[愛美食] 雲泉仙館吃齋去

今日多得同事做攪手, 一齊相約去了粉嶺的雲泉仙館食齋
喺粉嶺火南站 C 出口, 就有 52K 小巴搭到去門口落車, 都算好方便!
一入到去, 見到由植物砌成的福祿壽, 好特別!



吃齋菜的流程是先去售票處落單點菜同俾錢,
之後就要喺隔離排隊等位, 有位就會有職員帶你去坐低, 我哋都算好彩, 等咗五分鐘到就有位了!

我們一行六個人, 點了七菜一湯, 好瘋狂! 每人大概 $100~
個芋頭魚絕對係必吃!!! D 芋蓉非常之粉, 又炸得夠金黃酥脆, 超好食!
春卷同埋椒鹽三寶都係熱辣辣, 又脆又好食! 三寶中的炸花枝嘅味, 真係同真的魷魚冇乜分別, 太強了!!
有一碟係豉椒螺肉, 第一次見識到齋螺, 個樣都整得幾似啊!
哈哈, 我哋叫埋晒D 熱氣嘢, 同枱的兩夫妻叫的反而先是真正的齋菜呢.....



食完就到後面逛逛, 有D 小攤檔賣D 好地道的乾貨、涼果、茶葉等等!
有好多都係第一次見, 大開眼界~
當中好多涼果都係可以試食的, 其中咸黃皮同埋首烏八珍薑都好好食呀!
不過大住個肚, 唔可以食咁多呢D 嘢啦, 冇買到



不過反而買了好多之後用來補身的乾貨啊! 其實今個 weekend 本身都要去藥材舖買好多陪月話需要的乾貨,
今日喺呢度見到, 有D 標明係本地出產呀, 淮山又冇硫磺呀, 所以都買了幾樣啊!
唔該晒波比先生幫我咁重都拎返屋企!!



小攤檔仲有隔壁農場種的有機蕃茄仔, $10 咁大袋, 必買啦!
夜晚用來做沙律, 好味道!
仲有半斤蕃薯乾, 唔會好甜, 但好香濃的蕃薯味, 好好食啊! 都係 $10 咋!!
哈, 這地方真的值得再來啊!!

[小豬嘜] 推介之大肚相: 我的懷孕照 @ Amore Production

今日小豬嘜 37 週 1 天大了, 媽媽和爸爸都很開心, 因為今日去了影大肚相~

其實本身我都冇諗住影的, 不過到四月頭開始見到好多五月媽媽影了, 影得好靚, 攪到自己又心思思
於是諗住平平地影返輯, 喺 Groupon 見到有間叫 Amore Production 的,
http://www.groupon.hk/deals/_activities-and-courses/amore-family-photo-shoot/719953498

$288 的 package 都有 20 張相, 諗住都夠喇掛~ 就決定了!
打電話去 book, 本身好想復活假去影, 但係已 full booking 了,
約了今日, 知道已 37週其實都有D 擔心會唔會頂唔順影唔到, 好彩一切順利, 所以又好感恩!

其實團購都有好多 Pregnancy photo, 不過呢間最近我哋, 喺荃灣, 愉景新城對面就係,
其他的要去到觀塘港島就不會考慮了~

我們準時地上到去 Studio, 好快手就已經開始影相,
我們自備了三套衫去換 (講明只有三個造型), 但仲有一套大阪馬拉松衫都好想著, 於是就問問可唔可以影埋,
點知職員好好人都俾我哋影埋呀, 心裡已經加分了 :)

我影了跑步衫, 馬拉松衫, 斯文長裙, 同埋下圖呢套 McDull Family 衫~
哈哈, 呢套衫已有 8 年歷史了, 係當年第一次去泰國旅行整的, 著咗都唔夠兩三次,
估唔到仲有機會著返, 又估唔到都仲勉強啱著 XD

今日負責操刀的攝影師哥哥影得好好好有心機, 好熟練地教我哋擺 pose, 每個角度都執得好細緻，爬高爬低去影，呢一點我真係好欣賞，
想影的小道具同埋造型都通通影晒，好開心，
原來一度之下，我個肚已經有３９吋大了，好誇張！產後修身真係要加把勁了！

影完了可即刻 preview 所有相片，但影嘅時候都心知不妙了。。。
咁多場景造型 pose, 點可能只揀 20 張。。。

好彩，佢呢度可以$800 全數買回所有相片，所以我真的覺得呢間 Studio 好，否則逐張計的話，我影咗百幾張相真係好襟計。。。

講返相片質數，preview 時好快咁睇都有九成好滿意，仲要係唔洗執相我都已經覺得滿意～
需知道我都熱愛攝影，對相片的質素都有一定的要求，我都覺得ＯＫ就真係唔錯呀！
Ｄ相好想可以即刻 Copy 晒走呢，但當然唔得啦，
揀了一張都好鍾意的（但其實仲有好多都好靚），冒昧的問問職員可否就 send 這一張俾我先，
職員超好人話冇問題，轉個頭就 whatsapp 了俾我喇！

影完相大概 10-14日會有 compressed 咗嘅相 send 俾你揀相造相簿，
之後再幾星期就會有相簿相架等等製成品收到，可以用順豐速遞或者寄掛號，
哈，好期待呢 :)

萬寧買上癮

今日下午又要去 QE 覆診了!
覆診前又去了萬寧掃貨, 太抵了嘛!
$130 買了上面那堆高露潔, 然後送了 $55 現金劵同一包珍珠米,
波比先生好鍾意食呢款珍珠米啊~
不過我屋企D 牙膏真係多到可以用一年了 XD



今日又約咗人交收, 有時用網上平台以物易物真係幾好, 唔會浪費~
呢排執屋, 好多嘢冇用過, 掉又嘥, 送俾人/ 換物品就最好!
今日用個相架同一個媽媽換了罐媽媽奶, 之後餵母乳的話, 我都會 keep 住繼續飲媽媽奶呢~

點知咁啱, 約交收的地點附近, 竟然有 ANS 的 promotion!!!
免費攞了一罐1 號奶粉!!! 買要成三百幾蚊o架!! 真係賺透了 XD



第一胎, 真係乜都唔識, 而家至知原來好多媽媽會都會喺臨生之前寄D sample 呀 coupon 呀俾你,
尿片我已經買得太多了..... 應該用到四個月, 多到我恐怕小豬嘜用唔晒D NB size 就要轉 S 碼,
買一送一劵, 真係用唔著了........

[小豬嘜] 36 週 6 日

哈哈, 影了張自拍照, 紀錄這大肚 dum~
醫院有D 同事, 都「忽然」發現我大肚了, 仲覺得好驚訝點解之前一路都唔覺!
哈哈, 證明這星期肚子實在很很很大!
呢兩日, 真係企耐D 都好攰...... 我實在明白點解產假應放前四後六,
但我想留返多D 時間湊 BB, 所以還是揀了前二後八!
返埋今日, 努力捱多五個工作天啦!



今晚波比去踢波, 我同小豬嘜去麥當奴撐枱腳, 食了近來想食好耐的魚柳包~
然後行行超級市場, 這樣自由自在的日子, 快完結了~
有時我會發夢同波比先生跑步同行山, 但這些活動, 真的恐怕要到十多年後才可以再享受了~
揸車常經過那條我們由元朗跑到屯門的路, 很懷念兩個人四隻腳在三十度烈日下走過的日子~

[愛住家菜] 鮮魚湯水煮魚 (附食譜)

今日放了半天大假, 清埋今個年度的假了~
但又咁啱私家醫生的覆診忽然被改咗去今日......

醫生搬了去新診所, 地方大了, 部 ultrasound 機都靚咗少少,
不過 BB 而家太大個喇, 照 ultrasound 其實都睇唔清個樣,
睇埋今次, 一切都安好正常, BB 而家有 6 磅了, 相信兩星期後出生都有差不多 7 磅
而我都唔洗再嚟 clinic 覆診喇, 唉, 好怕要喺度等成個鐘好嘥時間, 又唔係睇到 BB 個樣

難得有時間, 今晚整了進階版水煮魚,
以前整啦, 會用濃湯寶雪藏魚o架咋,
今次由頭做起無添加!

買了一條大桂花魚, 叫魚檔姨姨幫我起肉
返到嚟, 用魚骨 + 薑蔥淆了一個奶白色的魚湯
然後再用蒜頭, 干辣椒, 麻辣醬, 豆辦醬起鑊,
加入魚湯、芽菜、豆腐、花椒、花椒油, 煮滾,
再放入已切片的桂花魚煮多兩三分鐘即成!

冇味精冇添加, 個湯撈飯好正呀!
新鮮魚又滑又好食, 仲有豆腐更健康~
花點時間去做都值得啊!

[小豬嘜] 自家製炒米茶

呢個 weekend 閒在家, 因為私家醫生的覆診忽然被改了,
所以繼續執吓嘢啦, 仲有整炒米茶

中式食療, 老老實實說我還是不太信啦, 要我跟我也只會揀D 簡易又無傷大雅的,
人人也說坐月要飲炒米茶, 見唔係好難就整囉~
用了兩嘜白米, 一嘜黑糯米, 白鑊中火炒幾分鐘至米粒變微黃
準備了茶包袋



等D 米放涼後, 四湯匙入落一袋包好, 去醫院時加熱水就可以沖來飲了!

萬寧星期五

小豬嘜 36 週了!!
時間真的過得很快啊~ 仲有兩個幾星期佢就會同大家見面了!
今日 QE 覆診, 醫生都講定佢仲有一星期足月, 隨時都有作動的機會, 要自己小心留意啊!
有D 五月媽媽都忽然間早生了! 攪到我都開始緊張!!

如果真係 37 週前生, 我可能都要去返 QE 生.......
37 週真正足月後先會安心去仁安, 小豬嘜妳乖乖, 喺媽媽肚裡面吸收多D 營養,
等個肺仔強壯D 先好出嚟呀~

近月我發現了星期五去買萬寧可以好抵! 常常有一些買夠幾錢, 就送嘢的優惠



早幾星期買了 6 支舒適達牙膏, 本身已是特價而平了, 我買夠了 $138 仲送一支油同一支藍威寶, 加埋都成 $60!

不過唔係次次買到啦, 好多時送的禮品正, 中午已冇晒了~ 我要返工冇可能買到~
今日下午去 QE 覆診, 返屋企時就順便睇睇, 點知今期D 贈品仲好齊喎, 好意外!!!

下圖用了 $102 咋! 洗頭水大概 $45 仲送護髮素 (成 $20/支), 平過藥房~
樽檸檬洗衣液 + 朱古力 + $15 現金劵都是送的!!! 好離譜!
佢又送現金劵, 即係會引到人不停再去消費, 呢招好絕呀, 哈哈哈 XD

倒數十二個工作天!

五天的假期完了, 就開始倒數我的產假喇!
4月24日開始放, 即返多 12日就放假了!

近來就好忙地為工作埋尾, 啱啱過了一個 financial year, 好多 annual plan 同 statistical reports 都要出埋, 先可以安心放假.........
也忙著同同事 handover 呢~
好彩 take over 我工作的同事們都好可靠, 所以我都唔太擔心 clinic 嘅嘢~

連續幾日假不停出街食, 係時候自己煮返多D 喇~
今晚買了種好得意嘅海魚, 老闆冇介紹錯, 真係好滑好食又唔算多骨啊~

海圖 cafe x 龍蝦意大利飯

假期的最後一天, 連 high chair 都洗同重組好了! 真係好開心唷, 小豬嘜的物品, 都已準備妥當了~



難得的二人世界, 要帶波比先生去歎吓咖啡,
Openrice 搜尋一輪後, 發現屯門有間 cafe 好多好評,
這間海圖 cafe 位置十分偏僻, 但去到超多人, 似乎很多人都慕名而來!
想不到, 在屯門有間這麼有格調的小 cafe, 就是要位置偏僻, 在能在這個租金貴得瘋狂的香港生存下去吧~



店內全是幾個年青人打理, 我們點了一份 All Day Breakfast, 真的要讚!
牛角包好脆又鬆, 好好食!
炒蛋非常滑, 配埋很多蔬果, 整體感覺很健康~



雞肉意大利粉: 我想話我平時總覺得在街外吃意大利粉好搵笨, 十零蚊的材料, 收你七八十蚊的價錢!
但今日不得不讚讚這個意粉, 因為佢調味很獨特! 有點酸酸的很清新開胃!
雞肉的配料也算多, 感覺很好~



最後是 Flat White, 這家店的咖啡師拉花很有水準, 波比也讚咖啡好飲!



不過兩樣食物 share 食, 其實我們都覺得不夠飽.......
好彩之後去咗行新墟, 食埋掃街小吃, 又去埋一田買下午茶, 波比先生先話夠咋.........

夜晚煮好D!!
整咗個龍蝦意大利飯, 我用了這個食譜: http://bonniechu.blogspot.hk/2014/05/blog-post_8.html
係就係好繁複, 因為要先將龍蝦起肉, 再用蝦殼去淆個龍蝦汁,
但咁樣整, 個龍蝦汁真係超超超好味呀!!! 再用嚟整意大利飯, 真係好食到冇得彈!!
龍蝦肉同帆立貝就另外煎香再上碟, 咁樣整原來好好食, 好過就咁放埋落去D 飯度整熟~

我對波比先生說: 有得食就好食喇你!
生完之後, 我相信真係好難有時間整呢D 手工菜色啦.........

[小豬嘜] 35 w 3d: 第一次的腳腫 x 洗奶樽

今朝起身, 執執吓嘢望到自己對腳, OMG! 點解會咁腫嘅?
這就是後期懷孕的腳腫吧, 可能尋日大半日都坐, 又飲得唔夠水.......
當 BB 愈來愈大時, 壓住了將血液回流到心臟的大靜脈, 帶不到水份走, 手手腳腳就會腫了!
係呀, 水腫其實唔係應該飲少啲水, 相反應該飲多D 水添, 仲有要活動多D

於是, 黃昏時就喺元朗行咗足足兩粒鐘, 辛苦史我了!
而家個肚大又墜, 真係唔行得耐呀.......
返到屋企再按吓腳, 晚上已消腫了~
都係返工會好D, 起碼唔會成日都坐, 半日會行吓健康好多!



今日繼續努力, 所有 0-3 months 的衣物被仔都洗摺好了!
滿滿的塞滿了兩個大櫃桶, 見到就開心!



仲有洗奶樽同奶泵的配件, 逐件洗, 要沖好多摔好耐先安心, 洗了足足半個鐘,
洗完就用蒸氣再消毒, 又要再晾乾同砌好同入箱, 真係好花時間呀!!!
好彩之後有陪月有鐘點姨姨幫我做, 否則真係好唔得閒!!