多人,
以往係食開佢的叉燒炸雲吞麵, 因為佢的叉燒係好唔同出面的叉燒,
唔知點解, 好爽口半肥瘦啱啱好, 一直都係鎮店之寶之一!

不過今次睇食評有人都讚佢的牛腩, 所以就叫了牛腩炸雲吞麵,
牛腩是清湯腩, 味道唔錯,
炸雲吞 - 好多年來都好想食, 終於有機會食到了!!! 不過今天的似乎放得太耐, 林咗....
但我終於都發現咗點解佢的炸雲吞咁好食 - 原來外皮係腐皮而唔係一般的雲吞皮啊!
或者全香港只有這家食到!




食完嘢, 一路走回大學, 原來佐治五世公園真的要拆了, 那是一個多麼令人懷念的地方.....
取而代之的, 是港鐵的港島線新站, 原來就係喺呢度, 怪不得 PP 隔離的新樓要賣 15k 一呎啦....



在圖書館睇書睇 video 就一個下午, 離開時心思思, 去了源記, 每次返嚟都必去的地方!
今次學人叫桑寄生蓮子蛋茶, $21 細細碗, 但原來真係好正!
桑寄生茶好清甜, 隻蛋係煲到入晒味變晒色,
蓮子就真係驚為天人!!! 一入口即溶同那陣蓮子的香味, 嘩~~~ 喺出面真係從未食過!
之前嚟親都淨係識食紅豆沙, 真係走寶!



等到波比先生放工, 相約了在中環, 本來打算去一間好評如潮的 cafe,
行到身水身汗終於去到, 點知....「本店逢星期一至三休息」
當堂下巴跌了落地, 大叫「唔係嘩....」邊有人可以咁做生意......

好彩附近有間餐廳都食過唔錯, 好彩仲未執!
叫了煙肉芝士焗薯條, ribs, 意粉,
煙肉芝士焗薯條實在太好味了~

再訪 Domon

第二天的課堂, 終於都上完了, 獲益良多!

放學後與同學仔行旺角, 真的很怕假日的旺角, 人頭湧湧......

再夜D 去了紅磡等踢完波的波比先生, 一齊去食 Domon 拉麵,
咁多間分店, 尖咀嗰間最好食, 沙田嗰間難食到爆, 黃埔呢間算中規中矩啦~



行街時買了 set 紙牌大富翁, 波比先生成日都話要買但唔知邊度有,
今日咁啱見到就買了! 不過兩個人點玩呀???

下一站上海

家吓又睇緊夏天搵個短程旅行去邊好,
想再去清境探綿羊攤草地, 又可以再去泰國食嘢,
不過最後忽然諗到, o依, 不如去上海!!! 去睇世博!!!

http://big5.expo2010.cn/index.shtml

睇D 介紹真係好好好勁咁, 雖然我上次去上海對這個地方的印象麻麻,
但似乎為了這個世博, 值得去一次!
打算 30/6 至 3/7, 有冇朋友有興趣同行呢?

病好了, 今晚去了食懷舊的安娜餐廳,
好大隻嘅咸豬手啊!!! 超讚!


好懷念的鐵杯雪糕, 襯上那綠色格仔枱布, 像回到過去~



飯後我們去了買電飯煲, 就嚟新年了, 又係大出血時間,
好多廚具都要逐一更換喇~

令人羨慕的退休生活

波比阿姨於上個月榮休了, 好羨慕她計劃十分周全的人生,
她說當年她放棄了一份較高人工的工作, 轉投公務員行列,
今日女都大晒, 有屋仔有車仔有工人, 可以退休兼咬糧,
嘩, 真係令人羨慕....... 尤其當我們還為退休後的幾十年生活費煩惱.......

有時在醫院, 見到D 公公婆婆九十幾歲,
心想: 如果我又咁好彩有九十歲命, 當我呢D 工做得到五十歲, 退休後我仲有四十年生命要捱.......
四十年是何其的長?
工作的廿多年要儲定退休後 (touch wood) 活多的四十年的生活費, 實在是唔知幾多百萬的數字....
所以長糧是一樣何其令人羨慕的東西~

阿姨由現在開始, 似乎是另一段生命的開始,
周圍去玩啦, 去學D 以前冇機會學嘅嘢啦, 做自己喜歡的事, 樂無憂的生活, 才是優質的退休生活~
阿姨今個月尾開始就會去學做陪月員! 還打算叫我生個 B 俾佢做第一個實習品, 哈哈!
不過講真, 如果我生 B 的話, 真係好大機會要搵阿姨幫手湊!

人大了, 當年紀開始進入另一階段,
就會諗多D 工作還是要抱著畢業時那份熱情, 去追尋理想懶有大志,
還是實實際際, 做一份準時返放工, 收入好的工作~ 追尋穩定的家庭生活, 相夫教子放第一位~

腸胃炎

本來今日想返半日工, 上午 book 到滿晒 outpatient, 請不得假.....
打算下午放假去睇醫生同抖抖啦, 點知我老細今日又 sick leave, clinic down manpower.....
下午老細仲 book 咗好多 new cases, 點算?

好彩 Clinic i/c 替我用人情 batch in 有得睇 staff clinic (本來如果 book 要聽日下午先有得睇),
好彩今日情況一路都好轉中, 唔需要上病房企太耐的話都 ok,
最後還是返足一日工~

食物中毒

嘩, 未試過D 腸胃痛得咁辛苦, /la2/ 住痛得要命.....
可能係食咗不潔食物, 夜晚肚痾了兩次.......
瞓又瞓得唔好......

而家起身先好少少......

Airasia 又有平機票, 來回曼谷可以平到 $900 全包,
不過太遠的時間, 還未知道將來會怎樣~

RC Re-U

好開心, 今日同一班 Red Cross 的朋友仔終於都約到出嚟食飯, 可惜未夠齊人~

食了好好味的泰國菜


7 個人有5 部 iPhone



傾了好多好攪笑的話題! 還有難得的大合照, 太開心的一晚~

又去踩單車

星期六, 見天氣唔錯, 就又同波比先生去南生圍嗰邊




今日見到好多雀仔呀, 有帶大相機, 影呀影!




同人哋 D Tele lens 冇得比o架喇, 不過總算都影到!









不過今日係咁手震, 加上D 植物有風係咁郁, 好難影到張 sharp

不要驚動愛情

在收音機聽返 Sammi 演唱會的一首歌 <<不要驚動愛情>>係一首好好聽的歌
佢話係借這首歌來形容佢同安仔現在的關係,
似乎佢哋之間有太多的可能和不可能, 想去愛又不可以愛的矛盾

勞氣

醫院的問卷調查, 相信 return rate 實在太低,
而家竟然送埋小禮物去鼓勵你填, 交返去仲有獎抽, 哈~


呢個世界有太多嘥政府資料的人, 約了 appointment 唔嚟又唔出聲, 遲到又唔出聲!
有個 case 上次已經放飛機, 攪到我執晒好多嘢又要 set 晒 video recording system 再呆等嘥咗一個鐘, 一個鐘我可以上病房睇兩個症了!!!
今日又約咗佢 9am, 我 9:10am 都未見佢出現心知不妙,
平時我哋唔會主動 call patient 的, 但為免又嘥我時間, 我打了俾個阿 B 的父母,
「你哋記唔記得今日約咗 9 點o架?」
「記得, 而家嚟緊」
「咁你去到邊o丫?」
「嚟緊o架喇」
「咁而家即係去到邊?」(開始火滾)
「去到XXX」
「吓?! 你而家先去到 XXX, 咁你嚟到起碼都 9:50am 喎, 你知唔知係約 9am o架?」
「我知呀, 我等吓啦」
「唔係你等唔等嘅問題, 唔係你等就有得睇, 我10am 打後已經約晒其他病人」
「咁我等吓你睇晒其他人先」
「都話唔係你等就有得睇咯, 我 10am 之後所有時間都約晒其他病人, 你係應該 9-10am 嚟睇o架, 今日係要做個評估, 要成個鐘, 你遲到一定做唔到囉!」
「咁呀....」
「你上次已經冇通知之下冇嚟, 你明知嚟唔到就應該打個電話通知聲, (攪到我呆等)
今日又係你遲到你又唔通知我哋, 唔係你幾點嚟都有得睇o架, (D 人簡直覺得自己大晒)
我哋張「到診需知」上面寫到明, 遲到 15 分鐘我哋就唔會睇,
兩次冇通知之下失約就會成個症刪除咗, 以後都唔會睇你,
小朋友做唔到個評估, 我冇資料俾醫生, 唔知會唔會影響小朋友個手術o架喎 (大吓佢),
到時可能所有嘢都要重頭排過晒期!
(最麻煩係呢個 case 要做手術, 佢父母衰到爆我都一定要喺手術前見一見個小朋友)
我而家俾最後一次機會你, 約你兩星期後, 如果你再唔準時出現我就唔會再約你, 有冇問題?」
「真係唔好意思, 咁改兩星期後啦」
「唔只我呢科, 無論你睇耳鼻喉醫生定係聽力學家, 你有事嚟唔到就唔該你出聲先,
你咁樣成日改期我哋再約返都會俾D 好後嘅期你o架, 明唔明白?」

唉, 對住呢D 半大陸人/ 新移民, 真係好勞氣,
唔係話咩歧視佢哋, 但真係好多個用了香港政府十幾萬去做個手術, 又安排好多專科俾佢睇,
佢又成日唔出現, 攪到做完手術對小朋友的幫助都好有限!
而真正納稅的香港人小朋友, 可能反而得唔到優先的治療。

MBS

今日終於都開始了我同師弟的第一個 MBS session,
點知遇著個喊咗成粒鐘的阿 B, 阿爸抱住就唔喊, 一放佢落將 X-ray chair 佢就喊到完全唔肯食....
攪咗成粒鐘, 一個醫生、三個 Therapist、一個放射技師、一個護士..... 都攪唔掂....
最後阿 B 就食咗好多 X-ray, 但奶就食唔到俾我哋睇(十級無奈....)
還有三個 adult patients, interpret MBS 比 interpret FEES 真係難好多,
對眼要好快, 要睇好多嘢, 到我自己做時, 就得我自己一對眼睇,
有D 嘢睇漏咗/ 睇唔到, 對個病人的影響可以好大, 還要好好的學習!

新寵

今日好開心啊, 好順利地賣咗我部 iPod Touch, 之後又買咗支新鏡頭!!

話說 Sony 機可以用 Sony 或 Minolta 的鏡頭, 但 Minolta 已經早幾年前執咗笠,
但好多人讚佢的鏡頭靚, 色水好菲林!
但而家已經冇佢的新鏡賣, 只可買二手~

於網上搵咗一輪, 早幾日終於都俾我等到有人放呢支 24-105mm 的鏡頭了!
第一時間聯絡個 seller, 好好彩, 一傾即合!
今日約了交收, 支鏡好好好新, 冇塵又冇花, 市場上實在好難搵到咁新的鏡!

就係佢喇!!!


很 Compact 的鏡身, 果然唔似我上一支 16-105mm 咁膠~

快來試試鏡! 感覺非常之好! 終於都明白咩係菲林色的感覺,
顏色好實, 好 sharp, 好準!!!! 所有相都冇用 PS 執過, 冇 + contrast







上一支鏡同埋支 kit lens 最大問題, 係影唔到(好難影)枱上的食物, 呢支鏡影得好靚啊!
一支好好的旅行天涯鏡啊! I really LOVE it! 期待用佢嚟拍櫻花呢!

墜機意外

難得見到的藍天, 好彩快快影下, 放工時又變回白濛濛一片了~


放工時, 要行過一條長長的斜路,
從衫袋拎部 iPhone 出嚟, 點知..... 跣手......
成部機飛咗落斜路, 呯啪分開兩部分..... 好彩, 只係個殼同部機分咗體,
不過, 部機都好嚴重的撞花晒, 係崩咗囉..... 好肉痛.....
不過, 未散仲用得可能都算大命了!

唉, 今日終於都報了那個 OM Course,
寄封信的時候, 我覺得我係擺緊五千蚊入一個郵箱度......

可愛的婆婆

剛開始了我的第二個 Vitalstim patient, 是一個好開心好愛笑的婆婆,
係又笑一餐, 唔係又笑一餐,
同佢正正經經做 training, 佢成日喺度玩喺度唔正經笑, 真係俾佢激親!

最攪笑今日發覺做做吓, 點解D electrode 係咁甩嘅??
我:「o依, 婆婆妳條頸搽咗 cream 呀?」
婆婆:「唔搽 Olay」
婆婆個女:「係喇, 下次唔搽 Olay 喇」
我:「吓..... 阿婆妳條頸都要搽 Olay 咁巴閉!」

又有另一個outpatient, 成九十歲的婆婆竟然有英文名, 已經覺得好出奇,
帶佢來的係一位女士, 佢話原來婆婆以前係一位修女,
但修女當然冇子女, 又已經冇其他親人,
那位女士是一位心腸很好的人, 她說她定期探望幾個年邁的修女同埋馬姐,
因為佢哋都係冇結婚冇親人, 得自己孤令令一個好慘~
有時買少少嘢食俾佢哋, 佢哋已經好開心,
可惜呢個婆婆其實我已經見過佢幾次, 又大病一場, 身體已退化到較差的情況,
同口進食也似乎渺茫了點.... 所以女士想盡一點心意也很難, 但去探探婆婆已經係好好了~

當我第時退咗休, 我都好想可以做D 咁有意義的工作~

每月都有的日子

女人每個月, 總有些日子.... 會想瘋狂的購一購物! 哈!
今日行了深水埗同旺角, 想睇鏡頭, 但仍然未搵到我想買嗰支,
反而喺旺角買了三件衫、一對鞋、一個熨斗、一堆零食......
嘻嘻, 又有新口味的日本版粗麵啊, 開心!


已經 Plan 好晒大阪行程喇, 其中有兩日會去神戶,
會去兩個動物園探我們的老友記北極熊,
會去 Universal Studio 仲有杯麵博物館,
其他都係行街街影相相, 希望最後一日喺大阪城可能見到櫻花開啦~

小肥羊。二人前

今日係 Semester 2 開波的日子，呢個 sem 輪到第二個同學做班長了, 終於都唔洗遲遲先走得!
如果課後留低問問題的同學, 問嘅係一D 有建設性的問題, 我覺得我值得用 15 分鐘去等,
但偏偏次次都係嗰一兩個問題天天都多的同學問, 問埋晒D 好 nonsense 的問題, 真係好頂佢唔順!
有人每次都問 lecturer:「xxx 會唔會考, 洗唔洗讀?」
嘩, 阿姐妳仲係小學生咩! 讀得 Master 都係求學求知而唔剩係求分數掛?!
如果仲係抱著「我剩係讀D 會考嘅嘢」「讀多咗咪蝕晒」的心態, 一話唔洗考的就完全唔去學, 我覺得太幼稚了吧?!

況且, 妳覺得 D lecturer 會講到好肯定咁話妳聽邊D 要考, 邊D 一定唔考咩? 同妳好熟呀?
妳當D 醫生傻o架? 真係覺得呢D 人嘅 mindset 好攪笑!

好了, 可以準時走, 返屋企同波比先生打邊爐,
今晚有小肥羊湯底 + 小肥羊羊肉, 真係切得好薄好正, 不過肥咗少少咁啦!



仲有蠔呀, 打邊爐一樣咁好食, 好滑!



仍然同好友討論緊究竟去唔去上嗰個 $5000 兩日的 course, 真係好貴.....
好友一句:「係呀, 好貴呀, 可以買個 LV!」
忽然間, 有隻魔鬼浮出嚟: 「妳把心一橫唔去上的話, 其實可以去日本買幾個 agnes b.」
哈..... 最後決定睇吓佢校長批唔批佢去上啦, 有伴就一齊上啦!

第一張成績表

心情緊張了幾日, 今日終於收到了 Sem 1 的成績表, 嘻, 唔錯吧!
Neuroimaging 嗰科覺得好唔抵, 因為睇得太多書的關係, 把簡單的問題諗到好複雜,
做卷時常常諗究竟醫生咁寫條題目係咪陰我/捉字蝨? (時有發生)
點知就係諗多咗...... 原來只係好 straight forward 的送分題目......
錯誤中學習, 往往係好深刻的歷程, 下一次考試我會醒目 D!

不過放假嚟溫書真係好重要! 未來的 Easter holiday, 我又要閉關了, sigh.......
多謝我的 i/c 批咗日 Study Leave 俾我讀書, 等我慳返日自己的 AL,
不過要 Study Leave 係要有 return 的, 開會要 present 返一次我讀咗D 乜~

為了獎勵自己, 去了睇鏡頭想買過一支變焦鏡, 不過試咗幾支, 還不是太啱心水, 所以冇買~

本來今晚約了波比先生, 如果我考得好就請佢食大餐慶祝,
不過後來約了朋友, 去了文化中心睇畫展,
去之前影了維港景, 今晚天氣算唔錯啊! 難得睇到好清楚的對面海~

打唔打?

有報導有人打咗 H1N1 流感針而懷疑得了我們叫 GBS 的病症,
是一種 acute inflammatory demyelinating polyneuropathy,
是一個一發就可以好嚴重的病, 但其實過咗又可以好得返嘅, 但個過程都幾痛苦咁解....

究竟打定唔打? 相信大家都一定有傾過,
身為醫護人員, 縱使聯網總監醫院總監走晒出嚟自己打先又影晒相周圍貼,
但老老實實醫院內打的人唔多,
應該話「肯」打的人唔多,
大概因為大家做呢行, 對疫苗的功效及安全性仍有一定的懷疑,
而其實我哋日日都會見到呢D patient, 已經見怪不怪,
香港咁多人感染, 又有好多係 asymptomic, 話唔定你同我根本都有抗體啦~
平衡 risk and benefit, 很多人仍然覺得 risk 比 benefit 多,
有同事話:「我仲仔細老婆嫩, 博唔過呀」~ 哈~
所以無論 HA 點樣「鼓勵」人打, 都唔多人接受~

正常的一月份

過去的十二月實在太多活動, 一月終於可以靜下來了,
波比先生去飲了差唔多十餐囍酒, 多得我要問佢:「有冇D 你可以唔去o架??」
終於又都飲晒喇! 可以返屋企兩個人食餐家常便飯喇!

今晚整咗芝士焗蠔呀!! 隻蠔本身好大隻, 填滿晒個殼o架, 不過焗完縮到咁細嘅??
味道就都唔錯啦! 但食呢D 有殼海產真係唔敢食得多, 食少少過吓癮就好了!



一月份幾日喺醫院都唔太多症要睇, 帶了餅 VHS 帶返去睇關於 X-ray 檢查的 sample,
如果唔係醫院仲有呢D 播帶機, 我都唔知可以喺邊度播到餅帶喇! 真係好古董!
第一次見到 Jeri Logemann 的真身同聽到佢把聲, woo~~~

又有 $0 機票

睇報紙 Airasia 又有 $0 機票呀!!!! 淨係俾四百幾蚊 tax + charge 就可以飛曼谷/布吉,
好吸引啊~~~~~

即刻諗吓有冇 long weekend?
答案係: 冇......
 Sem 2 又開學喇, 一開學就好困身呢.......

賣嘢變買嘢?

2010 年第一個工作天, 終於都 Full team 喇,
唔知係咪D 病人放假放得開心得滯, 一半 outpatient 冇嚟, 啞咗.....

有個病人送咗張賀年卡俾我呀, 真係好有心, 好多謝佢~


個病人兩個月冇見我, 佢竟然話:「嘩, 姑娘, 妳D 皮膚靚咗好多喎 , 係咪轉用咗咩新護膚品呀?」
攪到我都唔知點答佢.....
係, 我都話我過咗生日後終於的起心肝保養吓囉, 之前我真係咩都唔搽o架,
不過真係冇諗過會有 observable change! 神奇! 或者係我以前的皮膚實在太差了.....
(但靜靜雞話你知, 十二月買的 mask 已經又開始俾我擺埋一二邊冇用喇....)

今晚約咗人交收, 賣咗部舊電話同埋支長鏡頭,
係呀, 部 DSLR 就無人問津, 但支靚鏡頭就好多人問價......
最後賣咗支長鏡先, 其實我都幾鍾意佢o架, 但佢實在太重了,
托住佢加埋部機成 1kg (=2.2磅) 嚟去旅行, 其實都係一件幾痛苦的事, 行完一日咩 mood 都冇晒,
上次去泰國我都係一日帶 DSLR, 一日用返 LX3 就算 (真係頂唔順...)

點知同個買家 check 完鏡之後, 佢就問我對佢支定焦大光圈鏡有冇興趣,
e~~~ 呢支咪係我都有睇緊嗰支! 但一路都冇機會試試~
裝咗上佢部 A550 都仲係好輕, 影出嚟的景深真係好正!
正到我話「好啦, 我同你要咗佢」(星星眼 ＊o＊）
不過佢都冇諗過會今日賣，冇帶盒/單喺手, 所以先再約~

不過, 我又睇緊另一支變焦鏡喎, 嗰支都唔錯o架, 不過已絕版,
得二手買, 唔出到嚟睇又好難知個質素係點~ 煩惱中~

好專心呀~

嘩, 今日好專心呀, 坐咗喺書枱十幾個鐘!
不過....唔係讀書, 而係 plan 去大阪的行程!! 嘩哈哈! (讀書又唔見你咁勤力!)

「洗唔洗咁早 plan 呀?」
「Plan 得嚟啱o架喇, plan 好晒唔洗心掛掛嘛」

Plan 去大阪煩過去東京, 因為實在太多鐵路喇,
私鐵、電鐵、地下鐵、JR、新電車, 都唔知邊樣打邊樣.....
明知去日本搭車好貴, 想研究吓買 Pass 會唔會抵D,
但係 Pass 都有5種, 每種 Pass 包的鐵路又唔同, 要研究一大輪究竟我的行程要搭嘅車究竟包唔包喺個 Pass 度, 唔包就唔抵嘛, 唉, 好煩......

一日內總算大致 plan 好了頭五日的行程, 上網睇咗好多資料同遊記,
仲有 download coupon、地圖, 好忙好忙!
我成日話要波比先生俾返導遊費我, 上次去泰國嗰條數佢都未俾!

坐咗一日真係坐到腰又痛膊頭又痛, 夜晚要出去走走!
波比先生有同事結婚, 係圍村人, 佢去了食盤菜!
佢話食淨好多, 所以拎咗少少返嚟, 吓?! 咁叫少少!??
呢度夠我食三日三夜咯! 話時話, 真係煮得好入味好好食呀, 不過就超油囉....

白濛濛

今日香港的空氣好差好差, 四周白濛濛一片, 在銅鑼灣你不會看到對面海,
少於兩公里的能見度, 波比先生打了兩小時的噴嚏......

早幾日睇了篇報紙文章, 內容大概係話當香港人不停埋怨大陸的環境措施做得不好,
弄得香港天空永遠都灰濛濛的時候, 有沒有想過問題的根源?
或者就係我們這些要趕上潮流的香港人, 什麼都未用爛只是過時, 就要換個新的!
沒有需求, 哪有大量的供應?
我們要好好的反省, 我只是想如果我們的下一代每一天都活在這樣灰濛濛的香港,
實是可悲........

今日我們去了寵物店探望兩隻超可愛的鬆獅狗, 傻頭傻腦的很想帶牠回家,
但我們會停一停, 諗一諗, 都係望望就開心夠了~

去了 Den Lib 借書, 見到高街的豪宅起好了, 波比先生話要 $15000/呎, 好 crazy!!!
下星期開始我就會去學做個 x-ray exam 了, 借了一堆的 VCD 同書, 努力努力!

下午約了 Elana 來個茶聚, 嘩~~ 好驚喜的杯麵手信, 開心死波比先生了!!
講得慶起真想快快到三月可以去大阪啊!

之後我們到了銅鑼灣的 Sony Style 旗艦店, 嘩, 嗰度好勁呀, 有好多鏡頭俾人任試,
可惜我今日冇帶機來~
但其實呢排我有打算過放咗部 DSLR 佢.... 冇呀, 因為覺得一個月先會用佢一兩次太少,
而用支靚鏡頭又好重, 去旅行影相係就係好靚, 但係抬住佢走一日又好係嘢, 唔方便囉....
不過見到二手市場跌價跌得好犀利時, 就又打算都係留返自己用罷啦....

還有到球場看波比先生踢波, 哈, 見到佢走來走去總想 ki 一聲笑出來~

掃貨@吉豬島

新一年喇! 新開始, 我有一個車位! 應該話係單車位!
哈哈~ 幸運地抽到了屋苑的單車位, 每年 $150 租金就可以泊架單車喺樓下,
以後「攞車」出街都方便D, 早知就唔洗買摺車啦~


今日一早去了同屋企人飲茶, 試了新星新出的「流沙紅豆包」,
且~~~ 都唔流嘅.....



跟住去了吉豬島掃貨, 佢呢幾日大減價, 全部嘢都有折, 特價品都可以折!
先去了超級市場, 掃咗好多食物, 睇住架收銀機每 DO 一樣食物都打個九折時, 真係覺得好抵!!!
但真係勁多人囉, 排好長龍呀~~~

跟住見到有旅行喼賣, 我用開嗰個其實都爛爛地, 唔知佢可以捱多幾多次出門,
見到二三百就有交易, 最重要係仲有八折!!!!!
不過睇來睇去, 唔係太大就係太細, 暫時都未睇啱, 但想買喼的朋友真係好值得去睇吓!

跟住去咗玩具部, 嘩, 見到有九折有D八五折,
不過俾我發現佢係標高個價再折返嘅,
好似我上星期喺千色店見到嗰個 Hello Kitty 洗衣機, 千色店賣 $169, Jusco 賣 $199 八五折,
且.....咪一樣....
不過我哋都買咗個麥兜賀年掛飾呀, 希望冇被騙啦,



仲有豪俾佢扭咗隻豬仔鎖匙扣, 好 cute!



仲有去睇煲, 廚具類都有九折呀! 不過拎得太多嘢, 再諗諗先!

自從做咗呢份工, 好耐冇煲過湯喇, 今日難得唔洗出街食, 煲咗排骨海螺湯, yummy~