[愛烘焙] 愈來愈好吃的免搓麵包

之前有一篇介紹過一個免搓麵包食譜, http://startat712.blogspot.hk/2013/09/blog-post.html
今次減糖減油去造, 原來一樣咁好食, 又可以健康D!
星期二晚, 整了麵糰, 把四分之一留在一膠盒內,
星期三一朝起身, 用其餘的四分之三麵糰, 焗了一批提子合桃麵包, 鬆鬆軟軟, 發得剛剛好!! 夠吃兩天~



今日放假, 從雪櫃拎返嗰四分一的麵糰出來,
在濕暖的環境從新發酵了一個鐘, 變大了足足兩倍, 估唔到D 酵母仔的生命力咁強! 可能是白神酵母的關係?
然後, 焗成了一大條外脆內軟的麥包



今日的麵包, 質感同前天的完全不同,
前天的是有筋性的港式包, 今天的是很有彈力有嚼勁的西式包, 哈哈, 很有趣~
兩天都最開心的, 是一早有熱辣辣, 軟綿綿的包包, 十分幸福的感覺~

中秋節快樂

中秋節, 本來約了朋友過, 點知朋友早放時間唔啱, 取消了~
最後剩下我同波比先生二人世界, 唔想迫但又想玩燈籠賞月, 於是選了去沙田~

波比提議去麗豪酒店的 Avanti Pizzeria, 訂了位, 很好的環境, 落地玻璃還看得見窗外的沙田河畔,
點了一個 pizza set , 有一個自助沙律包埋, 但係實在有點小家, 講到明唔可以分嚟食, 如果分嚟食就要俾多一位 $98!
其實也是粟米青瓜之類, 值什麼 $98 呀????

不過其他食品的確有水準, 跟湯的麵包條, 又脆又滿是香草味,
個什菌雞肉意大利飯整得好好啊!
個汁好好味, 而且是意想不到的大碟 (通常 risotto 都是小小的一碟), 波比先生好鍾意~



個海陸 pizza 是傳說中的正, 個餅底又薄又脆, 好多芝士, 而且D 芝士是會不停拉出一絲絲的, 勁呀!!



之後, 就帶埋小熊貓燈籠行行城門河~
燈籠仔係尋日趕去買的, 還買了一個小白兔燈籠, 送俾一個醫院的大 BB, 希望佢中秋節有燈籠仔陪, 過得平安快樂~

我們沿城門河向馬鞍山方向行, 提著燈籠, 寧寧靜靜, 吹吹秋風,  十分寫意~



行到污水廠折返, 沿路有光得像大燈的月亮相陪



城門河的夜景, 真的很美~~
不過選了的路程比我們想像中的長, 行了兩小時共 7 公里 *o*
行到我中途好眼瞓...... 然後, 一上巴士就抱頭大睡了.........
祝大家呢幾日都有個開心愉快的假期~ :D

[愛住家菜] 印尼咖哩魚柳

醫院最忙的日子過去了, 希望可以煮多D 飯,
望著雪櫃內廿多種的調味料, 決定今晚煮咖哩, 用的是師妹去旅行時買給我的印尼咖哩粉~

魚柳先沾蛋漿生粉煎香,
咖哩粉同椰漿同煮, 加入其他調味, 仲有紅椒同素雞,
最後再放入魚柳, 兜兩兜就完成了!
其實我都好鍾意東南亞菜, 因為煮得好的地方, 都會用上很多不同的香料,
煮一個菜, 就是用上十多種的調味, 那複雜的味道, 不是一包李錦記咖哩汁可代替~



尋日就整了鵝肝小牛排炒飯, 吉之島有時有D 小牛排唔錯o架, $80-100 一盒, 充滿油花,
就咁煎一煎落少少鹽已經好一流!

[愛美食] 鼎泰豐 x 元朗的土耳其菜

上星期有一日, 約了波比姨丈, 送D 親手做的月餅俾佢,
連埋表妹四個人去了尖咀食鼎泰豐, 食物的質素仍然非常之好, 服務又好, 不過係D 食物好細碟, 叫了好多都唔夠飽.....



於是飯後轉戰地庫 food court 的甜品, 叫了個台式冰冰, 估唔到 $30 質素又非常之唔錯喎!
好多豆同芋頭, 正呀!!!



星期五那天, 冇煮飯, happy Friday!
波比建議去食有家新開了一段日子, 我哋都未試過的土耳其菜, 嘩, 真係幾正喎, 唔怪之得咁多人啦!
個羊膝好嫩呀, 又有好濃的香料味, 讚呀!



咖哩都幾辣, D 牛肉炆得好夠林, naan bread 即叫即烘, 脆脆又暖暖的, 超好吃!
絕對值得再幫襯!

[愛行山] 藍天白雲 26km

踏入九月, 毅行隊伍的訓練愈見落力,
今日就要行麥徑一二三段, 共 35km,
波比先生跑步班完結後, 都可以陪我行山了, 不過我哋今日目標是盡速完成一二段, 之後去西貢市中心食菠蘿包,
話說一年前的9月15日, 我們行同樣的路段, 以為好快行完, 點知成4點幾先行完,
中途冇食過飯, 一心諗住去西貢食菠蘿包啦, 點知.......
因為去到已太晏, 賣晒, @o@
當時波比先生真係欲哭無淚......
所以, 今年的偉大目標, 就係有菠蘿包食!!!!

我們瞧著菠蘿包進發, 其實麥一真係好好行, 石屎路, 又有廣闊的風景



很快已進入長長的堤壩了



嘩, 好好的天氣!!!!



久違了的藍天白雲青山綠水啊!!
今個夏天行咗幾次山, 次次都落雨, 終於有一次好好天了, 好感動!!!





靚到好似幅畫咁~



過完壩, 小上山, 見到好多牛牛呀



我超愛呢張相呢!! 又要讚一讚部 SONY TX30 真係好好用!!!



1hr40min, 到了破邊洲的亭子, 波比先生從袋裡掏出四條喺 759 買的日本蟹柳, 分俾大家食, 好正呀!!!





食完嘢就上山了 開始好曬!!





要爬 312米, 努力!



見到咁多個島, 好正呀!!!!



不知不覺, 已行到西灣, 之前報紙賣嗰幾間士多被告無牌經營, 要佢哋結業,
所以大家預咗去到冇嘢食先, 點知, 去到竟然有開喎, 開心地整返兩碗豆腐花先!

其實, 佢哋營業多年, 又唔阻到人, 又為行山玩水人士提供中途補給, 點解唔俾條生路人行??
不少行山人仕, 練山會一次過行晒麥徑一二三段, 成35km, 就算今日我哋已盡量孭多D 水,
但天氣酷熱, 35km 冇補給真係好難捱, 要自己孭 4-5L 水先夠,
我行一二段, 都孭咗2L 有多, 都真係唔夠, 唔係喺度買咗兩支嘢飲, 應該死咗,
希望政府可以手下留情啦~ 叫食環處去冚d 阻街嘅大排檔, 又唔見咁勤力喎, 生果日報日日賣佢哋都唔做嘢!



食完再起行, 見到好清的海水, 好靚!!

然後是較艱辛的長途戰, 師妹心急如焚, 因為佢其實下午要返學,
本想一點到完, 點知其實冇咩可能, 我哋已經行得好快, 又唔停低, 但仲有 10KM 要行,
感覺就是行極都未到..... 好遠好遠...... 見到時間過, 又是更心急~
行行吓, 可能今日行得太快, 又抽筋, 不過是小抽, 我又早有準備帶了支 SPRAY, 所以都安然地行得晒!

最後, 2:48PM 行完二段, 收工了! YEAH!



離開, 要搭 94巴士去西貢市, 非常感恩, 好快有車 (有時要等半個鐘頭先一班!)
去到西貢市, 去了運動場沖咗個涼, 超超超舒服呀!!!!! 未沖之前, 真係發出惡臭, 連自己都頂自己唔順......

第一站, 當然是去食菠蘿包同葡撻, 一次過買了三個, 乜都抵返!!!



第二站是為了醫肚的車仔麵, 都好好味!



行了一陣海邊, 唔知點解, 今日的西貢好少人, 好奇怪~
以前擠得水洩不通的感覺沒有了, 菠蘿包亦竟然唔洗排長龍, 仲要有位坐得慢慢食??!!

第三站, 去了波比指定要去的 cafe - Colour Brown
呢度真係好 pro 呀, 有一邊是賣豆的, 仲有烘焙機即買即炒, 喺香港實在少見!

Cafe 那邊, 好多人, 個個都係坐好耐唔願走的, 等了 40 分鐘先有位!!!
點了冰滴咖啡同凍咖啡, 啲豆可能新鮮, D 咖啡又香又濃, 又飲到果香, 真係全港至正呀!!!
豆腐芝士蛋糕都很出色, 很 creamy 又香豆味



最後, 波比忍唔住再點多杯Blue Mountain, 正到冇朋友~
圓滿結束了今日的旅 :)

[愛美食] Lam Tei Grill

哈哈, 成個星期冇 update, 冇計, 返工真係好忙........ 要用忙到史來形容,
過了今個星期, 應該一切都好了, 最大單的 project 終於都完了, 可喜可賀!!

寫埋上星期日, 整餅 gathering 後我們一齊去了 Lam Tei Grill 食飯
去過藍地的總店兩次, 印象都非常之好, 知道佢喺元朗開了分店, 一路都好想試試,
有次星期六中午特登行過去, 點知...... 佢原來冇做午市!!!
唔係化, 做食肆都可以做到咁寸?!

一行八個人, 一張長枱, 柔和的燈光, 非常優雅的環境,
元朗區又多間又靚, 食物又好, 服務又好的餐廳, 實在太好了~

鵝肝煎得好唔錯, 外脆內軟, 只是 risotto 的份量太少了, 怎夠八個人分....



豬手是這裡的招牌菜, 又嫩, 甜甜地又好味!



豬鞍就係食過唔錯, 所以今晚又 encore, 肉質很鮮嫩, 不似在吃豬肉



其實的也十分不錯~



我們整月餅, 食埋飯, 已經唔早了, 沒有時間一齊去公園玩燈籠添~

[愛烘焙] 私人教授 - 脆皮及冰皮月餅班

今日相約了六個同事仔到我家, 教大家整月餅,
為了今天, 忙了整整一天的準備工夫,
先是煮綠豆蓉, 部分又加入朱古力成了朱古力餡,
再煮紅豆蓉, 太愛自己煮有一粒粒紅豆的感覺,
再煮奶皇, 可惜份量似乎有點出錯, 煮完似 puree, 唔夠實......
另外仲買了芒果蓉~



來到先教大家整脆皮的皮, 雪凍的時候, 就整冰皮的皮, 要拎去蒸,
此時又去返整脆皮月餅, 先用了豬仔模, 但焗完....... D 奶皇餡溶得太緊要.....全部都瀉晒落嚟, 一齊食咗去吧......
樣衰衰, 但味道是十分的好! 仲要鬆鬆的脆皮, 其實真係好好食!



第二批用花花模, 紋理清楚靚好多! 大家都整得唔錯喎!



第二批焗好了, 冇用奶皇用返其他餡, 個個都好靚了!!!



有整開嘢食的師妹, 造出來的果然係靚D!



玩完脆皮就玩冰皮, 其實冰皮仲易, 皮包餡再塞入模一壓就係~
我在廚櫃搵到兩個從日本買回來的公仔烚蛋模, 就拎埋出嚟用, 估唔到好得喎,
級了一隻又一隻的小白兔同熊仔, soooooooo cute!!!!
其實我都係第一次整冰皮月餅, 估唔到咁成功呀, 個皮超好食, 好香椰汁味, yummy!!

[愛跑步] 完結即是開始

長跑訓練班去到最後一堂, 其實我只上了一半, 但波比很有恆心, 風雨不改的上了九堂

波比先生很開心, 因為佢又識到一班熱愛跑步的朋友,
雖然跑步班完了, 但同同學仔開了 whatsapp group, 仲可以約埋一齊去跑步

於是約了星期日一早就去跑步, 一行有十幾人, 由運動場出發, 跑去博愛醫院再去錦上路方向,
呢條路線都唔錯喎, 跑了入去村的一邊, 冇人冇車, 空氣好好多~
初頭的幾公里都仲跟到, 一班人練跑, 就好似跑比賽咁, 唔懶得, 死都要跟住去,
如果我哋兩個人練, 一辛苦D 我就肯定已停低抖抖了!

不過三十幾度, 過了博愛又要上斜, 開始跟唔到了~
跟大隊折返後, 開始愈來愈慢, 愈來愈跟唔上, 跑友都太犀利喇!!!
於是, 我跑到博愛就自己返了屋企, 哈哈~

對波比來說, 有跑友一齊練習應該是好事, 因為要同強過自己的人練習, 才會有更多的進步,
而且長跑教練都係一齊跑, 多點指導一定是是好事~
波比滿腔熱誠, 希望今年的比賽又有佳績啦!

[愛美食] 老點

星期四, 去了 QE 上堂, 五點就放 :P

於是上了二德惠掃貨, 好多人呀!!!
星期日約了同事仔上我家, 我教大家整月餅, 所以要先去買定材料喇~
呢度有好多不同味道的月餅餡, 連蜜瓜、榴槤、芋頭都有, 但係我想話, 呢D 餡料都好唔健康,
入面加了大量人造色素、調味同埋糖, 我常常話芋頭整出嚟的芋蓉, 根本不應是紫色, 是灰色,
粟子蓉也不是啡色, 應該是深黃色的~

所以, 除了同事指定的芒果蓉我買了之外, 其實的餡也打算自己整好了!



等埋波比放工, 去了旺角一間叫「老點」的點心專賣店食晚餐
呢度的點心都好好食呀, 小本經營, 用心即作, 全部都即叫即蒸熱辣辣, 值得再來~






之後再去 Spade 食 Honey Toast, 沒叫最大的的款式, 淺嚐一下也很不錯~

[愛烘焙] 朱古力麻糬波波

明天開 team meeting, 想整點小食給大家,
曲奇整過, 蛋糕整過....... 諗諗吓, 不如整麻糬?

上網 search 吓食譜, 唔同的網站同 blogger , 都係用同一食譜,
有時睇D 烹飪 blog 總覺得好有趣, 將人哋的食譜抄吓抄吓, 改少少食材的份量, 就當是自己的食譜,
有D 人仲出書添, well..........

我跟肥丁的食譜去做, 將芝士的份量換了做黑朱古力
不過出來的效果, 古力味不夠濃, 下次試試加點可可粉先得~
多謝同事的厚愛, 大家都很喜歡啊! :)