我的2010

帶著病, 去完結了我的 2010 年

波比先生今日又有得放早 (唔係化!!! 成日都唔洗做咁! ), 約埋一齊去食日本拉麵,
點知要等 60 張枱..... 唔等又唔得, 因為根本間間餐廳都有咁多人, 都係要等

等咗一個鐘, 終於有得食喇!



特登唔走得要喺度食飯, 為的是去行 Ikea,
除舊迎新, 今日添置了好多新的家庭用品, 有些用了七年的東西, 係時候退休了~

又係回顧一年的時候, 這一年其實過得很好,
工作、家庭、學業也算是得心應手,
只不過工作實在幾辛苦, 如果再多一點休息時間就好了!

Happy New Year!

自由行

今日去咗睇醫生, 開了三隻勁D 嘅藥, 希望今次真係好得返啦!

見都仲病病地, 冇 join 波比先生去打邊爐, 一個人食完飯就去咗 shopping,
哈哈, 買咗唔少廚具同埋廚房用品呀, 好滿足呀~
仲有買咗罐台灣肉燥, 唔知同我之前喺台灣買返嚟的係咪一樣味道呢?
上一罐食晒之後, 一路都念念不忘啊~~

偶爾我都很享受一個人行行街, 可以慢慢揀慢慢睇, 唔怕悶親老公~

呢個係尋晚整的麻辣肥牛呀, 加咗茄子同埋粉絲,
番煲都係咁好味!
波比先生問我買咗幾多包這個麻辣調味包, 我話一包咋, 試吓好冇食先嘛!
為食的波比先生已經諗緊下次再麻辣咩好!
哈, 唯有又多個藉口我哋返深圳再買啦!

牽掛

有些人一生勞勞碌碌, 用自己雙手去爭取一些東西達幾十年,
到走到生命的最後階段, 還是牽掛著那些東西,
神智已經不太清醒, 口中念念有詞的, 還是那些東西, 還是放不低
看在眼裡, 實在感觸....
身邊陪伴著的, 都是一班頭髮花白的朋友, 朋友愛護關心之情, 實在令人感動

人的一生, 不在乎長短, 只在乎價值,
一個人有多少的財寶, 帶不走
但一個人對社會對別人付出過的, 他人會銘記在心
一個人的生命 , 原來會是那麼震撼

******************************************************************

今日又病了, 其實係上星期的感冒一直都反反覆覆帶到今日, 又嚴重了點
聽日又要睇醫生喇~

四川水煮魚

話說我們都好鍾意食辣, 上次去傷心酸辣粉度, 食過一碟完全唔好食的水煮魚,
一路都心癢癢, 好想搵到好食的,
剛剛去深圳, 又食唔到, 不過都算好彩, 喺超級市場買到整水煮魚的調味包

呢款調味包真係好得! 有晒指示教你整, 一D 都唔難整!
最重要係, 個味道完全好掂, 好係四川風味, 又麻, 又勁勁勁辣,
嘩~~ 辣到變孖膶腸咀呀!!!



我仲好似人哋咁加埋芽菜, 又有豆卜去索D 辣汁,
波比先生食到唔停得口呀!



剩返的辣汁, 波比話聽日可能翻煮, 要落牛肉,
嘩, 麻辣肥牛, 諗起都想食 :P

聖誕聚餐第三激- 小朋友篇

哈, 今日我的小小好朋友到訪, 一來到, 送咗兩個汽球公仔俾我, SURPRISE!

小朋友話很想試試我的手勢, 煮咗幾樣食物,
小朋友一向出名揀食, 又食得好慢, 叫佢食飯就真勞氣嗰種,
但話得係小朋友, 都一定鍾意食炸嘢, 個天婦羅炸蝦就一個人食咗 3 隻, 仲自己主動夾, 幾難得!
大阪燒餅就自己落咗勁多醬, 又順利地食晒!
係韓式粉絲帆立貝就因為辣辣地, 所以佢冇食到~
魚露雞翼 - 佢已經飽, 只食咗一隻,
整體今日都食得多嘢了, 好俾面!



小朋友仲教我扭汽球, 隻粉紅色狗係我扭o架!



之後一齊玩大富翁 card game, 好好笑~

玩完仲食埋甜品心太軟, 好彩冇焗到過熟咋!



好開心的一晚~

聖誕聚餐第二激- 波比 U-mates 篇

嘩~~~~~ 睇到呢張相係咪好震撼呢~~
今晚呢餐聖誕聚餐實在係太太太豐富了!
我哋又去咗屋企對面買日本嘢食, 所有朋友都大讚好正!



呢款美國珍寶蠔, 只係 $23/隻, 但真係成隻碗咁大!!!! 係我咁大個女食過最巨嘅生蠔呀~~~
味道超得, 好鮮甜, 一D 都唔腥, 人人都讚!



見到咁大碟帶子..... 有D 滯嘅感覺, 最後有D 難度先清得晒!



呢D 係即開活赤貝, 我冇試呀, 朋友話唔錯~



因為下午飲茶時剩返太多食物, 今晚要食埋佢,
所以本來我準備了的炸蝦/ 大阪燒/ 韓式汁煮帆立貝都食唔到了~

熱食有瑞士雞翼同埋醉雞翼, 點知...... 醉雞翼咸咗D
還有這個杞子桂花糕, 開頭勁驚佢凝固唔到 (好似上次整果凍咁), 好彩都成功了! 太感動!



最後還有朋友替我們準備的生日蛋糕, 好啱我的口味呀, 因為係類似拿破倫的酥皮層+果仁呀~



今日過得好開心呢~~~

3 x GF2 x 大榮華 + 南生圍

比賽後抖一陣, 我們又出動了!
今日約了一大班波比大學同學來我們家, 嘩, 好耐都冇咁多人嚟我們家了 (所以前兩日要好認真的執屋!)

我們先去了大榮華飲茶, 眼闊肚窄的波比先生又叫咗好多食物......
最後, 好多食唔晒要打包囉~



之後上我哋屋企, 有兩個朋友都買了 GF2 呀!
三部 GF2 一齊研究研究, 試機試鏡,
波比先生又不停毒其他朋友買鏡頭, 壞人呀~~~~~~~~~~

跟住我哋就出發去南生圍, 嘩, 今日好好天, 好多人呀~~~~
沿途所見, 超過一半非單反人都係用緊GF1/GF2, 真係好 hit!!!

睇吓 GF2 的作品, 用最白痴的 iA mode 都可以影到唔錯的相片, so good~~~~~

波比的第二個跑步比賽

今日好鬼死凍, 但係我們都要一早起身,
因為波比先生參加了 Kappa 的 10km 賽, 係跑大欖郊野公園的路!

搭的士好快就到, 尋日都仲落緊雨, 估唔到今日好好天!
晨早人在郊區, 一片美麗的風景, 原來係好好好正!



嘻嘻. 前兩日買咗支 Panasonic 45-200mm 鏡, 今日第一之拎出街用,
景深效果都唔錯, 不過色水就淡咗D D (相比之前顏色好靚的 Minolta 鏡)
但今日其實係帶錯鏡....... zoom 得太勁了..... 唔啱影風景



到達報到站, 已經好多人



今次的號碼係 10107



先是跑 30km 的起跑, 淨返跑 10km 的, 原來得好少人...
哈哈, 是全港最少人參加的 10km

好了, 10km 都起跑了!!!



等波比先生回來期間, 我去行山影相, 但支鏡唔啱, 影唔到好相....









驚人發現: 原來一直都想試試的農場牛奶就係喺終點嗰度,
即刻入去買咗支新鮮牛奶, 仲有芒果布丁!

那裡的樹上有蘭花



等呀等, 波比回來了!!!
今次跑第 16 名呀, 唔洗 46 分鐘就完成了, 好叻呀!



每人有一個「禮物包」, 入面有蕉、梨、麵包、朱古力、水,
好順利地搭到 72 號小巴返元朗,
雖然今日真係好早起身, 但係係一個好好的經驗,
看了好風景、吸清新的空氣、曬曬太陽、有農場牛奶, 假期生活是多麼的美好~ :P

我們的聖誕大餐

嘻嘻, 結咗婚嘅人, 喺呢D 大時大節最唔鍾意出去同人迫,
今日仲又落雨又凍, 本來想去尖咀影相的計劃都要取消了....

於是留在家中, 煮一餐聖誕大餐



第一次整燒三文魚腩, 係喺百佳買的, 好肥美好多三文魚油啊, (三文魚油食多D 都唔怕)
另外仲有雞翼又有菜有菇, 好豐富的一餐~

大掃除之聖誕節

因為今個聖誕期會有不同的朋友到訪, 今日屋企來個超級大掃除,
總共掉咗起碼 7 袋垃圾, 仲有捐咗兩袋衫同埋兩袋鞋.......
執咗足足大半日!!! 除咗大年初一, 我諗我哋屋企今年都從未咁乾淨過!
個廳「終於」都出返嚟喇! (之前真係成個狗竇咁.....)
見到個屋企咁乾淨, 人都開心好多!



執完屋就出去買嘢, 搵咗幾間百佳, 終於俾我搵返呢款朱古力!
包裝有點熟口面?



佢係金莎同一間公司出的朱古力, 百佳寫住叫鑽莎,
係有 4 種不同果仁製成, 類似金莎的朱古力~
我考試期間見到, 一早已講定考完試要買盒獎勵自己, 點知考完試度度都見唔到.....
難得, 今日終於俾我搵到了! 好嘢好嘢!
試咗一粒, 味道稍甜, 但滑滑的朱古力同脆脆果仁, 都算唔錯~

聖誕快樂 2010

大家見我兩日冇寫 blog, 應該都估到..... 我又病咗......
其實一年都只是兩三次大病, 但今次都幾辛苦的 flu, 最慘係喉嚨好痛好痛, 食完藥又好眼瞓,
放咗兩日大假, 醫院又積埋好多 case 未睇,
所以尋日都係要返工, 放得嗰一個鐘 sick leave 咁大把,
仲冇得去期待以久的大學同學 gathering, wu.... wu......

今日先好返D, 如常的忙碌的工作,
放工的一刻太開心, 三日假唔算多, 不過配合濃厚的 holiday mood, 人的心情總是輕鬆百倍!

不過放工搭車又好勞氣, 約咗波比家人食飯,
但係等咗 20 分鐘先有車, 仲要勁停燈位又塞車,
個幾鐘先去到根本唔係好遠的目的地 (有時搭的士 20 分鐘就到), 足足遲咗半個鐘!!! 真係好勞氣o架!!!

飯後去了荃灣影聖誕樹, 人先開心返D~



祝大家聖誕快樂, 有個開開心心的假期呀~

Big Big Day

今日係我好好朋友的大喜日子, 好開心被邀請為姊妹團的成員

5am 我已經緊張到瞓唔著, 好似比自己結婚仲緊張
起身就執整埋玩新郎的遊戲食物, 6:40am 出發了!
好快, 7:30am 就去到海逸酒店, 佈置, 換衫, 化妝~



接新娘遊戲, 非常之爆笑, 笑到我標眼水! 難得新郎哥好落力, 一D 都冇交行貨!
敬茶出門完畢, 午飯時間,
條姊妹裙太緊, 大力D 抖氣都驚佢爆拉錬 (絕對覺得上一手著的只有23-24吋腰),
亦都唔敢食嘢, 因為真係冇空間俾我個胃去澎漲.......
不過好處就係條裙一定唔會鬆同跌, 可以好安心跑跑跳跳都得~

話咁快, 就過咗 Grand Hyatt, 由 Ambassador Suite 影的海景真係太靚, 如果今日再好天 D 就好了~
很夢幻的場地佈置, 賓客都讚不絕口~



很開心的 sip 時間同新娘子四處影相, 酒店大堂有好高的聖誕樹添啊!
我坐 Reception, 大家都好準時, 8pm 已有 9 成的入座率了!

30 人的 live band 奏樂, 高貴的新娘子 march in 了~
律師好勁, 要全場人靜晒先開始婚禮, 攪到冇人敢出聲, 亦都人人都好專心觀禮!
波比先生就開心啦, 樣樣食物都好好味, 仲有佢最愛的鮑魚~



整個婚禮都非常之順利, 因為一班兄弟姊妹真係好幫得手,
雖然都會有攪錯嘢嘅時候, 但大家同心合力, 好快就 manage 到~

今日用新寵 GF2 + 14mm 2.5 影相,
室外夠光的表現好好, 室內就.... 好多時都手震, 可能因為光圈唔夠大/環境唔夠光,
同埋支餅鏡..... 係冇防手震的!!! (我都係尋晚睇說明書先知, that's why 我之前用 SONY DSLR, 因為佢有機身防震, 啱晒我呢D 手震王.....)
不過喺電腦睇返D 相, 好彩通常都有影兩張做後備, 通常都有一張 ok 的~
不過真係要考慮吓洗唔洗換支 20mm 1.7, 但又驚佢 zoom 得太近/ 唔夠 wide~
雖然買唔到 45-200mm, 但今日太部分時間都好夠用, 呢D zoom 鏡, 其實通常都係去旅行先用多~

賣仔換女

呢個星期, 先後賣了我的 SONY DSLR 同埋 LX3,
就是為了換這個新女, 今日波比先生幫我去拎佢返嚟, 我們終於都見面了!!!



本來好想買埋支 45-200mm, 好急想買, 因為想聽日朋友結婚可以用,
點知行了兩間舖都冇貨, 一間就有一支, 但係有好大粒塵喺鏡內, 點買得落手....
仲有一間, 去到已經閂咗門, 唉................ >o<
註定我聽日唔好拎咁多嘢囉~

今晚做咗好咗準備功夫 for 聽日的接新娘遊戲, 真係好緊張呀!!
聽晚就會喺楊千嬅擺酒的同一地點做姊妹, 今晚睇電視見到楊千嬅擺酒的情況,
不停幻想聽晚會點呢?

好了, 瞓喇, 希望聽日朋友的婚禮順順利利, 開開心心啦!

深圳半天遊

今早去了跑步, 天氣唔錯啊~
南生圍有好多雀仔呀, 仲吱吱叫得好大聲呀, 好攪笑~



同屋企人食完飯, 我就同波比先生北上,
搭飛機的旅行就未有假未有得去住...... 唯有近近地都離開吓香港咁啦

去了科學園站的書城, 我都係第一次行深圳的書城咋 (聽就聽得多), 果然好大好多書!
行咗個半鐘, 買咗好多書, 都唔洗二百蚊, 好抵呀!



之後去對面的中信廣場, 明明睇 openrice 話車站有個商場有好多食店,
但我搵唔到, 去咗吉之島的 food court 坐坐, 叫波比買少少嘢食, 但佢話冇咩買,
最終買了成碗粉, 好辣!



再遊遊盪盪, 為的是等到六點幾去「豫園」食上海菜,
點知..... 明明六點經過都仲冇人, 我哋六點半再上去, 已經要等位, wu~~~~~
又已經好攰, 好想快D 坐低, 唯有放棄啦,
改咗去地庫的「金牌小龍」, 講真, 菜色完全好普通 (失望中), 不過味道都唔錯嘅~



食唔到好嘢, 唯有去超級市場掃貨去安慰自己,
遇上收工大減價, 竟然 8 蚊有 8 個日式紅豆燒餅, 當堂開心晒!
仲有買咗D 調味料同埋火鍋湯料, 正呀!



今日都算好滿載而歸, 不過真係好攰, 好彩落馬州打的返屋企都唔係好貴~
哈, 好 holiday mood 添~

又考完試喇!

今朝七點起身, 見到枱面有麥當當早餐,
是我的私家麥麥送喎, 多謝老公~

食完又讀書, hea 住讀就去考試,
好順利地考完了!
這個 Master 我仲有5 堂, 考多兩次試就完了! (當然寫 paper 另計)
諗起都開心, 就嚟可以 free 返星期六出嚟多D 陪波比先生了, 亦打算去做吓義工, 幫助有需要嘅人~

夜晚去了陪準新娘子買嘢, 話咁快, 原來仲有三日咋!
收到了帖, 同埋 COVA 餅卡!!! 我都鄧佢開始好緊張!
聽日我仲要 plan 接新娘遊戲呀, 忙呀忙呀!



等到頸都長, 一早訂咗的 GF2 竟然仲未到貨, 但有人喺旺角即買就買到, 咁早知唔洗訂啦.....
Confirm 了星期一有貨, 還可以趕得切朋友結婚當日用!

3.5 度

尋晚瞓到三點, 醒咗瞓唔返, 眼光光到四點幾, 見到得 4 度, 唔係化.....



諗住讀吓書啦, 點知一讀就眼瞓, 即係瞓得著, 哈哈哈 (讀書催眠真係萬試萬靈!)
七點起身, 見到得 3.5 度, 唔係嘩?!?!
好似住咗咁多年, 都未見過呢個度數!



好彩今日係放大假, 唔洗返工, 真係好難想像要出去會係點!
於是我就開行暖爐, 好俾心機咁..... 上網........... 哈哈...............
書, 都有讀嘅, 但聽日考嗰科D 內容好空泛吓, 都唔知讀乜囉,
第一次考試會唔緊張到咁!

全日都好凍, 不停地食嘢取暖,
一日內唔計三餐仲食咗一大盒朱古力薯片、薑醋、龜苓膏、紅豆沙



下午茶仲有超肥之菠蘿油!
嘻嘻, 因為咁啱波比先生出去見完客, 下午 Home Office, 所以有時間一齊去食 tea, 好開心!



仲有唔夠一日我就放監喇! 又想 shopping!

海鮮邊爐

嘩, 咁鬼凍, 點可以唔打邊爐呀?
要好準時收工, 好辛苦先喺街市同埋凍肉店買齊食材,
個街市同埋凍肉店迫到o丫, 都唔明D 人點解平時好似唔洗買餸, 要打邊爐先出嚟買餸咁!
D 肥牛搶剩幾盒, D 蟹籽包又冇晒........ 好誇張!

波比先生話要食海鮮, 於是就去買了象拔蚌



$88 一條, 阿姐會幫我洗一洗, 然後片埋, 俾埋冰我拎返嚟



呢D 蚌之類的物體我實在唔太好, 不過今次食過有D 改觀,
原來新鮮的, 真係有一種鮮甜味, 唔錯!



等阿姐劏蚌時, 佢又 sell 我買蜆, 十蚊雞有咁多隻
一試, 嘩, 好新鮮好好味呀!!! 仲正過D 蚌囉, 好耐未食過咁好的蜆了!
今年出街食過幾次, 次次都唔多掂, 那些豉椒炒蜆, 炒完D 蜆肉都唔見晒咁.....



仲有超甜粟米同埋西洋菜,
用了濃湯寶做湯底, 幾好呀, 清清地, 唔似上次小肥羊咁咸~